Nonoli 23 - Nouveau Testament bété de Gagnoa

Pɔle -ko 'gbobhlenyɔ 'yliku

¹ Pɔle 'wolo "ɛ -zejilɛ -wɛ "ku -vlee, "ne 'ɔ yi -lɔ no nɛɛ: «"Nowlia 'wanye, 'e -su 'ayi 'dlezɔ 'foo "ku Lagɔ 'yliku -kaa -zeka.»

² Lɔbhɔ 'ye bɔbɔnyɔ "yitɔ Ananiase bhulɛle -lɔ 'nyakpa -wa -ko 'ɛ Pɔle yɔko -wɛ nɛɛ: «'A "pɔ 'ɔnɛɛ -gbogbo -wɛ 'kwlɛ!»

³ "Ne Pɔle yi -lɔ no nɛɛ: «-Eyi 'ye Lagɔ "kɛ -lɔ lɔbhɔ, 'nyɔkpɔ -gbeyi -lɛ, -e -gli -gbɔglo "me, "ne -e -bhlele -ame -Lɔ 'na -se 'ɛ lɛ -wɛ 'na 'gbo, "ne -e bhulɛloa 'lelee -lɔ -gbɔ 'wa lɔbhɔ -ame, 'ɛ -Lɔ lɛ bhɔ 'ɛ -soɔ 'a?»

⁴ "Ne "ɛ 'nyakpa -wa -ko 'ɛ Pɔle yɔko -wɛ yu -lɔ bhulɛle nɛɛ: «-Soɔ -ye -e 'yli bhɔ 'ɛ bɔbɔnyɔ "yitɔ -a!»

⁵ "Ne Pɔle yua -lɔ bhulɛle nɛɛ: «"Nowlia 'wanye, 'e "ne 'se 'sɛ -yi -se 'ɔ -noɔ bɔbɔnyɔ "yitɔ yɔ. -Mɔ, 'ɛ -kɛle Lagɔ-bɔgo "me nɛɛ: Te 'ce 'neɛ -gligbɛnya 'na "cifi 'yli.»

⁶ -Mɔ, Pɔle -yi -sɛ nɛɛ: -Wa -ko yɔko -wɛ 'na -bedia -noɔ Saduseɛnya 'waa, "ne -bedia -noɔ Faliziɛnya 'waa, 'ɛnɛɛ za, "ne 'ɔ yi -lɔ "me "kpaa "yitɛ "ku 'wayi 'yliku, 'ɔ nɛɛ: «"Nowlia 'wanye, Faliziɛyu 'ye 'e -noɔ -lɔ, "ne 'e -noɔ 'le -lɔ Faliziɛnyɔ 'na yu yɔ; Zaa, -a 'to 'wɔ 'na 'dlekukɛlesɛ -wɛ 'ye "tɛle -me -lɔ 'dle nɛɛ: 'Nyɔkpɔ "kɛ -ku, 'ɔyi gluzɔ 'wlo 'ɛnɛɛ 'ylime za 'wa -nɛme -lɔ -ame -zejilɛ "ku.»

⁷ -Sɔɔdɛku 'ɛ Pɔle -le bhulɛ dɛku -wɛ, "ne Faliziɛnya -nyɛ Saduseɛnya "bhaa yi -lɔ weli "ku 'pepelia, "ne -zejilɛ yi -lɔ "me -dliɔ -zakpɛ "sɔ "ku.

⁸ "Ne Saduseɛnya yi -lɔ no nɛɛ: «'Gluzɔwloɛ "ne -le, "ne "nɔgɔzilɔ -nyɛ Zuzu "bhaa "ne -le.» -Mɔ, Faliziɛnya nɛɛ gluzɔwloɛ -le.

⁹ 'Doɔ 'wanɛɛ gbo 'bhale -lɔ. "Ne -Lɔsloanya 'na -wa -ko "me 'ɛ Faliziɛnya 'na -zakpɛ "me -wɛ yi -lɔ "me "kpaa "yitɛ "ku nɛɛ: «'Zagbɔ "ɛ 'nyɔkpɔ ne, "ne "nyɛnye no- -mɔ, zuzu -nyɛ "nɔgɔzilɔ "bhaa bhulɛlo- -lalɛce .»

¹⁰ "Ne 'wanɛɛ 'gbonoɛ yi -lɔ "me "tamale, lɔbhɔ 'ye 'Kamalenyɔ "yitɔ -nyanɔ 'lɔbhɔlo- -lɔ -gbɔ 'wa 'to -kɛ "me 'didile, "ne ɔ yi -lɔ "slojanya bhulɛle -gbɔ 'wa -sɛ Pɔle gbobhlebhudu "me, -see -wa 'kɔmo "slojanya na bhudu "yitɛ "me.

¹¹ "Ne -zle 'na -vinɛ yi -lɔ 'ze, 'ɛ -sabo "me 'ye Anyinɛnyɔ -tuɔ -lɔ 'ɔyi Pɔle 'ylime, "ne 'ɔ yu -lɔ bhulɛle nɛɛ: «'Neɛ 'kwɛme "tamale -kɛ -klekle! 'Neɛ 'de 'ye 'e "bhaa -lɔ Zeluzalɛme -sɛle -ka, zaa, 'e 'yɔbhɔ -gbɔ me Wlɔmo -se 'e "kɛ -kɛ 'lelee "bhle 'ce 'ɛ 'de ne -sɛle -me.»

Zufonya "zo Pɔle 'na 'de -se 'wa "kɔ lɔbhɔ 'ɔ "kɛ "ku

¹² "Ne -zle yi -lɔ 'ze. "Ne Zufonya 'na -bedia yi -lɔ 'wli "zo, "ne 'wa yi -lɔ zligbɔ nɛɛ: -A -ka -li 'na -kaa 'nɔmɔ, -a -mana Pɔle lɔbhɔ "bhuɔ ne.

¹³ 'Wa yi 'awɔ 'nyakpa 'na 'glo "sɔ yɔko "me "ple, 'ɛ -wa zligbɔ -wɛ.

¹⁴ "Ne 'wa yi -lɔ "bhle bɔbɔnya "yitia, "ne "yitia yle -ka me, ŋwɛnɛɛ: «-Sɛne 'ye -a zligbɔle- -lɔ Lagɔ 'yliku, -a nɛɛ: -A -ka -bɛɛ' li "ne -a -ka 'nɔmɔ, -a "mɔ -na Pɔle lɔbhɔ "bhuɔ ne.

¹⁵ -Dɛmeda gbobhlenya 'na yɛ "kɛ -lɔ 'anye -gwe "ku 'kwɛle Wlɔmo 'na 'kamalenyɔ 'na dɛce. -Se 'a "kɔ bhulɛle -gbɔ 'ɔ -nɛme Pɔle -dɛne 'anye 'yliku. -Se 'a "kɔ 'lelee bhulɛle -gbɔ 'a "kɛ -na Pɔle 'na weli 'ylime 'ye "bhuɔ 'tee. -Mɔ, 'ɛ kɛ -kɛ 'anye 'waa ne, -a "zo "kɛ 'ɔnɛɛ 'de "bhuɔ -gbɔ -a yu lɔbhɔ.»

¹⁶ Lɔbhɔ 'ye Pɔle 'ɔ "nɔyɔ 'na yu "nole -lɔ 'ɛ weli -wɛ "me, "ne 'ɔ yi -lɔ "ɛ Pɔle bhulɛle -ka me "slojanya 'na -bhudu "yitɛ -wɛ "me.

¹⁷ "Ne Pɔle yi -lɔ "slojayu la, "ne 'ɔ yu -lɔ bhulɛle nɛɛ: «'Kwɛle- 'teyigbɔ ne -gwe "ku "slojanya 'na 'kamalenyɔ 'na dɛce, -mɔ, weli -ko "me za 'ɔ "kɔ bhulɛle.»

¹⁸ "Ne 'ɛ "slojayu yu -lɔ -gwe "ku 'kwɛle, "ne 'ɔ yu -lɔ 'ɛ 'kamalenyɔ "yitɛ "kɔ 'je! 'Ɔ nɛɛ: «-Jiɛnyɔ Pɔle 'lebhe -lɔ -ame -gbɔ 'e -nɛme -eyi 'ɛ 'teyigbɔ ne, -mɔ, weli -ko "me zɔ 'cɛ -eyi bhulɛle.»

¹⁹ Lɔbhɔ 'ye "slojanya na 'kamalenyɔ 'na "cifi 'sale -lɔ 'ɛ 'teyigbɔ -wɛ sɔ, "ne 'ɔ -nyɔ "bhaa 'wa yi -lɔ zigbale-, "ne 'ɔ yu -lɔ lo 'yɔbhɔ nɛɛ: «-Ye -e "kɛ bhɔ -ame bhulɛle 'a?»

²⁰ "Ne 'ɛ 'teyigbɔ -wɛ yi -lɔ no nɛɛ: «Zufonya 'na yɛ "zo -kɛ 'de -gbɔ 'wa yi "kɛ -yi, -see 'wa "kɛ -eyi bhulɛle -se -e "kɛ 'zegbɛ Pɔle gbobhle-zejilɛ "ku kɔme, -see 'wa "kɔ -kɛ lo 'yɔbhɔ 'ɔnɛɛ weli "kɛ -kɛ -gbaa "me -ko zɛ.»

²¹ Zaa, 'toa "kɛ 'dleku -kɛle, -mɔ, 'nyakpa 'na 'glo "sɔ -ko -kɛ -gwe "ku -wa zligbɔle -kɛ Lagɔ "ku nɛɛ: «'Wa -ka li, 'wa -ka "nɔmɔ Pɔle -namlɛ "ku; 'Wa 'di- kɛ weli 'wli "ku "bhuɔ, -neɛ' "kuŋunuɛ 'wa -wo -kɛ -da -lɔ.»

²² "Ne 'ɛ "slojanya 'na 'kamalenyɔ "yitɔ -wɛ yi -lɔ 'ɛ 'teyigbɔ bhulɛle nɛɛ: «'Ɛ -ye -e bhulɛle -ame ne, -gbaa kɛ -neɛ' nuɛ -gwe "ku, -se 'e te -kɛ 'nyɔkpɔ 'na -vinɔ -sɛle.» "Ne 'ɔ yu -lɔ 'yi 'tale "ne 'ɔ yi -lɔ me.

'Wa -kɔme- Pɔle 'Kamalenyɔ "yitɔ Felise 'na sueme Sezale -du "me

²³ "Ne "slojanya 'na "cifi yi -lɔ 'ɔnɛɛ "slojanya "sɔ la, "ne 'ɔ yua -lɔ bhulɛle nɛɛ: «'A 'nyenyia -se 'a -kɛ Sezale -du "me -sabo ne "me me, zaa, 'a "zo "slojanya 'na glo 'umgbu 'na -zakpɛ "sɔ 'wli, "ne 'nyakpa 'na -wa ko -soko "klo -wɛ 'na 'glo ta yɛ -kogbɔ, "ne "slojanya 'na -wa -sɛle 'wayi "ku "klee -wɛ 'na glo 'umgbu 'na -zakpɛ "sɔ.

²⁴ 'A -sɛ me- "kɛ lɔbhɔ -sokofania 'na -wa "kɛ Pɔle -gwe "ku 'kwɛle -bɛɛ' 'too -kɛ -gwe "ku ylele, "ne 'ɔ "kɛ 'Kamalenyɔ "yitɔ Felise 'yliku ylɛ -wɛ -siɛ.»

²⁵ "Ne 'ɛ "slojanya 'na "cifi yi -lɔ "bɔgo kɛle, 'ɔ nɛɛ:

²⁶ «Klode Liziase, 'e bhɛle -kɛ -a 'to 'Kamalenyɔ "yitɔ Felise.

²⁷ 'Nyɔkpɔ 'ye 'wa -nɛme -kɛ -eyi -wɛ, zufonya nɛɛ: 'Wa "kɔ lɔbhɔ -se 'ɔ "kɛ "ku, "ne -neɛ' "slojanya "bhaa -a yi -lɔ lɔbhɔ ylɛ "ne -a yua -lɔ kɔ -sɛ. "Naa-, -a 'no "me -gbɔ Wlɔmo -du "me 'na 'nyɔkpɔ yɔ -lɔ zɛ.

²⁸ -Ame, 'e 'yɔbhɔ nɛ -gbɔ 'e "kɛ sɛ yibhlele- sɔɔbɛɛza "ɛ Zufonya 'na -bedia 'gblu gbo 'wlime -wɛ, 'ɛza 'e lubhi -lɔ "ku, "ne 'e yu -lɔ 'wanɛɛ gbobhle-zejilɛ "ku kɔme.

²⁹ 'E -gɛyli -gbɔ 'wa -nyɛ Pɔle "bhaa 'wanɛɛ -Lɔ 'na weli -ye 'wa 'pepelia -lɔ "ku, 'ɛza 'wa 'gbli -lɔ gbo 'wlime, -mɔ, gbo 'na 'ɛ -kɔ -jiɛ "me "pɔ, "ne 'ɛ "kɔ lɔbhɔ "ne 'ɔ "kɛ "ku yɛ "ne -noɔ.

³⁰ -Mɔ, 'wa bhulɛle -ame -gbɔ 'ɛ zufonya -wɛ yu kɛ -gbotu -ci. 'Ɛza 'e -nɛme -lɔ -eyi "ɛ 'nyɔkpɔ ne cuu. "Ne -e yi -lɔ 'ɛ -wa 'gblu gbo 'wlime -wɛ bhulɛle -gbɔ 'wa me -neɛ' doɔ. 'Ye 'e "kɛ nɛ bhulɛle -wɛ -lɔ gou.»

³¹ "Ne "slojanya yi -lɔ 'ɛ 'kamalenyɔ 'na 'ye 'ɔ bhulɛloa -wɛ -no, "ne 'wa yi -lɔ 'ɛ Pɔle "ku 'libhi 'ɛ -sabo -wɛ "me, "ne 'wa yu -lɔ 'ɛ Atipatlise -du "me -kɔme.

³² Zle 'na -vinɛ 'ze, "ne 'ɛ "slojanya yi -lɔ 'wanɛɛ "slojanya 'na -bhudu "yitɛ -wɛ "me 'wlizɔ -zi, "ne 'wa yi -lɔ "ɛ 'nyakpa -wa 'gli -soko "klo -wɛ yɔko "bhaa "ne 'wa me -lɔ 'yiɛ.

³³ 'Ɛ -sokoakloglinya -wɛ 'wɔ ylɛ lɛ Sezale ne, "ne -wa -su 'ɛ -sokoa -wɛ yi -lɔ "bhle "bɔgo -sɛ, "ne 'wa yi -lɔ Pɔle 'na "bɔgo 'Kamalenyɔ "yitɔ Felise kɔ 'je, "ne 'wa yu -lɔ Pɔle kɔ 'je -me.

³⁴ 'Kamalenyɔ "yitɔ -zɛle 'ɛ "bɔgo "me, "ne ɔ yi -lɔ Pɔle lo 'yɔbhɔ nɛɛ: «"Mɔ 'na 'nyɔkpɔ 'ye -noɔ bhɔ?» Pɔle nɛɛ: «Silisi 'na 'nyɔkpɔ 'ye 'e -noɔ -lɔ.»

³⁵ "Ne 'ɛ 'Kamalenyɔ "yitɔ yu -lɔ bhulɛle nɛɛ: «Zle -neɛ' gbo 'wlimegblinya kɛ 'ce -yi, 'ye 'e "kɛ 'ce -lɔ -eyi lo 'yɔbhɔ.» "Ne 'ɔ yi -lɔ no -gbɔ 'wa kɔme Pɔle -klɔgbɔnyɔ Elode "yitɔ 'na -bhudu -wɛ "me.