Nonoli 22 - Nouveau Testament bété de Gagnoa

¹ «"Nowlia 'wanye, To 'wanye, 'a 'fo -ye 'e "kɛ -dɛme 'anye bhulɛle "ne -ɛ -ka -ame gbo -sɛ ne 'yukwli.»

² -Mɔ, Pɔle 'na 'ye 'ɔ bhulɛle Eble -gbo "me -wɛ 'wa "no lɛ "me ne, "ne 'wa yi -lɔ "ku 'tli- -vlee. Pɔle nɛɛ:

³ «-Ame zufonyɔ 'ye 'e -noɔ -lɔ, "ne 'wa 'gwɛlele- -lɔ -ame Talese Silisi 'na 'du -bholo "ku. -Mɔ, mɛne Zeluzalɛme -du ne "me 'ye 'bhoɔle- 'lelee -lɔ, 'neɛ -sloanyɔ 'pa- -lɔ Gamaliɛle. -See 'wa "kɛ 'awɔ -a To 'wɔ 'na -Lɔ kɔ -kɛle -kpee -wɛ 'ye 'ɔ -sloa -lɔ -ame, "ne 'e yi -lɔ Lagɔ na weli "me zɛkɛle- gou, -se 'a -ko -zeka 'anyɛɛ soɔ -wɛ.

⁴ 'E 'gbapea- 'awɔ Zezu Kli 'na gɛlenya "ne 'wa "ku, 'e -saa 'widia "ne 'ŋwenea "ne 'poa -jiɛ "me.

⁵ Bɔbɔnyɔ "yitɔ -nyɛ -Gligbɛyitia "bhaa 'ye me 'ɛnɛɛ 'dɛ, "naa-, 'wa 'jea -lɔ -ame "bɔgo kɔ -gbɔ 'e kɔme -a "nowlia -wa -ko Damase -du "me-wɛ. Zaa, 'e kɛ "bhle -me ne, "ne "kɛ -lɔ 'klecɛnya "sa, "ne 'e "koa -lɔ Zeluzalɛme -nɛme, "ne 'e "koa -lɔ -jiɛ "me 'pɔ.»

Pɔle -sɛ -see 'ɔ "zo- 'klecɛ -wɛ 'na 'de

⁶ «'E -ko 'awɔ -gwe "ku 'e "ne 'awɔ -la Damase 'dɛ 'tlole-, "ɛ 'doɔ, 'ylokwɛ -zɛle "me "ne zle 'na "yitɛ yi -lɔ "nɔgɔ "me 'bhale "ne -ɛ yi -lɔ -ame bli-.

⁷ "Ne yi -lɔ dodo "ku zɔ bhli "ne 'e yi -lɔ weli "me 'no, 'ɛ nɛɛ: Sɔle, Sɔle sɔɔbɛɛza -e 'gbapea bhɔ -ame 'a?

⁸ "Ne 'e yi -lɔ no nɛɛ: -Ye -e -noɔ bhɔ Anyinɛnyɔ? "Ne "ɛ weli -wɛ yi -lɔ "kusɔ gbo 'dile, 'ɛ nɛɛ: -Ame Nazalɛte 'na Zezu -ye -e ziɛ -nyɛze -wɛ yɔ -lɔ.

⁹ 'Neɛ gɛlenya -nyɔ 'wɔ "bhaa -a 'nɔŋo -wɛ 'ye me 'awɔ 'ɛ zle -wɛ 'ylime, -mɔ 'wa "ne 'awɔ -la bhulɛweli -wɛ "me 'no-.

¹⁰ Lɔbhɔ 'ye 'e 'yɔbhɔ- -lɔ lo nɛɛ: 'Ye 'e "kɛ bhɔ no 'a Anyinɛnyɔ? "Ne 'ɔ yi -lɔ -ame bhulɛle nɛɛ: -Sɔ "ku -se me Damase, "bhle 'ce, 'wa yi -eyi 'ye 'e "kɛ no 'klekle -wɛ -sloa.

¹¹ -Mɔ, "ɛ zle -wɛ -nyimɔ -ame 'yli "ku "ne 'neɛ 'yli yi -lɔ 'wlɔ, lɔbhɔ -wa -gɛle -ame -wɛ -sale -lɔ -ame sɔ, "ne 'wa yi -lɔ -ame Damase kɔme-.

¹² 'Nyɔkpɔ -bholo -ko 'awɔ "bhle, 'ɔyi 'wa la 'awɔ -lɔ Ananiase -ɔ -kɛ Lagɔ 'dleku, "ne 'ɔ -kɛ "me 'lelee Moyize 'na -Lɔ 'dleku, Zufonya 'klekle sɛ 'awɔ 'ɔnɛɛ 'de 'na -namanɔ.

¹³ "Ne "ɛ Ananiase yi -lɔ -ame 'ylime 'ye -ka yi, "ne 'ɔ yi -lɔ -ame yɔko 'nyiɔ, "ne 'ɔ yi -lɔ -ame bhulɛle nɛɛ: -Ame "nɔwli Sɔle 'lea- 'yli! "Ɛ -gbabhuɔ -bhele ne "me, "ne 'neɛ 'yli yi -lɔ le "ne yu -lɔ 'yli "me 'ye.

¹⁴ "Ne 'ɔ yi -lɔ -ame bhulɛle nɛɛ: -A To 'wɔ 'na Lagɔ -sɛ -lɔ lɔbhɔ 'ɛyi "klee, -se -e "kɛ 'ɔnɛɛ 'ye 'ɔ 'yɔbhɔ -wɛ yibhlele-, -se -e "kɛ -ɔ ŋwinɛle- "me -wɛ 'ylime 'ye, -se -e "kɛ 'ɔnɛɛ weli "me 'no.

¹⁵ -E "kɛ 'ce 'ɔnɛɛ 'ɔyeɛdɛ "zo -glɔnya 'yliku, -se -e "kɛ -ye -e 'ye- 'ylime "ne -ye -e 'no- "me -wɛ 'na 'de -sɛ.

¹⁶ Sɔɔbɛɛza -e 'boɔ bhɔ? -A me! -Se -e "kɛ batɛme yle, -see -neɛ' 'nyinyonoli 'na 'gbo "kɛ "ku 'titliɔ- Anyinɛnyɔ Zezu 'na 'tɔ "me.

¹⁷ 'Ɛza, 'e -zi 'awɔ -lɔ Zeluzalɛme 'wlizɔ, 'yli -bholo "me, 'e -ko 'awɔ "Mebɔbɔlebhudu "me bhubhɔ dɛku, "ne Anyinɛnyɔ yi -lɔ -ame 'ylime "klo ylɛle.

¹⁸ 'E -gɔ 'yli "ne 'ɔ yi -lɔ -ame bhulɛle nɛɛ: -Sɔ "ku, 'bha Zeluzalɛme, te "kɛ 'boɔ-, sɛko -wɛ, -neɛ' 'Denaade 'ye -e -koa -sɛle 'neɛ dɛku -wɛ, 'wa -cɛ -kɛ 'yukwli 'fo.

¹⁹ "Ne -ame 'e yi -lɔ no nɛɛ: Anyinɛnyɔ, 'wa -yi -sɛ, -gbɔ 'mɔɔ me 'awɔ -lɔ "mebhubhɔlebhudu "me, -wa "kɛ -eyi 'dleku -wɛ 'kple nu sɔpɔle -ka, "ne 'e 'poa nɛ -lɔ -jiɛ "me.

²⁰ -Sɔɔdɛku 'wa 'lɔbhɔ 'awɔ Etiɛne -ɔ 'ye -me -neɛ' -li 'na dɛ -wɛ, -ame 'nabhɛ 'e -ko -me 'awɔ lɔbhɔ. 'E -nyɛ -wa 'lɔbhɔ -wɛ "bhaa 'a kole- 'awɔ -lɔ "ku zɛ. "Ne 'e 'kulɛ 'awɔ -lɔ 'wanɛɛ 'koti.

²¹ "Ne Anyinɛnyɔ yi -lɔ -ame bhulɛle nɛɛ: Me 'yuku -wa "ne "zo Lagɔ -wɛ 'na mɛce 'ye 'e 'lebhele -lɔ -eyi.»

Pɔle "ne Wlɔmo 'na "slojanya 'na "cifi

²² Zufonya 'wa 'fo nɛ Pɔle 'yukwli -wɛ yi -lɔ "me "kpa, ŋwɛnɛɛ: «'A -sɛ -se 'nyɔkpɔ -gbeyi ne -anye 'yliku -se 'ɔ "ku.»

²³ "Ne 'wa "kpa -lɔ "me 'yiɛ, 'wa 'pɔ- 'awɔ -lɔ 'wanɛɛ 'koti 'kwlɛ "me "ne 'wa 'mɛne 'awɔ -lɔ 'bhibhi "nɔgɔ "me.

²⁴ Lɔbhɔ 'ye wlomɛyu 'ɔ 'kamalea -wɛ -bhulɛloa -lɔ nɛɛ: «'A -nɔmo "slojanya 'na bhudu "yitɛ ne "me. 'A 'sɛpɔ -se 'ɔ "kɛ 'gbo 'di, -se 'ɔ "kɛ sɔɔbɛɛza 'wa "kpa "me -wɛ yibhlele-.»

²⁵ -Dee 'wa "kɛ Pɔle -duku 'piɛ -see 'wa "kɔ 'sɔpɔ -wɛ. "Ne 'ɔ yi -lɔ Wlɔmo 'na 'kamalenyɔ bhulɛle nɛɛ: «'A yi bhɔ soɔ Wlɔmo 'na 'nyɔkpɔ 'na 'ye 'a -na "klee 'gbobhlele -wɛ 'lɔbhɔ 'a?»

²⁶ "Slojayu 'no- lɛ "ɛ weli "me, "ne 'ɔ yi -lɔ "ɛ 'kamalenyɔ bhulɛle -ka me nɛɛ: «-Ye -e "kɛ nɛ bhɔ no 'a? "Ɛ 'nyɔkpɔ -wɛ, Wlɔmo 'na 'nyɔkpɔ yɔ -kɛ 'ce -lɔ 'ɛɛ!»

²⁷ "Ne "ɛ 'kamalenyɔ yi -lɔ Pɔle lo 'yɔbhɔ ka me nɛɛ: «Bhulɛle -ame -e kɛ -kɛ -diɛnadiɛ wlomɛyu yɔ? Pɔle nɛɛ: -Ɛɛ, 'ɔyi 'ye 'e -noɔ -lɔ.»

²⁸ "Ne "ɛ 'kamalenyɔ yi -lɔ no nɛɛ: «-Ame -e 'peɛle -kɛ 'dlasi -vu, "ne 'e yi -kɛ -lɔ Wlɔmo 'na 'kamalenyɔ "zo.» Pɔle nɛɛ: «-Ame wlɔmo 'ye 'wa 'gwɛle -lɔ -ame.»

²⁹ "Ɛ doɔ cuu, -wa "kɛ nɛ Pɔle -sɔpɔ -wɛ, 'yi 'wa 'talo -lɔ. -Mɔ, "ɛ "kɛ 'kamalenyɔ 'ye -nyanɔ 'lɔbhɔ -lɔ, "naa-, 'ɔ -yibhlele sɛ -gbɔ wlomɛyu 'ye 'ɔ -gwa nɛ -lɔ zɛ.

Pɔle -ko 'gbobhle-zejilɛ "ku

³⁰ Zle 'na -vinɛ -ze lɛ ne, wlɔmo 'na "slojanya 'na 'kamalenyɔ 'yɔbhɔ nɛ 'ɔ "kɛ sɛ yibhlele-, sɔɔbɛɛza 'wa 'gbli nɛ Pɔle gbo 'wlime -wɛ, "ne 'ɔ yi -lɔ bɔbɔnya "yitia "ne gbobhlenya 'klekle 'wli "zo. "Ne 'wa yi -lɔ 'nyakpa bhulɛle -gbɔ 'wa -nɛme Pɔle -zejilɛ "ku -see 'wa "kɔ 'gbobhlele.