Nonoli 21 - Nouveau Testament bété de Gagnoa

Pɔle me Zeluzalɛme

¹ -A "bhaa Efɛze "yitia yɔko bato "me "ne -a yi -lɔ Kɔse -du "me me. Zle -ze -wɛ, "ne -a yi -lɔ Wlodɛse -du -nyɛ Patala -du "bhaa "me me.

² "Ne -a yi -lɔ bato 'ɛ me Fenisi -glɔ -wɛ "me 'gblɛ. "Ne -a yi -lɔ jinyɛ "klo ylɛle, "ne -a yi -lɔ me.

³ -A "kɛ Siple -glɔ yɔko ylɛ ne, 'du -ye 'ŋu -bli -wɛ 'ye -a -ylɛle -lɔ yɔko, "ne -a yi -lɔ Sili -glɔ -ylɛle, "ne -a yi -lɔ Tile -glɔ "me 'kwlile-. "Naa-, "bhle 'wa "kɛ -lɔ "ɛ bato "me 'na -li -wɛ zɔ 'kwlialea-.

⁴ -A -sɛ lɔbhɔ 'yli -gbɔsɔ, "naa-, -a ylele lɔbhɔ gɛlenya zɛ, Zuzu Wlewle -ploa "me "ne 'wa yi -lɔ Pɔle bhulɛle -gbɔ 'ɔ 'te "kɛ Zeluzalɛme me.

⁵ "Ɛ 'yli -wɛ "ple lɛ "bhuɔ ne, me -a me -lɔ, 'wayi 'klekle -kwɛle -anye -gwe "ku, 'ŋwenea, "ne yua -ko -me -kɛ, "ne -a yi -lɔ 'ɛ 'du -wɛ "me "bhaa, "ne -a yi -lɔ jinyɛ yɔko kokomini pɔle, "ne -a yi -lɔ bhubhɔ.

⁶ "Ne -a yi -lɔ -cilɛcilɛle, "ne -a yi -lɔ bato "me 'gblɛ, "ne "kɔlepɔnya- yi -lɔ 'wlizɔ 'zi.

⁷ -Mɔ, 'ɛ "kɛ -anye 'waa, -a "bhaa Tile "ne -a yi -lɔ Petɔlemayise -du "me 'sibhɔ lɔbhɔ -ye -anyɛɛ bato 'nɛni -lɔ, "ne -a -bhɛle -a "nowlia 'wɔ "bhuɔ-wɛ, -a -soa 'yli -bholo yɔko.

⁸ Zle -ze -wɛ, "ne -a yi -lɔ me, "ne -a yi -lɔ Sezale -glɔ "me 'sibhɔ-, "ne -a yi -lɔ 'Denaade 'na -sɛnyɔ Filipo 'na sueme me, 'nyakpa -gbɔsɔ -ye 'wa -sɛ lɔbhɔ Zeluzalɛme -wɛ 'na 'glɛme 'na -bholo yɔ -lɔ.

⁹ 'Ɔ "kɛ 'ŋuyua -mɔɔnɔ -wa "ne 'widia -yi -wɛ "guɔkwɔmeŋuyua 'waa -lɔ.

¹⁰ -A 'gwlɛ 'ɛ 'du -wɛ "me Filipo yɔko, "ne Zude 'na "guɔkwɔmenyɔ -ye 'wa la Agabuse -wɛ yi -lɔ -yi.

¹¹ 'Ɔ ylele lɔbhɔ -anye, "ne 'ɔ yi -lɔ Pɔle 'na 'bɛto "ku 'libhi, "ne 'ɔ yi -lɔ 'ɔnɛɛ 'bho -nyɛ 'ɔnɛɛ sɔ "bhaa 'gbɛte, "ne 'ɔ yi -lɔ no nɛɛ: «'Ye Zuzu Wlewle bhulɛ ne lɛ, 'ɔ nɛɛ: 'Nyɔkpɔ -ɔ 'bhe- "ɛ 'bɛto ne, sɛne -ye Zufonya "kɔ -lɔ Zeluzalɛme 'gbɛtele-, "ne 'wa "kɔ -lɔ -wa "ne Lagɔ -yi -wɛ kɔ 'plele-.»

¹² "Ɛ weli -wɛ kɔ 'ye -anye "ne -a "nowlia -wa -ko "ɛ 'du -wɛ "me -wɛ 'wɔ "bhaa "ne -a yi -lɔ Pɔle bhubhɔ- nɛɛ: -Yaya te -kɛ Zeluzalɛme me.

¹³ -Mɔ, 'ɔ yua -lɔ bhulɛle nɛɛ: «sɔɔbɛɛza 'a 'tu bhɔ "ne 'a 'wlelia bhɔ -ame 'dle "me 'a? -Ame -e 'bhɛ- "me, 'ɛ "ne -kɛ no -gbɔ 'wa "kɛ -ame 'gbɛte za yɛ, -mɔ, 'ye 'e "kɛ Zeluzalɛme "kule Anyinɛnyɔ Zezu 'na 'tɔ "me -wɛ 'ye 'e sɛ -lɔ.»

¹⁴ -Ye 'ɔ bhulɛ -wɛ "me 'dleku 'za, -a "ne -la "bhle weli -kwɔ. "Ne -a yi -lɔ no- nɛɛ: «Anyinɛnyɔ 'na -see 'ɔ 'yɔbhɔ- -wɛ 'ɛ 'ko- sɔbhɔ!»

¹⁵ 'Yli yɛ 'ple-, "ne -a yi -lɔ -li 'wli -jijalea "bhuɔ, "ne -a yi -lɔ Zeluzalɛme me.

¹⁶ "Ne gɛlenya -wa -koo Sezale -wɛ yi -lɔ -anye 'beku -bhli me-, "ne 'wa yi -lɔ -anye Siple 'na Menasɔ 'na dɛce kɔme, "ne -a yi -lɔ lɔbhɔ go-, gɛlenya -gɔgɔa 'na 'glɛme 'na -bholo yɔ -lɔ.

Pɔle me- Zeluzalɛme Zake -bhɛle -ka

¹⁷ -A "kɛ Zeluzalɛme ylɛ ne, -a "nowlia 'wɔ 'sa- -anye 'ŋwɛnɛsɛ "ku 'tee.

¹⁸ Zle "kɛ 'ze ne, "ne Pɔle "bhaa -a yi -lɔ 'gɔme Zake 'na dɛce me, -dee "yitia 'klekle "zole 'awɔ 'wli -wɛ.

¹⁹ -A "koa -bhɛle "bhuɔ ne, Pɔle 'na -see Lagɔ -ylɛlo "me 'na libhɔ -ye 'ɔ no -wɛ 'na weli 'ɔ -bhulɛle -lɔ -wa "ne Lagɔ -yi -wɛ 'glɛme.

²⁰ -Wa fo Pɔle 'yukwli -wɛ 'kwa 'awɔ -lɔ Lagɔ 'ŋlu, "ne 'wa yu nɛ -lɔ bhulɛle nɛɛ: «"Nɔwli, -e 'ye 'ylime, -see -wa "tɛle Lagɔ 'dle -zu, Zufonya 'glɛme "ne 'wa -kɛ Moyize 'na -Lɔ kɔ 'tee -wɛ.

²¹ 'Ye 'nyakpa -yi -anye bhulɛle -ka -neɛ' dɛku ne lɛ, ŋwɛnɛɛ: -E -sloa Zufonya "ne -wa "ne zufonya 'waa -wɛ "ne -e bhulɛloa -lɔ -gbɔ 'wa 'bha Moyize 'na -Lɔ 'beku. "Ne -e yua bhulɛle -gbɔ 'wa 'te "kɛ -la 'wanɛɛ yua "ku 'dii, -see 'wa 'te "kɛ -la zufonya 'na -Lɔ -wɛ kɔ -kɛle.

²² 'Sɛ "kɛ bhɔ ylɛle 'a? "Naa-, 'wa yi 'ce sɛ yibhlele- -gbɔ -e -ko 'ɛ dɛ.

²³ Zaa, no -ye 'a "kɛ -eyi bhulɛle -wɛ, "ne 'nyakpa -mɔɔnɔ -wa ko -anye 'glɛme "ne 'wa "ple weli -wɛ.

²⁴ Libhua "ku, 'a me bɔbɔ -ka -se wa "kɛ 'wlele -plɛ, -se 'a 'ple 'dlasi 'wanɛɛ 'tɔ "me -see 'wa "koa 'wli 'tlu, -see 'nyakpa 'klekle "kɛ 'sɛ yibhlele- -gbɔ, -ye 'wa bhulɛ -neɛ' dɛku -wɛ, "ne -bɛɛ' "me -ko, -mɔ, -eyi 'lelee "zo me Moyize 'na -Lɔ 'plome.

²⁵ 'Ɛ kɛ -wa "ne "zo nɛ Lagɔ "ne 'wa "zo- -la 'dlekukɛlenya -wɛ 'waa ne, -a "kɛloa -anyɛɛ -ye -a bhulɛ -wɛ "ku, -a nɛɛ: 'Wa te "kɛ -nɛmɛ -ye "gbotu 'sa, "ne -ye 'wa bɔbɔle -gluzilɛ -wɛ li, -se 'a te 'ayi 'kpɛtɛkli -slu.»

²⁶ Zle "kɛ 'ze ne, Pɔle 'libhi "ɛ 'nyakpa -wɛ "ku, "ne 'wa yi -lɔ 'ɛ 'wleleplɛɛ -jajo -wɛ 'gɔme -nole, "ne 'ɔ yi -lɔ "Mebɔbɔlebhudu "me me, -se 'ɔ "kɛ 'yli 'na yɛ "kɛ "me -bhiɛ, "ne -ɔkɔkokɔko "kɛ 'ɔnɛɛ bɔbɔ -li -nɛme -wɛ 'di.

'Nyakpa "nyegbea Pɔle "Mebɔbɔlebhudu "me

²⁷ "Ɛ 'yli -gbɔsɔ -ye 'ɔ 'di- -wɛ -ko -bhiɛ dɛku, "ne Azi 'na Zufonya yi -lɔ Pɔle "ɛ "Mebɔbɔlebhudu -wɛ "me 'ylime 'yele- "ne 'wa yu -lɔ 'sa.

²⁸ 'Wa "kpa nɛ "me nɛɛ: «Izlayɛleyua 'nye, 'a yi 'se -anye "ku! -Mɔ, 'nyɔkpɔ -ɔ nyimɔ, -mee 'ɔ me 'klekle 'ɔnɛɛ sloa -sɛ "me, -anyɛɛ 'nyakpa 'klekle 'wlime, "ne 'ɔ sɛ -anyɛɛ -Lɔ 'plome, "ne bhulɛ -anyɛɛ "mebɔbɔlebhudu 'na "ku 'na weli -nyɛnye ne lɛ! 'Ɔ -nɛme glɛkenya "ɛ "Mebɔbɔlebhudu ne "me, "ne -anyɛɛ -dee -ko 'wlewle -wɛ, 'wa yi -lɔ lɔbhɔ 'fe -pla.»

²⁹ "Naa-, 'wa 'yo- 'du "yitɛ "me 'ylime, Efɛze 'na Tlofime "bhaa, 'wa -ta -gbɔ nɛɛ Pɔle -plɔ "ɛ "Mebɔbɔlebhudu -wɛ "me.

³⁰ 'Ɛza, 'ɛ 'du -wɛ "ku 'na -konya 'klekle 'sɛpɔsɛpɔle yɔko "me. "Ne 'wa yi -lɔ -zakpɛ "me 'yli. "Ne 'wa yi -lɔ Pɔle 'sa, "ne 'wa yu -lɔ -gbisi "ne 'wa yu -lɔ kɔme. "Ne 'wa yi -lɔ "ɛ "Mebɔbɔlebhudu -wɛ "gbaa cuu.

³¹ 'Wa kɔ nɛ 'lɔbhɔ "ne "slojanya 'na 'kamalenyɔ yi -lɔ "me 'no -gbɔ «Zeluzalɛme -du 'klekle -nyimɔ!»

³² "Ne 'ɔ yi -lɔ "slojanya "yitia 'wɔ 'wli "zo cuu, "ne 'wa yi -lɔ "ɛ 'nyakpa -wɛ lo mele. 'Wa "kɛ "slojanya 'na 'kamalenyɔ -nyɛ "slojanya "bhaa 'ylime 'ye ne, Pɔle 'na 'lɛbhɛlɛbhɛ 'wa 'tale -lɔ 'yi.

³³ "Slojayu "yitɔ -wɛ "kɛ lɔbhɔ 'nyiɔ ne, Pɔle 'ye 'ɔ 'sa -lɔ, "ne 'ɔ yi -lɔ no -gbɔ 'wa 'gbɛtelo 'gɔgɔ "sɔ nu, "ne 'ɔ yi -lɔ lo 'yɔbhɔ -gbɔ: «sɔɔnyɔ yɔ bhɔ? "Ne 'ye 'ɔ -no bhɔ?»

³⁴ -Mɔ, "ɛ -zakpɛ -wɛ "me, -ɔkɔkokɔko "kpa 'awɔ -se 'ɔ 'yɔbhɔ -wɛ "me, "ne 'ɔnɛɛ -ɔ -ko yɔko -wɛ "kpa 'awɔ 'ɔnɛɛ 'sɛku "me, -mɔ "ɛ -slojayu "yitɔ -wɛ, "ne 'bhɛle "ne 'ɔ -koa -sɛ ylɛle -wɛ za lo 'yɔbhɔ, 'wanɛɛ 'kple -wɛ 'na 'tɔ "me, "ne 'ɔ yua -lɔ bhulɛle -gbɔ 'wa 'kɔmo "slojanya 'na -bhudu "yitɛ -wɛ "me.

³⁵ 'Ɔ "kɛ 'wanɛɛ bhudu 'na -gbanuɔ "ku ylɛ ne, "slojayu yi -lɔ Pɔle "ku 'libhi, "ne yu -lɔ -kopi "ku 'piɛ-, "ɛ 'nyakpa -wɛ 'na 'kpokpo -li 'ye 'wa no -wɛ za.

³⁶ "Naa-, 'nyakpa 'na -zakpɛ "yitɛ -gɛlo nɛ, "ne 'wa "kpa nɛ -lɔ "me nɛɛ: «'A 'lɔbhɔ -se 'ɔ "ku!»

Pɔle -sɛ 'ɔyi gbo

³⁷ -Sɔɔdɛku 'wa -ko nɛ Pɔle "slojanya 'na bhudu "yitɛ "me -pla dɛku -wɛ, "ne 'ɔ yi -lɔ "slojayu "yitɔ bhulɛle nɛɛ: «'E 'bhɛle- bhɔ -se "kɛ gbo 'di 'a? "Ne 'ɔ yu -lɔ lo 'yɔbhɔ nɛɛ: 'E 'gbɔ bhɔ glɛke -gbo?»

³⁸ 'Ɛ "ne bhɔ -eyi Ezipte 'na 'nyɔkpɔ -mɔɔ 'libhi 'du 'wli "ku 'yli yɛ ne "me, "ne -e kɔme 'nyakpa lɔbhɔnya 'na -gɛmɛnɛ -wlulu -mɔɔnɔ 'kɔsɛku -wɛ yɔ?

³⁹ "Ne Pɔle yi -lɔ "kusɔ weli "ku 'libhile, "ne 'ɔ yi -lɔ no nɛɛ: «-Ame, Talese Silisi -du "me 'na Zufonyɔ 'ye 'e -noɔ -lɔ, 'du -ɛ me 'ŋlu 'na 'nyɔkpɔ 'ye 'e -noɔ -lɔ. 'E bhubhɔ -eyi, 'tale -ame 'yi -se 'e "kɛ 'nyakpa ne bhulɛle-!»

⁴⁰ "Ne 'ɔ yi -lɔ no -gbɔ bhulɛ. Pɔle "nyegbele 'ya, "ne 'ɔ yi -lɔ sɔ 'nu "ɛ 'nyakpa -wɛ 'yliku 'wɔkɔle-, "ne 'wa yi -lɔ "ku 'tli 'bleŋuu, "ne 'ɔ yua -lɔ Eble -gbo "me bhulɛle-.