Nonoli 20 - Nouveau Testament bété de Gagnoa

Pɔle me Glɛse "ne Masedoane

¹ -Sɔɔdɛku 'kple -kwleyi 'diɔle Efɛze "bhuɔ -wɛ, "ne Pɔle yi -lɔ gɛlenya la, -se 'ɔ "koa 'kwɛme "tamalea, "ne 'ɔ yua -lɔ 'cilɛ, 'ɔ nɛɛ: 'E ka me. "Ne 'ɔ yi -lɔ Masedoane -glɔ "me 'na -gwe plɛle-.

² 'Ɔ 'to lɛ Masedoane -glɔ -wɛ, "ne 'ɔ "tamalea lɛ 'ɔ "nowlia 'wɔ 'kwɛme "bhuɔ ne, "ne 'ɔ yi -da -lɔ Glɛse ylɛ.

³ Pɔle -saa Glɛke -glɔ "me 'ce ta. -Sɔɔdɛku, 'ɔ "kɛ bato 'gblɛ -se 'ɔ "kɛ Sili me -wɛ. "Ne 'ɔ yi -lɔ "me 'no -gbɔ Zufonya nɛɛ: 'Wa kɔ "nyɛnye 'wli no, lɔbhɔ 'ye 'ɔ 'sɔbhɔle -lɔ 'wli "ne 'ɔ yi -lɔ Masedoane ylɛle -ka me.

⁴ -Wa 'kwɛleɔ 'awɔ -gwe "ku -wɛ 'na 'tɔ ne lɛ: Sopatɛle, "bhle 'na 'nyɔkpɔ Piluse yowli yɔ -lɔ, Bele, Alisetake "ne Sekuduse, Tesalonike 'na 'nyakpa 'waa -lɔ, Gayuse, "ne Timote, Dɛlebe -noa 'waa -lɔ, Tisike "ne Tlofime, Azi -gligbɛ "ku -noa 'waa -lɔ.

⁵ 'Ɛ nyakpa -gbɔsɔ -wɛ -me 'awɔ -lɔ -anyɛɛ za tɛɛ, "ne 'wa yi 'awɔ -lɔ -anye Tloase 'wole.

⁶ -Anye -a -me 'awɔ Filipo, 'wa 'bhiɛ 'awɔ "fɔlɔ -ɛ "ne manyɔ "me -ko 'na -jajo 'gwlɛle -ka "bhuɔ ne, "ne -a yi -lɔ gɔlo 'gblɛ 'yli 'na 'umgbu -nɛ "me, "ne -a yi -lɔ Tloase 'kwlile. "Bhle -wɛ -a -no 'awɔ -lɔ dimasi -bholo.

Pɔle -ko Tloase

⁷ 'Yli 'gbeplo 'na "kugbedeku 'ye -a zɔ -lɔ 'wli -se -a "kɛ -wale lilɛ li. -Mɔ, Pɔle -yi 'awɔ -sɛ -gbɔ -zle "kɛ -ze "ne 'ɔ "kɛ -lɔ me, zaa, 'ɔ "nowlia 'wɔ 'yliku "ne 'ɔ yi -lɔ weli "ku 'libhi, 'ɔ bhulɛ 'awɔ -kaa "ne -zle 'diɔ "me.

⁸ "Ɛ "nɔgɔ-bhudu "me -mee -a "zole 'awɔ 'wli -wɛ 'na 'napɛ 'wɔ "ne 'awɔ 'ce "ku nyimɔ- 'kpɛɛ.

⁹ 'Teyigbɔ -bholo 'pa- -lɔ Etike, 'ɔ gli- 'awɔ -lɔ 'ylɛwli 'na -gbanuɔ "me "ne Pɔle bhulɛ 'awɔ -lɔ 'yiɛ, "ne 'yɛlɛ yu -lɔ 'lɔbhɔ- "yitɛ "ku. "Ne 'ɔ yi 'awɔ -lɔ "nɔgɔ-bhudu 'na tanɛ 'ce 'wli 'bha "ne 'ɔ yi -lɔ zɔ bhli, 'ɔ 'na no -gbɔ 'ɔ "kɔ "ku 'libhi cuu, 'zagbɔ 'ɔ "ku 'awɔ 'pepe.

¹⁰ "Ne Pɔle yi -lɔ zɔ 'kwli, "ne 'ɔ yu -lɔ -lo mele cuu, "ne 'ɔ yu -lɔ "ku 'libhi, 'ɔ nɛɛ: «'Dlebhɛ te "fu 'anye 'lɔbhɔ, -mɔ, 'ɔ -yɛ.»

¹¹ "Ne Pɔle yi -lɔ 'ɛ "nɔgɔ-bhudu -wɛ "me 'wli sɔbhɔ, "ne 'ɔ yi -lɔ "fɔlɔ "me 'didile, "ne 'ɔ yi -lɔ li. -Mɔ, 'ɔ -tlomale 'awɔ 'ɔnɛɛ bhulɛweli "me 'kaa -zle 'ze dɛku, "ne 'ɔ yi -da -lɔ me.

¹² 'Ɛyi -wɛ 'ple lɛ "bhuɔ ne, 'wa -su 'ɛ 'teyigbɔ -wɛ 'na -yɛyɛnɔ, "ne 'wa yu -lɔ -nɛme, "ne -wa -ko 'awɔ lɔbhɔ -wɛ 'ŋwɛnɛ yua -lɔ lɔbhɔ "yitɛ "ku "ne 'kwɛme yua -lɔ "tamale-.

Pɔle "bhaa Tloase "ne 'ɔ yi -lɔ Milɛ me

¹³ -Anye -me 'awɔ -lɔ "ɛ gɔlo "me 'gblɛ -ka tɛɛ -se -a ka -kɛ Asɔse -du "me Pɔle "ku libhile, -se 'ɔ -nyɛ "bhaa -a "kɛ 'awɔ 'gɔme mele -se 'ɔ la- 'awɔ -wɛ yɛ -lɔ.

¹⁴ Pɔle -ylele -anye Asɔse "ne -a yu -lɔ "ku 'libhi "ne 'ɔ -nyɛ "bhaa 'a yi -lɔ Mitilɛne -du "me me.

¹⁵ 'Ɛ moɔ -ye -a -ylɛle -lɔ "ne -a yi -lɔ zegbakpɔ "me Siyo -du "me 'sibhɔ. "Ne -zle 'na -vinɛ yi -lɔ 'ze 'na yi -lɔ Samɔse -du "me ylɛle, 'de glee 'na glo -bholo glee mɔɔnɔ "me ylɛ -ka -wɛ, 'na yi -lɔ Tloziliɔ -du "me 'nyegbe, "ne -a yi -da -lɔ Milɛ -du "me ylɛ 'yli 'na tanɛ "me.

¹⁶ Pɔle 'yɔbhɔ- 'awɔ -gbɔ "kɛ Efɛze -du "me 'nyegbe, "naa-, 'ɔ te -kɛ Azi -glɔ "me 'boɔleɔ zɛ. 'Ɔ 'pu -lɔ "bhle -se 'ɔ ka -kɛ Zeluzalɛme ko me- Patekɔte 'na -zle, 'ɛ "kɛ -kɛ 'bhɛle ne-.

Pɔle "cilɛ Efɛze 'na "yitia

¹⁷ Pɔle -ko 'awɔ Milɛ, "ne 'ɔ yi -lɔ Lagɔ -gligbɛ -ɛ -ko Efɛze -wɛ 'na "yitia 'nyakpa "ku 'lebhele -gbɔ 'wa -yi "ɛ -mee 'ɔ -ko ne.

¹⁸ "Ne 'wa yi -lɔ -yi, "ne 'ɔ yua -lɔ bhulɛle nɛɛ: «'Ye ylɛ 'a "bhle Azi -glɔ "me 'du 'ce, 'a 'ye 'se 'neɛ 'nɔŋosɛ -nyɛ 'neɛ nonoli "bhaa 'ylime -ye 'e nɛ -ko 'anye 'glɛme -wɛ.

¹⁹ 'E -lɔbhɔ Anyinɛnyɔ "ku, -ayi 'na "kukwlialeɛ "me 'kplɛkplɛɛ "me "ne 'tutuɛ "me Zufonya 'nabhɛ 'yɔbhɔ 'awɔ -gbɔ 'wa "kɛ 'awɔ -ame "nyɛnye 'wli no-.

²⁰ Zaa, -bɛɛ' 'na -ɛ 'nɛne -anye -gɛ "ne 'e -plɛle yɛle "ku "ne -le, 'e bhulɛle 'anye 'yliku, 'e -slo 'anye Lagɔweli -glɔnya 'yliku, "ne 'anyɛɛ -bhudu "me.

²¹ "Ne -la Zufonya -nyɛ glɛkenya "bhaa "ne bhulɛloa -gbɔ 'wa 'bheliɔ kɔ, -se 'wa mele Lagɔ lo, -se 'wa -kɛle Anyinɛnyɔ Zezu 'dleku.

²² -Dɛme 'na -dɛne "ku Zuzu Wlewle 'na -jiɛnyɔ 'ye 'e -noɔ -kɛ lɛ. Zeluzalɛme 'na -gwe "ku 'ye 'e -ko lɛ dɛne-, 'e "ne -kɛ -ɛ -wole -ame 'yuku -yi.

²³ -Mɔ, Zuzu Wlewle bhulɛle 'awɔ -ame, -gbɔ 'du 'klekle "ku, 'na -mee 'e "kɛ ylɛle -wɛ, 'e yi 'ce 'kplɛ, "ne 'e yi -jiɛ -plɛ.

²⁴ -Mɔ -ame, 'neɛ zikpɛ ne, 'ɛ "ne -bɛɛ' "me -ko. -Mɔ 'ɛnɛɛ -ye 'e 'yɔbhɔ lɛ 'tiaa, 'ɛ -leɛ 'e no Anyinɛnyɔ Zezu 'na libhɔ 'ye 'ɔ 'je- -ame kɔ -wɛ -se 'e -sɛ 'wli, zaa Anyinɛnyɔ Zezu 'na libhɔ -ye 'ɔ 'no -gbɔ 'e no -wɛ, 'ɛyi 'ye 'e no -lɔ, -ɛɛ -noɔ -lɔ -gbɔ To Lagɔ 'na 'Denaade, "ne 'ɔnɛɛ 'ŋwanade -wɛ 'e -sɛle -glonya.

²⁵ -Dɛmeda, 'e -yi -sɛ -gbɔ 'a -ka 'ce -la 'na "klo 'ylime 'ye, 'anye 'klekle 'ye 'e -ylɛle 'glɛme "ne -sloa 'Kamalezikpɛ "me 'na weli -wɛ.

²⁶ 'Ɛza, -zeka 'na zle ne "me, 'e 'nyegbe -lɔ 'anye 'klekle 'yliku, "ne 'e bhulɛle -lɔ 'anye, "naa-, 'e -no 'anye 'klekle 'na dɛku 'ye 'e 'bhɛle- -wɛ zɛ. 'A "mɔ -watɔ 'ye 'e -bhulɛle 'anye -wɛ 'yukwli 'fo, 'ɛ "ne -da 'neɛ gbo yɛ.

²⁷ "Naa-, 'ye Lagɔ no -gbɔ 'e sloa- 'anye 'klekle -wɛ, 'e "ne 'se 'anye 'ylime zizile-.

²⁸ Zaa, 'a 'slu "kɛ 'ayi 'tee, -se 'a 'slu -me "kɛ 'lelee Zuzu Wlewle 'na wlia 'ye 'ɔ -kulɛle 'anye "ku -wɛ 'tee, -se Lagɔ -gligbɛ 'ye 'ɔ sɔbhɔ- 'ɔyigɛsɛ 'ɔ yowli 'na dlu nu -wɛ "kɛ -kɛ 'anye 'fuɔ.

²⁹ -Mɔ, 'e -yi -sɛ -gbɔ, 'e "kɛ 'anye yɔko 'bha ne 'nyakpa -wa -ko sɛgbɛɛ 'slukua -wɛ yi 'anye 'glɛme -plɛ. "Ne 'wa -ka 'ce Lagɔ 'na wlia 'na -zakpɛ "ku 'tle-.

³⁰ "Ne 'anye 'glɛme 'na -bedia yi 'ce yowlɛ. "Ne gɛlenya 'na -bedia yua 'ce 'beku bhli.

³¹ Zaa, 'a "ple -kɛ 'yli, -se 'a 'luɔ- -kɛ, -mɔ, -ame, 'anyɛɛ za, -sabo "me, 'ylokwɛ "me, 'na 'ylobɛ ta ne lɛ 'ye 'e -tu 'anyɛɛ za, "ne 'e "zo 'anye 'de "me -bholo -bholo.

³² Dɛme 'na dɛne "ku, 'e kulɛle -kɛ 'anye Lagɔ -nyɛ 'ɔnɛɛ bhulɛweli -ɛ -noɔ 'ŋwɛnɛ yɛ -wɛ "bhaa "ku, "naa-, 'ɔnɛɛ bhulɛweli -wɛ, 'ɛ -kɛ 'bhɛloɛ "ne 'ɛ yi 'ce 'lelee 'anye 'wli "zo. "Ɛ weli -bhele -wɛ kɔ, Lagɔ yi 'ce -ɔkɔkokɔko -jɔlo 'na 'ɛ -ŋwɔ "ku -wɛ kɔ 'je.

³³ 'Ɛ "zo 'dlasi, -badlɛ "ne "mepla-koti "ne 'ce -ame 'dle "me -gbaa.

³⁴ 'Neɛ 'kwlɛ 'ye 'a -gɛ dɛne 'yli ne, 'anye 'nabhɛ 'a -yi -sɛ -gbɔ 'ɛyi 'ye 'e -nole -lɔ libhɔ "me, "ne 'e yi -lɔ 'neɛ -zikpɛ yle 'ɛ -nyɛ 'wa -gɛle -ame -wɛ "bhaa.

³⁵ 'E 'sloa 'ce 'anye -godogodo, 'e nɛɛ: 'A no libhɔ -se 'e "kɛ 'nyɛzenya 'kwɛle, Anyinɛnyɔ Zezu Kli 'na 'ye 'ɔ bhulɛ 'ɔyigɛsɛ ne lɛ: "Nyɛnyɛɛ 'nɛne "ne -ɛ -zi -ye 'wa 'je -eyi kɔ -wɛ "ku.»

³⁶ 'Ɔ bhulɛloa lɛ "bhuɔ ne, "ne 'ɔ yi -lɔ kokomini "pɔ, "ne 'wa yi -lɔ bhubhɔ 'wayi 'klekle "bhaa.

³⁷ 'Wayi 'klekle -tu, "ne 'wa yi -lɔ Pɔle "kutule.

³⁸ -Mɔ, 'wa -nyɛle 'awɔ "klo 'klekle, "naa-, sɛko -wɛ 'ɔ -bhulɛloa -gbɔ: «'Wa -ka 'ce -la 'ɔnɛɛ "klo 'ylime 'ye.» -Doɔ 'wa 'bha- "ne 'wa yu -lɔ -gwe "ku 'kwɛle bato "me.