Nonoli 19 - Nouveau Testament bété de Gagnoa

Pɔle 'na -ye 'ɔ -no Efɛze -wɛ

¹ -Sɔɔdɛku Apolɔse -ko Kolɛte -wɛ, "ne Pɔle yi -lɔ tlo 'du "ku ylɛle-, "ne 'ɔ yi -lɔ Efɛze me. 'Ɔ -ylele "bhle gɛlenya 'na yɛ.

² "Ne 'ɔ yua -lɔ lo 'yɔbhɔ nɛɛ: «-Da "zo 'dlekukɛlenya -wɛ, 'a yle bhɔ Zuzu Wlewle 'a?» -Mɔ, 'wa bhulɛlo nɛɛ: «'Wa "ne -anye Zuzu Wlewle 'na weli bhulɛle tɛkɛsɛ!»

³ "Ne Pɔle yua -lɔ lo 'yɔbhɔ nɛɛ: «Zaa, -sɔɔ batɛme 'ye 'a -yle bhɔ?» "Ne 'wa yi -lɔ no nɛɛ: «Zaa 'na batɛme 'ye -a -yle -lɔ!»

⁴ "Ne Pɔle yi -lɔ "kusɔ weli "ku libhile, 'ɔ nɛɛ: «Kɔ -bheliɔ batɛme -ye Zaa "nyɛ nɛ -lɔ 'nyakpa, "ne 'ɔ bhulɛle nɛ -lɔ "ɛ 'nyakpa -wɛ -gbɔ 'wa -kɛle 'ɔ "kɔ 'ce 'beme 'bhale -wɛ 'dleku, -ɛ -sɛ zɔ nɛɛ: Zezu!»

⁵ 'Wa foo- 'yukwli "ne 'wa yi -lɔ Anyinɛnyɔ Zezu 'na 'tɔ "me batɛme yle.

⁶ Pɔle 'pua 'kwlɛ 'wli "ne Zuzu Wlewle yua -lɔ "ku 'kwlile-. "Ne 'wa bhulɛlea -lɔ gbo 'na -ɛ "ne 'yiɔ -wɛ "me Lagɔweli.

⁷ 'Nyakpa yi 'awɔ -lalɛce -kogbɔ "sɔ -yle.

⁸ Pɔle me 'awɔ Zufonya 'na "mebhubhɔlebhudu "me 'yli 'oo -yli, 'ce ta 'na dɛ, 'dlekukɛlesɛ. 'Ɔ bhulɛloa 'awɔ Lagɔ 'na 'Kamalezikpɛ 'na weli, -se -wa 'fo 'yukwli -wɛ "kɛ kɔ "bheliɔ-.

⁹ -Mɔ, -bedia 'tɛ- 'yukwli "me, "ne 'wa "ne 'yɔbhɔ -gbɔ 'wa "kɔ 'yukwli 'fo -see 'wa "kɛ kɔ 'bheliɔ, "ne 'wa 'yɔbhɔ -gbɔ 'wa "kɛ 'dleku -kɛle, "ne 'ɛ -zejilɛ -wɛ "me 'wa 'silea -lɔ Lagɔ, "ne Pɔle yua -lɔ yɔko "bhaa, "ne 'ɔ yi -lɔ gɛlenya 'wanɛɛ -tiaa dɛku lale, "ne -see -zle 'ze -wɛ, 'ɔ bhulɛloa -lɔ Tilanuse 'na suklu -wɛ "me Lagɔweli.

¹⁰ 'Ɛ ylɛle -sɔbhɔ 'ylobɛ "sɔ 'na dɛ, 'ɛza, 'nyakpa 'klekle -wa -ko Azi -glɔ "me, Zufonya "ne glɛkenya yi -la -lɔ Anyinɛnyɔ 'na weli "me 'no -me.

Sekeva 'na yua

¹¹ Lagɔ "pɔle Pɔle 'na 'kwlɛ "me zɛzɛ "yitɛ.

¹² -Sɔbhɔ za, "klo siɛleyayi "ne lokwi 'pɛɛ -ɛ 'sa- 'ɔnɛɛ "ku kɔ -wɛ, 'wa 'zea 'awɔ -lɔ "ɛ 'gwizinya kɔ, "ne 'wa 'yamale nɛ -lɔ, "ne zuzu -nyɛnyea bhoa -lɔ keyi.

¹³ Zufonya 'na -bedia -wa me 'du 'wɔ "ku -wɛ 'sɔbhɔle me Anyinɛnyɔ 'na 'tɔ -ye 'ɛ zuzu -nyɛnyea -ko keyi "ku -wɛ za, "ne 'wa no -lɔ nɛɛ: «-A zligbɔle Anyinɛnyɔ Zezu 'na 'tɔ -ye Pɔle -sloa -glɔnya -wɛ "ku, "ne 'ɛ zuzu -nyɛnyea -wɛ bhoa -lɔ keyi!»

¹⁴ -Wa didale 'awɔ Pɔle -wɛ, zufonyɔ -bholo 'ɔ -noɔ 'awɔ bɔbɔnyɔ "yitɔ yɔ, "ne 'ɔ 'pa- 'awɔ Sekeva -wɛ 'na yua -gbɔsɔ 'waa -lɔ.

¹⁵ "Ne zuzu -nyɛnye yua -lɔ bhulɛle nɛɛ: «'E -yi Zezu, "ne 'e -yi Pɔle. -Mɔ, 'anye, -sɔɔnya 'ye 'a -noɔ bhɔ tiaa?»

¹⁶ "Ne "ɛ 'nyɔkpɔ -ye zuzu -nyɛnye -ko "me -wɛ yi -lɔ 'wayi 'klekle "ku bhlile- 'kpokposɛ, 'wa 'diɔ- 'wlu, gbiɛ -ŋwɛnoa moɔ 'klekle, "ne 'wa yi -lɔ 'fɔtɔ.

¹⁷ 'Nyakpa 'klekle -wa -ko Efɛze -wɛ, 'ɛ "zo Zufonya, "ne glɛkenya, 'wa "kɛ "ɛ -see 'ɛ -ylɛle -wɛ "me 'no ne, -nyanɔ 'lɔbhoa- -lɔ, "ne 'wa bhubhɔle 'awɔ Anyinɛnyɔ Zezu 'na 'tɔ 'na "kpɔmaleɛ "me.

¹⁸ 'Nyakpa -kwleyia "zo- 'dlekukɛlenya, 'wa -sɛ -lɔ 'nyakpa 'yliku 'wanɛɛ "nyɛnye 'ye 'wa no -wɛ 'na 'de.

¹⁹ 'Wanɛɛ -wa no 'dlamina libhɔ -wɛ 'na 'glɛme 'na -kwleyia "zo- 'wanɛɛ "bɔgo 'wli "ne 'wa yi -lɔ 'ɛ -zejilɛ -wɛ "me -siɛle. -Wa -kɛ 'ɛ 'dlasi 'na yɛ "kɛ li -wɛ -zɛle ne, 'ɛ yi -gɛmɛnɛ -wlulu -glo "sɔ yɛ kogbɔ -bhli.

²⁰ Soɔ 'ye Anyinɛnyɔ 'na 'bhɛloɛ "me Lagɔweli 'ŋwɛne -lɔ -glɔ 'klekle "ku, "ne 'ɛ yi -lɔ "me "tamale.

Efɛze 'na 'nyakpa -gbapea 'klecɛnya

²¹ -Ɛwɛ "kɛ 'ple "bhuɔ ne, "ne Pɔle yi -lɔ 'dlezɔ bhulɛle -gbɔ "kɛ Masedoane "ne 'du 'ye 'wa la Akayi -wɛ ylɛle -se 'ɔ "kɛ Zeluzalɛme me, "ne 'ɔ yi 'awɔ -lɔ no nɛɛ: «'E "kɛ "bhle me ne, 'e yi Wlɔmo -du "me "mɔme.»

²² "Ne 'ɔ yi -lɔ Timote "ne Elasete, 'ɔnɛɛ 'kwɛlenya "sɔ -wɛ Masedoane 'lebhele-. -Mɔ, 'ɔyigɛsɛ 'ɔ -to 'du 'ye 'wa la Azi -wɛ.

²³ 'Ɛ dɛ -wɛ "ku, gbo "yitɛ -bhlua 'glɛme, Anyinɛnyɔ 'na -gwe -ye Pɔle sloa- 'Nyakpa 'dɛ -wɛ 'na 'ylime.

²⁴ "Naa-, gblubhlɛnyɔ -ye 'wa la Demetluse libhi 'awɔ -lɔ 'tamayɛ "ne 'ɔ -no 'awɔ -lɔ Atemise 'na bhubhɔbhudu 'na 'yuslokpo "ku, "ne 'gblubhlɛnyɔ -nyɛ 'ɔnɛɛ libhɔnonya "bhaa yle 'awɔ -lɔ 'dlasi -kwleyi.

²⁵ "Ne Demetluse yi -lɔ 'gblubhlɛnya "ne -wa no me 'ɛ soɔ 'na libhɔ -wɛ 'wli "zo, "ne 'ɔ yua -lɔ bhulɛle nɛɛ: «Titoa 'wanye, 'a -yi -kɛ -sɛ -gbɔ 'ɛ libhɔ -ye -a no ne za -a -ko -lɔ 'tee.

²⁶ "Naa-, 'a -gɛyli "ne 'a no "me, 'a yi bhɔ 'ɛ ylɛle "ɛ mɛne, "ne "kɛ Efɛze 'ɛyikɔ yɛ, -mɔ, 'ɛ 'ŋwɛne "me "kɛ Azi -glɔ 'klekle "ku -gbɔ "ɛ Pɔle -wɛ 'ɔ "zo 'nyakpa gbo 'glɛme, "ne 'ɔ no -lɔ nɛɛ: 'Wa -kɛle 'ye 'ɔ bhulɛ -wɛ 'dleku, Lagɔ 'wɔ -ye 'wa -bhlɛ lɛtɛ "ku -wɛ, 'wa "ne Lagɔ 'waa.

²⁷ 'Ɛyi gbɔ "ne -anyɛɛ libhɔ yi -nyimɔ. "Ne Atemise "yitɔ 'na bhubhɔ-bhudu -ka -la -bɛɛ' "me ko, "ne Atemise -ye 'nyakpa 'kwa nɛ 'ŋlu -wɛ 'wa -kɔ -la 'ŋlu 'kwa -ɛ 'bhale- Azi -kaa moɔ 'klekle 'nyakpa -kɔ -la 'ŋlu 'kwa.»

²⁸ 'Ɛ weli -wɛ kɔ 'ye -wa 'fo 'yukwli -wɛ "pɔ -lɔ 'kɛle, "ne 'wa "kpaa -lɔ "me 'yiɛ ŋwɛnɛɛ: «Efɛze 'na 'nyakpa 'na zliŋɔnɔ "yitɔ Atemise yɔ -lɔ!»

²⁹ "Ne 'ɛ -jiji -wɛ yi -lɔ 'ɛ Efɛze -du -wɛ "me 'ŋwɛne. "Ne 'nyakpa yi -lɔ "pulɔ "ne 'wa yi -lɔ -digbɛme ylɛ -ka yi. "Ne 'wa yi -lɔ Masedoane 'na 'nyakpa "sɔ Gayuse "ne Alisetake, Pɔle "ne -nyɔɔ "bhaa -wa me -glo "ku 'yiɛ -wɛ -gwe "ku 'sale, "ne 'wa yua -lɔ -digbɛme kɔme.

³⁰ Pɔle 'yɔbhɔ nɛ -gbɔ "kɛ -dee 'wa "zole 'wli -wɛ me, -mɔ, gɛlenya "ne "ku 'ŋunu- -gbɔ 'ɔ me "bhle.

³¹ "Ne Azi 'na libhɔnonya "yitia -wa -noɔ 'ɔ 'titoa 'waa -wɛ yu -lɔ 'nyɔkpɔ "ku 'lebhele -gbɔ 'ɔ 'te 'kɛɛ 'wanɛɛ -dee 'wa "zole 'wli -wɛ me, -see 'wa 'to -kɛ "nyɛnye no!

³² 'Diɛɛ, -ɔkɔkokɔko "kpaa nɛ -se 'ɔ 'yɔbhɔ -wɛ "me, "ne "ɛ -zakpɛ no nɛɛ -ye 'wa 'yɔbhɔ -wɛ, -mɔ, 'wa "ne nɛ sɔɔbɛɛza 'wa "zo 'wli -wɛ -yi.

³³ "Ne 'ɛ zufonya 'na -zakpɛ -wɛ yi -lɔ Alɛzadle 'yuku -gelia "ne 'wa yu -lɔ 'ɛ weli -wɛ zɔ 'sibhalea, "ne 'ɔ yi -lɔ sɔ 'ya 'pɔ -gbɔ 'ɔ "kɛ nɛ "ɛ 'nyakpa 'na zakpɛ -wɛ bhulɛle-.

³⁴ -Mɔ "ɛ 'nyakpa -yibhlele lɛ sɛ -gbɔ Alɛzaadle Zufonyɔ yɔ ne, "me 'wa "kpa- -lɔ "yitɛ "ku, glee "sɔ 'na dɛ, ŋwɛnɛɛ: «Efɛze 'na 'nyakpa 'na zliŋɔnɔ "yitɔ Atemuse yɔ -lɔ!»

³⁵ "Ne 'ɛ 'du -wɛ "me 'na "bɔgokɛlenyɔ yi -lɔ "ɛ 'nyakpa -wɛ 'dɛpe nɛɛ: «Efɛze 'na 'nyakpa 'nye, -glɔ 'klekle -yi -sɛ -gbɔ 'du 'ye 'wa la Efɛze -wɛ -kole -lɔ zliŋɔnɔ Atemise 'na bhubhɔbhudu "ne 'yuslokpo -ɔ 'bhale "nɔgɔ "me -wɛ "bhaa "klo!

³⁶ -Dɛne -da -ko ne, 'anye 'glɛme 'na -ɔ "kɛ bhɔ no -gbɔ 'ɛ "ne 'diɛɛ yɛ, zaa, 'a 'piɛ "bhle 'dle, -se -a 'wlole "me, -se -a te -kɛ -bɛɛ' 'na -vinɛ no.

³⁷ "Naa-, "ɛ 'nyakpa -ye 'a -nɛme mɛne -wɛ "ne 'anyɛɛ -dee 'a bɔbɔle -wɛ 'plome -sɛ. "Ne 'wa "ne 'anyɛɛ 'yuslokpo 'yli-.

³⁸ -Lalɛce, Demetluse -nyɛ 'ɔnɛɛ libhɔnonya "bhaa 'yɔbhɔ -gbɔ 'wa "kɛ 'nyɔkpɔ -bholo gbo 'wlime 'gbli. Zaa, gbobhlenya -ko 'seɛ zoku ne, 'yli -ye 'wa -sɛ lɔbhɔ -le, zaa, 'a 'nyiɔ gbobhlenya yɔko.

³⁹ 'A "kɛ no -gbɔ 'a "kɛ -bɛɛ' 'na -vinɛ "me lo 'yɔbhɔ ne, gbobhlenya "kɛ 'ce -lɔ 'ɛ weli -wɛ 'bhle.

⁴⁰ 'Wa 'te "kɛ 'anye 'ɛ -zeka 'na 'wlizoɛ ne 'na 'gbo 'wlime 'gbli, "naa-, 'wa "kɛ -kɛ 'anye lo 'yɔbhɔ -ka -yi, 'a -kaa kɛ -ye 'a -kɛ bhulɛ -wɛ yibhlele.»

⁴¹ 'Ɛ "bɔgokɛlenyɔ bhulɛ lɛ "bhuɔ ne, "ne 'ɔ yi -lɔ no -gbɔ 'wa me -suɔ "me.