Nonoli 18 - Nouveau Testament bété de Gagnoa

Pɔle -ko Kolɛte

¹ 'Ɛyi -wɛ 'ple lɛ "bhuɔ ne, Pɔle 'bha- Atɛne, "ne 'ɔ yi -lɔ 'du 'ye 'wa la Kolɛte -wɛ me.

² "Bhle 'na Zufonyɔ -ye 'wa la Akilase -wɛ "bhaa 'wa 'sibhɔle- -lɔ "ku, Pɔŋo 'na nyɔkpɔ yɔ -lɔ, Itali 'ye 'ɔ 'bha- nɛ -lɔ 'ɔ "nɔŋɔ Plisile "bhaa. "Naa-, -klɔgbɔnyɔ "yitɔ Klode kɛle- 'awɔ gbɔ Zufonya 'klekle 'wlo Wlɔmo zɔ. Pɔle -me Akilase -nyɛ Plisile "bhaa 'na sueme.

³ "Naa- libhɔ -bhele 'wa no -lɔ zɛ, -gligbɛ 'sɔbhɔnya 'waa -lɔ, "ne 'wa yi -la -lɔ "ku -glile, "ne 'wa nole -lɔ libhɔ 'gɔme.

⁴ -See 'wa 'gwlɛle 'ce -gbajɛ 'yiɛ -wɛ, sɔbhɔ 'ye Pɔle 'libhi -lɔ Zufonya 'na "mebhubhɔlebhudu "me weli "ku, "ne 'ɔ 'pɔle -lɔ Zufonya -nyɛ glɛkenya "bhaa 'nade.

⁵ Zaa, -dee Silase "ne Timote 'wɔ 'bha- Masedoane 'du "me "ne 'wa -yi Kolɛte -du "me -wɛ, lɔbhɔ 'ye Pɔle -sɛle -lɔ Zufonya Lagɔ 'na 'Denaade 'ɔ nɛɛ: «Zezu Kli, Lagɔ 'na ŋwɛnɛŋwɛnɛyu yɔ -lɔ.»

⁶ -Mɔ, 'wa sɛ nɛ Pɔle "ne 'wa 'ylu nɛ. Sɔbhɔ za Pɔle -sɛ 'ɔnɛɛ "koti "ku "me "ne 'ɔ yi -lɔ "me -vuku, 'ɔ nɛɛ: «'Anyɛɛ zɛ -ye 'a pɛle -kɛ -wɛ! 'Anyɛɛ gbo yɛ -kɛ -lɔ, 'e "ne "kɛ "bhle -ko "me. -Dɛmeda, -wa "ne zufonya 'waa -wɛ 'ye 'e "kɛ -la -lɔ lo mele.»

⁷ "Ne 'ɔ yi -lɔ "ɛ -dee 'ɔ -ko -wɛ 'bha, "ne 'ɔ yi -lɔ 'nyɔkpɔ -ye 'wa la Titiuse Zutuse -ɔ bɔbɔ Lagɔ -wɛ 'na doɔ me, 'ɔnɛɛ -bhudu "ne "ɛ Zufonya 'na "mebhubhɔlebhudu yɔko 'dɛ 'tlole-.

⁸ -Mɔ, Klisepuse, Zufonya 'na "mebhubhɔlebhudu "me 'na "cifi, -kɛle Anyinɛnyɔ 'dleku, 'ɔnɛɛ -bhudu "me 'na -konya 'klekle "bhaa, "ne Kolɛte 'na 'nyakpa -kwleyia -wa 'fo -me 'awɔ Pɔle 'yukwli -wɛ 'kɛle -me 'awɔ 'lelee Lagɔ 'dleku "ne 'wa yi 'awɔ -lɔ batɛme yle -me.

⁹ "Ne -sabo "me, "Bhenyɔ yi -lɔ Pɔle 'yla "me bhulɛle nɛɛ: «'Te -kɛ "gu, bhulɛloa 'yiɛ, te -kɛ "ku 'tli!

¹⁰ -Ame, 'e -ko -eyi keyi, 'nyɔkpɔ "ne 'bhɛle "ne 'ɔ "kɛ yi kɔ 'sa, "ne 'ɔ "kɛ -eyi 'nyɛze -ziɛ, sɛko -wɛ 'ɛ 'du ne "me 'na 'nyakpa -wa 'yɔbhɔ -ame -wɛ 'zu kpɛnyee.»

¹¹ "Ne Pɔle -saa 'awɔ "bhle 'ylobɛ -bholo 'ce 'gbeplo, -se 'ɔ -sloa 'nyakpa Lagɔweli.

'Kamalenyɔ Galiɔ 'bhlele Pɔle gbo

¹² 'Tɛnyee "me Galiɔ -noa 'wɔ Akayi -glɔ "me 'na 'Kamalenyɔ "yitɔ yɔ -wɛ, 'ye Zufonya 'klekle -kole 'awɔ -lɔ "ku, "ne 'wa yi -lɔ Pɔle gbo no, 'wa -su "ne 'wa yu -lɔ gbobhle-zejilɛ "ku kɔme.

¹³ Ŋwɛnɛɛ: «'Nyɔkpɔ ne nɛɛ: -Se -a bɔbɔ Lagɔ -anyɛɛ -Lɔ "me -wɛ "ne 'ɛ yi yɛ, "ne 'ɔ -nyimɔ -lɔ -anye 'wlime "ne 'ɔ no -lɔ nɛɛ: -A bɔbɔ 'ɔnɛɛ soɔ!»

¹⁴ Pɔle -na 'di gbo, "ne Galiɔ yi -lɔ Zufonya bhulɛle nɛɛ: «'Ɛ -kɛ 'nyakpa lɔbhɔ gbo yɛ, "ne -ɛ "kɛ -kɛ 'lelee weli 'na -ɛ 'tɛ- "me yɛ, 'e yi nɛ 'anye 'yukwli 'fo zufonya 'tuku, "ne 'e yi nɛ 'bhle.

¹⁵ -Mɔ, 'anyɛɛ weli "me -seseliɛ, 'anyɛɛ 'tɔ "ne 'ayigɛsɛ 'na -Lɔ yɛ "kɛ -kɛ -noɔ, 'ayikɔ 'na weli yɛ -lɔ, -mɔ, -ame, 'e 'cɛ 'wli "ku 'di!»

¹⁶ "Ne Galiɔ yua -lɔ -zejilɛ "ku 'kpeti.

¹⁷ "Ne 'wa yi -lɔ Sɔsetɛne -ɔ -noɔ "mebhubhɔlebhudu "me 'na "cifi yɔ -wɛ 'sa, "ne 'wa yu -lɔ "ɛ 'gbobhlebhudu -wɛ yɔko 'bhetele, -mɔ, Galiɔ -noa "klo 'wolo-, "ne 'ɔ "ne 'di-.

Pɔle me "kusɔ Atiɔse

¹⁸ Pɔle 'gwlɛ 'awɔ Kolɛte -du "me, "ne 'ɔ yi -lɔ 'ɔ "nowlia 'klecɛnya yɔko "bhaa, "ne 'ɔ yi -lɔ bato "me 'gblɛ "ne 'ɔ yi -lɔ Sili me 'ɔ -nyɛ Plisile -nyɛ 'ɔ "luwli Akilase "bhaa. -Mɔ, 'ɔ 'ple 'awɔ weli, zaa, 'wa 'sibhɔ lɛ 'du 'ye 'wa la Sacle -wɛ, "ne 'ɔ yi -lɔ 'wli -tlu.

¹⁹ "Ne 'wa yi -lɔ Efɛze me, "bhle -wɛ -ye Pɔle 'bhale -lɔ Akilase -nyɛ Plisile "bhaa yɔko, "ne 'ɔ yi -lɔ -vidɛ me, "ne 'ɔ yi -lɔ 'ɛ "bhle 'na Zufonya 'na "mebhubhɔlebhudu "me -plɛ "ne 'wa -nyɔɔ 'wɔ "bhaa yi -lɔ 'lɛtɛ.

²⁰ -Mɔ, 'wayi, zufonya bhulɛlo 'awɔ -gbɔ 'ɔ 'gwlɛ 'awɔ yɔko 'tekeyi, "ne 'ɔ yi -lɔ lo -sɛ.

²¹ 'Ɔ nɛɛ: «'E kaa me, Lagɔ kɛ "ku 'ŋunu-, 'e yi "kusɔ yile», "ne 'ɔnɛɛ bato yi -lɔ 'ŋu 'to, "ne 'ɔ yi -lɔ 'du 'ye 'wa la Efɛze -wɛ me.

²² "Ne Pɔle yi -lɔ Sezale sibhɔ, "ne 'ɔ yi -lɔ "bhle 'na Lagɔ -gligbɛ "me 'na 'nyakpa 'bhɛle -ka me. "Ne 'ɔ yi -da -lɔ Atiɔse me.

²³ 'Ɔ 'gwlɛ 'awɔ Atiɔse 'tekeyi, "ne 'ɔ yi 'awɔ -da -lɔ 'wlizɔ -zi, "ne 'ɔ yi 'awɔ -lɔ Galasi -nyɛ Flizi "bhaa ylɛle, "ne 'ɔ "tamalea -lɔ gɛlenya 'kwɛme.

Apolɔse me Efɛze -nyɛ Kolɛte "bhaa

²⁴ Zufonyɔ -bholo 'ye 'wa la Apolɔse -wɛ, Alɛzadli -du "ku 'na 'nyɔkpɔ yɔ -lɔ, 'ɔ ylɛ- 'awɔ -lɔ Efɛze. "Ɛ 'nyɔkpɔ -wɛ -yi 'awɔ bhulɛ sɛ kpɛnyee, "ne 'ɔ -yi -me 'lelee 'ɛ 'Lagɔ-bɔgo "me 'na weli.

²⁵ 'Wa -sloɔ -mo 'lelee Anyinɛnyɔ 'na -gwe dɛ, zaa, Zuzu Wlewle -koa "me "klee, 'ɔ 'kɛ bhulɛ ne, 'ɔ zakalea -li 'klekle "me. "Ne 'ɔ kaa sloa- ne, Zezu Kli 'na 'Denaade 'ye 'ɔ sloa- -lɔ -kpee, -mɔ, Zaa 'na batɛme 'ɛyikɔ 'ye 'ɔ yia 'awɔ -lɔ.

²⁶ 'Ɔ bhulɛ 'awɔ -gbaa Zufonya 'na "mebhubhɔlebhudu "me "ne 'ɔɔ "gu, -sɔɔdɛku Plisile "ne Akilase 'no- 'ɔnɛɛ bhulɛweli "me -wɛ, lɔbhɔ 'wa libhilo- -lɔ "ku "ne 'wa yu -lɔ sueme kɔme. "Ne 'wa yu -lɔ Lagɔ 'na -gwe 'na 'ye 'ɔ "kɛ -bhli -kpee -wɛ 'dɛ sloa-.

²⁷ 'Ɛyi -wɛ ple lɛ "bhuɔ ne, Apolɔse 'yɔbhɔ 'awɔ -gbɔ 'wa 'kaa 'wɔ Akayi -glɔ "me me, zaa, 'wa "tamaleɔ 'kwɛme "ne 'wa yu -lɔ "bɔgo kɔ 'je, -se "bhle 'ce 'na gɛlenya kɔ -kɛ 'tee 'sa. "Ne 'ɔnɛɛ 'du ylɛ- -wɛ yua -lɔ 'kwɛle 'dlekukɛleɛ "me "ne 'wanɛɛ 'dlekukɛleɛ yi -lɔ 'kpɔmale 'ɔnɛɛ za.

²⁸ "Naa-, "ɛ 'nyakpa -wɛ 'yliku 'na 'ye 'ɔ bhulɛ 'awɔ -wɛ 'ɛ Zufonya "ne 'awɔ -la keyi -sɛ, -mɔ, Lagɔ-bɔgo "me 'na weli 'ye 'ɔ 'sibhaloa -lɔ zɔ -gbɔ Zezu Kli, Lagɔ 'na ŋwɛnɛŋwɛnɛyu yɔ -lɔ.