Nonoli 17 - Nouveau Testament bété de Gagnoa

Pɔle -nyɛ Silase "bhaa -me Tesalonike

¹ Pɔle -nyɛ Silaase "bhaa 'wa -ylɛle Afipoli "ne Apoloni, "ne 'wa yi -lɔ Tesalonike ylɛ, -dee Zufonya 'na "mebhubhɔlebhudu -ko 'awɔ -wɛ.

² "Ne Pɔle yua -lɔ "bhle ylele-, -se 'ɔ sɛ "klee -wɛ, "ne -gbajɛ ta 'na dɛ, 'wayi 'wɔ "bhaa 'wa yi -lɔ -ɛ kɛleɔ- Lagɔbɔgo "me -wɛ 'na weli lɛtɛ-.

³ "Ne 'ɔ yua -lɔ zɔ sibhalea- -gbɔ nɛɛ: «Ŋwlɛŋwlɛyu yi 'awɔ 'gbape, "ne 'ɔ yi 'awɔ gluzɔ 'wlo. "Ɛ ŋwɛnɛŋwɛnɛyu -wɛ, Zezu -nyɔ 'na weli 'ye 'e bhulɛle 'anye -wɛ yɔ -lɔ.»

⁴ "Ne "ɛ weli -wɛ yi -lɔ Zufonya 'na yɛ kɔ 'sa, "ne 'wa yi -lɔ Pɔle -nyɛ Silase "bhaa 'beku bhli, 'wa -nyɛ 'glɛkenya -kwleyia 'wa "zo- Lagɔ -wɛ, "ne -gligbɛ "yitɛ "ku 'na 'ŋwenea "bhaa.

⁵ -Mɔ, Zufonya 'na -ye lɔbhɔzo 'yiɛ- nɛ 'dlezɔ -wɛ "zo- 'nyakpa -gbeyia 'na -wa 'nɔŋo "fu 'du "me -wɛ 'wli, "ne 'wa yi -lɔ "ɛ 'du -wɛ "me 'na 'nyakpa 'wli "ku 'libhi, "ne 'wa yi -lɔ Pɔle -nyɛ Silase "bhaa 'yukwɔ me Zasɔ 'na -bhudu "me, -se 'wa "koa 'nyakpa 'yliku kɔme.

⁶ 'Wa "ne 'yloa 'na 'ylime za, 'wa libhi "ɛ Zasɔ, "ne "nowlia 'na yɛ "ku, "ne 'wa yua -lɔ gbobhlenya 'yliku kɔme. "Ɛ 'nyakpa -wɛ "kpa "me nɛɛ: «"Ɛ -wawɛ 'waa- -gbelia -lɔ -glɔ 'klekle "ku 'na 'nyakpa, -dɛmeda 'wa 'ya mɛne ylɛ-,

⁷ "ne Zasɔ yua -lɔ 'tee 'sa. "Ɛ -wawɛ 'klekle, 'Kamalenyɔ 'na -Lɔ 'na -bli 'wa 'pɔ -lɔ "ɛ soɔ, "ne 'wa no -lɔ -gbɔ -Klɔgbɔnyɔ 'na -vinɔ 'pa- Zezu.»

⁸ "Ne 'wanɛɛ "mekpaweli 'yiɛ -lɔ "ɛ 'nyakpa -wɛ -nyɛ gbobhlenya "bhaa 'dle nuɔ.

⁹ "Ne 'wa yi -lɔ no -gbɔ Zasɔ -nyɛ 'nyakpa 'na -bedia "bhaa 'wa 'peɛle 'dlasi -se 'wa "koa 'yi 'tale.

Pɔle -nyɛ Silase "bhaa 'wa me Bele

¹⁰ "Ne "ɛ -sabo -wɛ "me cuu ne, 'wa "nowlia 'klecɛnya 'wɔ yi -lɔ Pɔle -nyɛ Silase "bhaa -gwe "ku kwɛle-, "ne 'wa yi -lɔ 'du 'ye 'wa la Bele -wɛ me. 'Wa "kɛ 'du ylɛ ne, Zufonya 'na "mebhubhɔlebhudu "me 'wa -me -lɔ.

¹¹ "Bhle 'na Zufonya 'sa- 'nyakpa 'tee, "ne 'ɛ -zi Tesalonike 'na 'nyakpa "ku. "Naa-, 'wa 'sa -bhobhlo Lagɔweli -wɛ kɔ, -see 'wa 'yɔbhɔ gou -wɛ. Zaa, -se zle ze -wɛ, 'wa 'veɛ Lagɔ-bɔgo "me, -se 'wa 'cɛ 'ylime 'ye -ye Pɔle -bhulɛ -wɛ kɛ -kɛ 'diɛɛ yɛ.

¹² 'Wanɛɛ 'glɛme 'na 'kwleyia "zo- 'dlekukɛlenya "zo. Glɛkenya 'glɛme, -gligbɛ "yitɛ "ku 'na ŋwenea "ne 'widia -kwleyia "zo- -me 'dlekukɛlenya.

¹³ -Mɔ, Tesalonike 'na Zufonya 'cɛ "me 'no -gbɔ Pɔle bhulɛ -me Lagɔweli Bele ne, "bhle 'wa me -lɔ, "ne 'wa yi -lɔ "ɛ 'nyakpa -wɛ 'pɔ Pɔle -nyɛ Silase "bhaa za, "ne 'wa yua -lɔ 'dle nuɛ 'yiɛ.

¹⁴ 'Ɛza, 'wa "ne -la -boɔ, "ne "nowlia yi -lɔ Pɔle -gwe "ku 'kwɛle, "ne 'ɔ yi -lɔ jinyɛ "klo me, -mɔ, Silase -nyɛ Timote "bhaa -to 'awɔ Bele.

¹⁵ Ne -wa 'kwɛle nɛ Pɔle -gwe "ku -wɛ yu -lɔ kɔme -kaa "ne 'wa yu -lɔ Atɛne -du "me nenia-. 'Wa -zi 'wlizɔ, "ne 'wa yi -lɔ Silase -nyɛ Timote "bhaa bhulɛle- -ka me: «Pɔle nɛɛ 'a ylelo- -kɛ "bhle 'bhobhlo.»

Pɔle -ko Atɛne

¹⁶ -Sɔɔdɛku Pɔle -wole nɛ Silase "ne Timote Atɛne -wɛ, kɛle 'lɔbhɔ nɛ, "naa-, 'ɔ 'ye- "ɛ 'du -wɛ "me 'na 'yuslokpo 'ye 'wa bɔbɔ -wɛ 'ylime zɛ.

¹⁷ 'Ɛza, Zufonya 'na "mebhubhɔlebhudu -wɛ "me, 'ɔ bhulɛle 'awɔ -lɔ Zufonya, "ne -wa "zo Lagɔ -wɛ, zle 'klekle "me, -digbɛme, 'pleplenya -nyɔ 'wɔ "bhaa, 'wa 'sibhɔle "ku -wɛ "bhaa 'wa 'lɛtɛ nɛ -lɔ.

¹⁸ 'Nɛnenya, Epiculiɛnya "ne Setoyisiɛnya 'wa -nyɛ 'ɔyi "bhaa 'wa kpɛle- 'awɔ -lɔ. "Ne -bedia no -lɔ nɛɛ: «"Ɛ 'kplekɛlenyɔ -wɛ nɛɛ -lɛ bhɔ?» 'Wawɛ nɛɛ: «'Pleple Lagɔ 'na 'de 'ye 'ɔ sɛ -lɔ.» -Mɔ, Pɔle Zezu 'na 'Denaade 'ye 'ɔ -sɛ -lɔ "ne 'ɔ no -lɔ nɛɛ -glukonya yi 'ce gluzɔ 'wlo.

¹⁹ "Ne 'wa yu -lɔ 'sa, "ne 'wa yu -lɔ 'Gbobhle-zejilɛ "ku kɔme, "ne 'wa yi -lɔ bhulɛle- nɛɛ: «-Sloasɛ -lele 'na -ye -e -nɛme bha? -A 'yɔbhɔ -gbɔ -a 'cɛ yibhlele- zɛ.

²⁰ "Naa- -e kamalea -anye 'yukwli "me, "ne -a "ne -se -e lɛ -yi. 'Ɛza, -a 'yɔbhɔ -lɔ -gbɔ -a "kɛ -ye -e bhulɛ -wɛ yibhlele-.»

²¹ -Sɛko -wɛ, Atɛne 'na 'nyakpa 'klekle, "ne 'lowlinya 'klekle -wa -ko "bhle -wɛ, 'de 'na -sɛsɛ, "ne 'de -lele 'na 'yukwlifoɛ, 'ɛ -noɔ -lɔ 'wanɛɛ libhɔ yɛ.

²² "Ne Pɔle 'nyegbe- 'Gbobhle-zejilɛ 'na -jijɛ "ku, "ne 'ɔ yi -lɔ weli "ku 'libhi, 'ɔ nɛɛ: «Atɛne 'na 'nyakpa 'nye, 'a -wa "fu 'na lagɔ 'na bɔbɔbɔbɔɛ.

²³ -Mɔ, 'e "kɛ 'anyɛɛ sue -gbɛle "me 'wɔ ylɛle ne, -e 'wolo 'anyɛɛ 'yuslokpo 'ye 'a bɔbɔ 'wɔ -wɛ "ku. 'E 'ye- 'nabhɛ bɔbɔledɛ -dee 'a 'kɛle-: Lagɔ 'ɔ "ne -yiɔ, -wɛ 'ylime. -Ye 'a "zo "ne 'a "no -yi -wɛ 'na 'de 'ye -ame 'e yi -lɔ 'anye -sɛle -ka.

²⁴ Lagɔ -ɔ 'wlɛ- zikpɛ "ne -ɛ -ko "bhle 'klekle -wɛ, 'ɔɔ -noɔ -lɔ "nɔgɔ -nyɛ dodo "bhaa 'na Anyinɛnyɔ yɔ. 'Ɔ "ne -kɛ bhubhɔbhudu 'ye 'nyakpa 'sɔbhɔ -wɛ "me -ko.

²⁵ "Ne 'ɔ -na no -gbɔ 'nyɔkpɔ lɔbhɔ- "ku, "ne 'ɔ -na -bɛɛ' lo 'yɔbhɔ. "Naa- 'ɔyi, 'ɔɔ 'nyɛ -lɔ 'anye 'klekle zikpɛ, nyɔpɔnyɔŋo, "ne 'ɛ -to "bhle 'klekle -wɛ.

²⁶ 'Nyɔkpo -bholo 'ye 'ɔ -no -lɔ tɛɛ, "ne 'ɔ yi -lɔ 'nyakpa 'klekle 'wlɛ -se 'wa "kɛ dodo ne 'klekle "ku 'gli. 'Ɔ -seselia zle "me liɔ "me, "ne 'ɔ yi -lɔ 'du 'na -dee 'nyakpa "kɛ -ko -wɛ wɔkɔ.

²⁷ 'Ɛ -ylɛle 'ɛ soɔ, -se 'nyakpa "kɛ nɛ -kɛ Lagɔ za 'yli "pɔ, 'kplɛkplɛɛ "me 'ye 'ɛ kɛ se -noɔ -ce, 'wa yu -lalɛce yle. -Mɔ, 'ɔyi 'nabhɛ, 'ɔ "ne -ɔkɔkokɔko 'dɛ 'tlole- zɛ.

²⁸ "Naa-, 'ɔyi "me 'ye -a ylele -lɔ zikpɛ, "ne -a 'bha -lɔ bhulɛ "me, "ne -a -le -lɔ. Sɛne 'anyɛɛ lobhlenya 'na -bedia lɛ- -lɔ nɛɛ: "Naa- 'ɔnɛɛ yua 'ye -a -noɔ -lɔ.

²⁹ -A -noɔ Lagɔ 'na yua 'wa 'diɛɛ zaa, -a "ne 'bhɛle- "ne -a "kɛ 'dle 'pɔ -gbɔ Lagɔ 'wlole -badlɛ 'na 'yuslokpo, 'dlasi, 'tiyi 'ye 'wa -tɛle wɛ, "ne 'nyɔkpɔ 'na 'ye 'ɔ 'pɔ "ku 'dle -wɛ.

³⁰ "Tɛnye 'na -ye 'nyakpa "ne 'awɔ -ye 'wa no -yi -wɛ, Lagɔ "ne 'awɔ 'gbo 'di, 'dle 'ye 'ɔ 'piɛ- 'awɔ -lɔ "bhle zɛ. -Dɛmeda, 'ɔ la dodo ne "ku 'na 'nyakpa 'klekle -gbɔ 'wa 'bhelia- 'wanɛɛ zikpɛ kɔ.

³¹ "Naa-, Lagɔ -sɛ lɔbhɔ 'yli 'na 'ye 'ɔ "kɛ 'nyakpa 'gbobhlele "meŋwinɛlesɛ -wɛ. 'Ɔ -sɛ lɔbhɔ 'nyɔkpɔ -bholo 'ɛza "ne 'ɔ yu -lɔ gluzɔ 'wloa-. Sɔbhɔ 'ye 'ɔ -tuɔ -lɔ nyakpa 'ylime -gbɔ 'ɔyi -noɔ -lɔ gbobhlenyɔ -ye 'ɔ -sɛ lɔbhɔ -wɛ yɔ.»

³² Glɛkenya "kɛ gluzɔwloɛ 'na weli 'no ne, -bedia 'sile Pɔle, "ne -wawɛ no -lɔ nɛɛ: «'ɛ ko -soɔ -a -kɛ -eyi -vi -zle "me 'yukwli 'fo!»

³³ "Ne Pɔle yua -lɔ yɔko 'bha.

³⁴ -Mɔ, -bedia -gɛlelo, "ne 'wa yi -lɔ 'dlekukɛlenya "zo, -tiaa Denise gbobhlenya 'na -bholo, ŋɔnɔ -bholo -ɔ 'pa- Damalise 'wa -nyɛ -bedia "bhaa.