Nonoli 16 - Nouveau Testament bété de Gagnoa

Timote 'kwɛle Pɔle -nyɛ Silase "bhaa 'gwe "ku

¹ Pɔle -me Dɛlebe, "ne Lisetle. 'Ɔ -ylele "bhle gɛlenyɔ -bholo -ye 'wa la Timote -wɛ. 'Ɔ "nɔ, Zufoŋɔnɔ yɔ nɛ -lɔ "ne 'ɔ yi -lɔ 'klecɛ "zo. -Mɔ, 'ɔ 'to glɛkeyu yɔ 'awɔ -lɔ.

² 'Ɔnɛɛ nonoli 'nɛne 'awɔ kpɛnyee za Lagɔnya -wa -ko 'awɔ Lisetle "ne Ikoniɔme -du "me -wɛ, 'wa -sɛ 'awɔ 'ɔnɛɛ 'denaade.

³ Pɔle nɛɛ 'ɔ "kɛ Timote kɔme. 'Ɔ 'lubhu- "ku "ne 'ɔ yu -lɔ "ku 'di Zufonya 'wa -ko "ɛ -glɔ -wɛ 'wɔ zɔ -wɛ 'na za, "naa- 'wayi 'klekle -yi 'awɔ -sɛ -gbɔ 'ɔ 'to 'glɛkeyu yɔ 'awɔ.

⁴ Pɔle -nyɛ Silase "bhaa ylɛle 'awɔ 'du -wɛ 'wɔ "me, "ne 'wa -sɛle 'awɔ -glɔnya 'de -gbɔ 'wa "zo "ɛ weli -ye "kɔlepɔnya -nyɛ Zeluzalɛme 'na "yitia "bhaa bhulɛ -wɛ 'plome.

⁵ 'Ɛza, Lagɔ 'na -gligbɛ "tamale 'awɔ "me, 'dlekukɛleɛ "me, "ne 'Klecɛnya zimale 'awɔ zle 'klekle "me.

'Wa lale Pɔle Masedoane

⁶ Pɔle -nyɛ Silase "bhaa me 'awɔ Flizi "ne Galasi -glɔ "me, "naa-, Zuzu Wlewle bhulɛloa 'awɔ -gbɔ 'wa te Lagɔweli Azi -sɛle -ka me.

⁷ "Ne 'wa yi -lɔ Misi -gwegbame ylɛ, "naa-, 'wa 'yɔbhɔ nɛ -gbɔ 'wa "kɛ Bitini me, -mɔ, Zezu 'na Zuzu -soa -gwe "ku.

⁸ Lɔbhɔ 'wa -ylɛle -la -lɔ Misi "ne 'wa yi -lɔ Tloase -du -mee bato 'nyegbe -wɛ 'sibhɔ.

⁹ "Ɛ -sabo -wɛ "me, 'ye Pɔle -bɛɛ' -ylɛlo -lɔ 'yli "klo: Masedoane 'na 'nyɔkpɔ 'nyegbo- nɛ yɔko, "ne 'ɔ bhubhɔ nɛ -lɔ nɛɛ: «-Yaya, yi Masedoane 'anye "ku.»

¹⁰ "Ɛ Pɔle 'na -ye Lagɔ -tuɔ 'ylime -wɛ 'na weli "kɛ 'ple "bhuɔ cuu ne, "ne -a yi -lɔ Masedoane -du "me me. "Naa-, -a -kɛ nɛ 'dleku -gbɔ Lagɔ- la- -lɔ -anye -se -a "kɛ 'ɔnɛɛ 'Denaade "bhle -sɛle.

Filipo -du "me 'ye Lidi -kɛlele -lɔ Lagɔ 'dleku

¹¹ Tloase -du "me 'ye -a "gblɛle- -lɔ bato "me, "ne -a yi -lɔ Samotlase -du "ku me. Zle 'na -vinɛ -ze -la -wɛ, "ne -a yi -la -lɔ Neapolise -du "me me.

¹² Lɔbhɔ -wɛ 'ye -a 'bha- -la -lɔ, "ne -a yi -lɔ Filipo -du 'ɛ 'kpɔ- "ne 'ɛ -zi Masedoane -glɔ "me -wɛ yi, "naa- Wlomɛnya 'na 'glidɛme yɛ 'awɔ -lɔ. -A -sɛ 'awɔ "ɛ 'du -wɛ "me 'yli yɛ.

¹³ -Gbajɛ -zle, -a yi -lɔ "ɛ 'du -wɛ "me 'bha-, "ne -a yi -lɔ 'ŋu yɔko me, "naa-, -a 'pɔ nɛ 'dle -gbɔ lɔbhɔ 'ye Zufonya 'sibhɔle nɛ "ku -gogogodo "ne 'wa bhubhɔ. -A yi -lɔ -duku 'gli, "ne 'ŋwenea -wa "zole- lɔbhɔ 'wli -wɛ -a yua -lɔ Lagɔweli sloa-.

¹⁴ 'Wanɛɛ 'glɛme 'na -bholo 'pa- 'awɔ Lidi, lokwi 'na "namanɔ -zɛle -ɛ 'tɛ- 'kpɛ "ku -wɛ 'ye 'ɔ 'pɔ 'awɔ -lɔ 'pɔlo "ku. Tiatile -du "ku 'na 'ŋuyu yɔ 'awɔ -lɔ "ne 'ɔ lɔbhɔ 'awɔ -lɔ Lagɔ "ku "plomezoɛ "me. "Ɛ 'ŋɔnɔ -wɛ -fo 'awɔ -anye 'yukwli, "naa-, Anyinɛnyɔ -vulu 'awɔ 'ɔnɛɛ 'dle "ku -se 'ɔ "kɛ 'awɔ -kɛ Pɔle 'na -ye 'ɔ bhulɛ 'awɔ -wɛ "me 'no.

¹⁵ -Sɔɔdɛku 'ɔ -yle batɛme, 'ɔnɛɛ -bhudu "me 'na -konya "bhaa -wɛ, lɔbhɔ -ye Lidi laloa- -lɔ 'ɔnɛɛ sueme. 'Ɔ nɛɛ: «'A 'cɛ 'diɛɛ 'dleku -kɛ -gbɔ, -ame 'e -kɛle Anyinɛnyɔ 'dleku ne, 'a yi 'neɛ dɛne -ko -ka!» 'Ɔ 'sisi- 'anye "ku "ne -a yi -lɔ "ku 'ŋunu.

'Wa 'pɔ- Pɔle -nyɛ Silase "bhaa -jiɛ "me Filiipo

¹⁶ 'Yli -bholo "me, -a me nɛ bhubhɔledɛme, "ne "kulɔbhɔŋuyu -bholo yi -lɔ 'anye 'sibhɔle- -ka -yi. 'Ɔ -kɛ nɛ "ku 'yɔbhɔ -zuzu. -Gbli 'na zuzu -ko nɛ -lɔ keyi "ne 'ɔ bhulɛ nɛ -lɔ 'nyakpa 'na "kukoweli gbɛklɛklɛ zaa, 'ɔnɛɛ "bhenya lu nɛ 'dlasi "ku.

¹⁷ 'Ɔ -bhli nɛ -anye 'beku, Pɔle -nyɛ -ame "bhaa, "ne 'ɔ "kpa nɛ -lɔ "me nɛɛ: «"Ɛ 'nyakpa ne Lagɔ -ɔ zi "ku 'na "kulɔbhɔnya 'waa -lɔ! 'Wa slo 'anye -gwe -ye 'a "kɛ bhli "ne 'a "kɛ "po -wɛ dɛ.»

¹⁸ -Mɔ, "ɛ "kulɔbhɔŋuyu -wɛ, 'yli 'klekle "me, 'ɔ no 'ce "ɛ -bhelebhele -wɛ 'yiɛ. Pɔle 'pɔ- -kɛle, 'ɔ -wolo 'beme, "ne 'ɔ yi -lɔ "ɛ Zuzu -nyɛnye -wɛ bhulɛle nɛɛ: «"Bhenyɔ, Zezu Kli 'na 'tɔ "me 'ye 'e bhulɛ -lɔ, 'bha- "ɛ 'ŋɔnɔ -wɛ "me.» "Ɛ doɔ cuu ne 'ɔ 'wlo- zɔ.

¹⁹ 'Ɔnɛɛ 'ye 'ɔ lɔbhɔ "ku -wɛ 'na 'dleku "ne 'awɔ -la 'tɛ-, "naa-, 'ɔ -koa la 'dlasi "ku -nɛme zɛ, 'ɛza, 'wa "nyegbea -lɔ Pɔle -nyɛ Silase "bhaa, "ne 'wa yua -lɔ gbobhlenya "yitia kɔme -digbɛ "me.

²⁰ "Ne 'wa yua -lɔ Wlomɛnya 'na gbobhlenya kɔ 'je, ŋwɛnɛɛ: «'Nyakpa ne, -nyimɔ -lɔ 'anyɛɛ 'du, "ne Zufonya 'waa -lɔ.

²¹ "Ne 'wa -sloa -lɔ -anye -kosɛ -lele 'na -see -a "kɛ 'nɔŋo, "ne -see -a "kɛ -ko, -mɔ, 'anye, Wlɔmo 'na 'nyakpa, -a -cɛ "ku 'ŋunu, "ne -a -cɛ 'lelee gɛlele-.»

²² "Ne "ɛ -zakpɛ -wɛ, Pɔle -nyɛ Silase "bhaa yua -lɔ kɛle "ku 'lele-, lɔbhɔ 'ye gbobhlenya -sɛloa -lɔ "koti "ku "me, "ne 'wa yi -lɔ no -gbɔ 'wa 'lɔbhoa "kple nu.

²³ Zaa, 'wa 'lɔbhoa "bhuɔ -wɛ, "ne 'wa yua -lɔ -jiɛ "me "pɔ, "ne 'wa yi -lɔ "klokolenyɔ bhulɛle -gbɔ 'ɔ 'zoloa- -kɛ 'yliku 'tee.

²⁴ 'Ɛ "klokolenyɔ 'no- 'wanɛɛ weli "me, "ne 'ɔ yua -lɔ -jiɛbhudu "me 'na 'gwe 'gwe 'yli 'gbu "me "zole.

²⁵ Zle -jijɛku Pɔle -nyɛ Silase "bhaa yi -lɔ Lagɔ bhubhɔ, "ne 'wa yu -lɔ lo keyi 'dile. 'Walua -jiɛnya -foa nɛ 'yukwli.

²⁶ Cuu ne, dodo tɛtɛle, -jiɛbhudu zuzuɔ "me, "ne 'ɛnɛɛ -gbulɛ 'klekle yi -lɔ 'kɛleɔ, "ne -jiɛnya 'klekle 'na 'gɔgɔ yi -lɔ 'diɔ.

²⁷ "Ne "ɛ "klokolenyɔ -wɛ yi -lɔ 'glɔ-, 'ɔ 'na 'wolo "ɛ -jiɛbhudu 'na -gbulɛ -kɛleɔ, 'ɔ 'pɔ- nɛ 'dle -gbɔ -jiɛnya -fɔtɔ, "ne 'ɔ yi -lɔ 'ɔnɛɛ 'gblɛ 'bɛ "me -sɛ -se 'ɔ "kɛ 'ɔyi lɔbhɔ.

²⁸ "Ne Pɔle yi -lɔ "me "kpa "yitɛ "ku: «Te "kɛ -eyi -nyɛnye no, -mɔ -anye 'klekle -a -ko -kɛ "bhle.»

²⁹ "Ne "ɛ "klokolenyɔ -wɛ yi -lɔ zle lo 'yɔbhɔ, 'ɔ tɛtɛle, "ne 'ɔ yi -lɔ -bhudu -cibhɛ -mee Pɔle -nyɛ Silase "bhaa ko -wɛ -sokwɛ "me -plɛle "ne 'ɔ yi -lɔ "klo -siɛ 'gbli 'wayi 'yliku.

³⁰ Lɔbhɔ 'ye 'ɔ 'wloaloa- -lɔ zɔ, "ne 'ɔ yua -lɔ lo 'yɔbhɔ: «Anyinɛnyɔ, -ye 'e "kɛ bhɔ no, "ne 'e "kɛ bhɔ "po 'a?»

³¹ "Ne 'wa yi -lɔ sɛne lɛ nɛɛ: «-Kɛle Anyinɛnyɔ Zezu Kli 'dleku, -se -e "kɛ 'po, -e -nyɛ -neɛ' -bhudu "me 'na -konya 'wɔ "bhaa.»

³² "Ne 'wa yu -lɔ Anyinɛnyɔ 'na "kukoweli bhulɛle, 'ɔnɛɛ -bhudu "me 'na -konya 'wɔ "bhaa.

³³ "Ɛ 'gle -bhele -wɛ "me, titiɛ "me, "ɛ slojayu -kɔmoa -se 'ɔ "kɛ 'ɔnɛɛ 'gbiɛ 'glo. Lɔbhɔ "ne -la "me 'gwlɛ, "ne 'ɔ yu -lɔ batɛme "nyɛ, 'ɔnɛɛ -bhudu "me 'na -konya 'wɔ "bhaa.

³⁴ "Ne 'ɔ yi -lɔ Pɔle -nyɛ Silase "bhaa 'ɔnɛɛ sueme kɔme. "Ne 'ɔ yua -lɔ lilɛ 'nyɛ 'ɔnɛɛ -bhudu "me 'na -konya "bhaa 'ŋwɛnɛ lɔbhɔ -se 'wa -kɛle Lagɔ 'dleku -wɛ za.

³⁵ -Ye zle -ze -wɛ, "ne gbobhlenya yi -lɔ "slojanya lebhe -gbɔ 'wa bhulɛle -jiɛbhudu 'na "klokolenyɔ nɛɛ: «'Ɔ -sɛ "ɛ 'nyakpa -wɛ -jiɛ "me!»

³⁶ "Ne "ɛ -jiɛbhudu 'na "klokolenyɔ yi -lɔ Pɔle bhulɛle nɛɛ: «Gbobhlenya -lebhe 'nyakpa -gbɔ 'e 'tale 'anye yi zaa, 'a 'wlo zɔ -se 'a me, 'a wɔtɔ- "ku -bɔŋobɔŋo!»

³⁷ "Ne Pɔle yi -lɔ no nɛɛ: «'Wa "ne -kɛ -anye 'gbobhlele-, "ne 'wa yi -lɔ -anye -zejilɛ "me 'lɔbhɔle, "ne 'wa yi -lɔ -anye -jiɛ "me "pɔ, "ne -anye Wlɔmo 'na 'nyakpa 'ye -a -noɔ -me -lɔ, "ne -dɛme 'na dɛku, 'wa 'yɔbhɔ -gbɔ 'wa "kɛ -anye 'wime -jiɛ "me -sɛ? "Ɛ "ne sɔbhɔ 'bhɛle, zaa, 'wayigɛsɛ 'wa yi 'wa "kɛ 'anye -jiɛ "me -sɛ!»

³⁸ "Ne "ɛ "slojanya yi -lɔ "ɛ gbobhlenya 'de -sɛle -ka me, "ne -nyanɔ yua -lɔ lɔbhɔ 'ye 'wa 'no- "me -gbɔ Wlɔmo 'na 'nyakpa 'ye 'wa -noɔ -wɛ za.

³⁹ "Ne 'wa yua -lɔ bhubhɔ -ka me, lɔbhɔ 'wa -sɛloa -lɔ -jiɛ "me, "ne 'wa yua -lɔ bhulɛle -gbɔ 'wa 'bha "ɛ 'du -wɛ "me.

⁴⁰ Pɔle -nyɛ Silase "bhaa 'wlo lɛ -jiɛ "me zɔ ne, Lidi 'wa -me -lɔ yle -ka, "ne 'wa yi -lɔ 'wa "nowlia 'wɔ 'kwɛme "tamalea-, "ne 'wa yi -lɔ me.