Nonoli 15 - Nouveau Testament bété de Gagnoa

Zezu 'na gɛlenya 'na 'wlizoɛ "yitɛ Zeluzalɛme

¹ 'Nyakpa 'na -bedia 'bha- Zude -glɔ "me "ne 'wa yi -lɔ Atiɔse -du "me -yi. 'Wa 'yɔbhɔ 'awɔ -gbɔ 'wa -kɛ 'awɔ 'wanɛɛ -ɛ 'nɛnoa -gɛ -wɛ 'wa "nowlia sloa-. -Ye 'wa -bhulɛloa 'awɔ ne lɛ: «'A "mɔ 'ayi "ku 'di- -see 'ɛ -ko Moyize 'na -Lɔ "me -wɛ, 'a -ka 'popoɛ yle.»

² -Mɔ, Pɔle -nyɛ Banabase "bhaa 'wa "ne "ku 'ŋunu- zaa, 'wayi 'wɔ "bhaa 'wa 'diɔle- "me "yitɛ "ku. Lɔbhɔ 'ye Atiɔse 'na Lagɔnya -no -lɔ nɛɛ: Pɔle, Banabase "ne 'nyakpa 'na -bedia 'wɔ "bhaa 'wa me Zeluzalɛme, "kɔlepɔnya "ne "yitia "bhle yle -ka, "ɛ weli -wɛ za.

³ "Ne Atiɔse 'na Lagɔgligbɛ yua -lɔ 'dlasi kɔ 'je, -se 'wa "kɛ -glɔ "ku me. 'Wa -ylɛle Fenisi "ne Samali -glɔ "me, "ne 'wa -sɛle -lɔ -glɔnya -wa "ne Zufonya 'waa -wɛ 'de -gbɔ 'wa 'bhelia- 'wanɛɛ -kosɛ -nyɛnye kɔ -se 'wa "kɛ 'wayi Lagɔ kɔ 'je. "Ne 'ŋwɛnɛ 'lɔbhɔ nɛ -lɔ "ɛ "nowlia -wɛ 'klekle.

⁴ 'Wa "kɛ Zeluzalɛme ylɛ ne, Lagɔgligbɛ, "kɔlepɔnya "ne -gligbɛyitia soa- 'tee. Pɔle "ne Banabase yua -lɔ -ye Lagɔ -noa 'wli -wɛ 'na 'de sɛle-.

⁵ "Ne -wa -ko nɛ faliziɛnya keyi "ne 'wa "zo- 'klecɛnya -wɛ yi -lɔ no nɛɛ: «'Wa yi nɛ -wa "ne zufonya 'waa "ne 'wa "zo- 'klecɛnya -wɛ "ku 'di "bhuɔ, "ne 'wa "koa nɛ -lɔ bhulɛle- -gbɔ 'wa -kɛle Moyize 'na -Lɔ kɔ.»

"Kɔlepɔnya "pɔ Atiɔse 'na 'klecɛnya "bɔgo "ku

⁶ Lɔbhɔ 'ye "ɛ "kɔlepɔnya "ne "yitia "zo- -lɔ 'wli -see 'wa "kɛ -ɛ weli -wɛ 'ylime 'ye.

⁷ 'Wanɛɛ bhulɛweli "tamalea 'awɔ "me, "ne Piɛle yi -lɔ weli "ku 'libhi, "ne 'ɔ yi -lɔ no nɛɛ: «"Nowlia 'wanye, 'a -yi -sɛ -gbɔ "kucidɛku 'ye Lagɔ -sɛ 'a -lɔ lɔbhɔ -ame 'anye 'glɛme, -se 'e "kɛ 'a -luku -glɔnya 'na -wa "ne Lagɔ -yi -wɛ 'Denaade -sɛle, "ne -wa 'no- "me -wɛ yi -lɔ 'dlekukɛlenya "zo.

⁸ "Ne Lagɔ -ɔ -yi 'nyakpa 'na 'dle -wɛ yua -lɔ 'ɔyi 'ylime tua- -gbɔ 'ɔ 'soa- kɔ, -sɔɔdɛku 'ɔ 'nyoa- Zuzu Wlewle -anyɛɛ sɛ -wɛ.

⁹ 'Ɔ "ne -anye -nyɛ 'wayi 'wɔ "bhaa "me -seselia, -mɔ, 'dlekukɛleɛ "me 'ye 'ɔ "zoa- -lɔ 'wlele.

¹⁰ Zaa, -dɛmeda, sɔɔbɛɛza 'a vɔvɔ bhɔ Lagɔ, "ne sɔɔbɛɛza 'a jilɛ bhɔ gɛlenya -li 'na -ɛ 'wɛle kɔ -wɛ 'wli 'a? "Ne -a 'to 'wɔ, "ne -anye 'nabhɛ -a "ne 'ɛnɛɛ 'slusluɛ 'bhɛle-.

¹¹ 'Bhɔ! -Ye -a -kɛ 'dleku ne lɛ : -Anyinɛnyɔ Zezu 'na -jɔlo "fu 'ye 'ɔ "nyɛ -lɔ 'anye 'wɔ "bhaa -anye!»

¹² "Ne -wa -zo 'wli -wɛ yi -lɔ "ku 'tli 'klekle, "ne 'wa 'fo -la -lɔ Banabase -nyɛ Pɔle "bhaa 'yukwli, "ne 'wa -sɛ -lɔ zɛzɛ "ne -bɛɛ' 'na -ɛ 'nyea -wɛ 'na 'de, "ne Lagɔ -ylɛloa "me, "ne 'wa yi -lɔ 'nyakpa 'na -wa "ne Lagɔ -yi -wɛ 'yliku zɛzɛ "pɔle.

¹³ 'Wa "kɛ kɔ 'bhiɛ "bhuɔ ne, Zake 'libhi -la -lɔ weli "ku, "ne 'ɔ yi -lɔ no nɛɛ: «"Nowlia 'wanye, -a 'fo -ame 'yukwli.

¹⁴ "Naa-, Simɔ sibha- lɔbhɔ -anyɛɛ 'dle nɛɛ: "Kucidɛ 'ce "ku, Lagɔ 'libhi- -glɔ -wa "ne Lagɔ -yi -wɛ 'glɛme 'nyakpa "ku -se 'wa "kɛ 'ɔnoa "zo.

¹⁵ 'Ye 'wa bhulɛ -wɛ -nyɛ "guɔkwɔmenya 'na weli "bhaa 'ɛ -zo -bhele. -Sɛne Lagɔ-bɔgo lɛ -lɔ nɛɛ:

¹⁶ -Ɛwɛ "kɛ 'ple- "bhuɔ ne, Anyinɛnyɔ nɛɛ: 'E yi 'ce Davide 'na -bhudu -ɛ -bhli -wɛ "kusɔ 'sɔbhɔle -ka yi. 'Ɛnɛɛ -ɛ -to lɔbhɔ -wɛ, 'e 'yi 'ce "kusɔ "sɔbhɔle. "Ne 'e 'yi 'ce 'ya "nyegbelea-.

¹⁷ "Ne 'nyakpa 'wa -to lɔbhɔ -wɛ yi 'ce Anyinɛnyɔ za 'yli "pɔ. 'Wa -nyɛ -glɔnya 'klekle 'wa -di 'neɛ 'tɔ -wɛ "bhaa. Anyinɛnyɔ 'na 'ye 'ɔ bhulɛ ne lɛ, 'ɔ nɛɛ: Soɔ 'ye 'ɔ -no -lɔ "ɛ 'ye 'ɔ "kɛ nɛ no -wɛ.

¹⁸ 'Ɔ -gbɔ "ne 'wa -yibhlele "ɛ -li -wɛ. -Sɔbhɔ 'ye -ɛ -ko 'ce -lɔ -godogodo.»

¹⁹ -Ame Zake, 'e 'yɔbhɔ -gbɔ -wa "ne Lagɔ -yi "ne 'wa 'bheliɔ- kɔ -wɛ, 'a te 'wanɛɛ -gbapeɛ zimalea-.

²⁰ -Mɔ, -a "kɛloa "ku -gbɔ 'wa te -kɛ -nɛmɛ 'na -ye 'wa bɔbɔle "fu 'na Lagɔ -wɛ li. -Se 'a te -kɛ 'ayi 'kpetekli -slu, "ne -nɛmɛ 'ye 'wa "ne 'wli "ku 'di-, "ne 'ɛ -ko dlu "me -wɛ li.

²¹ -See 'ɛ 'bhale- 'awɔ "bhle tɛtɛ -nyakpa "ku -ce, Moyize -sɛle 'awɔ 'ce dukuduku 'na 'nyakpa 'de, "ne bhubhɔbhudu "me 'wa zɛle -me 'lelee "me -gbajɛzle 'klekle "me.

Zezu 'na gɛlenya kɔme Atiɔse 'na 'klecɛnya "bɔgo.

²² Nuɛ -bhele "me, "kɔlepɔnya "ne -gligbɛyitia, "ne Lagɔgligbɛ 'klekle yi -lɔ no nɛɛ 'wa -sɛ 'wayi 'glɛme 'nyakpa -se 'wa "koa Atiɔse lebhele-, 'wa -nyɛ Pɔle "ne Banabase "bhaa. "Ne 'wa yi -lɔ Zude -ye 'wa 'la Balesabase -wɛ "ne Silase, 'nyakpa 'na 'wa -ko 'plome 'wa "nowlia 'glɛme -wɛ 'waa -lɔ.

²³ 'Wayi, 'wa 'je- -lɔ "ɛ "bɔgo -wɛ kɔ. -Ye 'wa bhulɛ "ɛ "bɔgo "me ne lɛ: "Kɔlepɔnya, -gligbɛyitia, "ne "nowlia 'wɔ 'bhɛle 'dlekukɛlenya -wa "ne Zifonya 'waa, "ne 'wa -ko Atiɔse Sili "ne Silisi -wɛ.

²⁴ -A 'no- "me -gbɔ -anyɛɛ 'glɛme 'na -bedia -me 'anye 'dle nuɔ 'yiɛ -ka, "ne 'wa -cia 'anyɛɛ 'dle "me 'wanɛɛ nonoli "me, "ne -a "noa nɛ -kɛ -lebhe.

²⁵ 'Ɛnɛɛ za, nuɛ -bhele "me, -a -sɛ -lɔ lɔbhɔ 'nyakpa -gbɔ 'wa yi 'anye 'ylime 'ye ka 'wa -nyɛ -anyɛɛ 'dlegɛle-titoa Banabase "ne Pɔle "bhaa.

²⁶ 'Nyakpa 'wa -ple 'wanɛɛ -zikpɛ Anyinɛnyɔ Zezu Kli 'na 'tɔ "me -wɛ 'waa -lɔ.

²⁷ 'Ɛza, -a 'lebhele -lɔ 'anye Zude "ne Silase "ku, -se 'wa "kɛ 'anye 'yliku -see -a "pɔle 'gɔme 'dle -wɛ 'na weli bhulɛle.

²⁸ "Naa-, Zuzu Wlewle, "ne -anye 'nabhɛ, -a no -lɔ nɛɛ: 'Wa te -kɛ -la 'anye -bɛɛ' 'na -vinɛ 'wli -jilɛ. -Mɔ, 'ye 'a "kɛ no ne lɛ:

²⁹ 'A te -kɛ -nɛmɛ -ye 'wa bɔbɔle -tɛkpɔ, gluzilɛ -wɛ 'wɔ li. -Se 'a te -kɛ 'lelee -nɛmɛ -ye -gbotu 'sale blo "ku -wɛ li. 'A te "kɛ 'ayi 'kpetekli -slu. Zaa, 'ye -a bhulɛle 'anye -wɛ, 'a "zo 'plome 'tee, -a "nowlia 'wanye -degasɛ.

³⁰ "Ne Pɔle, Banabase, Zude "ne Silase yua -lɔ yɔko 'bha, "ne 'wa yi -lɔ Atiɔse me. 'Wa yi -lɔ Atiɔse 'na 'klecɛnya 'wli "zo "ne 'wa yua -lɔ "ɛ "bɔgo -wɛ kɔ 'je.

³¹ 'Wa -zɛle nɛ "ɛ "bɔgo -wɛ "me, 'ŋwɛnɛ 'lɔbhoa- nɛ, "naa- 'ɛ "tamaloa nɛ 'kwɛme zɛ.

³² Zude -nyɛ Silase "bhaa, -wa -noɔ "guɔkwɔmenya 'waa -wɛ, 'wa 'tamaloa nɛ 'kwɛme -nyɛ 'dleku "bhaa.

³³ Zaa, 'wa soa 'yli yɛ yɔko, "ne "ɛ "nowlia -wɛ yua -da -lɔ 'yi 'tale-, "ne 'wa yua -lɔ no nɛɛ: 'A me -degasɛ, -se 'a yle "bhle 'wa -lebhe 'anye -wɛ. [

³⁴ -Mɔ, Silase Atiɔse 'nɛmalo -gɛ za 'ɔ -to "bhle "ne Zude 'ɔyikɔ yi -lɔ Zeluzaleme 'wlizɔ zi.]

³⁵ 'Ɛ kɛ Pɔle -nyɛ Banabase "bhaa 'waa, 'wa -to Atiɔse 'wa -nyɛ 'nyakpa -kwleyia 'na -bedia -wa -gɛleloa -wɛ "bhaa, 'wa slo 'awɔ Lagɔweli "ne 'wa sɛle 'awɔ Anyinɛnyɔ 'na 'Denaade 'nyakpa.

Pɔle -nyɛ Banabase "bhaa 'wa -seseliɔ yɔko

³⁶ 'Yli yɛ "kɛ 'ple ne, "ne Pɔle yi -lɔ Banabase bhulɛle nɛɛ: «-A zi 'wlizɔ, -se -a "kɛ -a "nowlia -wa -ko dukuduku "ne -ye -a -sloa Anyinɛnyɔ 'na weli -wɛ, -a "koa "ku 'be, -se -a "kɛ 'wanɛɛ -gɛledɛ yibhlele-.»

³⁷ 'Ɛza, Banabase 'yɔbhɔ nɛ -gbɔ 'wa "kɛ Zaa -ye 'wa la Malke -wɛ kɔme.

³⁸ -Mɔ, Pɔle 'yɔbhɔ -gbɔ Zaa Malke -ɔ bhoa- Pafili yɔko -wɛ, "ne 'wa "ne libhɔ 'gɔme -nole -wɛ "bhaa 'wa -ka "ku 'nɔŋole-.

³⁹ Pɔle -nyɛ Banabase "bhaa 'wa -nyimɔle, "ne 'wa yi -lɔ yɔko -seliɔ. "Ne Banabase yi -lɔ Malke "ku 'libhi "ne 'ɔyi "bhaa 'wa yi -lɔ Siple me.

⁴⁰ "Ne Pɔle yi -lɔ Silase -tɔ "ne 'ɔ -nyɔ "bhaa 'wa yi -lɔ me, "ne "ɛ "nowlia -wɛ yu -lɔ Anyinɛnyɔ 'na -jɔlo "ku 'kwlialea-, "ne 'ɔ yi -lɔ me.

⁴¹ "Ne Pɔle -nyɛ Silase "bhaa yi -lɔ Sili "ne Silisi -glɔ "me me, -se 'wa "kɛ Lagɔgligbɛ "me 'nyakpa 'kwɛme "tamalea.