Nonoli 14 - Nouveau Testament bété de Gagnoa

Pɔle "ne Banabase -ko Ikoniɔme

¹ "Ɛ -bhele -wɛ -ylɛle -me 'lelee -lɔ Ikoniɔme: Pɔle -nyɛ Banabase "bhaa -me 'awɔ -lɔ Zufonya 'na "mebhubhɔlebhudu "me, "ne 'wa yi -lɔ "bhle Lagɔweli bhulɛle-, "ne "ɛ Zufonya -nyɛ Glɛkenya 'na "kwleyia "bhaa yi -lɔ Lagɔ 'dleku kɛle-.

² -Mɔ, Zufonya 'na -wa "ne kɔ -bheliɔ -gbo 'ŋunu- -wɛ, 'wa 'pɔ- 'awɔ -wa "ne Lagɔ -yi -wɛ weli 'wlime -gbɔ 'wa 'pɔ 'wa "nowlia 'klecɛnya 'wɔ za "nyɛnye "ku 'dle.

³ -Mɔ, Pɔle -nyɛ Banabase "bhaa -ko 'awɔ Ikoniɔme -du "me, 'wa -gwlɛ 'awɔ "bhle kpɛnyee. "Ne 'wa sɛle 'awɔ -lɔ "bhle Lagɔ 'na 'Denaade 'nyakpa, 'wa "ne "gu 'awɔ. "Ne Anyinɛnyɔ yua -lɔ 'ɔnɛɛ 'bhɛloɛ "nyɛ -se 'wa "kɛ zɛzɛ "pɔ 'ɛ -nyɛ -li 'na -ɛ -sɛ geji "ku "bhaa, 'wayi 'ye 'ɛ 'bhale -lɔ kɔ.

⁴ "Ne "ɛ 'du -wɛ "me 'na -konya yi -lɔ "me -dliɔdliɔle, -wawɛ -ko Zufonya keyi, "ne -wawɛ -ko "kɔlepɔnya keyi.

⁵ "Ne -wa "ne Lagɔ -yi -wɛ, "ne Zufonya -nyɛ 'wanɛɛ "cifia 'wɔ "bhaa yi -lɔ weli "ku "zolea- -gbɔ 'wa "koa 'nyɛze ziɛ-, -se 'wa "koa 'tiyi "pɔ 'kpokposɛ.

⁶ Pɔle -nyɛ Banabase "bhaa 'no- lɛ "ɛ weli -wɛ "me ne, "ne 'wa yi -lɔ Likaoni, Lisetle "ne Dɛlebe "ne "ɛ 'du -wɛ 'wɔ yɔko "gule -ka me.

⁷ "Bhle 'wa -sɛle -me 'awɔ 'lelee -lɔ Lagɔ 'na 'Denaade.

Pɔle -ko Lisetle

⁸ -Mɔ, "ɛ Lisetle -du -wɛ "ku 'nyɔkpɔ -bholo -ko 'awɔ "bhle, 'ɔ "ne 'bhɛle 'ɔ "kɛ 'ya "nyegbele, 'ɔ 'kɔtɔ- "ne 'wa yu -lɔ 'gwɛle-, 'ɔ "ne 'nɔŋo 'awɔ gou.

⁹ 'Yli -bholo "me, Pɔle bhulɛ 'awɔ Lagɔweli "ne 'ɔ -fo 'awɔ 'yukwli, "ne Pɔle yu -lɔ "ku 'wolo- -vlee, 'ɔ "kɔ 'ylime 'ye -gbɔ 'ɔ -kɛ 'dleku zaa, 'ɔ yi 'po ne

¹⁰ 'ɔ yu -lɔ 'gbo 'dile "yitɛ "ku nɛɛ: «-Sɔ "ku -se "nyegbele- 'ya -gbii.» "Ne "ɛ 'nyɔkpɔ yi -lɔ "ku -sɔ -vaa, "ne 'ɔ yi -lɔ 'nɔŋo.

¹¹ 'Nyakpa 'na -zakpɛ, -wa 'ye- "ɛ Pɔle 'na nonoli ne 'ylime -wɛ, bhulɛ -lɔ -sɛne Likaoniɛ -gbo "me nɛɛ: «lagɔ 'wɔ 'libhi- -kɛ 'nyakpa 'na ku "ku, "ne 'wa yi -kɛ -lɔ -anyɛɛ 'mɛne zɔ 'sibhɔle- -ka yi.»

¹² "Ne 'wa la -lɔ Banabase «Zeise» "ne Pɔle «Ɛlemɛse» sɛko -wɛ, 'ɔ gbɔloa nɛ -lɔ 'nuɔ "ku zɛ. 'Du 'na -plɛledɛ lɔbhɔ 'ye Zeise 'na bɔbɔbɔbɔ-bhudu -ko 'awɔ -lɔ.

¹³ Bɔbɔnyɔ, -ɔ bɔbɔ Zeise -wɛ -nɛme 'awɔ "bhlawɔ -nyɔ 'na 'gwe 'ye 'wa 'tɛlia -maflɛ nu -wɛ. "Ne 'ɔ yi -lɔ 'duwli "ku kɔme. "Ne "ɛ -zakpɛ -wɛ yi -lɔ "ku 'ŋunu -gbɔ 'wa bɔbɔ Pɔle -nyɛ Banabase "bhaa.

¹⁴ "Ɛ weli -wɛ -pla -lɔ "kɔlepɔnya Banabase -nyɛ Pɔle "bhaa kɛle "me kpɛnyee, "ne 'wa yi -lɔ 'wanɛɛ "koti "me ylɛylɛle-. "Ne 'wa yi -lɔ "ɛ 'nyakpa 'na -zakpɛ -wɛ 'sibhɔle "mekpaɛ "me,

¹⁵ «"Nowlia 'wanye, -ye 'a no bhɔ 'doɔ 'a? -Anye 'nyakpa 'ye -a -noɔ -me -lɔ 'anyɛɛ sɛ! -A -yi 'anye 'Denaade -sɛle -ka. 'A 'bha- 'anyɛɛ -jɛjɛ lagɔ -wɛ 'beku! -Se 'a 'yli- Lagɔ 'ɔ -yɛ gbligbli -wɛ lo. "Naa-, 'ɔɔ 'wlɛ- -lɔ "nɔgɔ, dodo, jinyɛ "ne -li -ɛ -gɔ 'yli "ne -li -ɛ "ne 'yli -gɔ -wɛ.

¹⁶ 'Gɔgɔ "me 'ɔ 'tale- 'awɔ 'ɔnɛɛ 'nyakpa yi "ne 'wa yi 'awɔ -lɔ -gwe 'na -ye 'wa -wa -wɛ bhli.

¹⁷ -Mɔ, Lagɔ gbɔ 'lelee 'ɔnɛɛ 'nɛne -ko -ylime za, 'ɔ 'bhalea "nɔgɔ "me 'ŋu "ne lilɛ 'po, "ne 'ɔ "zo 'anye 'ŋwɛnɛ 'dlezɔ, "ne 'ɔ 'nyɛ 'lelee 'anye lilɛ.»

¹⁸ -Mɔ, "ɛ "kɔlepɔnya bhulɛ "fu "ɛ soɔ, -ɛ -to -la "bhle 'tekeyi -se "ɛ -zakpɛ -wɛ "kɛ -ye 'wa no -gbɔ 'wa te no -wɛ no.

¹⁹ Lɔbhɔ 'ye Zufonya -wa 'bha Atiɔse "ne Ikoniɔme -wɛ ylɛ -lɔ 'du, "ne 'wa yi -lɔ "ɛ -zakpɛ -wɛ Pɔle -nyɛ Banabase "bhaa nu "zolea-. "Ne 'wa yi -lɔ Pɔle 'tiyi "pɔ, "ne 'wa yu -lɔ -gbisi "ne 'wa yu -lɔ "ɛ 'du -wɛ "me -sɛ, 'wa -ta -gbɔ "ku- 'ye 'ɔ "ku-.

²⁰ "Ne gɛlenya yi -lɔ yi, "ne 'wa yu -lɔ bli-, "ne 'ɔ yi -lɔ "ku -sɔ, "ne 'ɔ yi -lɔ 'du "me plɛ, zle 'ze -la -wɛ 'ɔ -nyɛ Banabase "bhaa, "ne 'wa yi -lɔ Dɛlebe -du "me me.

Pɔle -nyɛ Banabase -zi Atiɔse 'wlizɔ

²¹ 'Wa -sɛle 'awɔ 'Denaade "ɛ 'du -wɛ "me. 'Wa -yle lɛ gɛlenya -kwleyia "bhuɔ ne, lɔbhɔ 'ye 'wa -zile -lɔ Lisetle, Ikoniɔme "ne Atiɔse 'wlizɔ.

²² "Ne 'wa yi -lɔ gɛlenya bhulɛle -gbɔ 'wa -kɛle Lagɔ 'dleku, 'kwɛme "tamaleɛ "me, "ne 'wa yi 'lelee -lɔ no nɛɛ: «-A yi -gbape kpɛnyee "ne -a "kɛ -lɔ Lagɔ 'na 'Kamalezikpɛ "me plɛ.»

²³ Pɔle -nyɛ Banabase "bhaa 'wa -tɔ "yitia -ɔkɔkokɔko 'na Lagɔ -gligbɛ "me. 'Wa bhubhɔ 'awɔ, "ne 'wa 'te 'awɔ nuɛ, "ne 'wa yua -lɔ Anyinɛnyɔ -ye 'wa -kɛ 'dleku -wɛ "ku kulɛle-.

²⁴ "Ne 'wa yi -lɔ Pisidi -glɔ "me ylɛle, "ne 'wa yi -lɔ Pafili -glɔ "me me.

²⁵ 'Wa 'sibhɔ- Pelɛze, "ne 'wa yi -lɔ Lagɔweli -sloa, "ne 'wa yi -lɔ Atali -du "me me.

²⁶ "Ɛ 'doɔ, 'wa 'gblɛle- 'awɔ -lɔ bato "me, "ne 'wa yi -lɔ Atiɔse me, 'du -mee 'wa -kwilɛloa 'awɔ Lagɔ "ku -gɔgɔ "me, libhɔ 'ye 'wa no -wɛ za.

²⁷ 'Wa ylɛ lɛ Atiɔse 'du, "ne 'wa yi -lɔ Lagɔ -gligbɛ "me 'na 'nyakpa 'wli "zo, "ne 'wa yua -lɔ libhɔ 'ye 'wa -no -wɛ 'na 'de -sɛle. -Mɔ, -tiaa 'nyakpa 'na -wa "ne nɛ Lagɔ -yi, "ne 'dlekukɛleɛ -yua "me -wɛ 'na weli 'wa -bhulɛloa 'awɔ -lɔ.

²⁸ 'Wa -gwlɛ 'awɔ "ɛ gɛlenya -wɛ yɔko.