Nonoli 13 - Nouveau Testament bété de Gagnoa

Zuzu Wlewle -tɔ Banabase -nyɛ Sɔle "bhaa

¹ Atiɔse 'na Lagɔgligbɛ "me, "guɔkwɔmenya "ne Lagɔweli -sloanya -ko 'awɔ "bhle: Banabase, Simeɔ -ye 'wa la 'nyɔkpɔ -kpɔ, Silɛne 'na Lisiuse, 'du -ye 'wa la Mana 'na 'nyɔkpɔ -ɔ -nyɛ 'Kamalenyɔ "yitɔ Elode "bhaa 'wa 'nɔŋo 'awɔ 'yueja dɛku -wɛ "ne Sɔle.

² 'Yli -bholo "me, 'wa -ko 'awɔ Anyinɛnyɔ bhubhɔ dɛku nuɛteɛ "me, "ne Zuzu Wlewle yi -lɔ no nɛɛ: «'A -sɛ lɔbhɔ Banabase -nyɛ Sɔle "bhaa -se 'wa "kɛ libhɔ -nyɔ za 'e 'loa- -wɛ no -ka me.»

³ 'Wa "kɛ nuɛ te "ne bhubhɔ- "bhuɔ ne, 'wa yua -lɔ kwlɛ 'wli 'piɛ-, "ne 'wa yua -lɔ no -gbɔ 'wa me.

Banabase -nyɛ Sɔle "bhaa 'wa me Siple

⁴ Zuzu Wlewle "kɛ Banabase -nyɛ Sɔle "bhaa 'lebhe- ne, Selesi -du "me 'wa 'kwlile- -lɔ zɔ, lɔbhɔ 'wa 'bha- "ne 'wa yi -lɔ bato "ku 'libhi "ne 'wa yi -lɔ Siple -glɔ "me me.

⁵ 'Wa "kɛ 'du -ye 'wa la Salami -wɛ ylɛ ne, 'wa sɛle nɛ "bhle Lagɔweli 'na 'de Zufonya 'na "mebhubhɔlebhudu "me, 'wanɛɛ kwɛlenyɔ Zaa Malke -ko -me nɛ lɔbhɔ.

⁶ 'Wa to- lɛ 'ŋusuɛledu "bhuɔ ne 'wa 'sibhɔ- Pafɔse, 'Dlaminanonyɔ -ɔ la 'ɔyi "guɔkwɔmenyɔ -wɛ "bhaa 'wa 'sibhɔle- -lɔ "ku: Zufonyɔ yɔ -lɔ, 'ɔ 'pa- 'awɔ Bale Zezu.

⁷ 'Ɔɔ -ko 'awɔ -lɔ ''kamalenyɔ Sɛleziuse Poluse 'na sueme, "ne 'ɔ "nɛ- 'awɔ kpɛnyee, "ne 'ɔ yi 'awɔ -lɔ Banabase -nyɛ Sɔle "bhaa la, "naa-, 'ɔ 'yɔbhɔ 'awɔ -gbɔ 'ɔ "kɛ Lagɔweli 'yukwli fo zɛ.

⁸ -Mɔ Elimase ('dlaminanonyɔ 'wa la -lɔ "ɛ soɔ 'glɛkegbo "me) no 'awɔ Banabase -nyɛ Sɔle "bhaa gbo, 'ɔ "ne 'yɔbhɔ nɛ -gbɔ "ɛ 'Kamalenyɔ "yitɔ -wɛ kɛle- nɛ Lagɔ 'dleku.

⁹ "Ne Sɔle -ye 'wa la -me 'lelee Pɔle -wɛ, Zuzu Wlewle -ko "me, zaa, 'ɔ -wolo "ɛ 'nyɔkpɔ -wɛ 'wewe,

¹⁰ "ne 'ɔ yu -lɔ bhulɛle- nɛɛ: «-Eyi, yonyɔ, 'nyakpa ylononyɔ, "ne 'e -kɛ -kplɛkplɛ, 'gunyɔ 'na yu -lɛ, -li 'klekle -ɛ 'nɛne -wɛ 'na 'gblenyɔ, -sɔɔdɛku 'e "kɛ bhɔ Anyinɛnyɔ 'na -gwe -ɛ -ko -gbii -wɛ 'na "me ciciɛ 'yi 'tale- 'a?

¹¹ -E -gɛ 'yli, Anyinɛnyɔ 'na sɔ "ne -eyi keyi -ko. -Neɛ' 'yli yi 'wlɔ-, "ne -e -ka 'ce -la ylo 'ylime 'ye, "ne lɔbhɔ "kɛ 'ce -lɔ ylɛ.» "Ɛ -gba -bhele -wɛ "me, titiɛ yu -lɔ 'wli mana-, 'ɔ biblile "ku, "ne 'ɔ 'tɛle -lɔ 'nyɔkpɔ 'na 'ɔ "kɔ sɔ 'sale -wɛ siɛ.

¹² 'Ɔ "kɛ -see 'ɛ -ylɛle -wɛ 'ylime 'ye ne, "ɛ 'Kamalenyɔ "yitɔ -wɛ 'dlekukɛlenyɔ 'ye 'ɔ "zo- -lɔ, "naa-, Anyinɛnyɔ 'na weli sɔ- nɛ kɔ zɛ.

Pɔle "ne Banabase me Atiɔse

¹³ Pɔle -nyɛ 'ɔnɛɛ 'nɔŋonya "bhaa 'gblɛ- bato "me "ne 'wa yi -lɔ Pafɔse ylɛle-, "ne 'wa yi -lɔ Pelɛze "ne Pafili me-, "ne Zaa -ye 'wa la -me Malke -wɛ yua -lɔ 'beku 'bha-, "ne 'ɔ yi -lɔ Zeluzalɛme 'wlizɔ zi.

¹⁴ -Mɔ, 'ɛ kɛ 'wayi 'waa, 'wa 'bha- Pelɛze "ne 'wa yi -lɔ 'wanɛɛ -gwe bhli-, "ne 'wa yi -lɔ Pisidi 'na Atiɔse 'sibhɔ-. Zufonya 'na -gbajɛzle -ylɛ, "ne 'wa yi -lɔ Zufonya 'na "mebhubhɔlebhudu "me plɛ-, "ne 'wa yi -lɔ -duku 'gli.

¹⁵ 'Wa "kɛ -Lɔ -nyɛ "guɔkwɔmenya "bhaa 'na "bɔgo "me zɛle "bhuɔ ne, "ɛ bhubhɔbhudu -wɛ "me 'na "cifia yi -lɔ no nɛɛ: «"Nowlia nye, 'a kɛ no -gbɔ 'a "kɛ weli 'na -ɛ "kɛ 'nyakpa 'dleku "tamalea- -wɛ bhulɛ- ne, 'a 'libhi weli "ku!»

¹⁶ "Ne Pɔle yi -lɔ "ku -sɔ, "ne 'ɔ yi -lɔ sɔ 'wli "ku 'libhi -se 'wa "kɛ "ku 'tli "ne 'ɔ yi -lɔ no nɛɛ: «Izlayɛleyua, "ne 'anye "gu Lagɔ -gɛ -wɛ, 'a fo 'yukwli.»

¹⁷ "Naa-, Izlayɛle yua 'na Lagɔ -tɔ -a 'to 'wɔ. "Ne 'ɔ yua -lɔ 'kpɔmalea-, -sɔɔdɛku 'wa -ko nɛ Ezipte -wɛ, 'ɔnɛɛ 'bhɛloɛ "me, "ne 'ɔ yua -lɔ zɔ 'wloa-.

¹⁸ 'Ɔ 'nyoa- lilɛ 'kɔsɛku 'ylobɛ -glo "sɔ 'na dɛ.

¹⁹ "Ne -ye 'ɔ -bhia Kanaa 'na 'duwli -gbɔsɔ "ku "bhuɔ -wɛ, "ne 'ɔ yi -lɔ Kanaa 'na dodo -wɛ 'anyɛɛ 'nyakpa kɔ 'je "gube -lɛku.

²⁰ 'Ɛ -gwlɛ "me "ne 'ɛ -sɛ 'ylobɛ -glo 'umgbu 'na 'du -mɔɔnɔ 'ylobɛ kogbɔ. 'Ɛ 'ple- "bhuɔ -wɛ, "ne Lagɔ yua -lɔ gbobhlenya kɔ 'je, -kaa "ne 'ɛ yi -lɔ "guɔkwɔmenyɔ Samiɛle "ku 'sibhɔ.

²¹ "Ne 'wa yi -lɔ no -gbɔ 'wa 'joa -Klɔgbɔnyɔ kɔ, "ne Lagɔ yua -lɔ -klɔgbɔ Sayule -nɛme, Cise 'na yu yɔ -lɔ, "ne 'ɔ -noɔ -lɔ Bɛzamɛ 'na -gligbɛ "ku -nɔ yɔ. 'Ɔ 'kamalea- 'ylobɛ -glo "sɔ 'na dɛ.

²² 'Wa "kɔ -duku jilɛ "bhuɔ ne, Lagɔ -sɛ 'ɔnɛɛ lo, "ne 'ɔ yi -lɔ Davide lɔbhɔ -sɛ -a 'to 'wɔ 'na -klɔgbɔnyɔ "ku. 'Ɔnɛɛ "ku 'na weli 'ye 'ɔ -bhulɛ -lɔ, -ye 'ɔ -no nɛɛ: 'E yle Davide, Jese yowli, 'nyɔkpɔ 'na -ye 'neɛ 'dle 'yɔbhɔ -wɛ yɔ -lɔ, 'ɔɔ "kɛ -lɔ -ye 'e 'yɔbhɔ -wɛ 'klekle no.

²³ 'Ɔnɛɛ ŋeyi "me 'ye Lagɔ 'wloale- -lɔ Zezu zɔ, Izlayɛleyua 'na 'Fuɔnyɔ, -see 'ɔ -ple nɛ weli -wɛ.

²⁴ Zezu -namlɛ yi "ne Zaa sɛle 'awɔ Izlayɛleyua 'de -gbɔ 'wa 'bheliɔ- kɔ, -se 'wa "kɛ batɛme yle-.

²⁵ Zaa "kɛ 'ɔnɛɛ libhɔ no "bhuɔ ne, "ne 'ɔ yi -lɔ no nɛɛ: 'Anyɛɛ dɛku -ye 'e -noɔ bha? 'E "ne -kɛ 'ɔ "kɛ yi -wɛ yɔ! -Mɔ, 'A -gɛyli, 'nyɔkpɔ 'bhale -ame 'beme, 'e "ne 'bhɛle- -se 'e "kɛ -kɛ 'ɔnɛɛ -kpɔklo 'na 'lu vulu-.

²⁶ "Nowlia 'wanye -lɛ, 'anye 'bhale Ablame 'na -gligbɛ "ku "ne 'anye -ko -dɛne "ne 'a 'gu Lagɔ -gɛ -wɛ, 'anye 'wa -nɛme -lɔ 'popoɛ ne 'na 'de.

²⁷ "Ne Zeluzalɛme 'na 'nyakpa -nyɛ 'wanɛɛ "cifia 'wɔ "bhaa, 'wa "ne Zezu yibhlele-, "ne 'wa "ne "guɔkwɔmenya 'na weli "me 'no-, "ne 'wa yu -lɔ gbo 'wlime 'pɔ, "ne "bɔgo -ye 'wa zɛle "me zle 'oo -zle zufonya 'na -gbajɛzle -wɛ yi -lɔ 'yli 'wlole.

²⁸ 'Wa "ne gbo 'na -ɛ "kɔ 'lɔbhɔ "ne 'ɔ "kɛ "ku -wɛ -yle, zaa, Pilate, 'wa -bhulɛle -lɔ -gbɔ 'ɔ 'lɔbhɔ -se 'ɔ "ku.

²⁹ -Ɛ kɛleɔ- "bɔgo "me -wɛ "kɛ 'yli 'wlole "bhuɔ ne, -su "klo 'wa -sɔ -lɔ, "ne 'wa yu -lɔ -biɛ "me 'piɛ-.

³⁰ -Mɔ, Lagɔ 'wloɔ- gluzɔ.

³¹ "Ne 'ɔ yi -lɔ 'yli 'kwleyi 'na dɛ, -nyɔ 'wɔ "bhaa 'wa 'bhale- Galile "ne 'wa -yi Zeluzalɛme me -wɛ 'yliku 'sibhɔ, 'waa- -noɔ -lɔ -dɛme 'nyakpa 'yliku 'ɔnɛɛ -wayeɛdɛ 'waa.

³² "Ne -anye 'lelee, -a -sɛle -lɔ 'anye "ɛ 'Denaade ne, soɔ Lagɔ -bhulɛle 'awɔ -lɔ -a 'to 'wɔ.

³³ Lagɔ 'wloaleɛ- 'yli gou, -anye 'ɔnɛɛ yua ne za, -sɔɔdɛku, 'ɔ 'wloa- Zezu gluzɔ -wɛ, -see 'ɛ kɛleɔ- Some 'na "sɔnɛ "me -wɛ yɛ -lɔ: 'Neɛ yu 'ye -e -noɔ -lɔ, -Ame, 'mɔɔ 'gwɛle- -lɔ -zeka ne "me -eyi.

³⁴ Lagɔ 'wloa- Zezu gluzɔ, "ne 'ɔnɛɛ ku -ka -la -biɛ "me 'wlizɔ zi "ne 'ɛ "kɛ zu. -Se "ɛ Lagɔ lɛ- 'awɔ -wɛ yɛ -lɔ. 'Ɔ nɛɛ: 'E yi 'ce 'anye, Davide 'na -li -ɛ -ko 'wlewle -wɛ kɔ 'je, Davide 'na 'diɛɛ 'na weli 'na -see 'ɛ -ylɛle yɛ -lɔ.

³⁵ «'Ɛnɛɛ za, 'ɔ -bhulɛle -me 'lelee -lɔ weli -cibhɛ 'na -vinɛ "me nɛɛ: -E -ka 'ce -neɛ' 'nyɔkpɔ -ɔ -ko 'wlewle -wɛ 'yi 'tale, "ne 'ɔ "kɛ -biɛ "me zule-.

³⁶ -Mɔ, Davide 'na dɛce "ku, 'ɔ "kɛ -see Lagɔ 'yɔbhɔ -wɛ "ku lɔbhɔ "bhuɔ ne, "ku 'ye 'ɔ "ku- -lɔ, "ne 'wa yu -lɔ 'ɔ 'to 'wɔ yɔko zizi-, "ne 'ɔ yi -lɔ -biɛ "me zule-.

³⁷ -Mɔ, -ye Lagɔ 'wloa- gluzɔ -wɛ "ne -biɛ "me zule-.

³⁸ Zaa, "nowlia 'wanye -lɛ, 'a kɛle- 'dleku -gbɔ 'ɔnɛɛ 'ylime za, 'wa -sɛle -lɔ 'anye 'de -gbɔ, 'anyɛɛ 'nyinyonoli 'na gbo yi 'ce "ku 'titliɔ-. -Mɔ, Moyize 'na -Lɔ "ne 'anyɛɛ 'nyinyonoli 'na 'galu 'di-.

³⁹ "Naa-, 'ɔyi, 'ɔɔ "kɛ -lɔ 'nyɔkpɔ 'na -ɔ -kɛle Zezu 'dleku -wɛ 'na 'nyinyonoli 'na 'galu 'di.

⁴⁰ Zaa, 'a 'luɔ- -kɛ, -ɛ kɛleɔ- "guɔkwɔmenya 'na "bɔgo "me -wɛ te -kɛ 'anye yle:

⁴¹ 'A 'wolo 'se 'ayi "ku, 'anye 'bhabhanya nye -lɛ! 'Ɛ 'nyea- 'anye -se 'a bidlileɔ-! -Mɔ, 'ye 'a -yɛ -na -wɛ, 'e yi -bɛɛ' -bholo no 'anye 'yliku, 'nyɔkpɔ kɛ nɛ 'anye 'ɛnɛɛ 'de -sɛle ne, 'a -cɛ nɛ 'ce 'dleku -kɛle!»

⁴² -Sɔɔdɛku Pɔle -nyɛ Banabase "bhaa 'wlo "mebhubhɔlebhudu "me zɔ -wɛ "ne 'wa yua -lɔ bhubhɔ- -gbɔ 'wa yi, -se 'wa "kɛ "kusɔ "ɛ weli -bhele -wɛ bhulɛle- -gbajɛzle 'na -ɛ "kɛ yi -wɛ "me.

⁴³ 'Wa "kɛ 'wli "zo "bhuɔ ne, Zufonya 'na -kwleyia, "ne 'nyakpa -wa "zo Moyize 'na -Lɔ 'plome -wɛ -gɛlele Pɔle -nyɛ Banabase "bhaa "ne 'wa yua -lɔ bhulɛle- "ne 'wa yua -lɔ 'kwɛme "tamalea- -gbɔ 'wa tɛle- Lagɔ 'dle.

Pɔle -nyɛ Banabase "bhaa 'wa me Lagɔweli -wa "ne Lagɔ -yi -wɛ -sloa -ka

⁴⁴ "Ɛ -gbajɛzle 'na -vinɛ -ylɛ lɛ, 'dunya 'klekle "zo- 'awɔ 'wli, -se 'wa "kɛ Anyinɛnyɔ 'na weli 'yukwli 'fo.

⁴⁵ 'Wa "kɛ 'nyakpa 'na -zakpɛ 'ylime 'ye ne, kɛle 'lɔbhɔ- -lɔ Zufonya "ne 'wa yi -lɔ Pɔle -nyɛ Banabase "bhaa 'na bhulɛweli "me 'kpɛle- "ne 'wa 'ylua nɛ -lɔ.

⁴⁶ "Ne Pɔle -nyɛ Banabase "bhaa 'wa yua -lɔ 'dle -wɔtɛsɛ bhulɛle nɛɛ: «'Anye 'wa "kɛ nɛ -lɔ "ɛ Lagɔweli bhulɛle- tɛɛ! -Mɔ, 'a -sɛ 'ɛnɛɛ lo "ne 'a 'bhlele -lɔ 'ayigɛsɛ 'ayi gbo nɛɛ: 'A "ne 'bhɛle- "ne 'a "kɛ -zikpɛ 'na -ɛ -ka "kubhiɛ -wɛ yle. 'Ɛza, -a mele- -da -lɔ -wa "ne Lagɔ -yi -wɛ lo.

⁴⁷ "Naa-, -sɛne 'ye- Anyinɛnyɔ -bhulɛle lɛ -anye nɛɛ: 'E "zoa- -eyi -glɔ 'klekle 'na -zle. -Se -e "kɛ popoɛ dodo 'na 'wlizɔ bhiɛledɛ -nɛme.»

⁴⁸ "Ɛ weli -wɛ kɔ 'ye 'ŋwɛnɛ 'lɔbhɔ nɛ -lɔ -wa "ne Lagɔ -yi -wɛ, "ne 'wa 'kwa 'awɔ -lɔ Anyinɛnyɔ 'na weli 'ŋlu "ne -ye Lagɔ -sɛ lɔbhɔ zikpɛ 'na -ɛ -ka "kubhiɛ za -wɛ yi -lɔ 'dlekukɛlenya "zo.

⁴⁹ "Ne Anyinɛnyɔ 'na weli yi -lɔ -glɔ 'klekle "ku 'ŋwɛne-.

⁵⁰ -Mɔ, "ɛ Zufonya yua -lɔ lɛkɛle-ŋwenea 'glɛme 'na -wa bhubhɔ Lagɔ kpɛnyee -wɛ nu "zolea, 'wa -nyɛ "ɛ 'du -wɛ "me 'na lɛkɛlenya -wa 'tɛle nɛ Pɔle -nyɛ Banabase "bhaa 'dle -wɛ. "Ne 'wa yua -lɔ 'wanɛɛ -glɔ -wɛ "me 'kpeti.

⁵¹ Lɔbhɔ 'ye Pɔle -nyɛ Banabase "bhaa yi -lɔ 'wanɛɛ bhopɛpɛ 'wli 'siɛ 'bhle "ne 'wa yua -lɔ 'bhibhi yɔko 'tle-, "ne 'wa yi -lɔ 'du 'ye 'wa la Ikoniɔme -wɛ me.

⁵² -Mɔ, 'ɛ kɛ "ɛ gɛlenya -lelea -wɛ 'waa, 'ŋwɛnɛ 'lɔbhoa, "ne Zuzu Wlewle 'yua- nɛ "me.