Nonoli 12 - Nouveau Testament bété de Gagnoa

'Wa lɔbhɔ Zake "ne 'ɔ "ku "ne 'wa "nyegbea- Piɛle

¹ Lɔbhɔ 'na dɛku, -klɔgbɔnyɔ Elode ziɛ Lagɔgligbɛ "me 'na 'nyakpa 'nyɛze.

² -Klɔgbɔnyɔ Elode -bhulɛle 'nyakpa -gbɔ 'wa 'lɔbhɔ Zaa 'ɔ "nɔwli Zake -jijigbɛlɛ nu.

³ 'Ɔ -na 'wolo, "ɛ Zake 'na 'kwiɛ -wɛ -le Zufonya 'ŋwɛnɛ "ku, "ne 'ɔ yi -lɔ 'nyakpa bhulɛle- -gbɔ 'wa "nyegbea- Piɛle. "Fɔlɔ -ɛ "ne manyɔ "me -ko 'na -jajo 'na 'yli -wɛ "me yɛ 'awɔ -lɔ.

⁴ Elode "nyegbea- lɛ Piɛle "bhuɔ ne, -jiɛ "me 'ye 'ɔ 'pɔ- -lɔ. "Ne 'ɔ yi -lɔ "slojanya 'na -zakpɛ -mɔɔnɔ bhulɛle- -gbɔ 'wa -kolo "klo -se Paake 'na -jajo kɛ 'ple- "bhuɔ ne, 'wa "kɔ gbobhlele- -glɔnya 'yliku.

⁵ Piɛle -ko -jiɛ "me 'yiɛ. 'Ɔnɛɛ za, Lagɔgligbɛ "me 'na 'nyakpa bhubhɔ nɛ Lagɔ 'yiɛ.

"Nɔgɔzilɔ -sɛ Piɛle -jiɛ "me

⁶ 'Ɛ 'sabo -wɛ "me -ye Elode kɛ nɛ -lɔ Piɛle zɔ 'wloa- -se 'ɔ "kɔ 'nyakpa 'yliku gbobhlele-. Piɛle -gbɛteleɔ gɔgɔ "sɔ nu, "ne 'ɔ 'pe- -lɔ "slojanya "sɔ 'na -jijɛku. "Ne "klokolenya -ko -jiɛbhudu 'na -gbanuɛ -gwe.

⁷ Doɔ cuu ne, "nɔgɔzilɔ ylɛ -lɔ lɔbhɔ. "Ne zle yi -lɔ -bhudu -cibhɛ -mee Piɛle -ko -wɛ "ku 'yiɛ-. "Nɔgɔzilɔ yi -lɔ Piɛle 'na -gbɛcezɔ 'kwlɛ 'pɔ -se Piɛle "kɛ gɔlɔ-. "Ne 'ɔ yi -lɔ no nɛɛ: «-Sɔ "ku cuu!» "Ɛ doɔ, -gɔgɔ -ye 'wa -gbɛtele nɛ Piɛle nu -wɛ yi -lɔ 'vuluɔ-, "ne "ɛ yu -lɔ sɔ "me 'bha-.

⁸ "Nɔgɔzilɔ nɛɛ: «'Bhlele- -neɛ' 'bɛto 'mene -se 'gbɛte- -neɛ' 'kpɔklo!» Piɛle ne -la "bhle weli 'pɔ-. "Nɔgɔzilɔ nɛɛ: «-Pla -neɛ' "koti "me -se gɛle- -ame!»

⁹ "Ne Piɛle yu -lɔ gɛlele-, Piɛle "ne nɛ -tiaa 'dleku -kɛ -gbɔ "nɔgɔzilɔ 'na -ye 'ɔ no nɛ -wɛ -diɛɛ yɛ nɛ. 'Ɔ -ta -gbɔ 'yli "klo 'ɛ ylɛlo nɛ.

¹⁰ 'Wayi "sɔkpɔsɔkpɔ 'ple- tɛtɛ "slojanya 'na -zakpɛ yɔko, "ne 'wa yi -lɔ -zakpɛ 'na "sɔnɛɛ -wɛ yɔko "me 'ple. "Ne 'wa yi -lɔ 'leyi -gbulɛ -ɛ -glɛ 'du "yitɛ "klo -wɛ 'na dɛ ylɛ-. "Ne "ɛ -gbulɛ yi -lɔ 'eyigɛsɛ kɛleɔ-. 'Wa ylɛ- lɛ zikpoku ne, -gwe 'wa "zo- -lɔ 'wlime. Cuu ne, "nɔgɔzilɔ 'bha- Piɛle yɔko.

¹¹ Lɔbhɔ 'ye Piɛle 'na "wugɔŋo yu -lɔ "me yi. "Ne 'ɔ yi -lɔ no nɛɛ: «'E 'yɛ "me 'no, -diɛɛ yɛ -lɔ. Anyinɛnyɔ 'lebhe- 'ɔnɛɛ "nɔgɔzilɔ. 'Ɔɔ 'gbɔ -lɔ "ne 'e yi -lɔ Elode -nyɛ Zufonya 'klekle "bhaa kɔ 'bha-.»

¹² Piɛle 'sibhɔ- lɛ -gwe "ku ne, Zaa -ye 'wa la -me Malke -wɛ, 'ɔ "nɔ Mali 'na -bhudu "me 'ye 'ɔ -me -lɔ, 'ɛ -bhudu -wɛ "me 'nyakpa -kwleyia "zole- -lɔ 'wli "ne 'wa bhubhɔ nɛ -lɔ Lagɔ Piɛle za.

¹³ Piɛle gbɔtɔ -bhudu -gbulɛ, "ne Mali 'na "kulɔbhɔŋuuyu -bholo 'ɔ 'pa- Wlode yi -lɔ 'nyiɔ- -se 'ɔ "kɛ 'yukwli fo.

¹⁴ Wlode yibhlele- Piɛle 'na weli "me. 'Ŋwɛnɛ za 'ɔ "ne lɔbhɔ -kɛle. -Mɔ, -wa -ko -bhudu "me -wɛ 'ye 'ɔ me -lɔ 'de -sɛle -ka nɛɛ: «Piɛle -ko lɔbhɔ, 'ɔ 'nyegbe- -gbanuɛ "ku!»

¹⁵ 'Wayi -wɛ nɛɛ: «"kukwɛ 'sa bhɔ -eyi 'a!» -Mɔ, "ɛ "kulɔbhɔŋuyu Wlode bhulɛ 'yiɛ: «'Diɛɛ yɛ -lɔ, Piɛle -ko lɔbhɔ!» "Ne -bedia nɛɛ: «'ɔnɛɛ -didale yɔ -lɔ!»

¹⁶ Piɛle gbɔtɔ -bhudu 'yiɛ. "Ne 'wa yi -da -lɔ lɔbhɔ kɛle- -bɛsɛza. 'Wa -na 'wolo ne, Piɛle yɔ -lɔ 'diɛɛ, geji 'bhoa- "ku.

¹⁷ "Ne Piɛle yi -lɔ sɔ 'wli "ku 'libhi -gbɔ 'wa 'tli "ku. "Ne 'ɔ yua -lɔ -see Anyinɛnyɔ -sɔ -jiɛ "me -wɛ 'na 'de -sɛle. "Ne Piɛle yi -lɔ no nɛɛ: «'A me -se 'a sɛle- Zake -nyɛ 'ɔ "nowlia 'wɔ "bhaa 'de.» "Ne 'ɔ yi -lɔ zɔ 'wlo, "ne 'ɔ yi -lɔ -glɔ 'na -vidɛ me-.

¹⁸ Zle -ze dɛku, "slojanya bhlebhlele yɔko, 'wa 'yɔbhɔyɔbhɔle Piɛle 'na "ku 'nasɛ.

¹⁹ Elode nɛɛ 'wa 'be Piɛle moɔ 'klekle. -Mɔ, 'wa "ne Piɛle -yle. Elode bhiɛ Piɛle 'na "klokolenya nuɔ. "Ne 'ɔ yi -da -lɔ no nɛɛ 'wa 'lɔbhɔa- 'klekle -se 'wa "ku-. "Ne Elode yi -lɔ Zude 'bha-, "ne 'ɔ yi -lɔ Sezale me-, 'ɔ -gwlɛ 'awɔ "bhle.

-Klɔgbɔnyɔ Elode Aglipa 'na 'kwiɛ

²⁰ Elode, 'du 'ye 'wa la Tile "ne Sidɔ -wɛ 'na 'nyakpa "bhaa gbo -koa nɛ 'glɛme. Zaa, "ɛ 'nyakpa -wɛ nɛɛ: 'Wa "kɛ Elode "bhle yle. 'Wa -kole "ku "ne 'wa yi -lɔ Elode 'na -bhuduklokolenyɔ Blasetuse "me ylɛle, -se "ɛ gbo -wɛ "kɛ -kɛ 'tee 'bhiɛ. "Naa-, Tile "ne Sidɔ 'na lili -lilɛ 'klekle Elode 'na zoku -wɛ 'ye 'ɛ 'bhale -lɔ.

²¹ 'Yli 'ye 'wa -sɛ lɔbhɔ -gbɔ Tile -nyɛ Sidɔ "bhaa "kɛ -wale ylɛ lɛ ne, Elode yi -lɔ 'ɔnɛɛ -klɔgbɔ -koti "me pla-. "Ne 'ɔ yi -lɔ 'ɔnɛɛ -klɔgbɔ kpiɛ "me 'gli-. "Ne 'ɔ yi -lɔ -glɔnya bhulɛle-.

²² -Dee "ɛ Elode -ko nɛ bhulɛ dɛku -wɛ, -glɔnya -gbɔtɔ nɛ kɔ. "Ne 'wa no -lɔ nɛɛ: «Bhulɛweli -wɛ "ne -kɛ 'nyɔkpɔ -nɛ yɛ, -mɔ, Lagɔ -nɛ yɛ -kɛ -lɔ!»

²³ Cuu ne, "nɔgɔzilɔ yi -lɔ Elode lɔbhɔ, "naa-, 'ɔ "ne Lagɔ 'ŋlu -kwa zɛ. "Ɛ doɔ 'ye noa lilu- -lɔ "ne 'ɔ yi -lɔ "ku.

²⁴ -Mɔ, Lagɔweli 'ŋwɛne nɛ "moɔ 'klekle, -sɔbhɔ 'ye Zezu 'na gɛlenya zimale 'awɔ -lɔ 'yiɛ.

²⁵ Banabase -nyɛ Sɔle "bhaa 'je- lɛ Zeluzalɛme 'na Lagɔnya -ye 'wa "koa "nyɛ -wɛ kɔ "bhuɔ ne, "ne 'wa yi -lɔ 'wlizɔ -zi "ne 'wa yi -lɔ Zaa 'ye 'wa la -me Malke -wɛ kɔme-.