Nonoli 11 - Nouveau Testament bété de Gagnoa

Piɛle -sɛle Zeluzalɛme 'na Lagɔnya 'de

¹ "Kɔlepɔnya, "ne 'dlekukɛlenya -wa -ko Zude -glɔ "me -wɛ 'no- 'awɔ "me -gbɔ -wa "ne zufonya 'wa -wɛ -yle -me 'lelee Lagɔ 'na 'Denaade.

² Zaa, -sɔɔdɛku Piɛle -yi Zeluzalɛme -wɛ, lɔbhɔ 'ye "ɛ zufonya -wa -kɛ 'dleku -wɛ "bhaa 'wa 'seselia -lɔ weli "me.

³ 'Wa nɛɛ: «-E -me 'nyakpa 'na -wa "ne zufonya 'waa -wɛ 'na sueme, "ne 'wayi "bhaa -a -lile 'gɔme.»

⁴ "Ne Piɛle yi -lɔ -dee 'ɛ cile- "ku -wɛ 'bhale- "ne 'ɔ yua -lɔ zɔ 'sibhalea- -plɛplɛ.

⁵ 'Ɔ nɛɛ: 'E -ko nɛ 'du -ye 'wa la Zafa -wɛ, "ne 'e bhubhɔ nɛ, "ne -bɛɛ' -bholo yi -lɔ -ame 'yli "klo ylɛle- sɛgbɛɛ lokwi -pɛɛ "yitɛ, 'ɛ 'bhale "nɔgɔ "me, "ne 'ɛ -kɛ 'cɛmɛ -mɔɔnɔ, "ne 'ɛ yi -lɔ -ame lo 'yli-.

⁶ "Ne 'e -wolo "ku 'wewe, -se 'e "kɛ -ɛ -ko "me -wɛ yibhlele-, "ne 'e yi -lɔ 'nɛmea 'na 'wa 'pale bho -mɔɔnɔ 'yli, -wa 'gbisiɔ "ne -wa 'blule "nɔgɔ "me 'ylime 'ye.

⁷ "Ne 'e yi -lɔ weli "me 'no, 'ɛ nɛɛ: Piɛle, -sɔ "ku, lɔbhɔ "ɛ 'nɛmea -wɛ 'na 'glɛme 'na -bholo -se lu.

⁸ "Ne 'e yi -lɔ no nɛɛ: 'Bhɔ, Anyinɛnyɔ! 'E -na 'ce -zɛ lilɛ 'na -ɛ 'pɔ- gbɛ "ku "ne -ɛ "ne 'wlele -ko -wɛ li -me 'neɛ zikpɛ "me.

⁹ "Ne weli yi -lɔ "kusɔ "nɔgɔ "me 'bhale-, 'ɛ nɛɛ: 'Ye Lagɔ "zoa- 'wlele -wɛ, -eyi, -e yi bhɔ no -gbɔ 'ɛ "ne 'wlele -ko!

¹⁰ "Ɛ weli -wɛ 'plele- "ku ta, "ne "ɛ lokwi "yitɛ "me 'na 'ɛ -ko "bhle 'klekle -wɛ "bhaa yi -lɔ "nɔgɔ "me 'wli sɔbhɔ.

¹¹ "Ɛ doɔ cuu ne, 'nyakpa ta yi -lɔ sue -dee 'e -ko -wɛ yi, 'wa 'bhale 'du -ye 'wa la Sezale -wɛ, 'wa -lebhoa -gbɔ 'wa yi -ame 'yukwɔ.

¹² "Ne Zuzu Wlewle yi -lɔ -ame bhulɛle- nɛɛ: 'A me, te -kɛ lo -sɛ, "ne -ame "nowlia 'gbeplo -nyɔ 'wɔ "bhaa -a -ko "ɛ mɛne ne yi -lɔ -ame -gwe "ku kwɛle-, "ne -a yi -lɔ Kɔlenɛye 'na -bhudu "me plɛ- Sezale -du "me.

¹³ "Ne 'ɔ yi -lɔ -see 'ɔ 'ye- "nɔgɔzilɔ 'ylime, "ne 'ɔ -plɛ 'ɔnɛɛ -bhudu "me 'na 'de -anye -sɛle. 'Ɔ -bhulɛlo nɛɛ: 'Lebhele- 'nyɔkpɔ 'du -ye 'wa la Zafa -wɛ, -se 'ɔ la Simɔ -ye 'wa la -me Piɛle -wɛ -se 'ɔ yi.

¹⁴ -Se 'ɔ "kɛ -eyi Lagɔ 'na weli -ɛ "kɛ -eyi 'fuɔ, "ne 'ɛ "kɛ -neɛ' -bhudu "me 'na konya 'klekle 'fuɔ -wɛ -eyi bhulɛle-.

¹⁵ "Ne -ame Piɛle, -sɔɔdɛku 'e -le Kɔlenɛye -nyɛ 'ɔnɛɛ dɛkonya "bhaa bhulɛle -dɛku -wɛ, "ne Zuzu Wlewle yua -lɔ "ku 'kwlile- cuu, -see 'ɔ 'kwlile- -me 'awɔ -anye "ku "kucidɛku -wɛ.

¹⁶ "Ne 'e yi -lɔ Anyinɛnyɔ 'na -ye 'ɔ -bhulɛ 'awɔ -wɛ "ku 'luɔle-: «Zaa "nyɛle- batɛme 'ŋu "me. -Mɔ, 'anye, Zuzu Wlewle "me 'ye 'a "kɛ 'ce -lɔ batɛme ylele-.»

¹⁷ Lagɔ kɛ "ɛ 'nyakpa -jɔlo -bhele -ye Anyinɛnyɔ Zezu Kli 'na 'dlekukɛlenya yle -wɛ "nyɛ -me ne, -ame 'ye 'e -noɔ bhɔ, "ne 'e "kɛ Lagɔ 'na -ye 'ɔ no -gbɔ 'e no -wɛ 'na lo -sɛ 'a?

¹⁸ -Sɔɔdɛku "ɛ 'nyakpa 'no- "ɛ weli -wɛ, "ne 'wa yi -lɔ "ku 'tli- 'vlee, lɔbhɔ 'wa -kwale -lɔ Lagɔ 'ŋlu nɛɛ: «'A -gɛyli, -wa "ne nɛ Lagɔ -yi -wɛ, yi -la -dɛme kɔ 'bheliɔ-, "ne 'wa yi -la -diɛnadiɛ 'na -zikpɛ yle -me!»

Atiɔse 'na Lagɔgligbɛ

¹⁹ Etiɛne "ku lɛ "bhuɔ ne, "ne 'nyakpa yi -lɔ 'klecɛnya 'nyɛze ziɛ-, "ne 'wa yi -lɔ -dee 'wa -wa -wɛ me -kaa Fenisi, Siple "ne Atiɔse -glɔ "me, 'wa -slo 'awɔ "bhle Zufonya 'wayikɔ Lagɔweli.

²⁰ "Ne 'wanɛɛ 'glɛme 'na -bedia 'bha- 'awɔ 'du -ye 'wa la Siple "ne Silɛne -wɛ, "ne yi 'awɔ -lɔ 'du -ye 'wa la Atiɔse -wɛ plɛ. "Ne 'wa 'sɛle 'awɔ -lɔ Anyinɛnyɔ Zezu Kli 'na 'Denaade 'glɛkenya 'wayikɔ.

²¹ Anyinɛnyɔ 'na 'bhɛloɛ -koa 'awɔ "ku, 'ɛza, -wa -ylile Anyinɛnyɔ lo, "ne -wa -kɔlo 'dleku -wɛ zimale 'awɔ -lɔ kpɛnyee.

²² 'Ɛ 'de ylɛ lɛ Zeluzalɛme 'na Lagɔgligbɛ "me 'na konya "ku ne, Banabase 'wa -lebhele -lɔ "ɛ Atiɔse.

²³ -Sɔɔdɛku, 'ɔ -ylɛ 'du -wɛ, 'ɔ -na 'wolo Lagɔ 'na -jɔlo -ko 'awɔ Atiɔse -du "me 'na 'klecɛnya "ku, "ne 'ŋwɛnɛ yu -lɔ 'lɔbhɔ-, lɔbhɔ 'ye 'ɔ "tamaloa- -lɔ 'kwɛme, 'ɔ nɛɛ: 'A kɛle- Anyinɛnyɔ 'dleku -godogodo 'anyɛɛ 'dle 'klekle "me.

²⁴ "Naa-, 'ɔyi, 'nyɔkpɔ 'na "namanɔ yɔ 'awɔ -lɔ, Zuzu Wlewle -nyɛ 'dlekukɛleɛ "bhaa -ko "me, 'ɛza 'nyakpa -kwleyia yile 'awɔ -lɔ Anyinɛnyɔ lo.

²⁵ 'Ɛza, Banabase me -lɔ 'du -ye 'wa la Talese -wɛ Sɔle 'yukwɔ.

²⁶ 'Ɔ -ylelo lɔbhɔ, "ne 'ɔyi "bhaa 'wa yi -lɔ Atiɔse yi. 'Wa -sɛ 'awɔ "bhle 'ylobɛ -bholo, "ne 'wa -nole 'awɔ Lagɔgligbɛ "me 'na libhɔ 'gɔme, "ne 'wa yi -lɔ 'nyakpa -kwleyia Lagɔweli sloa-. Atiɔse 'ye 'wa -ziɛle -lɔ gɛlenya 'klecɛ -tɔ tɛtɛ.

²⁷ "Ɛ -zle -wɛ, "guɔkwɔmenya 'na yɛ 'bha- Zeluzalɛme "ne 'wa yi -lɔ Atiɔse yi.

²⁸ "Ne 'wanɛɛ 'glɛme 'na -bholo -ye 'wa la Agabuse -wɛ, "ne 'ɔ yi -lɔ Zuzu Wlewle "me bhulɛle- nɛɛ: Ŋɔŋo 'na "yitɛ yi -kɛ -glɔ 'klekle "ku yi, -diɛnadiɛ, wlɔmo 'na -klɔgbɔnyɔ "yitɛ Klode 'na "tɛnye -wɛ "me 'ye 'ɛ -yi 'awɔ -lɔ.

²⁹ "Ne gɛlenya -wa ko Atiɔse yi -lɔ no nɛɛ: -Ɔkɔkokɔko 'na 'ye 'ɔ -kɛ -wɛ, -ɔ -nɛme -se -a "kɛ -a "nowlia -wa -ko Zude -wɛ kwɛle-.

³⁰ Lɔbhɔ 'ye "ɛ gɛlenya -nɛme -lɔ 'wanɛɛ -ye 'wa -yle -wɛ, "ne 'wa 'yi -lɔ Banabase -nyɛ Sɔle "bhaa kɔ 'je ka me.