Nonoli 10 - Nouveau Testament bété de Gagnoa

"Nɔgɔzilɔ bhulɛle Kɔlenɛye

¹ 'Nyɔkpɔ -bholo -ko 'awɔ -lɔ Sezale, "ne 'ɔ 'pa- 'awɔ -lɔ Kɔlenɛye, 'ɔɔ -noɔ -lɔ wlomɛnya 'na "slojanya 'na "cifi yɔ, 'ɔɔ su -lɔ -zakpɛ -ye 'wa la «Italike» -wɛ.

² 'Ɔ tɛle- Lagɔ 'dle "ne 'ɔ gu Lagɔ -gɛ, 'ɔ -nyɛ 'ɔnɛɛ -bhudu "me 'na -konya "bhaa. 'Ɔ 'kwɛle "nyɛzenya, "ne 'ɔ bhubhɔ Lagɔ zle 'klekle "me.

³ 'Yli -bholo "me, "kugbɛdɛ glee 'na tanɛ "me, 'ɔ 'ye- "nɔgɔzilɔ 'ɔ -ylɛlo 'yli "klo -wɛ 'ylime, "ne 'ɔ yi -lɔ 'ɔnɛɛ -bhudu "me plɛ-, "ne 'ɔ yu -lɔ la. 'Ɔ nɛɛ: «Kɔlenɛye!»

⁴ "Ne Kɔlenɛye yu -lɔ "ku wolo vlee, "ne -nyanɔ yu -lɔ lɔbhɔ, "ne 'ɔ yi -lɔ no nɛɛ: «Anyinɛnyɔ, sɛko bha? 'Ɔ nɛɛ: -Neɛ' bhubhɔweli, "ne -neɛ' 'nɛne -ye -e no 'nyakpa 'wli -wɛ, Lagɔ sɛ- kɔ.

⁵ Zaa, -dɛmeda, 'lebhe 'nyakpa Zafa -se 'wa "kɛ Simɔ -ye 'wa la Piɛle -wɛ -nɛme.

⁶ 'Ɔ -ko 'nyɔkpɔ -bholo -ye 'wa la -me 'lelee Simɔ, -kpɔklokonyɔ 'na sueme. 'Ɔnɛɛ -bhudu -ko jinyɛ yɔko.»

⁷ "Ɛ "nɔgɔzilɔ, -ɔ -yu nɛ bhulɛle -ka -wɛ "kɛ me "bhuɔ ne, "ne "ɛ Kɔlenɛye yi -lɔ 'ɔnɛɛ "kulɔbhɔnya "sɔ la, 'wa -nyɛ 'ɔnɛɛ "slojayu -bholo "bhaa. "Ɛ "slojayu -wɛ 'gu Lagɔ -gɛ "ne 'ɔ tɛle- 'ɛ Kɔlenɛye 'dle 'na dɛ 'ya "me gwlɛ-.

⁸ "Ne Kɔlenɛye yua -lɔ -see 'ɛ -ylɛle 'klekle -wɛ 'na weli bhulɛle-, "ne 'ɔ yua -lɔ Zafa 'lebhele-.

Lagɔ -ylɛle Piɛle 'yli "klo

⁹ Zle 'na -vinɛ "kɛ -ze ne, -sɔɔdɛku 'wa -ko me -dɛku -wɛ, 'wa 'ya "ɛ Zafa "yitɛ yɔko 'nyiɔ- "bhuɔ, "ne Piɛle yi -lɔ -dee 'wa 'gli -wɛ me -se 'ɔ "kɛ bhubhɔ-, 'ylokwɛ -zɛle "me yɛ 'awɔ -lɔ.

¹⁰ "Ne ŋɔŋo yu -lɔ lɔbhɔ. 'Ɔ 'yɔbhɔ nɛ -gbɔ 'ɔ "kɛ nɛ li, -mɔ, 'wa -ko nɛ 'ɔnɛɛ lilɛ -pi dɛku. "Ne -bɛɛ' yi -lɔ "ɛ Piɛle 'yli "klo zɔ 'wlole.

¹¹ 'Ɔ 'na 'wolo ne, "nɔgɔ 'diɔ- 'nuɔ. "Ne -ɛ 'bhale "bhle -wɛ, "ne wɔkɔle -bɛɛ' -kɛ. 'Ɛ -leɛ lokwi -pɛɛ 'na "yitɛ 'na -cɛmɛ -mɔɔnɔ 'ye 'nyakpa -kɛ kɔ "ne 'ɛ yi dodo "ku loloɔ- -ka yi.

¹² "Ne 'nɛmea 'na 'wa -kɛ bho -mɔɔnɔ 'klekle -wɛ -ko -lɔ "me, "ne -wa -gbisile 'kekle dodo -nyɛ 'zea "bhaa.

¹³ Lɔbhɔ 'ye weli bhulɛlo -lɔ nɛɛ: «Piɛle, -sɔ "ku, 'lɔbhɔ 'nɛmea -wɛ -se 'lua!»

¹⁴ "Ne Piɛle yi -lɔ Anyinɛnyɔ bhulɛle- nɛɛ: «'Bhɔ, 'neɛ zikpɛ "me, 'e -na 'ce -zɛ lilɛ 'na -ɛ 'pɔ- 'gbɛɛ "ku, "ne -ɛ "ne 'wlele -ko -wɛ -li.»

¹⁵ "Ne weli yu -lɔ "kusɔ bhulɛle- nɛɛ: «-Ye Lagɔ "zoa- 'wlele -wɛ, -eyi, -e -ka no -gbɔ -ɛ "ne 'wlele -ko!»

¹⁶ 'Ɛ -nole sɔbhɔ "ku ta, "ne "ɛ -bɛɛ' -wɛ yi -lɔ "nɔgɔ "me 'gblɛ cuu.

¹⁷ -Sɔɔdɛku Piɛle 'yɔbhɔ nɛ -gbɔ 'ɔ "kɛ -ɛ ylɛlo 'yli "klo -wɛ 'na zɔsɛsɛ yibhlele-, lɔbhɔ 'ye Kɔlenɛye 'na 'nyakpa -ye 'ɔ -lebhe -wɛ tɛle nɛ -lɔ Simɔ 'na -bhudu -ye 'ɔ -ko "me -wɛ 'siɛ. "Ne 'wa yi -lɔ "ɛ Simɔ 'na -bhudu nuɔ "ku ylɛ.

¹⁸ "Ne 'wa yi -lɔ lo 'yɔbhɔ -gbɔ Simɔ -ye 'wa la Piɛle -wɛ dɛne 'ye 'ɔ go bha?

¹⁹ Lɔbhɔ 'na dɛku, "ɛ Piɛle -ko nɛ -ye 'ɔ 'ye- 'ylime -wɛ 'dleku 'pɔ dɛku, "ne Zuzu Wlewle yu -lɔ bhulɛle- nɛɛ: «'Nyakpa ta -wa 'tɛle -eyi 'siɛ -wɛ -lɔ.

²⁰ Zaa, 'kwli -dɛme zɔ, -se 'wayi 'wɔ "bhaa 'a mele- 'gɔme, -se te -la boɔ-. "Naa-, 'mɔɔ -lobhoa -lɔ zɛ.»

²¹ "Ne Piɛle yi -lɔ zɔ 'kwli, "ne 'ɔ yua -lɔ "bhle yle -ka me, "ne 'ɔ yua -lɔ bhulɛle- nɛɛ: «-Ame, -ye 'a 'tɛle 'siɛ -wɛ, 'mɔɔ ne lɛ, -ye 'a -yi bhɔ "ku 'a?»

²² "Ne 'wa yi -lɔ no nɛɛ: «Slojayu "yitɔ Kɔlenɛye, 'nyɔkpɔ 'na -ɔ 'ŋwinɛle- "me, "ne 'ɔ gu Lagɔ -gɛ, "ne Zufonya 'klekle bhulɛ 'ɔnɛɛ weli 'na -namanɔ, 'ɔyi -ye "nɔgɔzilɔ -bhulɛle -lɔ -gbɔ: -Nɛme Piɛle -neɛ' -bhudu "me, -se 'fo -ye 'ɔ "kɛ -eyi bhulɛle- -wɛ 'yukwli.»

²³ "Ne Piɛle yua -lɔ -bhudu "me pla-, "ne 'ɔ yua -lɔ 'tee 'sa. Zle "kɛ -ze ne, "ne 'wayi 'wɔ "bhaa 'wa yi -lɔ 'gɔme mele-. "Ne "ɛ 'nyɔkpɔ -wɛ 'ɔ "nowlia 'na Zafa -noa -wɛ 'na yɛ yua -lɔ -gwe "ku kwɛle-.

Piɛle ylɛ Kɔlenɛye 'na sueme 'du

²⁴ Zle 'na -vinɛ "kɛ ze- ne, Piɛle yi -lɔ Sezale ylɛ-, 'ɛ -kɛ Kɔlenɛye yɔ, 'ɔ -woa nɛ, zaa, 'ɔ la- 'ɔnɛɛ 'nyakpa, "ne 'ɔ 'titoa 'na -ye 'ɔ -kɛ 'dleku -wɛ.

²⁵ Piɛle "kɛ 'du ylɛ ne, Kɔlenɛye -mo sibhɔle- -ka, "ne 'ɔ yu -lɔ kokomini 'dle "me "pɔle plo "me -zo sɛku.

²⁶ "Ne Piɛle yu -lɔ wli "ku 'libhi "ne 'ɔ yu -lɔ bhulɛle- nɛɛ: «-Sɔ "ku! -Ame, 'nyɔkpɔ "fuu 'ye 'e -noɔ -me -lɔ -neɛ' sɛ.»

²⁷ Kɔlenɛye "bhaa 'wa -ko bhulɛ dɛku, "ne Piɛle yi -lɔ -bhudu "me plɛ-, "ne 'ɔ yi -lɔ "bhle 'nyakpa -kwleyia ylele-.

²⁸ "Ne 'ɔ yi -lɔ no nɛɛ: «'A yi 'se -sɛ -gbɔ Zufonyɔ -nyɛ lowlinyɔ "bhaa 'wa -ka 'titoa "me -ko, "ne 'wa -ka "ku kole- 'nabhɛ. "Naa-, 'nyɔkpɔ -lɛbhɛ yɛ -lɔ. -Mɔ, Lagɔ -bhulɛle -ame -gbɔ 'e "ne 'bhɛle- "ne 'e "kɛ no nɛɛ: 'Ɛwɛ 'pɔ- 'gbɛɛ "ku, "ne 'nyɔkpɔ 'na -ɔne "ne 'wlele -ko.

²⁹ 'Ɛnɛɛ za, -e la- -lɔ -ame, "ne 'e "ne -lɔ -ciciɔ, "ne 'e yi -lɔ yi. -Mɔ, dɛme 'na dɛku, 'e 'yɔbhɔ -gbɔ 'e "kɛ -nyɔ za -e la- -ame -wɛ yibhlele-.»

³⁰ "Ne "Kɔlenɛye yu -lɔ bhulɛle- nɛɛ: «"Ɛ 'yli ta -kpee ne lɛ -se 'e -ko 'neɛ -bhudu "me bhubhɔ dɛku, ylo me bhli -ka 'na glee 'na tanɛ "me. Cuu ne, 'nyɔkpɔ -pla 'koti 'na -ɛ 'lelele "me -wɛ "me, "ne 'ɔ yi -lɔ -ame 'yliku 'nyegbe-.

³¹ "Ne 'ɔ yi -lɔ -ame bhulɛle- nɛɛ: Kɔlenɛye, Lagɔ 'sa- -neɛ' bhubhɔweli "ne -neɛ' 'nɛne -ye -e no 'nyɛzenya 'wli -wɛ kɔ.

³² Zaa, 'lebhele- 'nyɔkpɔ Zafa -se 'ɔ "kɛ Simɔ -ye 'wa -ziɛle Piɛle -wɛ dɛne -nɛme. Simɔ 'na -vinɔ, -kpɔklokonyɔ 'na -bhudu "me 'ye 'ɔ -ko -lɔ, jinyɛ yɔko.

³³ 'Ɛnɛɛ za, 'e 'lebhe- -lɔ 'nyakpa -gbɔ 'wa me -eyi 'yukwɔ, "ne -e "ne "me 'cece-, "ne -e yi -lɔ yi. -Dɛmeda, -anye ne lɛ -eyi 'yliku -se -a "kɛ -ye Anyinɛnyɔ no -gbɔ bhulɛle- -anye 'klekle -wɛ 'yukwli fo.»

Piɛle bhulɛle 'nyakpa Kɔlenɛye 'na doɔ

³⁴ "Ne Piɛle yi -lɔ no- nɛɛ: «'E -yi -la -dɛme sɛ -gbɔ Lagɔ "ne 'gbezi 'nyakpa "me.

³⁵ -Glɔ 'klekle "ku, -ɔkɔkokɔko 'na -ɔ gu Lagɔ -gɛ, "ne -ɔ 'ŋwinɛle- "me -wɛ, Lagɔ yu 'ce wamale-.

³⁶ "Naa-, Zezu Kli "me 'ye Lagɔ -ylɛle -lɔ, "ne 'ɔ yi -lɔ Izlayɛleyua "kuwɛtɛ 'na 'Denaade -sɛle, 'ɔyi, -ɔ -noɔ 'nyakpa 'klekle 'na Anyinɛnyɔ yɔ -wɛ.

³⁷ 'A -yi sɛ -gbɔ -ɛ -bhli -wɛ 'na 'de ŋwɛne- Zude -glɔ 'klekle "ku, 'ɛ 'cile Galile -glɔ "me, -sɔɔdɛku Zaa -bhulɛ batɛme 'na weli "bhuɔ -wɛ.

³⁸ "Ɛ Nazalɛte 'na Zezu -wɛ, 'a -yi 'se sɛ -gbɔ Lagɔ -ŋwɛnɛlo Zuzu Wlewle "me, "ne 'ɔ jo- 'se 'bhɛloɛ kɔ ne, 'ɛza, -mee 'ɔ -ylɛle 'klekle -wɛ, 'ɔ -no 'nɛne, "ne 'ɔ -yamalea 'nyakpa -ye zuzu -nyɛnyea lia 'yalɛ -wɛ, "naa-, Lagɔ "bhaa 'wa -kole "ku zɛ.

³⁹ "Ne -anye, -anye -noɔ -lɔ -ye 'ɔ -no 'klekle Zufonya 'na 'du "me, "ne Zeluzalɛme -du "me -wɛ 'na -wayeɛdɛ 'waa. 'Wa -kolo klowa "klo "ne 'ɔ yi -lɔ "ku.

⁴⁰ -Mɔ, Lagɔ 'wloɔ- gluzɔ 'yli ta -zle "me, "ne 'ɔ yu -lɔ bhulɛle- -gbɔ 'ɔ 'tua- 'ɔyi -glɔnya 'ylime.

⁴¹ 'Ɛ "ne -kɛ 'nyakpa 'klekle 'waa, -mɔ, -anye. "Naa- Lagɔ -sɛ lɔbhɔ -anye "klee -wayeɛdɛ "ku. -Anye -nyɛ 'ɔyi "bhaa -a -lile 'gɔme, "ne -a -nɔmɔle 'gɔme, -sɔɔdɛku, 'ɔ 'wlo- gluzɔ "bhuɔ -wɛ.

⁴² 'Ɔ -bhulɛle -anye -gbɔ -a -sɛle 'nyakpa 'Denaade, -se -a bhulɛ -ye -a 'ye- 'ylime -wɛ 'na weli. 'Ɔyi Zezu, 'ye Lagɔ -sɛ -lɔ lɔbhɔ -wa -yɛ "ne 'wa "ku- -wɛ 'na 'gbobhlenyɔ "ku.

⁴³ "Guɔkwɔmenya 'klekle -wa bhulɛ 'ɔnɛɛ dɛku -wɛ nɛɛ: 'Nyɔkpɔ 'na 'ɔ -kɔ 'dleku, 'ɔnɛɛ 'tɔ "me, 'ɔ nyɔ -wɛ 'na 'nyinyonoli 'na gbo yi 'ce 'yi 'taleɔ-.»

Zuzu Wlewle 'kwlile -wa "ne zufonya 'waa "ku -wɛ

⁴⁴ Piɛle -ko -namlɛ bhulɛ dɛku, "ne Zuzu Wlewle yi -lɔ -wa -fo Lagɔweli 'yukwli -wɛ "ku 'kwlile- 'klekle.

⁴⁵ Zufonya -wa -kɛle 'dleku "ne Piɛle "bhaa 'wa -yile 'gɔme -wɛ, 'ɛ -nyoa, -ye 'wa 'ye- 'ylime -gbɔ Zuzu Wlewle 'kwlile- -me 'lelee -wa "ne zufonya 'waa "ku -wɛ.

⁴⁶ Sɛko -wɛ, 'wa -nyini 'awɔ 'lelee "ɛ 'nyakpa -wɛ 'na gbo -lele -kwleyi -ye 'wa gbɔ 'awɔ "ne 'wa kwa 'awɔ -lɔ Lagɔ 'ŋlu -wɛ "me. "Ne Piɛle yi -lɔ "kusɔ weli "ku libhile nɛɛ:

⁴⁷ «-Dɛmeda, 'Nyɔkpɔ yi bhɔ no -gbɔ 'wa te "ɛ 'nyakpa -wa -yle Zuzu Wlewle -anyɛɛ sɛ -wɛ, batɛme "nyɛ 'a?»

⁴⁸ "Ne Piɛle yi -lɔ no -gbɔ 'wa 'nyoa- batɛme Zezu Kli 'na 'tɔ "me, "ne 'wa yu -lɔ bhulɛle- -gbɔ 'ɔ -soa 'yli yɛ yɔko.