Matie 8 - Nouveau Testament bété de Gagnoa

Zezu -yamalea 'zlɛlɔbhɔnyɔ

¹ Zezu 'kwli- lɛ tlo bhuɔ ne, 'nyakpa 'na -zakpɛ "yitɛ yu -lɔ gɛlele-.

² 'Zlɛlɔbhɔnyɔ bholo 'nyiɔ- yɔko, 'ɔ "pɔlo- -kokomini 'yliku, "ne 'ɔ yi -lɔ no nɛɛ: «Anyinɛnyɔ, -e 'cɛ 'yɔbhɔ ne, -e 'bhɛle- -e "kɛ -ame 'wlele "zoa-.»

³ "Ne Zezu yi -lɔ sɔ "me glo, "ne 'ɔ yu -lɔ kɔ 'sa, 'ɔ nɛɛ: «'E 'yɛbhɛ zaa, plɛ 'wlele.» "Ɛ doɔ cuu 'ɔnɛɛ 'zlɛ yi -lɔ bhiɛ.

⁴ "Ne Zezu yu -lɔ kɔ 'titli nɛɛ: «Te -kɛ 'nyɔkpɔ 'de -sɛle, -mɔ, me -se -e "kɛ -eyi bɔbɔnyɔ 'ylime tuɔ-, -se bɔbɔli -ye Moyize no -gbɔ 'wa -sɛ -wɛ, 'wlɛ-. 'Ɛɛ "kɛ -lɔ 'de -sɛ nɛɛ -e -yamale.»

Slojayu 'na 'dlekukɛlesɛ

⁵ Zezu -plɛ Kafanaɔme "ne "slojayu "yitɔ yu -lɔ 'sibhɔle- "ne 'ɔ yu -lɔ bhubhɔ-.

⁶ 'Ɔ nɛɛ: «Anyinɛnyɔ, 'neɛ "kulɔbhɔnyɔ 'kɔtɔkɔtɔle- "me, 'ɔ "ne 'bhɛle- "ne 'ɔ "kɛ "ku -sɔ, 'ɔ 'gbape kpɛnyee.»

⁷ "Ne Zezu yu -lɔ bhulɛle- nɛɛ: «-A -me, 'e "kɔ -ayigɛsɛ yamalea-.»

⁸ -Mɔ, "ɛ "slojanya 'na 'yukugɛlenyɔ "yitɔ -wɛ nɛɛ: «Anyinɛnyɔ, 'e "ne -eyi 'neɛ sueme 'na pla- -sɛ -kɛ. Zaa, bhulɛ- welicibhɛ -bholo -kpee, -se 'neɛ "kulɔbhɔnyɔ "kɛ yamale-.

⁹ "Naa- -ame 'e -kɛ 'neɛ "cifia 'wɔ -ye 'e "zo lɛ 'plome, "ne 'e -kɛ 'neɛ -wa "zo -ame 'plome. 'E kɛ -bholo -no nɛɛ: Me, me 'ye 'ɔ me -lɔ, "ne 'ɔnɛɛ 'ɔwɛ yi, yi 'ye 'ɔ yi -lɔ, "ne 'e kɛ 'neɛ "kulɔbhɔnyɔ no -gbɔ no -ɛne, no 'ye 'ɔ no -lɔ.»

¹⁰ Zezu no- lɛ "ɛ weli -wɛ ne, "ɛ 'nyɔkpɔ -wɛ 'tɔ "ku 'ɔ -lelo -lɔ, "ne 'ɔ yi -lɔ -wa -gɛlelo -wɛ bhulɛle- nɛɛ: «Gbɛklɛklɛ 'ye 'e bhulɛle -kɛ lɛ 'anye, 'e -na 'ce -zɛ soɔ 'na 'dlekukɛleɛ 'ylime 'ye Izlayɛleyua 'klekle 'glɛme.

¹¹ -Mɔ, 'e bhulɛle 'anye 'gbagboa yi 'ce -glɔ 'na -mee ylo 'wlole gluzɔ "ne -mee 'ɛ me 'duku 'pele- -ka -wɛ 'bhale- "ne 'wa -nyɛ Ablame, Izake, Zakɔbo "bhaa, 'wa yi 'ce "kuzalilɛ Lagɔ 'na -klɔgbɔdu "me dɛbhele lile-.

¹² "Ne -nyɔ za "ɛ Lagɔ 'na 'Kamalezikpɛ -ko nɛ -kɛ lɔbhɔ -wɛ, 'wa yua zikpoku "pɔ gutitiɛ "me, "bhle 'ye 'wa "kɛ 'ce -lɔ "tule "ne 'wa "kɛ -lɔ 'glɛ nimile-.»

¹³ "Ne Zezu yi -lɔ "ɛ Wlɔmo 'na "slojayu "yitɔ -wɛ bhulɛle- nɛɛ: «Me, -see -e -kɛ 'dleku -wɛ, 'ɛ ko sɔbhɔ.» -Sɔɔdɛku Zezu -le nɛ bhulɛ dɛku -wɛ 'ye "ɛ Wlɔmo 'na "slojayu 'na "kulɔbhɔnyɔ -wɛ -yamale -lɔ.

Zezu -yamalea Piɛle 'na 'wɔtɔŋɔnɔ

¹⁴ Zezu -plɛ Piɛle 'na bhudu "me. 'Ɔ 'na 'wolo- Piɛle 'na 'wɔtɔŋɔnɔ pe- nɛ -duku, 'ɔnɛɛ ku gbɛtɛ nɛ.

¹⁵ "Ne Zezu yi -lɔ 'ɔnɛɛ sɔ kɔ 'sa, "ne 'ɔnɛɛ ku yi -lɔ "ku wɔtɔ-. "Ne 'ɔ yi -lɔ "ku -sɔ, "ne 'ɔ yi -lɔ Zezu "ku lɔbhɔ-.

Zezu -yamalea 'nyakpa -kwleyia

¹⁶ Kugbedɛku, 'nyakpa 'na 'kwleyia -ye zuzu -nyɛnye -ko keyi -wɛ 'ye 'wa -nɛme -lɔ Zezu. Welicibhɛ kɔ, 'ɔ -soa zuzu -nyɛnyea keyi "ne 'ɔ -yamalea 'gwizinya 'klekle.

¹⁷ Zezu -no "ɛ -li -wɛ 'wɔ -se "guɔkwɔmenyɔ Ezayi 'na weli -ye 'ɔ -bhulɛ -wɛ "kɛ 'yli 'wlole. Sɛne 'ye Ezayi -bhulɛ 'awɔ -lɔ nɛɛ: 'Ɔɔ libhi- -lɔ -anyɛɛ 'gbapeɛ "ku "ne 'ɔɔ -sɛ -lɔ -anye "gu 'wlime.

Zezu 'na gɛlesɛ

¹⁸ Zezu "kɛ 'nyakpa 'na -zakpɛ "yitɛ -wa -blu 'ylime 'ye ne, 'ɔ -bhulɛle 'ɔnɛɛ gɛlenya nɛɛ 'wa 'to 'ŋu -se 'wa "kɛ pɛ 'na -ɛce "ku me.

¹⁹ Lɔbhɔ 'ye -Lɔslonyɔ 'nyiɔ- -lɔ Zezu yɔko "ne 'ɔ yu -lɔ bhulɛle- nɛɛ: «"Bhenyɔ 'e yi -eyi gɛlele- -dee -e "kɛ me 'klekle -wɛ.»

²⁰ "Ne Zezu yu -lɔ bhulɛle- nɛɛ: «-Kɔkweazaki 'wɔ -kɛ -gwe 'na -mee 'wa 'plɛ, "ne "nɔgɔ "me 'na 'zea -kɛ 'wanɛɛ -lolɛ, -mɔ, 'Nyɔkpɔ Yowli "ne -kɛ plɛdɛ -kɛ.»

²¹ "Ne 'ɔnɛɛ gɛlenya 'na 'glɛme 'na -bholo yu -lɔ bhulɛle- nɛɛ: «Anyinɛnyɔ, 'tale- -ame 'yi -se 'e "kɛ -ame 'to zizi -ka me "bhuɔ.»

²² Zezu -bhulɛlo nɛɛ: «Gɛle- -ame, -se 'tale- -gɛzea 'yi -se 'wa zizi- 'wanɛɛ -gɛzea.»

Zezu 'sa- -pepe

²³ "Ne Zezu yi -lɔ gɔlo "me 'gblɛ-, "ne 'ɔnɛɛ gɛlenya yu -lɔ 'beku bhli.

²⁴ "Ne "ɛ doɔ cuu, -pepe "yitɛ yi -lɔ "ɛ jinyɛ -wɛ "klo yi, "ɛ gɔlo -ko la 'tekeyi 'ɛ "kɛ 'ŋu "ku 'yiɛ. -Mɔ, Zezu 'ŋɔŋo- nɛ.

²⁵ "Ne 'ɔnɛɛ gɛlenya yu -lɔ yɔko 'nyiɔ-, "ne 'wa yu -lɔ 'golia-, ŋwɛnɛɛ: «"Bhenyɔ yi -anye "ku, -mɔ, 'a ku -kɛ 'se ɛɛ.»

²⁶ "Ne Zezu yua -lɔ bhulɛle- nɛɛ: «Sɔɔbɛɛza 'a gu bhɔ? 'Nyakpa -nyɔ 'na 'dlekukɛleɛ "ne lɛ 'kpɔ- ne!» "Ne 'ɔ yi -lɔ "ku -sɔ, "ne 'ɔ yi -lɔ gbɔtɔ- "ne "ɛ -pepe -nyɛ jinyɛ "bhaa yi -lɔ 'diɔle- 'zɛnyee.

²⁷ "Ne 'ɔnɛɛ gɛlenya -wɛ geji yua -lɔ "ku 'bha-. Ŋwɛnɛɛ: «Sɔɔnyɔ yɔ bhɔ "ne -pepe -nyɛ jinyɛ "bhaa "zo bhɔ 'plome 'a?»

Zezu -sɛ 'nyakpa "sɔ zuzu -nyɛnyea keyi

²⁸ -Sɔɔdɛku Zezu -ylɛ lɛ "ɛ 'ŋu 'na 'pɛɛ -ce "ku, "ne -glɔ -ye 'wa la Gadala -wɛ 'na -biɛglo "ku, 'nyakpa "sɔ -ye zuzu -nyɛnyea li 'awɔ 'yalɛ yu -lɔ 'sibhɔle- -ka yi. -Biɛ "me 'ye 'wa 'dile- -lɔ 'du. "Ne 'nyɔkpɔ "ne 'bhɛle- "ne 'ɔ "kɛ lɔbhɔ ylɛle- -ye 'wa -ko 'konyinɛ "me kpɛnyee za.

²⁹ "Ne 'wa 'kpa 'awɔ -lɔ "me nɛɛ: «-Ye -e 'yɔbhɔle bhɔ -anye "me Lagɔ Yowli? Lɔbhɔ -namlɛ ylɛ -se -e "kɛ bhɔ -anye 'gbapea- 'a?»

³⁰ Lɔbhɔ 'na 'yukudɛ -bholo, 'kokotia 'na -zakpɛ "yitɛ -ko 'awɔ lɔbhɔ, 'wa li nɛ lɔbhɔ "ku.

³¹ "Ne zuzu -nyɛnyea yi -lɔ Zezu bhubhɔ- nɛɛ: «-E kɛ -anye -kpeti ne, "pɔ -kɛ -anye 'kokotia -wɛ "me!»

³² "Ne Zezu yua -lɔ -gwe "nyɛ, "ne zuzu -nyɛnyea yua -lɔ keyi 'bha- "ne 'wa yi -lɔ 'kokotia "me 'gbe 'klekle. 'Wanɛɛ -zakpɛ -wɛ gou 'bha- tlo 'vli, "ne 'wa yi -lɔ jinyɛ "me 'gbe 'klekle. "Ne 'wa yi -lɔ 'ŋu "me "kule-.

³³ "Ne 'kokotia 'na "klokolenya yi -lɔ yɔko -seliɔ. 'Wa -me zoku 'de -sɛle -ka. "Ne 'wa yi -lɔ 'nyakpa -ye zuzu -nyɛnyea -ko nɛ keyi -wɛ 'na 'de -sɛ -me.

³⁴ "Ɛ zoku -wɛ 'na 'nyakpa 'klekle -yi, "ne 'wa yi -lɔ Zezu 'sibhɔle-, 'wa 'yo- lɛ 'ylime ne, "ne 'wa yu -lɔ bhubhɔ- -gbɔ 'ɔ 'bha- 'wanɛɛ -glɔ "me!