Matie 5 - Nouveau Testament bété de Gagnoa

Zezu sloa 'ɔnɛɛ gɛlenya

¹ Zezu 'ye- 'nyakpa 'na -zakpɛ 'ylime, "ne 'ɔ yi -lɔ tlo 'vli 'gblɛ, "ne 'ɔ yi -lɔ -duku 'gli, "ne 'ɔnɛɛ gɛlenya yu -lɔ yɔko 'nyiɔ-.

'Diɛɛ 'na -jɔlo

² 'Ɔ libhi- weli "ku, "ne 'ɔ yua -lɔ sloa nɛɛ:

³ «'Ŋwɛnɛ "lɔbhɔ -ye 'dlezɔ -ko foo, "naa-, Lagɔ 'na 'Kamalezikpɛ 'wanɛɛ yɛ -lɔ.

⁴ -Wa 'tu -wɛ, 'ŋwɛnɛ "lɔbhoa-, "naa-, Lagɔ yua 'ce 'ylime siɛ.

⁵ -Wa 'nɛne- 'dleku -wɛ, 'ŋwɛnɛ "lɔbhoa, "naa-, 'wa yi 'ce dodo yle- Lagɔ 'na "nyɛnyɛ -bɛɛ' "ku.

⁶ 'Ŋwɛnɛ "lɔbhɔ -ye ŋɔŋo "ne 'ŋuto 'lɔbhɔ Lagɔ 'na "meŋwinɛlezikpɛ za -wɛ, "naa-, 'wa yi 'ce lo!

⁷ -Wa -kɛ 'nyɛzedle -wɛ, 'ŋwɛnɛ "lɔbhoa, "naa-, 'wa yi 'ce 'wanɛɛ 'nyɛzedle "pɔ me.

⁸ -Wa 'je- 'wayi Lagɔ kɔ gou -wɛ, 'ŋwɛnɛ "lɔbhoa, "Naa-, 'wa yi 'ce Lagɔ 'ylime 'ye.

⁹ -Wa gbɔ "ne "kuwɛtɛ -le -wɛ, 'ŋwɛnɛ "lɔbhoa, "Naa-, Lagɔ yua 'ce 'ɔnɛɛ yua la.

¹⁰ -Ye 'wa ziɛ 'nyɛze Lagɔ 'na "meŋwinɛlezikpɛ za -wɛ, 'ŋwɛnɛ "lɔbhoa, "naa-, "nɔgɔ-klɔgbɔ 'wanɛɛ yɛ -lɔ.

¹¹ 'Ŋwɛnɛ "lɔbhɔ 'anye, -sɔɔdɛku 'wa 'yli 'anye, 'wa ziɛ 'anye 'nyɛze "ne 'wa 'gbli 'anye gbagba -gbo 'wlime 'neɛ za -wɛ.

¹² 'A 'vluvlule- "me, 'a "kpa "me 'ŋwɛnɛ za, "naa-, 'peɛleɛ "yitɛ -wole 'anye "nɔgɔ "me! "Ɛ soɔ 'wa -zia 'awɔ -lɔ bhlɛme "guɔkwɔmenya 'nyɛze.»

Jibhi "ne Zle

¹³ 'Anye -noɔ -lɔ dodo ne "ku 'na jibhi 'waa. -Mɔ, jibhi "mɔ -da 'nu -kɛ ne, -see 'wa 'cɛ bhɔ 'lelee jibhi "zoa-? 'Bhɔ, 'ɛ "ne -la -bɛɛ' "me -ko, 'wa 'yi 'kwlɛ "me 'mɛne- "ne 'nyakpa 'yi "ku 'nɔŋɔle-.

¹⁴ 'Anye -noɔ -lɔ dodo ne "ku 'na -zle 'waa, 'du 'na -ɛ -ko tlo "yitɛ 'vli -wɛ, 'ɛ yi bhɔ "ku zizɔ- 'a?

¹⁵ "Ne 'wa yi bhɔ 'napɛ 'yli 'di "ne 'wa 'yi bhɔ nyidɛ 'wlime 'gbli? 'Bhɔ, "nɔgɔ "ku 'wa glɛ -lɔ "ne 'ɛ 'lea -lɔ -bhudu "me 'na konya 'klekle "ku.

¹⁶ "Ɛ sɛbhele -wɛ, 'anyɛɛ zle lea- -me 'nyakpa "ku, -se 'wa "kɛ 'anyɛɛ -li 'na -li -ye 'a no -wɛ 'ylime 'ye, -se 'wa "kɛ -a To Lagɔ -ɔ -ko "nɔgɔ "me -wɛ 'ŋlu kwa-.

Sɛne Zezu lɛ -lɔ Moyize 'na gbagbɛ 'na dɛku

¹⁷ 'A te -kɛ 'dleku kɛle- -gbɔ Moyize 'na -Lɔ "ne "guɔkwɔmenya 'na weli 'ye 'e -yi "ku bhia -ka. 'Bhɔ, "ku bhia -ka 'ye 'e "ne -yi, -mɔ, 'yli 'wlolea- -ka 'ye 'e -yi -lɔ.

¹⁸ "Naa-, gbɛklɛklɛ 'ye 'e bhulɛle -kɛ lɛ 'anye, "nɔgɔ -nyɛ dodo "bhaa kɛ -nazɛ -le, 'be 'na 'teketekeyi -bhueyi "ne 'bhɛle- "ne 'ɛ "kɛ Moyize 'na -Lɔ "klo 'bha-, 'wa -cɛ 'be 'na 'tekeyi "klo -sɛ gou, soɔ 'ye 'ɛ "kɛ 'ce -lɔ ko -kaa zikpɛ 'na "kubhiɛɛ.

¹⁹ 'Ɛza, -ɔ kɛ 'ce 'neɛ gbagbɛ -wɛ 'na 'tekeyi 'plome -sɛ, "ne -ɔ 'cɛ 'nyakpa -sloa -gbɔ 'wa -sɛ -me 'lelee 'plome ne, 'wa yu 'ce Lagɔ 'na 'Kamalezikpɛ "me 'na dɛku yu la, -mɔ, -ye 'a "kɛ lɛ no -tia 'ɛɛ ne lɛ: -Ɔ -slule 'neɛ weli 'ɔyi "me -wɛ, "ne -ɔ 'sloa 'nyakpa -wɛ, sɔbhɔ -nɔ -wɛ, 'ɔɔ "kɛ 'ce -lɔ Lagɔ 'na 'Kamalezikpɛ "me 'na "yitɔ "zo.

²⁰ -Mɔ, gbɛklɛklɛ 'ye 'e bhulɛle -kɛ lɛ 'anye, 'anyɛɛ "meŋwinɛleɛ 'ɛ "mɔ -Lɔsloanya "ne Faliziɛnya -nɛ "ku -zi, 'a "ne 'bhɛle- "ne 'a "kɛ Lagɔ 'na 'Kamalezikpɛ "me plɛ.

Kɛle "ne 'gboseliɛ

²¹ 'A 'no- 'awɔ "me -gbɔ 'wa bhulɛle- 'awɔ 'a 'to 'wa 'to 'wɔ nɛɛ: Te -kɛ 'nyɔkpɔ 'lɔbhɔ, -ɔ kɛ -kɛ 'nyɔkpɔ 'lɔbhɔ- ne, 'wa yu -kɛ gbobhlezejilɛ "ku kɔme-.

²² -Mɔ -ame, 'e bhulɛle 'anye nɛɛ: 'Nyɔkpɔ 'na -ɔ kɛ 'ɔ "nɔwli kɛle yɔko 'pɔle-, 'wa yu gbobhlele-, -ɔ kɛ 'ɔ "nɔwli 'yli- nɛɛ: -E "ne "nɛ-, 'wa yu 'ce zufonya 'na gbobhle-zejilɛ "ku kɔme-; -Ɔ kɛ 'ɔluyu no nɛɛ: "Kukwɛ sa bhɔ -eyi 'a, sɔbhɔ 'na nyɔ -wɛ yi 'ce -kosu "me me.

²³ Zaa, -e kɛ -neɛ' bɔbɔli -su, "ne -e 'cɛ bɔbɔledɛ "me kɔme ne, "ɛ doɔ, -e kɛ -luɔ -gbɔ -e "nɔwli -kɛ -neɛ' kɛle "me,

²⁴ 'tle- doɔ -neɛ' bɔbɔli cuu, me, -se -e "nɔwli "bhaa, 'a "kɛ -na 'gbo -seliɔ "bhuɔ, -se, -e "kɛ yi -se -e "kɛ -neɛ' bɔbɔli Lagɔ tuɔ-.

²⁵ -Neɛ' gbononyɔ "bhaa 'a wale- cuu, -sɔɔdɛku, 'a -ko -namlɛ -gwe "ku -wɛ, 'ɛ "mɔ -kɛ sɔbhɔ -ylɛle ne, -neɛ' gbononyɔ yi -kɛ -eyi gbobhlenyɔ kɔme-, "ne gbobhlenyɔ yi -kɛ -eyi "slojanya kɔ 'je "ne 'wa yi -kɛ -eyi -jiɛ "me "pɔ.

²⁶ Gbɛklɛklɛ 'ye 'e bhulɛle -kɛ lɛ -eyi: -E -ka -kɛ -jiɛ "me zɔ 'wlo, -e "mɔ -na -kɛ 'ɛnɛɛ "bhle bhiɛ -nɛ -fle "bhuɔ ne.

Gbozlɛɛ

²⁷ 'A 'no- 'awɔ "me -gbɔ 'wa bhulɛle- 'awɔ 'a 'to 'wa 'to 'wɔ nɛɛ: Te -kɛ gbo zlɛ-.

²⁸ -Mɔ -ame, 'e bhulɛle 'anye nɛɛ: -E kɛ -kɛ -eluyu 'na 'ŋɔnɔ "ku -wolo -visɛ, 'ɔ -nyɔ "bhaa gbo 'ye 'a -zlɛ -kɛ -lɔ 'dlezɔ.

²⁹ -Neɛ' lilikwlɛyli kɛ -eyi 'nyinyonoli noa- ne, -sɛ "bhle, -se "pɛ 'kwlɛ "me. "Naa-, -neɛ' ku 'na 'cibhɛ "kɛ 'kwlɛ bhli 'ɛ 'nɛne "ne 'ɛ -zi -e "kɛ "ku 'tuɔle- -se -e "kɛ -kosu "me me "ku.

³⁰ "Ne -neɛ' lilikwlɛsɔ kɛ -eyi "nyinyoli noa- ne, 'di "ku -se "pɛ 'kwlɛ "me. "Naa-, -neɛ' ku 'na 'cibhɛ "kɛ 'kwlɛ bhli 'ɛ 'nɛne "ne 'ɛ -zi -e "kɛ "ku 'tuɔle- -se -e "kɛ -kosu "me me "ku.

'Ŋɔnɔ 'na losɛweli

³¹ 'A 'no- 'awɔ 'lelee "me -gbɔ: -Ɔ kɛ 'ɔnɛɛ 'ŋɔnɔ 'na lo -sɛ ne, 'ɔ 'piɔ losɛbɔgɔ keyi.

³² -Mɔ, -ame, 'e bhulɛle 'anye nɛɛ: 'Nyɔkpɔ te -kɛ 'ɔnɛɛ 'ŋɔnɔ 'na lo -sɛ. 'E -na -kɛ -wa "ne kwɔkwɔlesɛ -kɛ -wɛ ga. -Mɔ, 'nyɔkpɔ 'na -ɔ -sɛ 'ɔnɛɛ 'ŋɔnɔ 'na lo -wɛ, gbozlɛɛ 'ye 'ɔ 'peliɔ -lɔ 'yli. Sɛko -wɛ 'widi 'na -vinɔ 'ye 'ɔ "kɛ -lɔ kwɔ zɛ. "Ne 'nyɔkpɔ kɛ -kɛ 'ŋɔnɔ 'na -nyɔ 'na lo 'wa -sɛ -wɛ -kwɔ, gbo 'ye 'ɔ zlɛ -lɔ.

Zezu nɛɛ: 'Wa te zligbɔ

³³ 'A 'no- "me 'lelee -gbɔ 'wa bhulɛle- 'awɔ 'a 'to 'wa 'to 'wɔ nɛɛ: Te -kɛ "fu weli 'ple, weli -ye -e -plele Anyinɛnyɔ kɔ -wɛ, "zo -kɛ 'plome.

³⁴ «-Mɔ, -ame, 'e bhulɛle 'anye nɛɛ: 'A te -kɛ zligbɔ gou, -se 'a te -kɛ "nɔgɔ "ku zligbɔle- sɛko -wɛ 'ɛɛ -noɔ -lɔ Lagɔ 'na 'glidɛ yɛ.

³⁵ -Se 'a te -kɛ 'lelee dodo "ku zligbɔle-, sɛko -wɛ 'ɛɛ -noɔ -lɔ 'ɔnɛɛ bho 'na 'piɛdɛ yɛ. -Se 'a te -kɛ 'lelee Zeluzalɛme "ku zligbɔle-, sɛko -wɛ -klɔgbɔnyɔ "yitɔ 'na 'du yɛ -lɔ zɛ.

³⁶ Te -kɛ -neɛ' 'wli "ku zligbɔle-. Sɛko -wɛ, -e -ka -neɛ' 'wlikonyi 'na yɛ -bholo 'fɛɛ "ne kpɔ "zoa- zɛ.

³⁷ -Neɛ' -ɛɛ, 'ɛ "zo -ɛɛ, -neɛ' 'bhɔ, 'ɛ "zo 'bhɔ, -ɛ yi -la 'beme -wɛ, sata "me 'ye 'ɛ 'bhale -lɔ.»

Zezu nɛ 'a te kpɛ -sɛ

³⁸ «'A 'no- 'awɔ "me nɛɛ: -Eluyu kɛ -eyi glɛ nu -sɛ, -sɛmo glɛ nu. 'Ɔ kɛ -neɛ' 'yli -wlɛ, wlɛ -me 'ɔnɛɛ.

³⁹ -Mɔ -ame 'e bhulɛle 'anye nɛɛ: -Ɔ -gble -eyi -wɛ 'to -kɛ gble -me, -mɔ -ye 'a "kɛ lɛ no -tiaa 'ɛɛ ne lɛ: 'Nyɔkpɔ kɛ -neɛ' lilikwlɛ -takpe kwlɛ 'pɔ-, tuɔ- -me 'lelee kɔpɛ -takpe.

⁴⁰ 'Nyɔkpɔ kɛ no -gbɔ 'ɔ "kɛ -eyi gbobhle-zejilɛ "ku -kɔme -se 'ɔ "kɛ -neɛ' "meplakoti "ku libhi- ne, 'jo mo 'lelee -neɛ' "kupɔlokwi kɔ.

⁴¹ 'Nyɔkpɔ kɛ no -gbɔ libhi 'na 'gbudu "ku -se 'nyia- -ame doɔ 'klɛpa ne, kwɔlo- -gwe "ku -kaa -se 'ple lɔbhɔ.

⁴² -Ɔ kɛ -eyi zlɛ "nyɔ. 'Nyɔkpɔ kɛ -eyi bho -ka -yi ne, te lo -sɛ.»

Zezu nɛɛ: 'A 'wamale- 'anyɛɛ -gblenya

⁴³ «'A 'no- 'awɔ "me nɛɛ: Wamale- -eluyu, -se gble -me -ɔ -gble -eyi -wɛ.

⁴⁴ -Mɔ, -ame 'e bhulɛle 'anye nɛɛ: 'A wamale- 'anyɛɛ -gblenya -se 'a bhubhɔ- -wa ziɛ 'anye 'nyɛze -wɛ za.

⁴⁵ 'A 'cɛ -kɛ soɔ 'sa 'ye 'a "kɛ -lɔ -diɛnadiɛ 'a To Lagɔ -ɔ -ko "nɔgɔ "me -wɛ 'na yua "zo, "naa-, sɛko -wɛ, 'ɔ 'poa 'ɔnɛɛ ylo -konyinɛnya "ne 'nɛnekonya za. "Ne 'ɔ labha 'ŋu 'nɛnekonya "ne konyinɛnya za.

⁴⁶ "Naa-, 'a "kɛ -wa -wa 'anye -wɛ -wa -me ne, 'peɛleɛ 'na -ye 'a "kɛ bhɔ yle? -Lɛposanya 'nabhɛ "zo me "ɛ soɔ.

⁴⁷ "Ne 'a kɛ 'a "nowlia 'wayikɔ 'bhɛle- ne, -ɛ -noɔ bhɔ "bhle lele yɛ 'a? -Wa "ne Lagɔ -yi -wɛ "zo me "ɛ sɛbhele -wɛ.

⁴⁸ Zaa, 'anye, 'a ko -kpee, -see 'a To -ɔ -ko "nɔgɔ "me -ko -kpee -wɛ.