Matie 3 - Nouveau Testament bété de Gagnoa

Zaa Batise 'na bhulɛweli

¹ "Ɛ "tɛnye -wɛ "me 'ye Zaa Batise 'wlole- -lɔ Zude 'na 'kɔsɛku zɔ "ne 'ɔ "pɔle 'awɔ -lɔ "bhle weli nɛɛ :

² «'A 'bheliɔ- kɔ, -mɔ, Lagɔ 'na 'Kamalezikpɛ "ne -la 'anye dɛ tlole-.»

³ 'Ɔnɛɛ "ku 'na weli 'ye "guɔkwɔmenyɔ Ezayi -bhulɛ 'awɔ -lɔ nɛɛ: 'Nyɔkpɔ -bholo "pɔle 'kɔsɛku weli. 'Ɔ nɛɛ: «'A -sɛ Anyinɛnyɔ 'na -gwe, -se 'a 'jeɛ- -kɛ 'wli gbii.»

⁴ Zaa 'pɔ- 'awɔ samoŋɛnelokwi "ku. 'Ɔ -bhlele 'awɔ nɛmɛku -bɛto "mene. 'Kpakpaa nyɛ lɔgwea kpe "bhaa 'ye 'ɔ li 'awɔ -lɔ.

⁵ "Ne 'nyakpa 'bhale 'awɔ Zeluzalɛme, Zude "ne Zludɛbɔ 'na moɔ 'klekle, "ne 'wa yi 'awɔ -lɔ Zaa yɔko.

⁶ "Ne 'wa sɛ 'awɔ -lɔ 'wanɛɛ 'nyinyonoli 'na 'de, "ne Zaa 'nyoa 'awɔ -lɔ batɛme Zludɛbɔ "me.

Zaa 'na weli

⁷ Faliziɛnya "ne Saduseɛnya 'na 'gbagboa yli 'awɔ Zaa lo, -se 'wa "kɛ batɛme yle. 'Ɔ yoa- lɛ 'ylime ne, 'ɔ nɛɛ: «"Ŋwetɛbhea 'na -zakpɛ -lɛ, -ɔ -sloa bhɔ 'anye -see 'a "kɛ Lagɔ 'na 'kɛle -ɛ yi -wɛ nu 'bha- 'a?

⁸ 'A 'tlo- bhi, -se 'wa "kɛ sɛ yibhlele- -gbɔ 'a 'bheliɔ- kɔ.

⁹ -Mɔ, 'a te -kɛ no -gbɔ nɛɛ: -Anye, Ablame 'na yua 'na yua 'ye -a -noɔ -lɔ. Sɛne 'ye 'e bhulɛle lɛ 'anye nɛɛ: 'Tiyi ne, -ye 'a 'wolo dɛne "ku ne, Lagɔ 'yi Ablame 'na yua 'na yua "zoa-!

¹⁰ -Dɛme ne, "gbupɛ 'pe- su -kpulu 'wɔ yɔko -se 'ɛ 'cɛ glu -sɛ. Zaa, su 'na -ɛ "ne tlo bhi 'na -bhi -wɛ yi 'ce 'kɔlɔ-, "ne 'ɛ yi 'ce -kosu "me 'pɔ-.»

-Ɔ yi -wɛ

¹¹ «-Ame, 'ŋu nu 'ye 'e "nyɛle lɛ 'anye batɛme, -se 'a "kɛ kɔ 'bheliɔ-. -Mɔ, -ɔ 'bhale -ame 'beme -wɛ 'ɔ 'kpɔ- "ne 'ɔ -zi -ame "ku: 'E "ne 'bhɛle- "ne 'e "kɔ 'ɔnɛɛ 'kpɔkolo 'bho "me -sɛ. 'Ɔyi, Zuzu Wlewle "me, "ne -kosu "me, 'ɔ "kɛ -lɔ 'anye batɛme "nyɛle.

¹² 'Ɔ -su -kɛ -bitɛ, 'ɔ "kɛ "me fo. -Ɛ 'nɛne -wɛ, 'ɔ 'cɛ 'wlo "me "zo -se 'ɔ "kɛ -didi -kosu 'na -ɛ "ne nyimɔ -wɛ "me siɛle-.»

Zaa 'nyɛ- Zezu batɛme

¹³ "Ne Zezu yi -lɔ Galile 'bha-, "ne 'ɔ yi -lɔ Zludɛbɔ "me Zaa yɔko yi, -se 'ɔ "kɔ batɛme "nyɛ.

¹⁴ Zaa 'nasɛ lo: «'Ɔ nɛɛ: -Eyi -mɔɔ "kɛ -lɔ -ame batɛme "nyɛ, "ne -e nɛɛ 'mɔɔ -na "nyɛ -eyi batɛme!»

¹⁵ -Mɔ, Zezu nɛɛ: «'Tale- -namlɛ soɔ 'yi, "naa- soɔ 'ye -a "kɛ -lɔ -ye Lagɔ 'yɔbhɔ lo -wɛ no.» "Ne Zaa yi -la -lɔ "ku 'ŋunu.

¹⁶ Zezu -yle lɛ batɛme "bhuɔ ne, 'ŋu "me 'ye 'ɔ 'bha- -lɔ. "Ne "nɔgɔ "me yi -lɔ nuɔ 'diɔ, "ne 'ɔ yi -lɔ Lagɔ Zuzu -ɛ 'bhale "nɔgɔ "me -wɛ 'ylime 'ye sɛgbɛɛ -kobhlele, "ne 'ɔ yu -lɔ "ku 'kwile-.

¹⁷ "Ne weli yi -lɔ "nɔgɔ "me 'bhale- nɛɛ: «-Ɔne 'neɛ -wawayu yɔ -lɔ, 'ɔyi 'ye 'e -sɛ -lɔ 'ŋwɛnɛsɛ "ku lɔbhɔ.»