Matie 28 - Nouveau Testament bété de Gagnoa

Zezu 'wlo- gluzɔ

¹ -Gbajɛ 'ple- lɛ "bhuɔ ne, 'Dimasi 'na zegbakpɔ "me, Magedala 'na Mali "ne Mali 'na -vinɔ -wɛ -me -biɛ "ku 'wolo- -ka.

² Cuu ne, dodo -tɛtɛle "yitɛ "ku. "Nɔgɔzilɔ 'kwli- "nɔgɔ "me "zɔ, "ne 'ɔ yi -lɔ 'tiyi 'letia-, "ne 'ɔ 'yi -lɔ "ku 'gli.

³ 'Ɔ 'lelele "me, "ne 'ɔnɛɛ "meplakoti -ko buu.

⁴ Nyanɔ 'lɔbhɔ "slojanya -wa -kole -biɛ "klo "yitɛ "ku "ne 'wa yi -lɔ tɛtɛle-, "ne 'wa yi -lɔ lele- sɛgbɛɛ -wa "ku-.

⁵ "Ne "nɔgɔzilɔ yi -lɔ 'gbo 'di, "ne 'ɔ yi -lɔ 'ŋwenea bhulɛle- nɛɛ: «'A te 'gu, 'e -yi sɛ -gbɔ Zezu -ye 'wa -kole klowa "klo -wɛ za 'a 'pɔ -lɔ 'yli.

⁶ 'Ɔ "ne dɛne -ko, 'ɔ 'wlo- gluzɔ, -see 'ɔ -bhulɛ nɛ -wɛ, zaa, 'a yi -se 'a "kɛ -dee 'ɔ 'pe- nɛ -wɛ 'ylime 'ye.

⁷ Zaa, -Dɛmeda, 'a me cuu -se 'a bhulɛle- 'ɔnɛɛ gɛlenya nɛɛ: Zezu 'wlo- gluzɔ, 'ɔ -wole 'anye Galile. "Bhle -ce 'ye 'a "kɔ -lɔ 'ylime 'yele. -Ye 'e "kɛ nɛ 'anye bhulɛle- -wɛ -lɔ.»

⁸ "Ɛ 'ŋwenea -wɛ 'bha- "ɛ -biɛ "ku cuu, "naa-, 'wa gu nɛ kpɛnyee "ne 'ŋwɛnɛ 'lɔbhoa nɛ kpɛnyee. 'Wa -guɔ, -se 'wa "kɛ nɛ 'ɔnɛɛ gɛlenya 'de -sɛle -ka me.

⁹ Cuu ne, "Ne Zezu yua -lɔ 'sibhɔle-, "ne 'ɔ yua -lɔ bhulɛle- nɛɛ: «'A yawo!» "Ne 'ŋwenea -wɛ yu -lɔ yɔko 'nyiɔ-, "ne 'wa yu -lɔ 'bho 'sale, "ne 'wa yu -lɔ "zo.

¹⁰ Lɔbhɔ 'ye Zezu -bhulɛloa -lɔ nɛɛ: «'A te 'gu, 'a me -se 'a bhulɛle- -ame "nowlia 'wɔ, 'wa me Galile, "bhle -ce 'wa "kɛ -lɔ -ame 'ylime 'ye le.»

"Slojanya 'na 'desɛweli

¹¹ "Ɛ 'ŋwenea -wɛ 'nɔŋo- -na -gwe "ku, "ne "slojanya -wa -kole -biɛ "klo -wɛ, yi -lɔ bɔbɔnya "yitia zoku 'de -sɛle -ka me, -see 'ɛ -ylɛle 'klekle -wɛ.

¹² "Ne bɔbɔnya 'na "cifia -nyɛ "yitia 'wɔ "bhaa "zo- -lɔ 'wli "ne 'wa yi -lɔ weli "ku "zolea- "ne 'wa yi -lɔ "slojanya 'dlasi -kwleyi kɔ 'je.

¹³ "Ne 'wa yi "lɔ "slojanya bhulɛle- nɛɛ 'a no -kɛ -gbɔ: «Zezu 'na gɛlenya -yi sabo ne 'ɔnɛɛ -gɛzɛ 'wi yli -ka -sɔɔdɛku -a 'ŋɔŋo- -wɛ.

¹⁴ 'Kamalenyɔ "yitɔ 'cɛ -kɛ "me 'no- ne, -anye, -a yu "ɛ weli -wɛ zɔ -sɛle 'tee, -se 'a te -kɛ 'gbo "me ylele- zɛ.»

¹⁵ "Ne "ɛ "slojanya yi -lɔ "ɛ 'dlasi -wɛ "ku 'libhi, "ne -ye 'wa -bhulɛloa -wɛ, -wa 'yi -lɔ no. 'Ɛnɛɛ za, "ɛ weli -wɛ, 'wa sɛ -na 'ce -zɛ -dɛme Zufonya 'glɛme 'ɛnɛɛ 'de.

Zezu -tua 'ɔyi 'ɔnɛɛ gɛlenya 'ylime

¹⁶ Zezu 'na gɛlenya kogbɔ -bholo -me Galile. "Ne 'wa yi -lɔ tlo -dee Zezu -no -gbɔ 'wa me -wɛ 'vli ylɛ.

¹⁷ 'Wa "kɛ Zezu 'ylime 'ye ne, "zo 'wa "zo- -lɔ, -mɔ, -bedia ne -tia 'dleku -kɛ -gbɔ 'ɔyi yɔ.

¹⁸ Zezu 'nyua- yɔko, 'ɔ nɛɛ: «'E -yle 'bhɛloɛ 'klekle "nɔgɔ "me "ne dodo ne "ku.

¹⁹ 'A me -glɔ 'klekle "ku, -se 'a bhulɛle- 'nyakpa 'neɛ "kukoweli, -se 'wa "kɛ 'neɛ gɛlenya "zo. 'A 'nyoa- batɛme To, Yu "ne Zuzu Wlewle 'na 'tɔ "me.

²⁰ "Ne gbagbɛ 'klekle -ye 'e -sloa 'anye -wɛ, 'a sloa -see 'wa 'cɛ 'plome "zo -wɛ, "ne -ame, 'e -ko 'anye 'glɛme -godogodo -kaa zikpɛ 'na "kubhiɛ -zle.»