Matie 24 - Nouveau Testament bété de Gagnoa

Zezu nɛɛ: Zeluzalɛme 'na "Mebɔbɔlebhudu yi 'wlɔ-

¹ Zezu 'wlo- "Mebɔbɔlebhudu "me zɔ, 'ɔ -ko nɛ me dɛku "ne 'ɔnɛɛ gɛlenya yu -lɔ yɔko 'nyiɔ-, -se 'wa "kɔ "ɛ "Mebɔbɔlebhudu -wɛ 'na sɔbhɔ sɛ 'ylime tua-.

² Zezu libhi- weli "ku nɛɛ: «'A -gɛ -ɛwɛ 'klekle 'yli 'a? Gbɛklɛklɛ 'e bhulɛle lɛ 'anye, -ɛwɛ, "ɛ 'tiyi -wɛ 'wɔ -ka -la "ku 'pepele-. 'Ɛyi 'klekle yi 'wlɔ-.»

Zezu -yi -ɛ "kɛ yi zikpɛ 'na "kubhiɛ -zle

³ Zezu 'gli- Oliviesu 'na tlo 'vli, 'ɔnɛɛ gɛlenya 'nyiɔ- yɔko, 'wayikɔ 'wa -ko nɛ lɔbhɔ, "ne 'wa no -lɔ nɛɛ: «'Bhulɛle- -anye, -Sɔɔdɛku lɔbhɔ "kɛ bhɔ ylɛ "Ne 'be 'na -ye -a "kɛ bhɔ 'ylime 'ye "ne -a "kɛ bhɔ 'sɛ yibhlele- -gbɔ lɔbhɔ -ylɛ 'a?»

⁴ "Ne Zezu yua -lɔ bhulɛle- nɛɛ: «'A 'luɔle- -kɛ 'ayi "ku! 'Nyɔkpɔ te -kɛ 'anye ylo no.

⁵ "Naa-, 'nyakpa -kwleyia yi 'ce yi "ne 'wa yi 'neɛ 'tɔ "ku 'libhi "ne 'wa yi 'ce no nɛɛ: -Ame Ŋwlɛŋwlɛyu 'mɔɔ ne lɛ, 'wa yi 'ce 'nyakpa -kwleyia 'kwlɛ bhlia-.

⁶ 'A yi 'ce to 'na -ɛ tlo dɛ "ne -ɛ "ne dɛtlo -wɛ 'na weli 'no. Zaa, 'a 'luɔ- -kɛ! 'A te -kɛ "gu! 'Diɛɛ, "ɛ -ɛwɛ 'klekle sɔbhɔ 'ye 'ɛ "kɛ -lɔ ylɛle-. 'Ɛ "ne -mlɛ -kɛ zikpɛ 'na "kubhiɛ -zle yɛ.

⁷ "Naa-, 'du 'na -ɛwɛ -nyɛ 'du 'na -ɛwɛ "bhaa 'wa yi 'ce gwe. -Klɔgbɔdu -nyɛ -klɔgbɔdu "bhaa yi 'ce gwe, "ne -glɔ 'na -bedi "ku ŋɔŋo yi 'ce "bhle yi, "ne dodo yi 'ce tɛtɛle-.

⁸ -Ɛwɛ 'klekle yi 'ce lele- sɛgbɛɛ 'gwɛlelɔbhɔŋɔnɔ 'na tɛtɛ -gbapeɛ.

⁹ 'Ɛ dɛ -wɛ "ku, 'wa yi 'ce 'anye 'ple "ne 'a yi 'ce 'kle 'ye, "ne 'wa yi 'anye 'lɔbhɔ, "ne 'a yi "ku. -Wa "ne Lagɔ -yi 'klekle yi 'ce 'anye 'gble 'neɛ za.

¹⁰ "Ne 'nyakpa -kwleyia 'na -wa -kɛ nɛ Lagɔ 'dleku -wɛ, yi 'ce 'ɔ lo -sɛ. 'Wa yi 'ce ylo 'nonole-, "ne 'wa yi 'ce 'gblegblele-.

¹¹ 'Nyakpa 'na -wa -noɔ "guɔkwɔmenya -gbeyia 'waa -wɛ yi 'ce yi "ne 'wa yi 'ce 'nyakpa -kwleyia ylo no.

¹² -Ɛwɛza, "nyɛnye yi 'ce zimale- kpɛnyee, "ne 'nyakpa -kwleyia 'na 'ŋwɛnɛ yi 'ce "ku -seliɔ.

¹³ -Mɔ, -ɔ kɛ 'ce 'dleku "tamale- -kaa "ne lɔbhɔ kɛ 'ple- ne, Lagɔ yu 'ce 'fuɔ.

¹⁴ "Ɛ Lagɔ 'na 'Kamalezikpɛ "me 'na 'Denaade -wɛ 'wa 'yi 'ce -glɔ 'klekle zɔ -sɛle. "Ne -wa "ne Lagɔ -yi 'klekle -wɛ 'yi 'ce "me no. "Ɛ doɔ 'ye zikpɛ 'na "kubhiɛ dɛku "kɛ -lɔ ylɛ.»

Zezu nɛɛ: Nyakpa yi 'ce 'gbape kpɛnyee

¹⁵ «-Sɔɔdɛku, 'a kɛ 'ce -linyimɔnyɔ "yitɔ 'ylime 'ye, "ne 'ɔ kɛ -dee -ko 'wlewle -wɛ 'gli- ne, -see "guɔkwɔmenyɔ Daniɛle -gbɔ 'awɔ -wɛ, -eyi, -mɔɔ zɛle "me ne, 'no- "me 'tee!

¹⁶ Lɔbhɔ 'na dɛku -wa kɛ 'ce Zude -glɔ "me -ko, 'wa 'fɔtɔle- tlo 'vli.

¹⁷ -Ɔ kɛ -bhudu 'wli -ko, 'ɔ te 'kwli -se 'ɔ te -bhudu "me -bɛɛ' "ku 'libhi ka me.

¹⁸ -Ɔ kɛ 'kwlɛ "me -ko, 'ɔ te 'wlizɔ zi, -se 'ɔ te "koti "ku 'libhi ka me.

¹⁹ "Ɛ -zlewɛ, gokɛleŋwenea "ne gwaŋwenea yi 'ce 'nyɛze "ku lele- kpɛnyee!

²⁰ Zaa, 'a bhubhɔ- Lagɔ -se -zle 'a 'fɔtɔ -wɛ te -kɛ, 'wɔtlɔ -yi dɛku "ne -gbajɛzle "zo.

²¹ "Naa-, "ɛ "tɛnye -wɛ "me, 'nyakpa yi 'gbape kpɛnyee, -see 'nyɔkpɔ -na 'ce -zɛ 'gbape- -wɛ. -Se 'ɛ 'bhale zikpɛ 'na "kucidɛ "me "ne 'ɛ -ylɛ lɛ -dɛme ne, 'nyɔkpɔ -na 'ce -zɛ "ɛ soɔ 'gbape-, "ne 'nyɔkpɔ -ka 'ce -la sɔbhɔ 'gbape.

²² Lagɔ "mɔ nɛ -kɛ "ɛ 'yli -wɛ "ku -sɛ ne, 'nyɔkpɔ -cɛ nɛ nu "po! -Mɔ, 'nyakpa -ye Lagɔ 'ɔyigɛsɛ -sɛ lɔbhɔ -wɛ za, 'ɔ -sɛ -lɔ "ɛ 'yli -wɛ "ku -dudu.

²³ Zaa, 'nyɔkpɔ kɛ 'anye bhulɛle nɛɛ: 'A 'wolo- "ku, Klise -ko dɛne! "Ne 'ɔ -ko dɛce! 'A 'to 'ce 'dleku kɛle-.

²⁴ "Naa-, 'nyakpa yi 'wayi Ŋwlɛŋwlɛnya la, "ne "guɔkwɔmenya -gbeyia yi yi, "ne 'wa yi zɛzɛ "yitɛ "pɔ. "Ɛ zɛzɛ yi 'kpɔmale- kpɛnyee 'na 'ylime 'ɛnɛɛ 'bhɛloɛ 'ɛ yi nɛ -kɛ 'nyakpa -ye Lagɔ -sɛ lɔbhɔ 'nabhɛ -wɛ 'kwlɛ bhlia-.

²⁵ 'A 'fo 'yukwli, -Ame, 'e ligba- -kɛ 'anye "bhuɔ!»

'Nyɔkpɔ Yowli yi 'ce yi

²⁶ «'Wa kɛ 'anye -bhulɛle nɛɛ: 'A -gɛ 'yli, ŋwɛnɛŋwɛnɛyu -ko 'kɔsɛku, 'a te -kɛ "bhle me, 'wa kɛ -no -gbɔ 'a -gɛ 'yli, 'ɔɔ zizɔ- lɛ dɛ 'a 'te 'dleku 'kɛle-.

²⁷ "Naa-, 'Nyɔkpɔ Yowli yi 'ce yi sɛgbɛɛ 'ŋu bhle 'yli "ne 'ɛ 'bhale -mee ylo 'wlole gluzɔ "ne -ɛ me -mee 'ɛ bhlile -wɛ.

²⁸ Zaa, -dee -gɛzɛ 'pe- -wɛ, lɔbhɔ 'ye "gbaa 'yɔbhɔle -lɔ 'wli.

²⁹ "Ɛ 'gbapeɛ -wɛ kɛ 'ple- "bhuɔ ne, ylo -ka "po, 'ce -ka le, -zeli yi zɔ bhli, "ne "nɔgɔ "me 'na -li 'klekle -ɛ kɛ "bhle -ko yi tɛtɛle-.

³⁰ "Ne 'nyakpa "kɛ -lɔ 'Nyɔkpɔ Yowli 'na 'be "nɔgɔ "me 'ylime 'yele, 'ɛɛ "kɛ -lɔ gbɔ "ne "ɛ 'nyakpa "kɛ -lɔ 'sɛ yibhlele- -gbɔ 'Nyɔkpɔ Yowli yi -la yi, "ne dodo ne "ku 'na 'nyakpa 'klekle "kɛ -lɔ 'tu, "ne 'wa "kɛ -lɔ 'Nyɔkpɔ Yowli 'na yiyinɔ 'ylime 'ye "nɔgɔ "me, 'ɔ 'bhale "nɔgɔjatlɛ "me, 'ɔ -nyɛ 'ɔnɛɛ 'bhɛloɛ 'klekle -nyɛ 'ɔnɛɛ 'ŋlu "bhaa.

³¹ -Jɔgwe "yitɛ yi 'ce 'gbɔ "ne 'Nyɔkpɔ Yowli "kɛ -lɔ 'ɔnɛɛ "nɔgɔzilia -nɛme, -se 'wa "kɛ 'ɔnɛɛ -ye 'ɔ -sɛ lɔbhɔ dodo ne "ku -dawli -mɔɔnɔ -wɛ dɛbhele 'wli "zole, 'wa 'bhale kɔpɛ "ku, lili -kwlɛ "ku, 'yuku "ne 'beme.»

Figesu -sloa 'anye

³² «Figesu 'na "ku 'na weli -ye 'ɛ -sloa 'anye -wɛ, 'a 'no "me 'tee. Figesu 'na kpe kɛ mi -ku "ci, "ne 'ɛ kɛ 'bhoɔ, 'a yibhlele- sɛ -gbɔ 'ylobɛlele "ne -la dɛtlo.

³³ Zaa, 'anye 'lelee, 'a kɛ -li -wɛ 'klekle 'ylime 'ye ne, 'a yibhlele- sɛ -gbɔ 'Nyɔkpɔ Yowli "ne -la dɛtlo, 'ɔ -ko 'anye 'nuɔ "ku.

³⁴ Gbɛklɛklɛ 'e bhulɛle lɛ 'anye, 'nyakpa ne 'na -zakpɛ -ka -na 'ple 'klekle, "ne "ɛ -li ne 'klekle "kɛ -lɔ 'yli 'wlole

³⁵ "Nɔgɔ -nyɛ dodo "bhaa yi 'ce 'ple. -Mɔ, 'neɛ weli -ka 'ce "kubhiɛ.»

'Nyɔkpɔ Yowli 'na yi -zle

³⁶ «-Mɔ, "ɛ 'yli -wɛ -nyɛ 'gle -wɛ "bhaa, 'nyɔkpɔ "ne -kɛ -yi, "nɔgɔzilia, -wa -ko Lagɔ yɔko "ne -yi. Yu "ne -yi. 'Ɛ "mɔ -kɛ To 'ɔyikɔ -bholo -kpee yɔ.

³⁷ -See 'ɛ -ylɛle 'ce Nowe 'na zle -wɛ, 'Nyɔkpɔ Yowli 'na yi -zle sɔbhɔ 'ye 'ɛ "kɛ 'ce -lɔ ylɛle- -me.

³⁸ "Naa-, -dee -ziɛziɛŋu -ɛ -lɔbhɔ "ne 'ɛ libhi- dodo "ku -na nɛ lɔbhɔ -wɛ, 'nyakpa li nɛ "ne 'wa 'nɔmɔ nɛ, 'wa plɛ 'awɔ 'sue "ne 'wa 'je 'awɔ 'wanɛɛ 'ŋuyua 'widia, -kaa "ne Nowe yi 'awɔ -lɔ gɔlo didigbegwli "me "gblɛ.

³⁹ "Ne 'nyakpa "ne 'awɔ "me 'no-, "ne -ziɛziɛŋu -ɛ -lɔbhɔ "ne -ɛ libhi- dodo "ku -wɛ yua -lɔ vu, "ne 'ɛ yua -lɔ 'wli 'bhia- -dɛgbɛɛ. Zle 'Nyɔkpɔ Yowli kɛ 'ce -yi, "ɛ sɛbhele -wɛ 'ye 'ɛ "kɛ 'ce -lɔ ylɛle-.

⁴⁰ Zaa, 'nyakpa "sɔ yi 'kwlɛ "me ko, "ne -bholo yi 'ce "ku libhiɔ- "ne -ɔwɛ yi 'to-.

⁴¹ "Ne 'ŋwenea "sɔ yi 'ce libhi dɛku -ko, -bholo yi 'ce "ku libhiɔ-, -ɔwɛ yi 'ce lɔbhɔ to-.

⁴² Zaa, 'a 'gɛle- -kɛ 'yli "me, "naa-, 'a "ne -kɛ 'yli 'na -ye Anyinɛnyɔ "kɛ "me yi -wɛ -yi zɛ.

⁴³ 'A yibhlele- sɛ, -bhudubhenyɔ kɛ nɛ sabo 'na 'gle -ye 'winyɔ "kɛ "me yi -wɛ -yi ne, 'ɔ -ka nɛ soɔ -bhudu 'yi 'tale- "ne 'winyɔ 'cɛ nɛ nyimɔ.

⁴⁴ -Ɛwɛza, 'anye ne, 'a luɔ-, "naa-, 'a "ne -sɔɔdɛku 'Nyɔkpɔ Yowli "kɛ yi -wɛ -yi zɛ.»

"Kulɔbhɔnyɔ 'na nunɛ

⁴⁵ «'Ɔ -noɔ bhɔ "kulɔbhɔnyɔ 'na "namanɔ "ne "nɛnenyɔ yɔ 'a? 'Ɔnɛɛ -ye "bhenyɔ -sɛ lɔbhɔ nɛɛ: 'E 'je- -eyi libhɔ ne kɔ, -se lɔbhɔ kɛ ylɛ ne, "nyɛ "kulɔbhɔnya 'na -vinoa -wɛ lilɛ.

⁴⁶ Zaa, 'ŋwɛnɛ 'lɔbhɔ "ɛ "kulɔbhɔnyɔ -ye 'ɔnɛɛ "bhenyɔ -ylele libhɔ 'yli "me -wɛ.

⁴⁷ Gbɛklɛklɛ 'ye 'e bhulɛle lɛ 'anye, "bhenyɔ yu -kɛ 'ɔnɛɛ -klɔgbɔli -wɛ 'klekle 'na "cifi "zoa-.

⁴⁸ -Mɔ, "ɛ "kulɔbhɔnyɔ -wɛ kɛ "nyɛnye yɔ ne, sɛne 'ye 'ɔ "kɛ -lɔ no nɛɛ: 'Neɛ "bhenyɔ -dɛme 'ye 'ɔ -gba "kɛ yi,

⁴⁹ "ne 'ɔ "kɛ -lɔ 'ɔlua -wɛ 'lɔbhɔ, "ne nonɔmɔnya "bhaa 'wa "kɛ -lɔ li "ne 'wa "kɛ -lɔ "nɔmɔ.

⁵⁰ "Ne "bhenyɔ "kɛ -lɔ 'yli 'na -ye 'ɔ "ne 'dleku -kɛ -wɛ "me, "ne 'gle 'na -ye 'ɔ "ne -yi -wɛ "me yi.

⁵¹ 'Ɔnɛɛ "bhenyɔ yu libhɔ "me 'kpeti-, 'nyakpa -wa -noɔ 'ylisiɛtɛlenya 'waa -wɛ 'glɛme -ye 'ɔ "kɛ -lɔ ko -me, "ɛ doɔ 'ye 'lugbu "ne glɛ nimiɛ "kɛ -lɔ 'bhale-.»