Matie 23 - Nouveau Testament bété de Gagnoa

-A te -Lɔsloanya 'na -li no

¹ -Ɛwɛza Zezu -bhulɛle -lɔ sɛne 'nyakpa 'na -zakpɛ -nyɛ 'ɔnɛɛ gɛlenya "bhaa nɛɛ:

² «-Lɔsloanya "ne Faliziɛnya 'gli- Moyize 'na -gbɔglo "me, "ne 'wa sloa Moyize 'na -Lɔ.

³ -Ye 'wa bhulɛ -wɛ 'a "zo -kɛ 'plome, -se -ye 'wa bhulɛle 'anye 'klekle -wɛ 'a 'no, -mɔ, 'a te kɛ 'wanɛɛ -li no, sɛko -wɛ, 'wa bhulɛ -kɛ "fu, -mɔ 'wa "ne no -kɛ -ye 'wa bhulɛ -wɛ.

⁴ 'Wa 'sɛle -kɛ 'gbapi -ɛ 'wɛle- kɔ -wɛ, "ne 'wa 'piɛ -kɛ -lɔ 'walua 'kopi "ku, "ne 'wa "ne 'yɔbhɔ -gbɔ 'wanɛɛ 'sɔwleyɛ -bholo 'sɛ kɔ.

⁵ -See 'wa "koa ylɛ -wɛ 'na -li 'wa no -lɔ. "Klokwɛ 'jeyuɛ -ye 'wa 'piɛ "klo "ne wa 'piɛ sɔ yɔko -wɛ, 'wa 'kpɔmalea 'wanɛ "ne 'wa 'tlomalea -lɔ 'wanɛɛ "koti 'na glu 'na -yabhɛ.

⁶ "Mebhubhɔlebhudu "me "ne lilɛlidɛ "me 'wa -wa -gbɔ 'wa "kɛ 'yuku 'gli.

⁷ 'Wa kɛ -digbɛ "me -ko 'wa 'yɔbhɔ -gbɔ 'wayi 'wa -na la "Bhenyɔ.

⁸ 'Anye, 'a te -kɛ 'ayi "Bhenyɔ la, sɛko -wɛ 'anyɛɛ "Bhenyɔ -yle -bholo -kpee, "ne 'anye 'klekle "nowlia 'ye 'a -noɔ -lɔ.

⁹ -Se 'a te dodo ne "ku 'nyɔkpɔ To la, sɛko -wɛ 'a To -yle -bholo -kpee, 'ɔɔ -noɔ -lɔ -a To -ɔ -ko "nɔgɔ "me -wɛ yɔ.

¹⁰ -Se 'a te 'ce 'lelee 'ayi "cifia la, "naa-, 'anyɛɛ "cifi -yle -bholo -kpee, 'ɔ 'pa- -lɔ Klise.

¹¹ -Ɔ lɔbhɔ 'ɔlua "ku -wɛ, 'ɔɔ "kɛ 'ce -lɔ 'anyɛɛ 'glɛme 'na "yitɔ "zo.

¹² -Ɔ libhi 'ɔyi 'wli "ku -wɛ, yi 'ce "ku 'kwlialeɔ-, "ne -ɔ 'kwlialea 'ɔyi "ku -wɛ, yi 'ce 'wli "ku libhiɔ-.

Zezu -sɛ -Lɔsloanya -nyɛ Faliziɛnya "bhaa 'na kosɛ -nyɛnye zɔ

¹³ 'Kpilɛkpilɛ 'ye 'a lale -kɛ -lɔ 'ayi "ku -Lɔsloanya -nyɛ Faliziɛnya "bhaa, 'ylisiɛtelenya nye -lɛ! "Naa- 'a 'gba -lɔ Lagɔ 'na 'Kamalezikpɛ "me 'na -gbulɛ 'alua 'yliku. 'Anye 'nabhɛ 'a -ka "bhle plɛ, "ne -wa 'yɔbhɔ -gbɔ 'wa "kɛ "bhle plɛ -wɛ, 'a nɛɛ 'wa te "bhle 'plɛ.

¹⁴ ['Kpilɛkpilɛ 'ye 'a lale -kɛ -lɔ 'ayi "ku. -Lɔsloanya "ne Faliziɛnya 'ylisiɛtɛlenya nye -lɛ, 'a sɛ 'kwiziŋwenea 'na -ye 'wa -kɛ 'klekle -wɛ kɔ, "ne "ɛ -gbabhuɛ -bhele -wɛ "me, 'a 'tlomalea -lɔ bhubhɔweli "me, 'wa kɛ -kɛ 'anye 'ylɛ zɛ, 'ɛnɛɛ za, 'anyɛɛ 'gbobhleleɛ "kɛ 'ce -lɔ "me "tamale- kpɛnyee.]

¹⁵ 'Kpilɛkpilɛ 'ye 'a lale -kɛ -lɔ 'ayi "ku 'Anye -Lɔsloanya -nyɛ Faliziɛnya "bhaa, 'ylisiɛtɛlenya -ne -lɛ, 'a 'nɔŋo 'ŋu -nyɛ dodo "bhaa "ku, 'nyɔkpɔ -bholo 'na kɔ -bhelia -za, "ne 'a "kɔ -yle "bhuɔ ne, 'a gbɔ "ne 'ɔ "zo -kosu "me -nɔ "kusɔ, "ne 'ɔ zi 'anye "ku.

¹⁶ 'Kpilɛkpilɛ 'ye 'a lale -kɛ -lɔ 'ayi "ku. 'Anye 'yligbeyinya 'wa -su 'walua -lɛ, 'a nɛɛ: -E "kɛ "Mebɔbɔle-bhudu "ku zligbɔle, 'ɛ "ne -bɛɛ' "me -ko, -mɔ, 'nyɔkpɔ "kɛ "Mebɔbɔle-bhudu "me 'na -badlɛ "ku zligbɔle, 'ɔ nyɔ 'ɔ 'wlɛ "klepaa.

¹⁷ 'Yligbeyinya, -wa "ne "nɛ- -lɛ, -ɛ 'kpɔ bhɔ "ne -ɛ -zi bhɔ "ku 'a? -Badlɛ 'a? -Mɔ, "Mebɔbɔle-bhudu -ɛ gbɔ "ne "ɛ -badlɛ -wɛ -ko 'wlewle -wɛ bha?

¹⁸ "Ne 'a no 'lelee -lɔ nɛɛ: -E kɛ bɔbɔledɛ "ku zligbɔle, 'ɛ "ne -bɛɛ' "me -ko, -mɔ, bɔbɔledɛ "me 'na -li -ɛ slu- lɔbhɔ -wɛ, -ɔ 'cɛ "ku zligbɔle, 'ɔ 'nyɔ 'ɔ 'wlɛ "klepaa.

¹⁹ 'Yligbeyinya nye -lɛ! 'Ɛnɛɛ -ɛ 'kpɔ- bhɔ? Bɔbɔli 'a? -Mɔ, bɔbɔledɛ -ɛ "zoa- bɔbɔli 'wlewle -wɛ bha?

²⁰ Zaa, -eyi -mɔ zligbɔle bɔbɔledɛ "me "ku -wɛ, "ɛ bɔbɔledɛ "me 'na bɔbɔli -ɛ 'slu- lɔbhɔ -wɛ 'ye -e zligbɔle me -lɔ "ku.

²¹ -E kɛ "Mebɔbɔle-bhudu "ku zligbɔle, 'ɛ "Mebɔbɔle-bhudu "me 'na -ɔ -ko "bhle -wɛ 'ye -e zligbɔle me -lɔ "ku.

²² -E kɛ "nɔgɔ "ku zligbɔle, Lagɔ 'na 'leyli -gbɔglo 'ye -e zligbɔle me -lɔ "ku "ne Lagɔ -ɔ 'gli- "ɛ 'leyli -gbɔglo "ku -wɛ 'ye -e zligbɔle me 'lelee -lɔ "ku.

²³ 'Kpilɛkpilɛ 'ye 'a lale -kɛ -lɔ 'ayi "ku, -Lɔsloanya -nyɛ Faliziɛnya "bhaa, 'ylisiɛtɛlenya nye -lɛ! 'Anye 'peɛle 'kwlɛ "me 'na -titi 'jeyuɛ -ye 'wa "zo zɔpo "me "ne -ɛ "pɔ 'ŋoni -wɛ 'na 'dime. "Ne -Lɔ "me 'na -ɛ 'tɛ- "me "ne 'a plɛle yɛle "ku -wɛ ne lɛ: "Meŋwinɛleɛ, 'nyɛzedlekɛleɛ, "ne 'dlekukɛleɛ, -ye 'a "kɛ nɛ no "ne 'a -ka nɛ 'ɛwɛ 'wɔ "ku dlu -wɛ -lɔ.

²⁴ 'Yligbeyinya 'wa -su 'walua 'ye 'a -noɔ -lɔ, 'anye "kple 'ŋu "me "ne 'a sɛ "bhle -kpɔmia "ne 'a 'mɛnɛ samo -wɛ!

²⁵ 'Kpilɛkpilɛ 'ye 'a lale -kɛ -lɔ 'ayi "ku, -Lɔsloanya -nyɛ Faliziɛnya "bhaa, 'ylisiɛtɛlenya nye -lɛ! 'A 'wɛle 'slɔ -nyɛ 'baa "bhaa 'na keyi "ku, "ne 'ɛnɛɛ 'mene 'yiɛ 'wiylili "ne -ye 'a -sɛ 'nyakpa kɔ -wɛ "ku.

²⁶ 'Yligbeyinyɔ, Faliziɛnyɔ, 'wɛle- -na 'se 'slɔ 'na 'mene "bhuɔ, -se 'ɛnɛɛ yɔko "kɛ 'wlele ko -me.

²⁷ 'Kpilɛkpilɛ 'ye 'a lale -kɛ -lɔ 'ayi "ku Faliziɛnya -nyɛ -Lɔsloanya "bhaa, 'ylisiɛtɛlenya nye -lɛ! 'A -ko sɛgbɛɛ -biɛ -ye 'wa 'pɔ- blɛ 'fɛɛ -wɛ, -biɛ 'na "ku -le sɛgbɛɛ -ɛ -ko 'wlele, -mɔ, 'ɛnɛɛ 'mene 'yiɛ- 'nyakpakwɛ "ku "ne zizili 'klekle.

²⁸ Sɔbhɔ 'anye faliziɛnya 'a -ko -me -lɔ, zikpoku 'ɛ -le sɛgbɛɛ "me 'ye 'a 'ŋwinɛle-, -mɔ, 'anyɛɛ 'mene 'yiɛ yo "ne "nyɛnye "ku.

²⁹ 'Kpilɛkpilɛ 'ye 'a lale -lɔ 'ayi "ku, Faliziɛnya -nyɛ -Lɔsloanya "bhaa, 'ylisiɛtɛlenya -ne -lɛ, 'a sɔbhɔ "guɔkwɔmenya 'na -biɛ "namanɔ "ne 'a 'namalea -lɔ "meŋwinɛlenya -nɛ.

³⁰ "Ne 'a no -lɔ nɛɛ: -A kɛ 'awɔ 'a 'to 'wɔ 'na dɛce "ku -ko -me ne, 'wayi 'wɔ "bhaa -a -ka nɛ 'ce "ku kole- "ne -a "kɛ nɛ "guɔkwɔmenya 'na dlu 'siɛ slu.

³¹ 'Ayigɛsɛ "ne -a -sɛ -kɛ -la -lɔ 'ayi zɔ -gbɔ 'nyakpa -wa 'lɔbhɔ- "guɔkwɔmenya -wɛ 'na yua 'ye -a -noɔ.

³² Zaa, 'a gɛlele- -ye 'a 'to 'wɔ 'ci- "ku -wɛ, -se 'a 'bhiɛ 'wlizɔ!

³³ 'Tɛbhɛ 'dlekɛkɛlenya nye -lɛ, 'a yi -kosu "me me, "ne 'a -cɛ nu "po.

³⁴ 'Ɛza, 'a 'fo 'yukwli, -ame 'e yi 'anye "guɔkwɔmenya, "nɛnenya "ne -Lɔsloanya -gwe "ku "pɔ, -mɔ, 'a yi -bedia 'lɔbhɔ "ne 'wa yi "ku, "ne 'a yi 'wawɛ klowa "klo 'kole-, "ne 'a yi -wawɛ "mebhubhɔlebhudu "me 'sɛpɔle-, "ne 'a yua 'ce "ɛ 'du -wɛ 'wɔ "me 'kpeti-.

³⁵ Zaa, "meŋwinɛlenya 'na dlu -ye 'a 'slu- dodo ne "ku 'siɛ -wɛ, 'ɛ yi 'ce 'anye "ku 'ylile-. 'Ɛ 'cile- "meŋwinɛlenyɔ Abɛle 'na 'kwiɛ "ku -kaa "ne 'ɛ 'sibhɔ Zakali "ku, Balaci yowli -ye 'a 'lɔbhɔle- bɔbɔledɛme -nyɛ bhuducibhɛ 'wlewle "bhaa 'na jijɛku.

³⁶ Gbɛklɛklɛ, 'ye 'e bhulɛle -kɛ lɛ 'anye, "ne sɛne 'ye 'e lɛ lɛ, 'ɛyi 'klekle 'na gbo yi 'ce "ɛ 'wukwɛ ne 'gɛle-.

Zezu "ne Zeluzalɛme

³⁷ Zeluzalɛme 'na 'nyakpa! Zeluzalɛme 'na 'nyakpa! 'Anye -wa lɔbhɔ "guɔkwɔmenya "ne 'nyakpa 'na -ye Lagɔ -lebhe 'anye "ku -wɛ 'a lɔbhɔa 'tiyi nu, "ne 'wa "ku, 'e 'yɔbhɔ nɛ 'ce -godogodo -gbɔ 'e "kɛ nɛ 'anye -ame yɔko 'wli 'yabha- sɛgbɛɛ 'gwaŋɔnɔnunu -nyɛ 'ɔnɛɛ yua "bhaa, -mɔ, 'a "ne "ku 'ŋunu-.

³⁸ 'Ɛza, Lagɔ yi -kɛ 'anyɛɛ "Mebɔbɔlebhudu "me 'bhale-.

³⁹ Sɛko -wɛ, 'e bhulɛle 'anye nɛɛ: 'A -ka -la -ame 'ylime 'ye 'na dɛ "ne -la "me tlo, -kaa "ne 'yli -bholo "me, 'a "kɛ -lɔ no nɛɛ: Lagɔ "pɔ -ɔ yi Anyinɛnyɔ 'na 'tɔ "me -wɛ 'ŋu.»