Matie 17 - Nouveau Testament bété de Gagnoa

Zezu zizlɔle- gɛlenya ta 'yliku

¹ 'Yli 'gbeplo "kɛ 'ple ne, Zezu libhi- Piɛle, Zake "ne Zaa, Zake 'ɔ "nɔwli "ku, "ne 'wa yi -lɔ tlo "yitɛ 'vli 'gblɛ, 'wa -tlole nɛ 'nyakpa dɛ.

² "Ne 'wayi 'yliku 'ɔ yi -lɔ zizlɔle-, 'ɔnɛɛ "klo 'lelele nɛ "me sɛgbɛɛ ylo, "ne 'ɔnɛɛ "meplakoti yi -lɔ lele- 'buu sɛgbɛɛ zle.

³ "Ɛ doɔ cuu, Zezu 'na gɛlenya ta -wɛ yi -lɔ Eli "ne Moyize 'ylime 'ye, 'wayi -nyɛ Zezu "bhaa 'wa -ko lɛtɛ dɛku.

⁴ "Ne Piɛle yi -lɔ Zezu bhulɛle- nɛɛ: «Anyinɛnyɔ, 'anyɛɛ dɛne 'na kokoɛ 'nɛne, -e kɛ 'yɔbhɔ, -a "kɛ lɔbhɔ -gligbɛ ta 'sɔbhɔle, -neɛ' -bholo, Moyize -nɛ -bholo "ne Eli -nɛ -bholo.»

⁵ -Mɔ, 'ɔ -le bhulɛ dɛku, "ne "nɔgɔjatlɛ yua -lɔ 'wli mlɔa-, "ne "ɛ "nɔgɔjatlɛ -wɛ "me weli yi -lɔ "bhle 'bhale-, 'ɛ nɛɛ: «-Ɔne 'neɛ -wawayu -ye 'e -sɛ lɔbhɔ 'ŋwɛnɛ -sɛku yɔ -lɔ, 'a 'fo 'yukwli!»

⁶ 'Ɔnɛɛ gɛlenya 'no- lɛ "ɛ weli -wɛ "me, nyanɔ 'lɔbhoa- -lɔ kpɛnyee "ne 'wa yi -lɔ ɔyi 'yliku 'wanɛɛ "klo dodo 'gla.

⁷ "Ne Zezu yua -lɔ yɔko 'nyiɔ-, "ne 'ɔ yua -lɔ kɔ 'sa, 'ɔ nɛɛ: «'A -sɔ "ku! 'A te 'gu.»

⁸ Gɛlenya libhi- lɛ 'wli "ku ne, Zezu -bholo -kpee 'wa 'ye- -lɔ 'ylime.

⁹ -Sɔɔdɛku 'wa -ko nɛ "ɛ tlo 'kwli dɛku -wɛ, lɔbhɔ 'ye Zezu 'titliloa- -lɔ kɔ nɛɛ: «-Ye 'a 'ye- 'ylime ne 'na 'de, 'a 'te -na -kɛ 'nyɔkpɔ -sɛle -kaa, -se 'Nyɔkpɔ Yowli "kɛ -kɛ gluzɔ 'wlo "bhuɔ.»

Zezu -bhulɛ "guɔkwɔmenyɔ Eli 'na "kukoweli

¹⁰ "Ne gɛlenya 'yɔbhɔ- nɛ Zezu lo nɛɛ: «Sɔɔbɛɛza -Lɔsloanya no bhɔ nɛɛ Eli "kɛ -lɔ yi "bhuɔ 'a?»

¹¹ Zezu -bhulɛloa nɛɛ: «-Tiasɛku Eli "kɛ -lɔ yi -se 'ɔ "kɛ -li 'wli jijalea-.

¹² -Mɔ, -ame, 'e bhulɛle 'anye, Eli -yi nɛ -kɛ "bhuɔ. 'Nyakpa "no -yibhlele, zaa 'wa -no -ye 'wa 'yɔbhɔ -wɛ 'wli. Sɔbhɔ 'Nyɔkpɔ Yowli 'nabhɛ "koa 'ce -lɔ kɔ 'gbapele- -me kpɛnyee.»

¹³ -Mɔ, 'ɔnɛɛ gɛlenya 'no- "me -gbɔ Zaa Batise 'na weli 'ye 'ɔ bhulɛloa -lɔ.

Zezu -kpeti zuzu -nyɛnye -ɔ -ko yu keyi -wɛ

¹⁴ 'Wa -ylɛ lɛ -zakpɛ yɔko ne, 'nyɔkpɔ -bholo 'nyiɔ- -lɔ Zezu yɔko, "ne 'ɔ yu -lɔ -kokomini yɔko "pɔle.

¹⁵ 'Ɔ nɛɛ: «"Bhenyɔ "pɔ -ame yowli 'na 'nyɛzedle, -sukusuku 'lɔbhɔ, 'ɔ zi 'nyɛze kpɛnyee, 'ɛ 'pɔ -kosu "me, "ne 'ŋu "me.

¹⁶ 'E -nɔmo -neɛ' gɛlenya, -mɔ, 'wa -siɛlo.»

¹⁷ Zezu nɛɛ: «'Anye -dɛme 'na 'nyakpa 'dlekukɛleɛ "ne 'anye "me -ko, 'nyakpa -gbeyia 'ye 'a -noɔ -lɔ. 'Yli zɔŋ 'e "kɛ bhɔ 'anye yɔko -sɛ 'a? "Ku zɔŋ 'e "kɛ bhɔ 'anye slule- 'a? 'A -nɛme -ame "ɛ yu -wɛ dɛne.»

¹⁸ "Ne Zezu yi -lɔ "ɛ zuzu -nyɛnye -wɛ "ku "kpale-, "ne 'ɔ yi -lɔ yu keyi 'bha- cuu, "ne 'ɔ yi -lɔ yamale-.

¹⁹ "Ne 'ɔnɛɛ gɛlenya 'wayikɔ yi -lɔ Zezu yɔko 'nyiɔ- "ne 'wa yu -lɔ lo 'yɔbhɔ- nɛɛ: «Sɔɔbɛɛza -anye, -a "ne "ɛ zuzu -nyɛnye -wɛ 'na kpetikpetiɛ 'bhɛle 'a?»

²⁰ "Ne Zezu yua -lɔ bhulɛle- nɛɛ: «'Anyɛɛ 'dlekukɛleɛ "ne 'kpɔ- za yɛ -lɔ. 'E bhulɛle 'anye, gbɛklɛklɛ yɛ kɛ -lɔ, 'anyɛɛ 'dlekukɛleɛ kɛ nɛ -ko sɛgbɛɛ mutade 'na yɛ, 'a yi nɛ tlo ne bhulɛle- nɛɛ: 'Bha- dɛ -se me mece, "ne 'ɛ yi nɛ 'anye 'plome "zo. -Bɛɛ' 'na -ɛ "kɛ 'ce 'anye siɛ "ne -le.

²¹ Bhubhɔweli "ne nuɛteɛ "me 'ɛyikɔ 'ye 'wa 'kpetile -lɔ soɔ 'na zuzu -nyɛnye.»

Zezu bhulɛle "kusɔ nɛɛ 'ɔ yi "ku "ne 'ɔ yi gluzɔ 'wlo

²² 'Ɛ -Zlewɛ, gɛlenya "zole- 'awɔ Galile 'wli. "Ne Zezu yua -lɔ bhulɛle- nɛɛ: «'Wa yi 'Nyɔkpɔ Yowli 'nyakpa kɔ plele-.

²³ 'Wa yu 'lɔbhɔ "ne 'ɔ yi "ku, "ne 'yli ta kɛ 'ple- ne, 'ɔ yi gluzɔ 'wlo.» "Ne "ɛ welicibhɛ -wɛ yua -lɔ 'gbapea- kpɛnyee.

Zezu "ne Piɛle 'peɛle- "Mebɔbɔlebhudu "me 'na -lɛpo

²⁴ Zezu -nyɛ 'ɔnɛɛ gɛlenya "bhaa -ylɛ Kafanaɔme. "Ne -ye 'wa 'peɛle "Mebɔbɔlebhudu "me -lɛpo kɔ -wɛ yi -lɔ Piɛle yɔko 'nyiɔ-, "ne 'wa yu -lɔ lo 'yɔbhɔ nɛɛ: «'Anyɛɛ sloanyɔ 'peɛle me bhɔ "Mebɔbɔlebhudu "me 'na -lɛpo?»

²⁵ Piɛle nɛɛ: «'Ɔ 'peɛle me -lɛpo.» "Ne Piɛle yi -lɔ -bhudu "me plɛ. "Ne Zezu yi -lɔ weli "ku 'libhi tɛ "ne 'ɔ yi -lɔ Piɛle bhulɛle- nɛɛ: «Simɔ -see -e 'pɔ bhɔ 'dle 'a? -Wa "kɛ bhɔ dodo ne "ku 'na -lɛpo "ne 'dlasi -wɛ 'wɔ -klɔgbɔnya kɔ 'peɛle 'a? Dunya, -mɔ, 'lowlinya?»

²⁶ Piɛle nɛɛ: «'Lowlinya.» "Ne Zezu yu -lɔ bhulɛ- nɛɛ: «Zaa, 'dunya -wɛ kɔ 'wa yle -la -lɔ.

²⁷ 'E te -kɛ -zejilɛ gbelia za, me jinyɛ yɔko, "pɔ -gwɛ 'ŋu "me, -se tɛtɛ -zibhi -ye -e 'sa- -wɛ vulu 'ɔnɛɛ nuɛ "ku, -e yi "bhle 'tamayɛ ylele-, libhi "ku -se 'peɛle -neɛ', -se -e "kɛ 'neɛ 'peɛle.»