Matie 16 - Nouveau Testament bété de Gagnoa

Faliziɛnya "ne saduseɛnya 'yɔbhɔ zɛzɛ -pɛɛ lo

¹ Faliziɛnya "ne Saduseɛnya 'nyiɔ Zezu yɔko -se 'wa "kɔ "me 'bea-, "ne 'wa no -lɔ nɛɛ 'ɔ tua- zɛzɛ -ɛ 'bhale "nɔgɔ "me -wɛ 'ylime.

² "Ne Zezu yua -lɔ bhulɛle- nɛɛ: «Silɔ kɛ yilɔ- ne, "ne "nɔgɔ "me kɛ -zɛle 'a nɛɛ: Zle "kɛ -lɔ 'namale-.

³ "Ne zegbakpɔ "me, "nɔgɔ "me kɛ 'tile-, 'a nɛɛ: -Zeka 'na zle ne "ne -kɛ 'nɛne. Soɔ 'ye 'a yibhlele -lɔ "nɔgɔ "me 'na 'be 'na "me -seselia sɛ. Zaa, 'a -yi 'se "nɔgɔ "me 'na 'be 'na "me -seselia -sɛ ne, sɔɔbɛɛza 'a "ne bhɔ zikpɛ ne "ku 'na -ɛ 'ple "bhle -wɛ -yi!

⁴ -Dɛme 'na 'nyakpa -wa "ne 'nɛne, "ne -ye Lagɔ 'yɔbhɔloa lo -wɛ 'wa "ne no, -mɔ, zɛzɛ 'ye 'wa 'yɔbhɔ -lɔ lo! 'Ɛ "mɔ Zonase nɛ -wɛ yɛ, 'wa -ka zɛzɛ 'na -vinɛ 'ylime 'ye gou.» 'Ɔ -tloa "ɛ doɔ, "ne 'ɔ yi -lɔ me.

Faliziɛnya 'na kosɛ nyɛnye

⁵ "Ne Zezu 'na gɛlenya yi -lɔ 'ŋu 'na -gbɔsɔ -ce plele, -mɔ 'wa -dlu "ne 'wa "ne 'awɔ "fɔlɔ "ku libhi-.

⁶ "Ne Zezu yua -lɔ bhulɛle- nɛɛ: «'A me -kɛ! -Se 'a 'luɔle- -kɛ Faliziɛnya -nyɛ Saduseɛnya 'wɔ "bhaa 'na manyɔ "ku.»

⁷ -Mɔ, 'wanɛɛ dɛku sɛne 'wa 'pɔ -lɔ 'dle nɛɛ: «-A "ne "fɔlɔ "ku libhi- za 'ɔ bhulɛ -lɔ soɔ.»

⁸ -Mɔ, Zezu -yibhlele 'wanɛɛ 'dlepɔsɛ, "ne 'ɔ yua -lɔ bhulɛle- nɛɛ: «'Nyakpa -wa "ne 'dleku -kɛ -tiaa -lɛ, sɔɔbɛɛza 'a 'pɔ bhɔ 'dle -gbɔ 'a ne "fɔlɔ -su za yɛ 'a?

⁹ 'A "ne -nazɛ "me -nyini? 'Anyɛɛ 'dle 'sibhɔ bhɔ "fɔlɔ -bhi 'umgbu -ye 'nyakpa 'na -gɛmɛnɛ -wlulu 'umgbu -li 'awɔ -wɛ "ku -a! "Ne -gbɛɛ zɔŋ 'ye 'a -kɔme 'awɔ 'a?

¹⁰ "Ne 'anyɛɛ 'dle 'sibhɔ bhɔ "fɔlɔ bhi -gbɔsɔ -ye 'nyakpa 'na -gɛmɛnɛ -wlulu -mɔɔnɔ (4.000) -li 'awɔ -wɛ "ku -a! "Ne -gbɛɛ zɔŋ 'ye 'a -kɔme 'awɔ 'a?

¹¹ 'E bhulɛle 'anye -gbɔ 'a 'luɔle- Faliziɛnya -nyɛ Saduseɛnya 'wɔ "bhaa 'na manyɔ "ku, "ne 'a "ne "me 'no- -gbɔ "fɔlɔ 'na weli 'ye 'e -na 'anye bhulɛle-.»

¹² 'Wa 'no- -da "me -gbɔ Zezu -na nɛ "fɔlɔ 'na manyɔ "me -zo weli bhulɛ, -mɔ, 'ɔ nɛɛ: 'Ɔnɛɛ gɛlenya 'wa 'luɔle- -kɛ Faliziɛnya -nyɛ Saduseɛnya 'na sloasɛ -wɛ "ku.

Piɛle -yibhlele Zezu -gbɔ Klise yɔ

¹³ Zezu "kɛ Sezale, Filipo -glɔ "me 'na 'du, ylɛ- ne, 'ɔ yi -lɔ 'ɔnɛɛ gɛlenya lo 'yɔbhɔ nɛɛ: «'Nyakpa 'na dɛku -ye 'Nyɔkpɔ Yowli -noɔ bhɔ?»

¹⁴ Ŋwɛnɛɛ: «-bedia 'na dɛku, Zaa Batise 'ye -e -noɔ -lɔ, -wawɛ nɛɛ: Eli 'ye -e -noɔ -lɔ, "ne 'wace nɛɛ: Zelemi 'ye -e -noɔ -lɔ, "ne "Guɔkwɔmenya 'glɛme 'na -bholo 'ye -e -noɔ -me -lɔ.»

¹⁵ "Ne Zezu yua -lɔ lo 'yɔbhɔ nɛɛ: «"Ne 'anye, 'anyɛɛ dɛku -ye 'e -noɔ bhɔ?»

¹⁶ Simɔ Piɛle "kɛ weli "ku 'libhi ne, 'ɔ nɛɛ: «Klise 'ye -e -noɔ -lɔ, -yɛyɛ Lagɔ 'na Yu.»

¹⁷ "Ne Zezu yi -lɔ "kusɔ weli "ku "libhile, 'ɔ nɛɛ: «'ŋwɛnɛ 'lɔbhɔ 'se -eyi Simɔ, Zonase yowli, "naa-, 'nyɔkpɔ "ne -eyi 'dleku 'pɔ-, -mɔ, -ame To -ɔ -ko "nɔgɔ "me -wɛ 'pɛ- -lɔ -eyi 'dleku.

¹⁸ "Ne -ame 'e bhulɛle -eyi nɛɛ: 'Tiyi 'ye -e -noɔ -lɔ, "ne "ɛ 'tiyi -wɛ "klo 'ye 'e "kɛ 'ce -lɔ 'neɛ "me bhubhɔle-bhudu 'sɔbhɔle, "ne 'kwiɛ 'na 'bhɛloɛ -ka 'ce -eyi -bɛɛ' no.

¹⁹ 'E yi 'ce -eyi 'Kamalezikpɛ "me 'na 'safɛ kɔ 'je. -Ye -e kɛ 'ce dodo ne "ku -gbɛte, 'ɛ yi 'ce "nɔgɔ "me 'gbɛteɔ-, "ne -ye -e kɛ 'ce dodo ne "ku -vulu, 'ɛ yi 'ce "nɔgɔ "me vuluɔ-.»

²⁰ "Ne Zezu yi -lɔ 'ɔnɛɛ gɛlenya kɔ 'titli -gbɔ 'wa te -kɛ 'nyɔkpɔ bhulɛle- nɛɛ: Klise 'ye 'ɔ -noɔ -kɛ.

Zezu nɛɛ: 'Ɔ yi "ku "ne 'ɔ yi gluzɔ 'wlo

²¹ Lɔbhɔ 'ye Zezu Kli -bhulɛle -lɔ 'ɔnɛɛ gɛlenya gbɛklɛklɛ nɛɛ: 'Ɔ yi Zeluzalɛme me, "ne -Gligbɛyitia, bɔbɔnya "yitia "ne -Lɔsloanya yu 'gbapea- kpɛnyee, "ne 'wa yu 'lɔbhɔ "ne 'ɔ yi "ku, -mɔ 'yli ta kɛ ple-, 'ɔ yi gluzɔ 'wlo.

²² Lɔbhɔ 'ye Piɛle yi -lɔ Zezu la, "ne 'wa yi -lɔ guɔ ziza-, "ne 'ɔ yu -lɔ "ku 'gbɔtɔle- nɛɛ: «Anyinɛnyɔ, Lagɔ -kole -eyi "klo, -bɛɛ' -ka -eyi no!»

²³ Lɔbhɔ 'ye Zezu 'bheliɔ -lɔ kɔ, "ne 'ɔ yi -lɔ Piɛle bhulɛle- nɛɛ: «'ylile- -ame "guɔ Sata! -E 'yɔbhɔ -gbɔ -e "kɛ -ame zɔ "pɔ, 'yliku -e "titi -lɔ -ame. -E "ne 'pɔ Lagɔ 'nasɛ 'dle, -mɔ, 'nyakpa 'nasɛ 'ye -e 'pɔ -lɔ 'dle.»

-See 'wa "kɛ bhɔ Zezu 'gɛle- 'a?

²⁴ "Ne Zezu yi -lɔ 'ɔnɛɛ gɛlenya bhulɛle- nɛɛ: «'Nyɔkpɔ kɛ no -gbɔ 'ɔ "kɛ -ame 'gɛle- ne, 'ɔ 'bhale- 'ɔyi "me, 'ɔ libhi 'ɔnɛɛ klowa "ku -se 'ɔ 'gɛle- -ame.

²⁵ "Ne -ɔ kɛ no -gbɔ 'ɔ "kɛ 'ɔnɛɛ zikpɛ "ku 'cece, 'ɔ 'yi 'ce bhlia-. -Mɔ, -ɔ kɛ 'ɔnɛɛ zikpɛ 'neɛ za "me 'bhale- 'ɔ 'yi 'ce yle.

²⁶ -Ye dodo ne "ku 'na -klɔgbɔ 'klekle 'na kɛlekɛleɛ -ko bhɔ "me 'ɛ kɛ zikpɛ 'na kwlɛbhliɛ "me 'wlisɛle- 'a? "Ne -ye 'nyɔkpɔ "kɛ bhɔ wlɛ- "ne 'ɛ "kɛ 'ɔnɛɛ zikpɛ 'ylime 'plele 'a?

²⁷ "Naa-, 'Nyɔkpɔ Yowli yi 'ce 'ɔ To 'na 'ŋlu "me yi 'ɔnɛɛ "nɔgɔzilia 'wɔ "bhaa, "ne 'ɔ yi -ɔkɔkokɔko 'na -ye 'ɔ no -wɛ 'na 'peɔloɛ "nyɛ.

²⁸ 'E bhulɛle 'anye, 'diɛ yɛ -kɛ -lɔ, -wa -ko dɛne 'na -bedia "mɔ -na 'Nyɔkpɔ Yowli -ɔ "kɛ -klɔgbɔnyɔ 'nasɛ yi -wɛ 'ylime 'ye, 'wa -ka "ku.»