Matie 15 - Nouveau Testament bété de Gagnoa

Zezu -nyɛ Faliziɛnya "ne -Lɔsloanya 'na yɛ "bhaa 'kpɛle-

¹ Faliziɛnya "ne -Lɔsloanya 'waa- 'bha- -lɔ Zeluzalɛme -se 'wa -nyɛ Zezu "bhaa 'wa "kɛ 'lɛtɛ-. Ŋwɛnɛɛ:

² Sɔɔbɛɛza -neɛ' gɛlenya "ne "zo bhɔ -a 'to 'wɔ 'na -Lɔ 'plome 'a? 'Wa -gba "kɛ li ne, 'wa "ne 'wɛle- kɔ.

³ Zezu nɛɛ: «'Anye, 'a 'to 'wɔ 'na -Lɔ -wɛ za, 'a "ne "zo Lagɔ 'na gbagbɛ 'plome sɔɔbɛɛza yɛ bhɔ -tia?»

⁴ "Naa-, sɛne Lagɔ lɛ- -lɔ nɛɛ: «"Zo -e 'to -nyɛ -e "nɔ "bhaa 'plome.» "Ne 'ɔ lɛ- -me 'lelee -lɔ sɛne nɛɛ: «'nyɔkpɔ 'na -ɔ bhle 'ɔ 'to -nyɛ 'ɔ "nɔ "bhaa "ku -wɛ, 'wa 'lɔbhɔ -se 'ɔ "kɛ "ku.»

⁵ -Mɔ, 'anye, sɛne 'ye 'a bhulɛle -lɔ 'nyakpa nɛɛ: 'Nyɔkpɔ 'bhɛle- -se 'ɔ "kɛ 'ɔ 'to -nyɛ 'ɔ "nɔ "bhaa no nɛɛ: -Bɛɛ' -ye 'e "kɛ nɛ 'anye kɔ 'je "ne -ɛ "kɛ 'anye kwɛle- -wɛ, 'ɛyi 'ye 'e 'je- -lɔ Lagɔ kɔ.

⁶ "Ɛ 'nyɔ -wɛ 'na dɛku 'ɔ 'to 'na 'plomezoɛ "ne -bɛɛ' "me -ko, 'ayigɛsɛ 'na -Lɔ za, 'ɛza, 'a sɛ -lɔ lɔbhɔ Lagɔ 'na weli.

⁷ 'Ylisiɛtɛlenya nye -lɛ! -Ye "guɔkwɔmenyɔ Ezayi -bhulɛ 'anyɛɛ dɛku Lagɔ za -wɛ, 'diɛɛ yɛ -lɔ:

⁸ «'Nyakpa ne "zo -ame 'plome bhulɛweli 'ɛyikɔ "me. -Mɔ, 'wanɛɛ 'dle tlole- -ame 'dɛ kpɛnyee.

⁹ "Fu 'wa bhubhɔ -lɔ -ame, -Mɔ, 'ɛ "ne -bɛɛ' "me -ko 'neɛ dɛku. "Ne -ye 'wa slo -wɛ, 'nyakpa 'na gbagbɛ yɛ -lɔ.»

-Ɛne plaa -lɔ 'nyɔkpɔ 'fe

¹⁰ "Ne Zezu yi -lɔ -zakpɛ la, 'ɔ nɛɛ: «'A 'fo -ame 'yukwli -se 'a 'no -kɛ "me 'tee.

¹¹ -Ɛ -plɛ nu -wɛ 'ɛ "ne pla- 'nyɔkpɔ 'fe, -mɔ, -ɛ 'bhale 'nyɔkpɔ nu -wɛ, 'ɛɛ pla- -lɔ 'nyɔkpɔ 'fe.»

¹² 'Ɛza, gɛlenya 'nyiɔ- -lɔ Zezu yɔko "ne 'wa yu -lɔ lo 'yɔbhɔ nɛɛ: -E -yi bhɔ sɛ -gbɔ welicibhɛ -ye -e -bhulɛ -wɛ 'kɛle Faliziɛnya yɔko 'a?

¹³ "Ne Zezu yua -lɔ bhulɛle- nɛɛ: «Su 'na -ye -ame 'to -ɔ -ko "nɔgɔ "me "ne -glo -wɛ 'ɛ yi 'ce glu -sɔɔ.

¹⁴ 'A 'taloa 'yi! "Naa-, -kpelɔbhɔnya -su -lɔ -kpelɔbhɔnya. -Mɔ -kpelɔbhɔnyɔ "kɛ ɔ 'luyu -kpelɔbhɔnyɔ -su ne, 'wayi "sɔkpɔsɔkpɔ yi 'sɔkɔ "me bhli -du!»

¹⁵ Zaa, Piɛle -bhulɛle -lɔ Zezu nɛɛ: «-Sɛle 'anye 'ɛ nunɛ -wɛ zɔ.»

¹⁶ Zezu nɛɛ: «'Anye, 'a "ne 'lelee 'ɛnɛɛ zɔ -yi me?

¹⁷ 'A "ne bhɔ sɛ -yi -gbɔ -ɛ ylɛle nu 'klekle -wɛ 'mene 'ye 'ɛ bhlɔ, "ne 'wa kɔme 'kwlɛ yɔko 'a?

¹⁸ -Mɔ, -ɛ 'bhale nu -wɛ, 'dlezɔ 'ye 'ɛ 'bhale -lɔ. -Ɛwɛ pla -lɔ 'nyɔkpɔ 'fe -tiaa.

¹⁹ "Naa-, 'dlepɔsɛ -nyɛnye 'klekle 'dlezɔ 'ye 'ɛ 'bhale -lɔ, 'ɛɛ gbɔ -lɔ "ne 'nyakpa 'lɔbhɔ -lɔ 'walua, gbozɛlɛ, "kpɛtɛklinɔŋoɛ, 'wiyliɛ, 'alua 'na gbo 'wlime -gbliɛ, 'tɔnyimɛ -le -lɔ.

²⁰ -Ɛwɛ 'klekle pla- -lɔ 'nyɔkpɔ 'fe. -Mɔ, 'nyɔkpɔ "mɔ kɔ -wɛle "ne 'ɔ kɛ -li ne, 'ɛyi -wɛ -na 'nyɔkpɔ 'fe pla-.»

'Lowliŋɔnɔ -kɛ Zezu 'dleku

²¹ Zezu 'bha- lɛ doɔ ne, Tile -nyɛ Sidɔ "bhaa 'na -glɔ "me 'ye 'ɔ -me -lɔ.

²² Cuu ne, Kana 'na 'ŋɔnɔ -ɔ 'glile "ɛ -glɔ -wɛ "me -wɛ -yi -lɔ Zezu 'sibhɔle- -ka, "ne 'ɔ 'kpa nɛ -lɔ "me nɛɛ: "Bhenyɔ, Davide Yowli, -yaya "pɔ 'na 'nyɛzedle! -Ame 'yɔŋɔ 'gbape, zuzu -nyɛnye liɔ 'yalɛ, "ne 'ɛ "ne me "bhle gou.

²³ -Mɔ, Zezu "no gbo 'dile-, zaa, 'ɔnɛɛ gɛlenya yu -lɔ yɔko 'nyiɔ-, ŋwɛnɛɛ: «'kpotu 'se "naa- 'ɔ 'kpale -anye 'beku "me, "ne 'ɔnɛɛ "mekpɛɛ "ne 'diɔle-.»

²⁴ -Mɔ, Zezu nɛɛ: «-A To -lebhe -lɔ -ame dodo ne "ku Izlayɛleyua -wa -bhli 'kwlɛ -wɛ "ku.»

²⁵ "Ne "ɛ 'ŋɔnɔ ne yi -lɔ Zezu -kokomini 'dle "me "pɔle, 'ɔ nɛɛ: «"Bhenyɔ yi -ame "ku!»

²⁶ Zezu nɛɛ: «'Wa "ne libhi -la yua 'na lilɛ "ku "ne 'wa 'cɛ gweayua 'yliku "pɔ 'ɛ "ne 'nɛne.»

²⁷ 'Ŋɔnɔ nɛɛ: «-ɛɛ, "Bhenyɔ, 'ɛ -ko sɔbhɔ, -mɔ, -ɛ 'bha "bhenyɔ 'na tablɛ "klo "ne -ɛ bhli zɔ -wɛ, 'ɛyi 'ye gweayua li -lɔ.»

²⁸ "Ne Zezu yu -lɔ bhulɛle- nɛɛ: «'Ŋɔnɔ, -neɛ' 'dlekukɛleɛ 'kpɔ, zaa -see -e 'yɔbhɔ -wɛ 'ɛ ylɛle- sɔbhɔ!» "Ne "ɛ yu yi -lɔ yamale- "ɛ -gbabhele -wɛ "me.

Zezu -yamalea 'nyakpa -kwleyia jinyɛ yɔko

²⁹ "Ɛ doɔ 'ye Zezu 'bha- -lɔ "ne 'ɔ yi -lɔ Galile 'na jinyɛ yɔko me, "ne 'ɔ yi -lɔ tlo 'vli 'gblɛ, "ne 'ɔ yi -lɔ -duku 'gli.

³⁰ -Zakpɛ -kwleyia 'yli Zezu lo. 'Wa nɛme 'bhogbeyinya, -kpelɔbhɔnya, 'kɔtɔkɔtɔnya, -wa "ne 'di 'gbo "ne 'gwizinya 'na -kwleyia, 'wa glua Zezu yɔko, "ne 'ɔ yua -lɔ yamalea- 'klekle.

³¹ "Ɛ -zakpɛ -wɛ 'na 'wolo, 'nyakpa 'na -wa "ne 'di nɛ gbo -wɛ, bhulɛ 'tee, 'bhogbeyinya -yamale 'gbligbli, 'kɔtɔkɔtɔnya -yamale 'klekle "ne -kpelɔbhɔnya 'ye 'siɛ, "ne "ɛ -zakpɛ -wɛ 'klekle 'kwa -lɔ Izlayɛle 'na Lagɔ 'ŋlu!

Zezu -lia 'nyakpa 'na -gɛmɛnɛ -wlulu mɔɔnɔ

³² Zezu lale- gɛlenya 'ɔyi yɔko, 'ɔ nɛɛ: «'Nyakpa ne -le -ame 'nyɛze "ku. "Naa-, 'yli ta ne lɛ -se 'wa -ko -ame yɔko ne, 'wa ne lilibɛɛ -kɛ. 'E "ne 'yɔbhɔ -gbɔ 'wa me sueme ŋɔŋo "me, 'kwɛme -koa "tamale-, -se 'wa "kɛ -gwe bhli!»

³³ "Ne gɛlenya yu -lɔ bhulɛle- nɛɛ: «-Dee -a "kɛ bhɔ -dɛme 'kɔsɛ ne "ku lilɛ ylele- "ne -a 'cɛ bhɔ "ɛ -zakpɛ -wɛ kɔ 'je, "ne 'wa 'cɛ li, "ne 'wa "kɛ bhɔ lo 'a?»

³⁴ Zezu nɛɛ: «"Fɔlɔbhi zɔŋ 'a -su bhɔ?» Gɛlenya nɛɛ: «"Fɔlɔbhi gbɔsɔ, "ne zibhia 'jeyua 'na yɛ.»

³⁵ Zezu -bhulɛle "ɛ -zakpɛ nɛɛ: 'A gli -duku.

³⁶ "Ne 'ɔ yi -lɔ "ɛ "fɔlɔbhi gbɔsɔ -nyɛ zibhiajeyua -wɛ "bhaa "ku 'libhi, "ne 'ɔ yi -lɔ Lagɔ bhɛle-, "ne 'ɔ 'yi -lɔ "me didile-, "ne 'ɔ 'yi -lɔ gɛlenya kɔ 'je, -se 'wa 'cɛ "ɛ 'nyakpa -wɛ 'dlile-.

³⁷ "Ne 'wayi 'klekle -li "ne 'wa -lo 'klekle, "ne "fɔlɔ -cibhi -ɛ -to "ku -wɛ, 'wa libhi-, 'ɛ -bhli -gbɛɛ gbɔsɔ 'na 'yiɛyiɛnɛ "ne gɛlenya 'yi -lɔ kɔme.

³⁸ "Ne -wa -li -wɛ, -yle 'awɔ -gɛmɛnɛ -wulu -mɔɔnɔ (4.000). -Mɔ, 'ŋwenea "ne yua ne nɛ -zɛleɔ -me.

³⁹ "Ne Zezu yi -lɔ "ɛ 'nyakpa 'na -zakpɛ -wɛ 'cilɛ-, "ne 'ɔ yi -lɔ gɔlo "me 'gblɛ, "ne 'ɔ yi -lɔ Magadane -glɔ "me me.