Matie 13 - Nouveau Testament bété de Gagnoa

'Gloglonyɔ 'na nunɛ

¹ "Ɛ -zlewɛ, Zezu 'wlo- -bhudu "me zɔ, "ne 'ɔ yi -lɔ jinyɛ yɔko 'gli -ka me.

² "Ne 'nyakpa 'na -zakpɛ "yitɛ yu -lɔ bli- -ka yi, 'ɛza, 'ɔ 'gblɛ- gɔlo "me, "ne 'ɔ yi -lɔ -duku gli, "ne "ɛ 'nyakpa -wɛ 'klekle -ko -lɔ jinyɛ yɔko.

³ "Ne 'ɔ yua -lɔ weli -kwleyi bhulɛle- nunɛpɛɛ "me nɛɛ: «'Gloglonyɔ -me 'awɔ -lɔ lilɛ -glo -ka.

⁴ 'Ɔ -ko glo dɛku "ne yo 'na -bedi yi -lɔ -gwe 'yukwli -zɔ bhli, "ne 'zea yi -lɔ yi, "ne 'wa 'yi -lɔ li 'klekle.

⁵ 'Yo 'na -bedi -bhli 'kpɛslɛ "klo, -dee dodo ne -zu -wɛ, "ne 'ɛ yi -lɔ 'kwɛle 'gba cuu, sɛko -wɛ, dodo ne lɔbhɔ -zu zɛ.

⁶ Ylo "kɛ "po ne, "ku 'ye 'ɛ -si -lɔ, "ne 'ɛ yi -lɔ yɛ soɛsoɛ, "naa-, 'ɛ "ne -kpulu 'na -kpulu zɔ -ko zɛ.

⁷ 'Yo 'na -bedi -bhli -kpɛcɛ "me, 'ɛ 'wlo- zɔ 'tee, -mɔ -kpɛcɛ 'miɛle- 'wli "ku, "ne 'ɛ 'yi -lɔ 'nyɔŋo "ku zia-.

⁸ Yo 'na -bedi -bhli dodo 'na -dodo "me, 'ɛ 'po- 'tee, 'ɛ -tlo, "ne 'gwlɛ -bholo -ko yɛ -glo 'umgbu 'yli, "ne -ɛwɛ -ko yɛ -glo ta 'yli, "ne -ɛwɛ -ko yɛ -glo -bholo yɛ kogbɔ 'yli.

⁹ -Ɔ kɛ 'yukwli -kɛ, 'ɔ 'no -kɛ "me!»

Sɔɔbɛɛza Zezu kɛ bhulɛ "ne 'ɔ 'pɔ bhɔ nunɛ 'a?

¹⁰ Zezu "kɛ bhulɛ- "bhuɔ ne, "ne 'ɔnɛɛ gɛlenya yu -lɔ yɔko 'nyiɔ "ne 'wa 'yɔbhɔ -lɔ lo nɛɛ: «Sɔɔbɛɛza -e 'pɔloa bhɔ nunɛ 'a?»

¹¹ "Ne 'ɔ yua -lɔ sɛne bhulɛle- nɛɛ: «"Naa-, 'anye Lagɔ -gbɔ "ne 'a -yi 'ɔnɛɛ 'Kamalezikpɛ "me 'na diɛweli, -mɔ, 'wayi 'wa "ne -yi.

¹² "Naa-, -ɔ -kɛ -wɛ, 'wa yu "nyɛ, "ne 'ɔnɛɛ yi lɔbhɔ 'ple. -Mɔ, -ɔ "ne -kɛ -wɛ, "ɛ -ye 'ɔ -kɛ -wɛ 'wa yu kɔ -sɛ.

¹³ -Ɛwɛza 'e 'pɔloa -lɔ nunɛ, sɛko -wɛ, 'wa wolo 'siɛ, -mɔ, 'wa "ne -bɛɛ' 'yli -gɛ, "ne 'wa no gbo, -mɔ, 'wa "ne -bɛɛ' "me -nyini.

¹⁴ "Ne 'wanɛɛ 'ylime "guɔkwɔmenyɔ Ezayi 'na weli 'wlole- -lɔ 'yli. 'Ɛ nɛɛ: 'A yi 'ce 'yukwli fo 'tee, -mɔ, 'a -ka 'ce -bɛɛ' "me no, "Ne 'a yi 'ce siɛ wolo- -vlee, -mɔ, 'a -ka 'ce -bɛɛ' 'ylime 'ye.

¹⁵ "Naa-, "ɛ 'nyakpa -wɛ 'gba- 'wanɛɛ 'yukwli "ku -se 'wa te -kɛ gbo 'no, 'wa 'gba- 'wanɛɛ 'yli "ku -se 'wa te -kɛ siɛ 'ye, sɛko -wɛ, 'wa "ne 'yɔbhɔ -gbɔ 'wa kɛ kɔ 'bheliɔ- -se 'e "koa yamalea-!

¹⁶ -Mɔ, 'anye, 'ŋwɛnɛ 'lɔbhɔ 'se 'anye, "naa-, 'a -ye siɛ "ne 'a no gbo!

¹⁷ Gbɛklɛklɛ 'ye 'e bhulɛle lɛ 'anye nɛɛ: "Guɔkwɔmenya 'na 'kwleyia, "ne "meŋwinɛlenya 'na 'kwleyia 'yɔbhɔ me nɛ -gbɔ -ye 'a 'ye 'ylime -wɛ, 'wa 'cɛ nɛ 'ylime 'ye me, -mɔ, 'wa "ne 'ylime 'ye-, "ne -ye 'a 'no "me -wɛ, 'wa 'cɛ nɛ "me 'no me, -mɔ, 'wa "ne "me 'no-.

Zezu -sɛ gloglonyɔ 'na nunɛ zɔ

¹⁸ Zaa, 'anye, 'a fo 'se gloglonyɔ 'na nunɛ 'na -see 'ɛ sɛ "zo -wɛ 'yukwli.

¹⁹ 'Nyɔkpɔ kɛ Lagɔ 'na 'Kamalezikpɛ "me 'na weli 'yukwli -fo, "ne 'ɔ "mɛ "me 'no-, Sata yi -lɔ "ne 'ɔ 'sɔ -lɔ 'dlezɔ, 'ɛ -ko sɛgbɛɛ 'yo 'na -ɛ -bhli -gwe 'yukwli -zɔ -wɛ.

²⁰ 'Yo 'na -ɛ -bhli 'kpɛslɛ "klo -wɛ, 'nyakpa 'na -wa 'no- Lagɔweli "me "ne 'wa 'sɛ- kɔ 'bhobhlo 'ŋwɛnɛsɛ 'waa -lɔ.

²¹ -Mɔ, Lagɔweli "noa -kpulu "me -mile, zaa, kɔ 'ye 'wa 'bheliɔ -lɔ cuu, 'wa "koa 'gbapea- "ne 'wa "koa "nyɛzezia- Lagɔweli za ne, keyi 'ye 'wa glɛ -lɔ.

²² Yo 'na -ɛ -bhli 'kpɛcɛ "me -wɛ, 'nyɔkpɔ, -ɔ 'no- Lagɔ 'na weli "me, -mɔ dodo ne "ku 'na -li nyimɔ 'wlime, "ne 'ɔnɛɛ 'dle -glɛ -klɔgbɔ 'klekle -ɛ no ylo -wɛ glɛ, "ne 'ɛ ziɔ 'nyɔŋɔ "ku, "ne 'ɔ "ne tlo bhi yɔ -lɔ.

²³ 'Yo 'na -ɛ -bhli dodo 'na dodo "me -wɛ, 'nyɔkpɔ 'na -ɔ -fo Lagɔ 'na weli 'yukwli "ne -ɔ 'no- "me 'tee -wɛ yɔ -lɔ. Zaa, 'ɔ tlo bhi "ne 'ɛnɛɛ -bholo -ko yɛ glo 'umgbu 'yli, -ɛwɛ -ko yɛ -glo ta 'yli, "ne -ɛwɛ -ko yɛ -glo -bholo yɛ kogbɔ 'yli.»

"Zezu

²⁴ "Ne Zezu yua -lɔ nunɛ 'na -vinɛ "pɔle nɛɛ: «Lagɔ 'na 'Kamalezikpɛ -ko sɛgbɛɛ 'nyɔkpɔ 'na -ɔ -glo 'ble 'ɔnɛɛ 'lɛɛ "me.

²⁵ -Sɔɔdɛku 'nyakpa ŋɔŋo- -wɛ, 'ɔnɛɛ -gblenyɔ -yi, "ne 'ɔ yi -lɔ "zeezu "ɛ 'blelɛɛ -wɛ "me 'glo.

²⁶ -Sɔɔdɛku "ɛ 'ble 'wlo- zɔ, "ne 'ɛ -fete -wɛ, "ne "ɛ "zeezu -wɛ yi -lɔ zɔ 'wlo me 'klekle.

²⁷ "Ne "ɛ 'lɛɛbhenyɔ 'na "kulɔbhɔnya yu -lɔ lo 'yɔbhɔ ka yi nɛɛ: -A To, 'yo 'na "namanɔ 'ye -e ne nɛ bhɔ "ɛ 'lɛɛ ne "me -glo 'a? Sɛko bhɔ "ne "zeezu 'yiɛ bhɔ "bhle 'a?

²⁸ "Ne 'ɔ yua -lɔ bhulɛle- nɛɛ: 'Neɛ -gblenyɔ -no -lɔ "ɛ soɔ. "Ne "kulɔbhɔnya yu -lɔ lo 'yɔbhɔ nɛɛ: Zaa, -e 'yɔbhɔ bhɔ -gbɔ -a me -se 'a 'cɛ glu -sɛ 'a?

²⁹ 'Ɔ nɛɛ: 'Bhɔ, "naa-, 'a 'cɛ -kɛ glu -sɛ, 'a te -kɛ "ɛ 'ble -wɛ glu -sɛ -me zɛ.

³⁰ "Ne 'ɔ yi -lɔ no nɛɛ: 'A 'tale- 'yi -se 'ɛ 'bhoɔle 'gɔme -kaa, -se 'ɛnɛɛ 'di dɛku "kɛ ylɛ. Lɔbhɔ kɛ -la -ylɛ, 'e "kɛ -wa 'cɛ 'di -wɛ bhulɛle- nɛɛ: 'A 'di -na "zeezu "guɔ "bhuɔ, -se 'a 'cɛ 'gbɛte-, -se 'a 'cɛ siɛ-, -se 'a "kɛ -da "ɛ 'ble 'di, -se 'a 'cɛ 'wlo "me zɔ.»

Mutadeyɛ 'na nunɛ

³¹ "Ne Zezu yua -lɔ nunɛ 'na -vinɛ "pɔle, 'ɔ nɛɛ: «Lagɔ 'na 'Kamalezikpɛ -ko sɛgbɛɛ 'nyɔkpɔ, -ɔ -glo su -ye 'wa la mutade -wɛ 'na yɛ 'ɔnɛɛ 'laabhueyi "me.

³² 'Ɛɛ -noɔ -lɔ 'glogloli 'klekle 'glɛme 'na yɛ -ɛ "ne 'kpɔ dodo ne "ku yɛ, -mɔ, 'ɛ kɛ -la -mi, 'ɛ 'kpɔmale "ne 'ɛ zi -lɔ 'lɛɛ "me 'na 'gloglo -li 'klekle "ku, "ne 'ɛ "zo -lɔ su "yitɛ "ne 'zea yi -lɔ 'ɛnɛɛ 'klɛ 'wli 'wanɛɛ -lolɛ sɔbhɔle -ka.»

Manyɔ 'na nunɛ

³³ "Ne Zezu yua -lɔ nunɛ 'na -vinɛ "pɔle nɛɛ: «Lagɔ 'na 'Kamalezikpɛ -ko sɛgbɛɛ manyɔ -ye 'ŋɔnɔ libhi- "ku, "ne 'ɔ yi "fɔlɔbhobho 'na "kɔpo ta wɔkɔ-, "ne 'ɔ 'yi "me "zo -se 'ɛ "kɛ -kɛ 'flu.»

Zezu 'sloale- nunɛpɛɛ "me 'nyakpa

³⁴ Zezu 'na -ye 'ɔ -bhulɛle "ɛ 'nyakpa 'na -zakpɛ -wɛ, nunɛ 'ye 'ɔ "pɔloa 'ce -lɔ, 'ɛ "mɔ "ɛ nunɛ yɛ, 'ɔ "ne bhulɛloa nɛ -visɛ.

³⁵ -Se "guɔkwɔmenyɔ 'na -ye 'ɔ -bhulɛ -wɛ "kɛ -kɛ 'yli 'wlole: 'E kɛ nuɛ "ku -vulu, nunɛ 'e "koa 'ce -lɔ "pɔle, -see zikpɛ "mɔ 'awɔ 'wlo 'na -ɛ zizɔ- "ku -wɛ, 'e yi 'ce 'ɛnɛɛ weli bhulɛ-.

Zezu -sɛ "zeezu 'na nunɛ "zo

³⁶ -Ɛwɛ "kɛ 'ple "bhuɔ ne, Zezu 'bha- "ɛ 'nyakpa 'na -zakpɛ -wɛ yɔko "ne 'ɔ yi -lɔ sueme yi, "ne 'ɔnɛɛ gɛlenya yu -lɔ yɔko 'nyiɔ- "ne 'wa yu -lɔ bhulɛle- nɛɛ: «-Sɛle 'se -anye "ɛ "zeezu -ɛ -ko 'lɛɛ -wɛ "me 'na zɔ.»

³⁷ "Ne Zezu yua -lɔ bhulɛle- nɛɛ: «-Ɔ -glo yɛ 'na "namanɔ -wɛ, 'Nyɔkpɔ Yowli yɔ -lɔ.

³⁸ 'Lɛɛ, zikpɛ -ye -a -ko "ku ne yɛ -lɔ, "ne yɛ "namanɔ, Lagɔ 'na 'Kamalezikpɛ "me 'na yua 'waa -lɔ, "ne "zeezu, -wa -gɛle Sata 'waa -lɔ.

³⁹ "Ne -gblenyɔ, -ɔ -glo "zeezu -wɛ, Sata yɔ -lɔ, -ye 'wa 'di -wɛ, zikpɛ 'na "kubhiɛɛ yɛ -lɔ, 'didinya -wɛ, "nɔgɔzilia 'waa -lɔ.

⁴⁰ Zaa, -see 'wa di "zeezu "guɔ "ne 'wa 'siɛ -wɛ, sɔbhɔ 'ye zikpɛ 'na "kubhiɛɛ "kɛ 'ce -lɔ ko.

⁴¹ 'Ɛza, 'Nyɔkpɔ Yowli "kɛ 'ce -lɔ 'ɔnɛɛ "nɔgɔzilia 'wɔ -nɛme, "ne 'wa "kɛ 'ce -lɔ -wa noa 'walua 'nyinyonoli, "ne 'wa no "nyɛnye -wɛ, 'ɔnɛɛ 'Kamalezikpɛ "me -sɛ.

⁴² "Ne 'wa "koa 'ce -lɔ -kosu "yitɛ "me "pɔ, -mee 'wa "kɛ 'ce 'tule "ne 'wa "kɛ 'ce glɛ nimile- yɛ 'ce -lɔ.

⁴³ -Mɔ, "meŋwinɛlenya yi 'ce "me "lelele- 'wa To Lagɔ 'na 'Kamalezikpɛ "me sɛgbɛɛ ylo. -Ɔ kɛ 'yukwli -kɛ, 'ɔ 'no -kɛ "me!»

-Klɔgbɔ 'na nunɛ

⁴⁴ Lagɔ 'na 'Kamalezikpɛ -ko sɛgbɛɛ -bɛɛ' 'na -ɛ 'tɛ- 'kpɛ "ku 'na -ye 'wa zizi 'lɛɛ "me. -Ɔ -yle -wɛ, zizi 'ye 'ɔ zizi -lɔ "kusɔ, 'ŋwɛnɛ miɛlo 'wli "ku, "ne 'ɔ me -lɔ 'ɔnɛɛ -li 'klekle 'pɔlo "ku "pɔ ka, "ne 'ɔ 'pea -lɔ "ɛ 'lɛɛ -wɛ.

⁴⁵ Lagɔ 'na 'Kamalezikpɛ -ko 'lelee sɛgbɛɛ "pɔlopɔnyɔ -ɔ tɛle -nyɛne 'na "namanɔ 'siɛ.

⁴⁶ 'Ɔ kɛ 'ɛnɛɛ -ɛ 'tɛ- 'kpɛku -wɛ -yle ne, 'ɔnɛɛ -li 'klekle 'ye 'ɔ me -lɔ 'pɔlo "ku "pɔ ka, "ne 'ɔ yi -lɔ 'pea -ka.

Sokwli 'na nunɛ

⁴⁷ Lagɔ 'na 'Kamalezikpɛ -ko 'lelee sɛgbɛɛ 'sɔkwli -ye 'wa 'pɔ jinyɛ "me "ne -ɛ 'sa 'ŋu "me 'na zibhia 'klekle -wɛ.

⁴⁸ 'Ɛ kɛ 'yiɛ- ne, 'cice "ku 'wa nɛme -lɔ, "ne 'wa 'gli -lɔ -duku -plɛplɛ "ne 'wa "zo -lɔ -ɛ 'nɛne -wɛ 'gbɛɛ "me, "ne 'wa 'pɔ -lɔ -ɛ "ne 'nɛne -wɛ 'kwlɛ "me.

⁴⁹ Sɔbhɔ 'ye zikpɛ 'na "kubhiɛɛ "kɛ 'ce -lɔ ko, "ne "nɔgɔzilia "kɛ -lɔ -wa 'nɛne "ne -wa "ne 'nɛne -wɛ 'wɔ "bhaa "me -seselia.

⁵⁰ "Ne 'wa "kɛ 'ce -lɔ -wa "ne 'nɛne -wɛ -kosu "yitɛ "me "pɔ, -mee 'wa "kɛ 'ce 'tule "ne 'wa "kɛ 'ce glɛ nimile- yɛ 'ce -lɔ.

⁵¹ «'A 'no- bhɔ -ye 'e bhulɛle- 'anye 'klekle -wɛ "me 'a?» Ŋwɛnɛɛ: «-Ɛɛ, -a 'no "me.»

⁵² "Ne Zezu yua -lɔ bhulɛle- nɛɛ: «Sɔbhɔ 'ye -Lɔslonyɔ, -ɔ -yibhlele Lagɔ 'na 'Kamalezikpɛ "me 'na weli -wɛ, 'ɔ -ko sɛgbɛɛ suebhenyɔ, -ɔ -sɛ 'ɔnɛɛ zizidɛ -li 'na 'lele "ne 'ɛnɛɛ 'gɔgɔ.»

Zezu -nyɛ Nazalɛte 'na 'nyakpa "bhaa

⁵³ Zaa, Zezu -bhiɛ lɛ "ɛ nunɛ -wɛ 'wɔ 'pɔ kɔ ne, "ɛ doɔ 'ye 'ɔ 'bha- -lɔ, "ne 'ɔ yi -lɔ me.

⁵⁴ "Ne 'ɔ yi -lɔ 'du 'na -mee 'ɔ 'bhoɔle- nɛ -wɛ me, "ne 'ɔ sloa nɛ -lɔ "mebhubhɔlebhudu "me Lagɔweli. -Wa -ko nɛ "bhle -wɛ, 'ɛ -soa nɛ geji "ku "ne 'wa no -lɔ nɛɛ: «-Dee 'ɔ -sɛ bhɔ "ɛ soɔ 'na 'ylime yamaleɛ 'ɛ -nyɛ zɛzɛpɛɛ bha?

⁵⁵ 'Ɔ "ne bhɔ sutɛlenyɔ 'na yu yɔ? 'Ɔ "nɔ "ne bhɔ Mali 'pa-, "ne 'ɔ "nowlia "ne bhɔ Zake, Zozɛfo, Simɔ "ne Zude 'waa?

⁵⁶ 'Ɔ "nɔyoa 'wɔ "ne bhɔ -anye 'glɛme -ko? Zaa, -dee 'ɔ -sɛ bhɔ "ɛ -ɛwɛ 'klekle 'a?»

⁵⁷ 'Ɛza 'wa "ne nɛ 'bhɛle- 'wa "kɛ Zezu 'dleku kɛle- "ne Zezu yua -lɔ bhulɛle- nɛɛ: «"guɔkwɔmenyɔ "ne -la 'ɔnɛɛ zoku "ne 'ɔnɛɛ -bhudu "me 'plome -ko.»

⁵⁸ Sɔbhɔ za 'ɔ "ne -la zɛzɛ -kwleyi 'pɔ-, sɛko -wɛ, 'wa "no 'dleku -kɛ zɛ.