Matie 10 - Nouveau Testament bété de Gagnoa

"Kɔlepɔnya kogbɔ "sɔ

¹ Zezu la- 'ɔnɛɛ gɛlenya -kogbɔ "sɔ, "ne 'ɔ yua -lɔ 'bhɛloɛ "nyɛ, -se 'wa "kɛ -kɛ zuzu -nyɛnyea kpeti-, -se 'wa "kɛ gu -nyɛ gbapegbapeɛ 'klekle "bhaa yamalea-.

² "Ɛ "kɔlepɔnya -kogbɔ "sɔ -wɛ 'na 'tɔ ne lɛ: Simɔ -ye 'wa la Piɛle -wɛ, "ne 'ɔ "nɔwli Adle; "ne Zebede 'yowlia Zake, "ne 'ɔ "nɔwli Zaa;

³ Filipo "ne Batelemi; Toma "ne -lɛposanyɔ Matie; Alefe yowli Zake "ne Tade;

⁴ Simɔ -ɔ si 'du za "me "ne Zuda Isekaliɔte, -ɔ -ple Zezu -wɛ.

Zezu -lebhe 'ɔnɛɛ "kɔlepɔnya -kogbɔ "sɔ

⁵ Zezu -lebhe "ɛ "kɔlepɔnya kogbɔ "sɔ -wɛ, "ne 'ɔ yua -lɔ bhulɛle- nɛɛ: «'A te -kɛ 'nyakpa -wa "ne Lagɔ -yi -wɛ "ku plɛ. -Se 'a te -kɛ Samalidu "me plɛ.

⁶ -Mɔ, 'a mele- Izlayɛle 'na 'nyakpa lo, -wa -ko sɛgbɛɛ bhlɛbhlea -wa -bhli 'kwlɛ -wɛ.

⁷ -Se, -mee 'a "kɛ -kɛ -ylɛle 'klekle -wɛ, 'a bhulɛle- -kɛ "bhle na 'nyakpa nɛɛ: Lagɔ 'na 'Kamalezikpɛ ne -kɛ -la 'anye dɛ tlole-!»

⁸ 'A yamalea- -kɛ 'gwizinya, 'a golia- -kɛ kwia, 'a yamalea- -kɛ 'zlɛlɔbhɔnya, -se 'a kpeti- -kɛ zuzu -nyɛnyea. 'A -yle "fu, 'a "nyɛ me -kɛ "fu.

⁹ -Se 'a te -kɛ 'anyɛɛ wlu "me 'dlasi "zo. -Se 'a te -kɛ 'tamayɛ slu- 'ɛ -nyɛ -badlɛ "bhaa.

¹⁰ -Se 'a te -kɛ 'gbudu slu-, -se 'a te -kɛ "koti 'na -vinɛ slu-, -se 'a te -kɛ -kpɔklo -nyɛ -zu "bhaa "ku 'libhi, "naa-, 'kle 'na dɛku, libhɔnonyɔ -kɛ 'ɔnɛɛ lilɛ.

¹¹ 'A "kɛ 'du "yitɛ "ne 'du 'jeyuɛ "me -plɛ, 'a 'yɔbhɔ lo, -se 'a "kɛ -kɛ 'nyɔkpɔ -ɔ "kɛ 'anye 'tee 'sa -wɛ 'na sueme plɛ, -se 'a "kɛ lɔbhɔ -wɛ -ko -kaa, -se 'anyɛɛ me dɛku "kɛ ylɛ.

¹² 'A kɛ "ɛ -bhudu -wɛ "me -plɛ, 'a no -gbɔ "kuwɛtɛ ko 'anye "ku.

¹³ "Ɛ -bhudu -wɛ "me 'na -konya kɛ "kuwɛtɛ 'yɔbhɔ, 'ɛ yi "bhle plɛ, -mɔ, 'wa kɛ -no -gbɔ 'wa "ne 'yɛbhɛ, 'ɛ zile- 'anye "me 'wlizɔ.

¹⁴ "Ne 'nyɔkpɔ "mɔ 'anye 'tee sa-, "ne 'ɔ "mɔ 'anyɛɛ bhulɛweli 'yukwli -fo, 'a kɛ "ɛ -bhudu "ne "ɛ 'du -wɛ "me 'bha- ne, 'a gbɔtɔ bho yɔko.

¹⁵ Gbɛklɛklɛ 'ye 'e bhulɛle lɛ 'anye nɛɛ: «-Zle gbobhle dɛku kɛ 'ce -ylɛ, Lagɔ yi 'ce "ɛ 'du -wɛ gbobhlele- "yitɛ "ku "ne 'ɛ yi 'ce Sodɔme "ne Gomɔle 'na 'nyakpa -nɛ "ku zi.»

Zezu nɛɛ: 'Ɔnɛɛ "kɔlepɔnya yi 'ce 'gbape

¹⁶ «'A 'fo -kɛ -ame 'yukwli, 'e 'lebhe 'anye -see 'wa sibha lɛ wlia 'slukua 'glɛme, zaa, 'a yibhlele- -kɛ "nɔŋɔ sɛ sɛgbɛɛ tɛbhɛ, -se 'a wɔtɔ- -kɛ 'dle sɛgbɛɛ -kobhlele.

¹⁷ -Se 'a 'luɔle- -kɛ 'nyakpa "ku, 'wa yi -kɛ 'anye gbobhlenya kɔme-, "ne 'wa yi -kɛ 'lelee 'anye "mebhubhɔlebhudu "me kɔme-, "ne 'wa yi -kɛ 'anye 'sɔpɔ.

¹⁸ "Ne 'neɛ 'tɔ "me, 'wa yi -kɛ 'anye kamalenya -nyɛ -klɔgbɔnya 'wɔ "bhaa 'yliku kɔme-. Lɔbhɔ 'ye 'a "kɛ -lɔ 'neɛ -wayeɛdɛ "zo 'wayi 'yliku, "ne -wa "ne Zufonya 'waa -wɛ 'yliku.

¹⁹ Zaa, 'wa kɛ 'ce 'anye gbobhlezejilɛ "ku kɔme-, -ye 'a "kɛ bhulɛ- "ne -see 'a "kɛ lɛ -wɛ 'na 'dlebhɛ te 'ce 'anye 'lɔbhɔ, -mɔ, Lagɔ yi 'anye "ɛ -gbabhele -wɛ "me weli -ye 'a "kɛ bhulɛ- -wɛ nu "pɔ.

²⁰ "Naa-, 'anye -gba 'cɛ bhulɛ-, -mɔ, 'a To 'na Zuzu Wlewle "kɛ -lɔ 'anye "me bhulɛle-.

²¹ "Nɔwli yi 'ce 'ɔ "nɔwli 'ple "ne 'wa yu 'ce 'lɔbhɔ. "Ne 'to yi 'ce 'ɔnɛɛ yu 'ple "ne 'wa yu 'ce 'lɔbhɔ. "Ne yua yi 'ce 'wa 'to 'na -gblenya "zo, "ne 'wa yua 'ce 'kwiɛ 'na -jiɛ "me "pɔ.

²² "Ne 'neɛ 'tɔ "me 'nyakpa 'klekle yi 'ce 'anye 'gble, -mɔ, -ɔ kɛ 'ce 'dleku "tamale- -kaa "ne 'ɛ kɛ 'ce -bhiɛ, Lagɔ yu 'ce 'fuɔ.

²³ 'Wa kɛ 'anye 'du 'na -mee 'a -ko nyɛze ziale- ne, 'a 'gule 'du 'na -vidɛ. Gbɛklɛklɛ 'ye 'e bhulɛle- -kɛ lɛ 'anye, "naa-, 'a -ka -kɛ Izlayɛledu -wɛ 'klekle 'wlizɔ 'bhiɛ, "ne 'Nyɔkpɔ Yowli "kɛ 'ce -lɔ lɔbhɔ zɔ 'wlole.

²⁴ Sɛko -wɛ nea, gɛlenyɔ "ne -la 'ɔnɛɛ sloanyɔ "ku -zi, "ne "kulɔbhɔnyɔ "ne -la 'ɔnɛɛ "bhenyɔ "ku -zi.

²⁵ -Ye 'wa 'yɔbhɔle lɛ gɛlenyɔ lo ne, 'ɔ ko sɛgbɛɛ 'ɔnɛɛ sloanyɔ. -Se, "kulɔbhɔnyɔ ko sɛgbɛɛ 'ɔnɛɛ "bhenyɔ. 'Wa 'na la 'se -bhudubhenyɔ Bɛlzebule ne, 'ɛ "kɛ -la zi -bhudu "me 'na konya!»

-A 'gu Lagɔ -gɛ

²⁶ «Zaa, 'a 'toa -kɛ -gɛ 'gu! -Mɔ, -ɛ zizɔ- "ku "ne 'ɛ -ka lɛ yibhleleɔ- "ne -le, "ne -ɛ -ko 'diɛɛ "me "ne 'ɛ -ka lɛ zɔ 'wlo "ne -le.

²⁷ 'Ɛza, -ye 'e -bhulɛle 'anye titiɛ "me -wɛ, 'a bhulɛle- zle "ku, "ne -ye 'wa 'ŋuŋwale 'anye -wɛ, 'a 'nyegbe -bhuduwliji, -se 'a "kpa "me -se 'a "kɛ 'ɛnɛɛ 'de -sɛ.

²⁸ 'A te 'nyakpa -wa 'lɔbhɔ ku -mɔ, 'wa "ne 'bhɛle- "ne 'wa "kɛ 'wugɔŋo 'lɔbhɔ -wɛ -gɛ 'gu. -Ye 'a "kɛ -gɛ 'gu -noɔ -lɔ Lagɔ yɔ, "naa-, 'ɔ -kɛ 'bhɛloɛ -se 'ɔ kɛ 'wugɔŋo -nyɛ ku "bhaa 'lɔbhɔ -se 'ɔ 'cɛ -kosu "me 'pɔ.

²⁹ 'Wa "ne 'pɔ bhɔ 'zea -jeyua "sɔ 'tamayɛ za 'pɔlo "ku 'a? "Ɛ 'zea -wɛ 'glɛme 'na -bholo -ka dodo "ku bhli, 'a To Lagɔ "mɔ "ku 'ŋunu.

³⁰ -Mɔ, 'anye, Lagɔ -yi 'anyɛɛ 'wlikonyi 'na -see 'ɛ -di "ku 'klekle.

³¹ Zaa, 'a te 'se 'gu, -mɔ, 'a -zi 'zea 'jeyua 'klekle "ku.

³² 'Nyɔkpɔ kɛ 'ce 'neɛ gbo 'ŋlu- 'ɔlua 'yliku ne, 'e yi 'ce 'ɔnɛɛ gbo 'ŋlu -me -a To -ɔ -ko "nɔgɔ "me 'yliku.

³³ -Mɔ, 'nyɔkpɔ kɛ 'ce 'neɛ lo -sɛ 'nyakpa 'yliku, 'e yi 'ɔnɛɛ lo -sɛ -me -ame To -ɔ -ko "nɔgɔ "me -wɛ 'yliku.»

Zezu -nɛme to

³⁴ «'A te 'dleku kɛle- -gbɔ "kuwɛtɛ 'ye 'e -nɛme dodo ne "ku. "Kuwɛtɛ 'ye 'e "ne -kɛ -nɛme, -mɔ, -jijigbɛlɛ 'ye 'e -nɛme -lɔ.

³⁵ "Naa-, 'e -yi -se yu -nyɛ 'ɔ 'to "bhaa 'wa "kɛ keyi glɛglɛle-, 'ŋuyu -nyɛ 'ɔ "nɔ "bhaa "kɛ "me diɔle-, "ne 'wɔtɔŋɔnɔ -nyɛ 'ɔnɛɛ yu 'na 'ŋɔnɔ "bhaa "kɛ keyi glɛglɛle-.

³⁶ "Ne -neɛ' -bhudu "me 'na 'nyakpa yi -neɛ' -gblenya "zo.»

-A wamale- Zezu

³⁷ «-Ɔ kɛ 'ɔ 'to -nyɛ 'ɔ "nɔ "bhaa -wa "ne 'ɛ kɛ -ame "ku -zi, 'ɔ "ne -ame "ku -ŋwa. "Ne -ɔ kɛ 'ɔ yowli -nyɛ 'ɔ yɔŋɔ "bhaa -wa "ne 'ɛ kɛ -ame "ku -zi, 'ɔ "ne -ame "ku -ŋwa.

³⁸ "Ne -ɔ "mɔ 'ɔnɛɛ klowa "ku libhi-, "ne 'ɔ "kɛ -ame -gɛlele, 'ɔ "ne -ame "ku -ŋwa.

³⁹ Zaa, -ɔ kɛ -no -gbɔ 'ɔ "kɛ 'ɔnɛɛ zikpɛ 'fuɔ, 'ɔ 'yi 'ce bhlia-, "ne -ɔ kɛ 'ɔnɛɛ zikpɛ "me 'bhale- 'neɛ za, 'ɔ 'yi 'ce yle.»

-Ɔ kɛ 'anye 'tee 'sa-, -ame 'ye 'ɔ 'sa- -lɔ 'tee

⁴⁰ «-Ɔ 'sa- 'anye 'tee -wɛ, -ame 'ye 'ɔ 'sa- -lɔ 'tee. "Ne -ɔ 'sa- -ame 'tee -wɛ, -ɔ -lebhe -ame -wɛ 'ye 'ɔ 'sa- -lɔ 'tee.

⁴¹ -Ɔ 'sa- "guɔkwɔmenyɔ 'tee -se 'ɔ lɔbhɔ Lagɔ "ku -wɛ za, 'ɔ yi 'ce "guɔkwɔmenyɔ 'na 'peɛleɛ yle. "Ne -ɔ kɛ "meŋwinɛlenyɔ -se 'ɔ 'ŋwinɛle- "me -wɛ za 'tee 'sa-, 'ɔ yi 'ce "meŋwinɛlenyɔ 'na 'peɛleɛ yle.

⁴² -Ɔ kɛ 'ŋu -bɔŋobɔŋo 'na 'slɔ yua -wɛ 'na 'glɛme 'na -bholo 'nyɛ-, -see 'ɔ -noɔ 'neɛ gɛlenyɔ yɔ -wɛ za, gbɛklɛklɛ 'ye 'e bhulɛle lɛ 'anye. 'Ɔ yi 'ce 'ɔnɛɛ 'peɛleɛ yle.»