Malke 9 - Nouveau Testament bété de Gagnoa

Zezu zigbale- 'ɔyi "me, Piɛle, Zake "ne Zaa 'yli "ku

¹ "Ne Zezu bhulɛloa 'awɔ 'lelee -lɔ sɛne nɛɛ: «'E bhulɛle 'anye, 'diɛɛ yɛ -kɛ -lɔ, -wa -ko dɛne 'na -bedia "mɔ -na Lagɔ 'na 'Kamalezikpɛ -ɛ "kɛ 'bhɛloɛ "me yile- 'ylime 'ye, 'wa -ka "ku»

² 'Yli 'gbeplo "kɛ 'ple ne, Zezu libhi- Piɛle, Zake "ne Zaa "ku, "ne 'wa yi -lɔ tlo "yitɛ 'vli 'gblɛ-, 'wa -tlole nɛ 'nyakpa dɛ. "Ne 'wayi 'yliku 'ɔ yi -lɔ zizlɔle-.

³ 'Ɔnɛɛ "meplakoti 'na 'pulesɛ zi nɛ "ku, 'nyɔkpɔ "ne 'bhɛle- -se 'ɔ "kɛ sɔbhɔ -bɛɛ' 'pulea- dodo ne "ku.

⁴ "Ɛ doɔ cuu, Zezu 'na gɛlenya ta -wɛ yi -lɔ Eli "ne Moyize 'ylime 'ye, 'wayi -nyɛ Zezu "bhaa 'wa -ko lɛtɛ dɛku.

⁵ "Ne Piɛle yi -lɔ Zezu bhulɛle- nɛɛ: «"Bhenyɔ, -a "kɛ dɛne ko -wɛ 'nɛne, za, -a "kɛ lɔbhɔ -gligbɛ ta 'sɔbhɔle: -Neɛ' -bholo, Moyize -nɛ -bholo, "ne Eli -nɛ -bholo.»

⁶ Piɛle "ne -la -see 'ɔ "kɛ lɛ -yi, "naa-, nyanɔ 'lɔbhɔ 'ɔ -nyɛ 'ɔlua -wɛ "bhaa.

⁷ "Ne "nɔgɔjatlɛ yua -lɔ 'wli mlɔa-, "ne weli yi -lɔ "bhle 'bhale- 'ɛ nɛɛ: «'Neɛ -wawayu yɔ -lɔ, 'a 'fo 'yukwli.»

⁸ Gɛlenya 'na 'pɔ 'yli cuu ne, Zezu -bholo -kpee 'wa 'ye- -lɔ 'ylime, 'ɔɔ 'nyegboa- -lɔ yɔko.

⁹ -Dee 'wa 'kwli nɛ tlo -wɛ, lɔbhɔ 'ye Zezu 'titliloa- -lɔ kɔ nɛɛ: «-Ye 'a 'ye- 'ylime ne 'na 'de, 'a 'te -kɛ 'nyɔkpɔ -sɛle -kaa, -se 'Nyɔkpɔ Yowli "kɛ -na -kɛ gluzɔ 'wlo "bhuɔ.»

¹⁰ 'Wa "zo- "ɛ Zezu 'na weli -wɛ 'plome, -mɔ, 'wa 'yɔbhɔyɔbhɔle -lɔ lo nɛɛ: «'Gluzɔwloɛ ne, -see 'ɛ sɛ bhɔ zɔ 'a?»

¹¹ 'Wa 'yɔbhɔ nɛ Zezu lo nɛɛ «Sɔɔbɛɛza -Lɔsloanya no bhɔ nɛɛ Eli "kɛ -lɔ yi "bhuɔ 'a?»

¹² Zezu -bhulɛloa nɛɛ: «-Tiasɛku Eli "kɛ -lɔ yi tɛɛ -se 'ɔ "kɛ -li 'wli jijalea-. -Mɔ sɔɔbɛɛza Lagɔbɔgo no me bhɔ 'lelee nɛɛ 'Nyɔkpɔ Yowli yi 'gbape kpɛnyee, "ne 'wa yu 'ce 'nyɛze ziɛ- 'a?

¹³ 'E bhulɛle 'anye, Eli -yi nɛ -kɛ "bhuɔ "ne 'nyakpa -no -ye 'wa 'yɔbhɔ -wɛ 'wli, -see 'ɛ kɛleɔ- 'ɔnɛɛ dɛku Lagɔbɔgo "me -wɛ.»

Zezu -kpeti demo -ɔ -ko yu keyi -wɛ

¹⁴ 'Wa "kɛ gɛlenya 'na -bedia yɔko ylɛ- ne, 'wa 'na 'wolo 'nyakpa 'na -zakpɛ -blua, 'wayi -nyɛ -Lɔsloanya "bhaa, 'wa -ko kpɛle- dɛku.

¹⁵ "Ɛ -zakpɛ -wɛ 'ye- lɛ Zezu 'ylime cuu ne, geji 'bhoa- "ku 'klekle, "ne 'wa guɔguɔ me -lɔ -se 'wa "kɔ 'bhɛle-.

¹⁶ "Ne Zezu 'yɔbhɔ -lɔ 'ɔnɛɛ gɛlenya lo nɛɛ: «'wayi -wɛ "bhaa -ye 'a 'kpɛle bhɔ "ku 'a?»

¹⁷ "Ne "ɛ -zakpɛ -wɛ "me 'na 'nyɔkpɔ -bholo yi -lɔ 'gbo 'di nɛɛ: «"Bhenyɔ, 'e -nɛme -eyi 'neɛ yu, zuzu -nyɛnye liɔ 'yalɛ za 'ɔ "ne 'di gbo.

¹⁸ "Ɛ zuzu -nyɛnye -wɛ 'bhɛle- 'ɔ "kɔ -dee 'ɔ 'yɔbhɔ -wɛ "ku libhile. 'Ɔ 'bhlo 'siɛ, 'pipli 'bhalo nu "ne 'ɔnɛɛ glɛwli libhilibhile -lɔ, "ne 'ɔ 'goglele -lɔ. 'Ɛza 'e -bhulɛle -neɛ' gɛlenya -gbɔ 'wa 'kpotu-, -mɔ, 'wa -siɛlo.

¹⁹ "Ne Zezu yua -lɔ bhulɛle- nɛɛ: 'Anye -dɛme 'na 'nyakpa, 'a "ne 'dleku -kɛ, zaa, 'yli zɔŋ 'e "kɛ bhɔ 'anye yɔko -sɛ 'a? "Ne 'yli zɔŋ 'e "kɛ bhɔ 'anye slule- 'a? 'A -nɛme -ame "ɛ yu -wɛ.»

²⁰ "Ne 'wa yu -lɔ "ɛ yu -nɛme. "Ɛ zuzu -nyɛnye -wɛ "kɛ Zezu 'ylime 'ye ne, "ɛ yu 'ye 'ɔ -zuzua -lɔ "me "yitɛ "ku, "ne "ɛ yu yi -lɔ zɔ bhli-, "ne 'ɔ ziɔ -lɔ 'libhɔ "ne dɔ 'kwlilo -lɔ nu.

²¹ "Ne Zezu yi -lɔ "ɛ yu -wɛ 'ɔ 'to lo 'yɔbhɔ nɛɛ: «-Sɔɔdɛku 'ye 'ɛ cu- bhɔ "ku 'a? "Ɛ yu 'ɔ 'to nɛɛ: -Ye 'ɔ -noɔ 'awɔ "bhle yu yɔ -ce.

²² 'Ɔ "pɔ zle o -zle -kosu "me, 'ŋu "me, -se 'ɔ "kɛ "ku. Zaa, -e kɛ 'bhɛle- -gbɔ -e yi -bɛɛ' no, "pɔ -anyɛɛ 'nyɛzedle, -se 'fuɔ- -anye.»

²³ Lɔbhɔ 'ye Zezu -bhulɛlo -lɔ sɛne: «Sɔɔbɛɛza -e no bhɔ -gbɔ: -E kɛ 'bhɛle- -gbɔ -e yi -bɛɛ' no, 'e no 'a? -Li 'klekle 'bhɛleɔ- -ɔ -kɛ 'dleku -wɛ za.

²⁴ "Ɛ doɔ cuu, "ɛ yu 'ɔ 'to yi -lɔ "me "kpa, 'ɔ nɛɛ: 'E -kɛ 'dleku! Kwɛle- -ame, 'neɛ 'dlekukɛleɛ "ne -tia "me 'tɛ-.»

²⁵ Zezu 'na wolo, 'nyakpa 'na -zakpɛ "zo- nɛ 'wli, "ne Zezu yi -lɔ "ɛ zuzu -nyɛnye -wɛ "ku "kpale- nɛɛ: «-Eyi, -mɔɔ gbɔ "ne 'nyɔkpɔ ne "ne 'di 'gbo "ne 'ɔ "ne 'no 'gbo -wɛ, 'bha- "ɛ yu ne "me, -se 'to 'ce -la "kusɔ "me plɛle-.»

²⁶ "Ne "ɛ demo yi -lɔ "me 'kpa, "ne 'ɔ yi -lɔ "ɛ yu "me zuzua- "yitɛ "ku, "ne 'ɔ yu -lɔ "me 'bha-. "Ɛ yu -le sɛgbɛɛ -ɔɔ "ku-, "ne 'nyakpa no -lɔ nɛɛ: «'Ɔ "ku- -kɛ 'ceɛ.»

²⁷ "Ne Zezu yu -lɔ sɔ 'sale-, "ne 'ɔ yu -lɔ 'wli "ku 'libhi, "ne 'ɔ yi -lɔ 'ya 'nyegblele-.

²⁸ Zezu "kɛ sueme 'sibhɔ-, "ne 'ɔnɛɛ gɛlenya "bhaa 'wa "kɛ 'wayikɔ lɔbhɔ ko ne, lo 'wa 'yɔbhɔ- -lɔ nɛɛ: «Sɔɔbɛɛza -anye, -a "ne "ɛ zuzu -nyɛnye -wɛ 'na kpetikpetiɛ 'bhɛlemale-?»

²⁹ "Ne Zezu yua -lɔ sɛne bhulɛle- nɛɛ: «Bhubhɔbhubhɛ 'ɛyi kɔ "me 'ye soɔ 'na zuzu -nyɛnye -wɛ 'kpetiɔ- -lɔ.»

Zezu -bhulɛle "kusɔ sɛne nɛɛ: 'Ɔ yi ''ku "ne 'ɔ yi gluzɔ 'wlo

³⁰ Zezu -nyɛ 'ɔnɛɛ gɛlenya "bhaa 'wa 'bha- -dee 'wa -ko nɛ -wɛ "ne 'wa yi -lɔ Galile ylɛle-. Zezu "ne 'yɔbhɔ nɛ -gbɔ 'wa yibhlele- sɛ.

³¹ "Ne 'ɔ sloa 'awɔ -lɔ sɛne 'ɔnɛɛ gɛlenya nɛɛ: «'Wa yi 'Nyɔkpɔ Yowli 'nyakpa kɔ plele-, 'wa yu 'lɔbhɔ-, "ne 'ɔ yi "ku, "ne 'yli ta kɛ 'ple- ne, 'ɔ yi gluzɔ 'wlo.»

³² -Mɔ, 'ɔnɛɛ gɛlenya "ne -ye 'ɔ 'bhulɛloa -wɛ "me -nyini, "ne nyanɔ 'lɔbhoa 'lelee za, 'wa "ne -see 'wa "kɔ lo 'yɔbhɔ -yi.

-Ɔ 'kpɔ- bhɔ "ne -ɔ zi bhɔ "ku 'a?

³³ "Ne 'wa yi -lɔ 'du -ye 'wa la Kafanaɔme -wɛ ylɛ. 'Wa -ko -bhudu "me, "ne Zezu yi -lɔ 'ɔnɛɛ gɛlenya lo 'yɔbhɔ nɛɛ: «-Ye 'a -ko nɛ -gwe "ku -wɛ, -ye 'a 'kpɛle nɛ bhɔ "ku 'a?»

³⁴ 'Wa -tli "ku "naa- -gwe "ku, 'wa kpɛle- nɛ -gbɔ 'wa "kɛ 'wayi glɛme 'na -ɔ -noɔ "yitɔ yɔ yibhlele-.

³⁵ "Ne Zezu yi -lɔ -duku 'gli, "ne 'ɔ yi -lɔ 'ɔnɛɛ "kɔlepɔnya kogbɔ "sɔ -wɛ la, "ne 'ɔ yua -lɔ sɛne bhulɛle- nɛɛ: 'Nyɔkpɔ kɛ -no -gbɔ 'ɔ "kɛ 'yuku gɛle-, 'ɔɔ "kɛ -lɔ 'nyakpa 'klekle 'na 'be bhiɛle, "ne 'ɔɔ "kɛ -lɔ 'nyakpa 'klekle "ku lɔbhɔ-.

³⁶ "Ne 'ɔ yi -lɔ yu bhueyi "ku 'libhi, "ne 'ɔ yu -lɔ 'wanɛɛ jijɛ "ku 'nyegbea-, "ne 'ɔ yu -lɔ gbegblele-, "ne 'ɔ yi -lɔ 'ɔnɛɛ gɛlenya bhulɛle- nɛɛ:

³⁷ «'Nyɔkpɔ 'na -ɔ kɛ yua glɛme 'na -bholo 'tee 'sa- 'neɛ 'tɔ "me, -ame 'ye 'ɔ 'sa- -lɔ 'tee. "Ne 'nyɔkpɔ 'na -ɔ 'sa- -ame 'tee -wɛ, -ame 'ye 'ɔ "ne 'tee 'sa-, -mɔ, -ɔ -lebhe -ame -wɛ 'ye 'ɔ 'sa- -lɔ 'tee.»

-Ɔ "ne 'anye -gble -wɛ, 'anye -nɔ yɔ -lɔ

³⁸ Zaa -bhulɛle lɛ Zezu nɛɛ: «Sloanyɔ, -a 'ye- 'nyɔkpɔ 'na -ɔ 'kpeti zuzu -nyɛnyea 'neɛ 'tɔ "me -wɛ 'ylime. -A 'na 'titu 'yli "ku -se 'ɔ te nɛ -kɛ "ɛ -ye 'ɔ no -wɛ no. "Naa-, 'ɔ "ne -anye lo -ko -me zɛ.»

³⁹ "Ne Zezu yua -lɔ bhulɛle- nɛɛ: «'A 'to 'yli "ku 'titi. Sɛko -wɛ ne, 'nyɔkpɔ -ka -la 'neɛ 'tɔ "me zɛzɛ "pɔ, "ne 'ɔ "kɛ 'lelee 'neɛ dɛku welinyɛnye bhulɛ- cuu.

⁴⁰ -Ɔ "ne -anye -gble -wɛ, -anye -nɔ yɔ -lɔ.

⁴¹ -Ye 'e bhulɛle dɛne 'anye -wɛ, 'nyɔkpɔ kɛ 'anye 'ŋu -bɔŋobɔŋo 'na 'slɔ -bholo 'nyɛ- -see 'a -noɔ Klise -noa 'waa -wɛ za ne, gbɛklɛklɛ 'ye 'e bhulɛle lɛ 'anye, 'ɔ yi 'ce 'ɔnɛɛ 'peɛleɛ yle.»

'A te "nyɛnye no

⁴² -Ɔ kɛ yua 'glɛme 'na -ɔ -kɛ -ame 'dleku Lagɔ keyi -gla ne, 'ɛ -ŋwɔ "ku -gbɔ 'wa glɔ 'tiyi -zabhuɛ blo "me -se 'wa "kɔ jinyɛ "me 'pɔ.

⁴³ -Neɛ' sɔ kɛ -eyi 'nyinyonoli noa- ne, 'di "ku. -E "kɛ sɔ -bholo kɛle- -se 'e "kɛ Lagɔzikpɛ "me plɛ 'nɛne "ne 'ɛ -zi -e "kɛ sɔ "sɔ kɛle- -se -e "kɛ -kosu "me me "ku, -mee -kosu "ne nyimɔ "ku -wɛ.

⁴⁴ [Lɔbhɔ tavlia -wa li ku -wɛ 'wa "ne "kule -ce lɔbhɔ "ne lɔbhɔ 'na -kosu nyimɔ 'ce]

⁴⁵ -Neɛ' bho kɛ -eyi 'nyinyonoli noa- ne, 'di "ku. -E "kɛ bho -bholo kɛle- -se 'e "kɛ Lagɔzikpɛ "me plɛ 'nɛne "ne 'ɛ -zi -e "kɛ bho "sɔ kɛle- -se 'wa "kɛ -eyi 'kleyeɛ "me "pɔ.

⁴⁶ [Lɔbhɔ tavlia -wa li ku -wɛ 'wa "ne "kule -ce lɔbhɔ "ne lɔbhɔ 'na -kosu nyimɔ 'ce]

⁴⁷ -Neɛ' 'yli kɛ gbɔ "ne -e kɛ 'nyinyonoli no ne, -sɛ "bhle. -E "kɛ 'yli -bholo kɛle- -se 'e "kɛ Lagɔzikpɛ "me plɛ 'nɛne "ne 'ɛ -zi, -e "kɛ 'yli "sɔ kɛle- -se -e "kɛ -kosu "me me "ku.

⁴⁸ Lɔbhɔ tavlia -wa li ku -wɛ 'wa "ne "kule -ce lɔbhɔ "ne lɔbhɔ 'na -kosu nyimɔ 'ce

⁴⁹ -Ɔkɔkokɔko yi 'ce gbapegbapeɛ 'na -kosu "me ylɛle- "ne 'ɔ "kɛ 'ce -lɔ jibhi -ɛ "kɔ 'ce 'wlele "zoa- -wɛ yle.

⁵⁰ Jibhi, -bɛɛ' 'na -bɛɛ' yɛ -lɔ, -mɔ, 'ɛ "mɔ -da 'nu -kɛ ne, -see 'wa 'cɛ bhɔ 'lelee jibhi "zoa-? Zaa, 'a ko jibhi 'nasɛ, -se "kuwɛtɛ ko 'anye 'glɛme.