Malke 8 - Nouveau Testament bété de Gagnoa

Zezu -lia 'nyakpa 'na -gɛmɛnɛ -wlulu -mɔɔnɔ.

¹ -Zlewɛ, 'nyakpa 'pɔle- 'awɔ "kusɔ -zakpɛ zɔ. 'Wa "ne 'awɔ lilibɛɛ -kɛ za Zezu yi -lɔ 'ɔnɛɛ gɛlenya bhulɛle- nɛɛ:

² «'Nyakpa ne -le -ame 'nyɛze "ku. "Naa-, 'yli ta ne lɛ -se 'wa -ko -ame yɔko "ne 'wa "ne lilibɛɛ -kɛ.

³ 'E koa -dɛme "ɛ soɔ 'yi 'tale- "ne 'wa kɛ -me ne, 'wa -ka -gwebhliɛ 'bhɛle-. "Ne 'wanɛɛ -bedia -na -kɛ 'deyine 'bhale-.»

⁴ 'Ɔnɛɛ Gɛlenya nɛɛ: «Zaa, -dee -a "kɛ bhɔ 'kpɛslɛ -jijɛ ne "ku lilɛ ylele-, "ne -a "kɛ bhɔ 'nyakpa -kwleyia -wɛ "nyɛ?»

⁵ Zezu 'yɔbhoa- lo nɛɛ: «"Fɔlɔbhi zɔŋ 'a -su bhɔ?» Ŋwɛnɛɛ: «"Fɔlɔbhi gbɔsɔ.»

⁶ "Ne 'ɔ yi -lɔ 'nyakpa bhulɛle- nɛɛ: 'A gli -duku. "Ne 'ɔ yi -lɔ "ɛ "fɔlɔbhi gbɔsɔ -wɛ "ku 'libhi-, "ne 'ɔ yi -lɔ Lagɔ bhɛle-, "ne 'ɔ 'yi -lɔ "me 'didile-, "ne 'ɔ 'yi -lɔ 'ɔnɛɛ gɛlenya kɔ 'je, -se 'wa 'cɛ 'nyakpa 'dlile-. "Ne 'wa yua -lɔ 'dlile-.

⁷ 'Wa -su -me nɛ zibhia -jeyua 'na yɛ. Zezu 'lubhua- "ku "ne 'ɔ yi -lɔ Lagɔ bhɛle-, "ne 'ɔ 'yi -lɔ 'ɔnɛɛ gɛlenya kɔ 'je -se 'wa 'cɛ -zakpɛ 'dlile-.

⁸ 'Nyakpa -li "ne 'wa -lo. "Ne "fɔlɔcibhi "ne zibhia 'na -ɛ -to "ku -wɛ, 'wa libhi-, 'ɛ -bhli -gbɛɛ gbɔsɔ, "ne gɛlenya 'yi -lɔ kɔme.

⁹ "Ne 'ɛnɛɛ linya -yle 'awɔ -kɛ 'nyakpa 'na -gɛmɛnɛ -wlulu -mɔɔnɔ (4.000). "Ne Zezu yi 'awɔ -lɔ "ɛ 'nyakpa -wɛ -gwe "nyɛ.

¹⁰ 'Ɔ 'bha- lɛ 'ɛyi -wɛ "ku ne, gɔlo "me 'ɔ -bhli -lɔ cuu, 'ɔnɛɛ gɛlenya "bhaa "ne 'wa yi -lɔ Dalemanuta 'na -glɔ "me me.

Faliziɛnya 'yɔbhɔle Zezu zɛzɛpɛɛ "me lo

¹¹ Faliziɛnya -yi Zezu yɔko -se 'wa "kɛ kpɛle-. 'Wa 'dle -ko 'ɔnɛɛ "me -bea -dɛ. Ŋwɛnɛɛ: «'Pɔle -anye 'yliku zɛzɛ -ɛ 'bhale "nɔgɔ "me -wɛ.

¹² "Ne Zezu yi -lɔ 'nyɔŋo 'slu, 'ɔ nɛɛ: -Dɛme 'na 'nyakpa 'wa 'yɔbhɔle -ame zɛzɛpɛɛ "me? Gbaa 'ye 'e bhulɛle lɛ 'anye, -dɛme 'na 'nyakpa 'wa -ka -na zɛzɛ 'ylime 'ye!»

¹³ "Ne Zezu -tle doɔ Faliziɛnya, "ne 'ɔ yi -lɔ gɔlo "me 'gblɛ, "ne 'ɔ yi -lɔ jinyɛ 'na -gbɔsɔ -ce me.

¹⁴ 'Wa "kɛ -la me ne, gɛlenya -dlu "ne 'wa "ne 'awɔ "fɔlɔ "ku libhi-, 'wa -su 'awɔ "fɔlɔbhuɛ -bholo -kpee, "ne 'wa yi 'awɔ -lɔ gɔlo "me 'gblɛ.

¹⁵ "Ne Zezu yua -lɔ sɛne 'de "me "zo, 'ɔ nɛɛ: «'A -gɛ 'yli, 'a luɔle- -kɛ faliziɛnya -nyɛ Elode "bhaa 'na manyɔ "ku.»

¹⁶ "Ɛ weli 'wɛ kɔ 'ye gɛlenya "nyɛnyɛle- lɔ 'de nɛɛ: «-A "ne "fɔlɔ "ku libhi- za 'ɔ bhulɛ -lɔ soɔ.»

¹⁷ Zezu -bhle "ɛ weli -wɛ 'yukwli, "ne 'ɔ yua -lɔ lo 'yɔbhɔ nɛɛ: «sɔɔbɛɛza 'a "nyɛnyɛle bhɔ 'de 'nɛɛ: -A "ne "fɔlɔ -su za 'ɔ 'gbɔ -lɔ soɔ? 'A "ne "pɔ bhɔ 'dle 'a? 'A "ne -bɛɛ' "me -nyini? 'Anyɛɛ 'dle "ku 'ye 'ɛ 'gbɔ- bha?

¹⁸ 'A -kɛ 'yli "ne 'a "ne 'ye siɛ, 'a -kɛ 'yukwli "ne 'a "ne 'gbo -nyini? 'Anyɛɛ 'dle "ne 'sibhɔ bhɔ lɔbhɔ 'a?

¹⁹ Nyakpa 'na -gɛmɛnɛ -wlulu 'umgbu (5.000) -sɔɔdɛku 'e -dliloa 'awɔ "fɔlɔbhi 'umgbu "ne 'wa 'yi 'awɔ li -wɛ, "ɛ 'cibhi -ɛ to "ku 'na -gbɛɛ -yle 'awɔ zɔŋ?» Ŋwɛnɛɛ: «-Gbɛɛ kogbɔ "sɔ.»

²⁰ «"Ne -ye 'e -dlile "Fɔlɔbhi 'gbɔsɔ 'nyakpa 'na -gɛmɛnɛ -wlulu -mɔɔnɔ (4.000) -wɛ, 'ɛ -cibhi -ɛ -to "ku 'na -gbɛɛ -yle 'awɔ zɔŋ?» Ŋwɛnɛɛ: «-Gbɛɛ gbɔsɔ.»

²¹ "Ne Zezu yua -lɔ bhulɛle- nɛɛ: «Zaa, sɛko "ne 'a -nɛ -nazɛ "me 'no-?»

Zezu 'yea- Bɛtesayida 'na -kpelɔbhɔnyɔ siɛ.

²² Zezu -nyɛ 'ɔnɛɛ gɛlenya "bhaa -yi -lɔ Bɛtesayida. 'Nyakpa -su -kpelɔbhɔnyɔ, "ne 'wa yu -lɔ Zezu -nɛme, "ne 'wa yi -lɔ Zezu bhubhɔ- nɛɛ: Libhu 'kwlɛ.

²³ "Ne Zezu yu -lɔ sɔ 'sale, 'ɔ -su "ne 'wayi "sɔ yi -lɔ "ɛ 'du -wɛ "me 'bha-, "ne 'ɔ yu -lɔ dɔ 'yli "klo 'dia-. 'Ɔ 'piɔ- 'kwlɛ 'wli, 'ɔ nɛɛ: «-E -gɛ bhɔ -bɛɛ' 'yli 'a?»

²⁴ 'Ɔ "kɛ 'yli "ku vulu- ne, 'ɔ nɛɛ: «'E -gɛ 'nyakpa 'yli, 'wa -le sɛgbɛɛ su, -mɔ, 'wa 'bha bhulɛ "me.»

²⁵ "Ne Zezu yu -lɔ "kusɔ sɔ 'yli "klo 'piɛ, 'ɔ -yamale "ne 'ɔ yi -lɔ siɛ 'ye gbɛklɛklɛ.

²⁶ Zezu nɛɛ: «Sɔbhɔ 'wli, me sueme te -kɛ -la "ɛ 'du -wɛ "me plɛ.»

Piɛle nɛɛ: Zezu -noɔ -lɔ ŋwɛnɛŋwɛnɛyu yɔ.

²⁷ Zezu -nyɛ 'ɔnɛɛ gɛlenya "bhaa -me Sezale, Filipo -glɔ "me 'na 'du. 'Wa -ko -gwe "ku "ne 'ɔ yi -lɔ 'ɔnɛɛ gɛlenya lo 'yɔbhɔ- nɛɛ: «'Nyakpa 'na dɛku sɔɔnyɔ 'ye 'e -noɔ bhɔ?»

²⁸ Ŋwɛnɛɛ: «'Nyakpa 'na -bedia nɛɛ: Zaa Batise 'ye -e -noɔ -lɔ. -Wawɛ nɛɛ: Eli 'ye -e -noɔ -lɔ. "Ne 'wace nɛɛ: "Guɔkwɔmenya 'glɛme 'na -bholo 'ye -e -noɔ -me -lɔ.

²⁹ "Ne Zezu yua -lɔ "kusɔ lo 'yɔbhɔle nɛɛ: -See 'a lɛ bhɔ? 'Anyɛɛ dɛku -ye 'e -noɔ bhɔ?» Piɛle libhi- weli "ku. 'Ɔ nɛɛ: «Klise 'ye -e -noɔ -lɔ.»

³⁰ "Ne Zezu yua -lɔ kɔ 'titli-. 'Ɔ nɛɛ: «'Nyakpa te -na -kɛ 'ɛnɛɛ 'de 'no.»

Zezu -sɛ 'de nɛɛ: 'Ɔ yi "ku "ne 'ɔ yi glɔ-

³¹ "Ne Zezu 'sloa -lɔ sɛne 'ɔnɛɛ gɛlenya nɛɛ: «'Nyɔkpɔ Yowli yi -kɛ 'gbape kpɛnyee, "ne -Gligbɛyitia, "ne bɔbɔnya "yitia, "ne -Lɔsloanya yi 'ɔnɛɛ lo -sɛ, "ne 'wa yu 'lɔbhɔ, "ne 'ɔ yi "ku, -mɔ, 'yli ta kɛ 'ple-, 'ɔ yi gluzɔ 'wlo.»

³² "Ɛ weli -wɛ gbɛklɛklɛ 'ye 'ɔ -bhulɛloa -lɔ. "Ne Piɛle yi -lɔ Zezu la, "ne 'wa yi -lɔ guɔ ziza-, "ne 'ɔ yu -lɔ "ku 'gbɔtɔle-.

³³ "Ne Zezu yi -lɔ kɔ 'bheliɔ-, "ne 'ɔ yi -lɔ 'ɔnɛɛ gɛlenya "ku 'wolo-, "ne 'ɔ yi -lɔ Piɛle bhulɛle- nɛɛ: «"Plele -ame 'beme Sata! -E "ne "pɔ Lagɔ 'nasɛ 'dle, -mɔ, 'nyakpa 'nasɛ 'ye -e "pɔ -lɔ 'dle!»

Gɛlenya yi 'wanɛɛ zikpɛ "me 'bhale- Zezu 'nasɛ

³⁴ "Ne Zezu yi -lɔ -zakpɛ -nyɛ 'ɔnɛɛ gɛlenya "bhaa la, "ne 'ɔ yua -lɔ bhulɛle- nɛɛ: «'Nyɔkpɔ kɛ -no -gbɔ 'ɔ "kɛ -ame 'gɛle- ne, 'ɔ 'bhale- 'ɔyi "me, 'ɔ libhi 'ɔnɛɛ klowa "ku, -se 'ɔ 'gɛle- -ame.

³⁵ "Naa-, -ɔ kɛ 'ɔnɛɛ zikpɛ "ku 'cece 'ɔ yi 'ce bhlia-. -Mɔ, -ɔ 'bhale 'ɔnɛɛ zikpɛ "me 'neɛ za, "ne 'Denaade za -wɛ, 'ɔ yi 'ɔnɛɛ zikpɛ yle.

³⁶ -Ye dodo ne "ku 'na -klɔgbɔ 'klekle 'na kɛlekɛleɛ -ko bhɔ "me 'ɛ kɛ zikpɛ 'na kwlɛbhliɛ "me 'wlisɛle- 'a?

³⁷ "Ne -ye 'nyɔkpɔ "kɛ bhɔ wlɛ- "ne 'ɛ "kɛ 'ɔnɛɛ zikpɛ 'ylime 'plele 'a?

³⁸ -Dɛme 'na 'nyakpa -wa no 'nyinyonoli "ne 'wa 'glɛ Lagɔ keyi, "ɛ 'nyakpa -wɛ 'yliku, 'e kɛ 'nyɔkpɔ 'zu "ku -le, "ne 'na weli kɔ 'zu "ku -le -me, -zle 'Nyɔkpɔ Yowli kɛ 'ce 'ɔ To 'na 'Kamalezikpɛ "me -yi, nɔgɔzilia 'wɔ "bhaa, -ame, 'Nyɔkpɔ Yowli, 'e yi 'ce 'ɔnɛɛ za zu plɛ -me.»