Malke 3 - Nouveau Testament bété de Gagnoa

Zezu -yamalea 'nyɔkpɔ -gbajɛzle

¹ "Ne Zezu yi -lɔ "mebhubhɔlebhudu "me 'wli zɔzi. 'Nyɔkpɔ -bholo -ye sɔ -bhli yɔko -wɛ -yi -me "bhle.

² Faliziɛnya 'wolo Zezu "ku 'wewe: 'Ɔ kɛ -gbajɛzle "ɛ 'nyɔkpɔ -wɛ 'na gu -bhia ne, 'wa "kɔ gbo 'wli no zɛ.

³ "Ne Zezu yi -lɔ "ɛ sɔyɔkobhlinyɔ -wɛ bhulɛle- nɛɛ: «-Sɔ "ku! -Se yi -dɛne 'nyakpa 'klekle 'yliku!»

⁴ "Ne 'ɔ yi -lɔ sɛne 'nyakpa -wa -ko lɔbhɔ -wɛ bhulɛle- nɛɛ: «-ye 'nyɔkpɔ "kɛ bhɔ no -gbajɛzle 'a? 'Wa no "nɛne, -mɔ, 'wa no "nyɛnye? 'Wa yamalea- 'nyɔkpɔ, -mɔ 'wa 'talo- 'yi -se 'ɔ "ku?» 'Gbodinyɔ "ne -le.

⁵ "Ne 'ɔ yua -lɔ "kɛlesɛ 'ylime 'glole- 'klekle. 'Dle 'gbapelo "me -see 'wa 'tɛ- 'yukwli "me -wɛ za. "Ne 'ɔ yi -lɔ "ɛ sɔyɔkobhlinyɔ -wɛ bhulɛle- nɛɛ: «Glo -neɛ' sɔ -wɛ "me.» 'Ɔ 'cɛ "me 'glo ne, 'ɔnɛɛ sɔ -yamale.

⁶ Faliziɛnya "kɛ "mebhubhɔlebhudu "me zɔ 'wlo ne, 'wli -zo -ka 'wa -me -lɔ cuu, Elode 'na keyikonya "bhaa: -See 'wa "kɛ "zo "ne 'wa "kɛ Zezu 'lɔbhɔ -wɛ 'wa 'tɛle -lɔ 'siɛ.

'Nyakpa -kwleyia -yi Zezu yɔko

⁷ Zezu -nyɛ 'ɔnɛɛ gɛlenya "bhaa, 'wa -me Galile 'na 'ŋu "yitɛ yɔko. 'Nyakpa 'na -zakpɛ "yitɛ -gɛlelo. 'Wa 'bhale nɛ Galile "ne Zude.

⁸ 'Wa 'bhale Zeluzalɛme, Idume, "ne Zludɛ keyi, -bedia 'bhale Tile "ne Sidɔ -glɔ "me. "Ɛ 'nyakpa -kwleyia -wɛ -yi Zezu yɔko, "naa-, -li 'klekle -ye 'ɔ -no nɛ -wɛ, 'wa 'no -me 'ɛnɛɛ 'de zɛ.

⁹ "Ne 'ɔ yi -lɔ 'ɔnɛɛ gɛlenya bhulɛle- nɛɛ: «'A -sɛ lɔbhɔ gɔlo -bholo -se 'e 'cɛ "me 'gli, -se 'nyakpa te -kɛ -ame "ku 'nɔŋɔle- -ka yi.»

¹⁰ "Naa-, 'gwizinya -ye 'ɔ -yamalea 'awɔ lɛ ne, 'wa "ne 'awɔ 'muɔnɔ. 'Ɛnɛɛ 'ylime 'nyakpa 'klekle -wa 'gbape 'awɔ -wɛ, 'wa 'gwegwele 'awɔ -lɔ yɔko "me -se 'wa "kɔ -kɛ 'kwlɛ libhi -me zɛ.

¹¹ -Se zuzu -nyɛnyea 'ye Zezu 'ylime 'yiɛ -wɛ ne, sɔbhɔ 'wa yu -lɔ 'bho yɔko "pɔle -ka. "Ne 'wa 'kpa -lɔ "me nɛɛ: «Lagɔ Yowli 'ye -e -noɔ -lɔ 'diɛɛ!»

¹² "Ne Zezu yua -lɔ nuɔ "ku bhli, "ne 'ɔ yua -lɔ bhulɛle- nɛɛ: «'A te -kɛ 'nyakpa bhulɛle- sɔɔnyɔ -ye 'e -noɔ -wɛ.»

Zezu -tɔ "kɔlepɔnya kogbɔ "sɔ

¹³ Zezu "kɛ tlo 'vli 'gblɛ ne, 'ɔ lale- 'ɔyi 'nyakpa -ye 'ɔ 'yɔbhɔ -wɛ yɔko, "ne 'wa yu -lɔ "bhle yle.

¹⁴ 'Wayi 'glɛme 'ye 'ɔ -sɛ -lɔ 'nyakpa kogbɔ "sɔ, "ne 'ɔ yua -lɔ "kɔlepɔnya ziɛle-. -Se 'ɔyi 'wɔ "bhaa 'wa "kɛ "ku 'nɔŋɔle-, -se 'ɔ "koa 'lebhe-, -se 'wa "kɛ 'Denaade -sɛ.

¹⁵ 'Ɔ 'nyoa- 'bhɛloɛ -se 'wa "kɛ -kɛ zuzu -nyɛnyea 'kpeti- -me.

¹⁶ "Ɛ 'nyakpa kogbɔ "sɔ -wɛ, 'wanɛɛ 'tɔ ne lɛ: Simɔ 'ɔyi Zezu ziɛle- -lɔ Piɛle.

¹⁷ Zebede 'yowlia Zake "ne Zaa, 'wayi Zezu la -lɔ Boanɛgɛse, 'ɛ sɛ zɔ nɛɛ: -Gbagbadɛyua.

¹⁸ Adle, Filipo, Batelemi, Matie, Toma, Alefe yowli Zake, Tade, Simɔ -ɔ si 'du za "me.

¹⁹ "Ne Zezu 'na plenyɔ Zuda Isekaliɔte.

Zezu -nyɛ 'ɔnɛɛ nyoa "bhaa

²⁰ Zezu -zi sueme 'wlizɔ, 'ɔ 'na 'wolo-, 'nyakpa 'na 'kwleyia -yu yɔko 'wli "zole -ka "kusɔ. 'Ɛnɛɛ 'ylime, 'ɔnɛɛ gɛlenya "bhaa 'wa "ne 'awɔ -see 'wa "kɛ -bɛɛ' li -yi.

²¹ "Ɛ 'de -wɛ "kɛ Zezu 'na nyoa "ku 'wlo ne, 'yukwɔ 'wa -yu -lɔ -se 'wa "kɔ sueme kɔme-. "Naa-, 'wanɛɛ dɛku, 'wlime nyimɔ -lɔ zɛ.

Zezu -sɛ -Lɔsloanya 'na weli keyi.

²² -Lɔsloanya -wa 'bhale- Zeluzalɛme -wɛ, 'waa- 'gbɔ -lɔ sɛne nɛɛ: «-Ɔwɛ, zuzu -nyɛnyea 'na "cifi Bɛlzebule -ko -lɔ "me. Zuzu -nyɛnyea 'na "cifi gbɔ -lɔ za 'ɔ "kpeti -lɔ Zuzu -nyɛnyea 'nyakpa keyi.»

²³ "Ne Zezu yua -lɔ 'ɔyi yɔko lale-, "ne 'ɔ yua -lɔ nunɛ "pɔle. 'Ɔ nɛɛ: «-See Sata "kɛ bhɔ Sata 'kpeti- 'a?

²⁴ 'A -gɛ 'yli! Du -bholo "ku 'na 'nyakpa, 'wa "kɛ 'wayi to 'lɛ "me 'piɛ- ne, "ɛ 'du -wɛ -glɛgbɛ 'ye 'ɛ "zo -lɔ.

²⁵ "Ne -gligbɛ -bholo "ku 'na 'nyakpa, 'wa "kɛ "me 'diɔle- ne, "ɛ -gligbɛ -wɛ bhiɛ 'ye 'ɛ bhiɛ -lɔ.

²⁶ "Ne Sata kɛ 'ɔyigɛsɛ 'ɔyi to "ku sile ne, "ne 'ɔ kɛ 'ɔyi zɔ 'di ne, 'ɔ -ka -la lele-. 'Ɔnɛɛ sɛ 'yli 'ye 'ɛ bhiɛ- -lɔ.

²⁷ "Ne 'nyɔkpɔ kɛ -no -gbɔ 'ɔ "kɛ jɛnenyɔ 'na -bhudu "me plɛ -se 'ɔ "kɛ 'ɔnɛɛ -li "ku 'libhi ne, 'ɔ "mɔ -na gbɛte- klekle "bhuɔ, "ne 'ɔ "kɛ -da -lɔ -bhudu "me plɛ, "ne 'ɔ "kɛ -la -lɔ 'ɔnɛɛ -li 'klekle "ku 'libhi.

²⁸ Gbɛklɛklɛ 'ye 'e bhulɛle lɛ 'anye nɛɛ: 'Nyinyonoli 'klekle -ye 'nyakpa no Lagɔ 'wli -wɛ, "ne 'dii -ye 'wa ziɔ -wɛ, 'ɔ yi 'ce 'ɛnɛɛ gbo 'yi 'tale-, -see 'ɛ "mɔ "ku -di -ce, "ne -see 'ɛ kɛ "ku -di -ce.

²⁹ -Mɔ, 'nyinyonoli -ye 'nyakpa no Zuzu Wlewle 'wli -wɛ 'ɛ -ka 'ce "ku 'titliɔ-! Gboyɛkɛ yɛ 'ce -lɔ.»

³⁰ "Naa-, -Lɔsloanya nɛɛ: «-Ɔwɛ, zuzu -nyɛnyea -ko -lɔ "me, "ɛ -sɛ -lɔ Zezu weli "me, "ne 'ɔ yi -lɔ soɔ la.»

Zezu 'ɔ "nɔ "ne 'ɔ "nowlia

³¹ Zezu 'ɔ "nɔ "ne 'ɔ "nowlia -yi 'ɔnɛɛ za. 'Wa 'nyegbe- zikpoku, "ne 'wa yu -lɔ -bhudu "me 'nyɔkpɔ "ku 'lebhele-.

³² Zezu 'gli- 'nyakpa -kwleyia 'na jijɛku, "ne 'wa yu -lɔ bhulɛle- nɛɛ: «-E "nɔ "ne -e "nowlia, 'wa -wole -eyi zikpoku, ŋwɛnɛɛ 'wa "kɛ -eyi 'lɛtɛle- 'tekeyi.»

³³ Zezu nɛɛ: «-Ɔ -noɔ bhɔ -ame "nɔ yɔ, "ne 'wa -noɔ bhɔ -ame "nowlia 'waa 'a?»

³⁴ "Ne 'ɔ yi -lɔ 'nyakpa -wa -blu -wɛ "ku 'wolo-, 'ɔ nɛɛ: «-Ame "nɔ "ne -ame "nowlia, 'waa- ne lɛ.

³⁵ "Naa-, -ɔ no -ye Lagɔ 'yɔbhɔ -wɛ, 'ɔ -noɔ -lɔ -ame "nɔwli yɔ, -ame "nɔyɔ yɔ, -ame "nɔ yɔ.»