Malke 15 - Nouveau Testament bété de Gagnoa

'Wa -kɔme Zezu Pilate 'yli "ku

¹ 'Zegbakpɔme, bɔbɔnya "yitia, gligbɛyitia, -Lɔsloanya "ne Zufonya 'na -glɔgbobhlenya "zo- 'wli -se 'wa "kɛ weli "ku "zolea-. 'Wa -gbɛte Zezu "ne 'wa yu -lɔ Pilate kɔ 'je.

² "Ne Pilate yi -lɔ Zezu lo 'yɔbhɔ nɛɛ: «Zufonya 'na -klɔgbɔnyɔ 'ye -e -noɔ bha?» Zezu nɛɛ: «-Mɔɔ gbɔ -lɔ sɔbhɔ, -eyi 'nabhɛ.»

³ "Ne bɔbɔnya "yitia 'gbli nɛ Zezu gbo -kwleyi 'wlime.

⁴ Pilate 'yɔbhɔ -lɔ "kusɔ Zezu lo nɛɛ: «-Ee 'di gbo? Zaa, -e -gɛ bhɔ gbo 'klekle -ye 'wa 'gbli- -eyi 'wlime -wɛ 'yli 'a?»

⁵ -Mɔ, "ɛ Zezu -tli "ku "ne 'ɛ yi -lɔ Pilate -nyea.

'Wa 'pɔ- Zezu 'kwiɛ 'na -jiɛ "me.

⁶ -See 'wa -gwlɛle 'ce Paake -wɛ, Pilate -sɛ 'ce 'nyɔkpɔ -bholo -ye -zakpɛ 'yɔbhɔ -wɛ -jiɛ "me.

⁷ 'Nyɔkpɔ -ye 'wa la Balabase -wɛ -ko 'awɔ -jiɛ "me 'ɔ -nyɛ 'ɔlua "bhaa. "Naa-, 'wa 'lɔbhɔ- 'awɔ 'nyɔkpɔ "ne 'ɔ "ku- -zle 'wa -mele 'awɔ wlomɛnya kpokpo sɛku lo.

⁸ -Zakpɛ -yi Pilate 'na doɔ "ne 'wa yu -lɔ lo 'yɔbhɔ nɛɛ: «No 'se "ɛ -ye -e no 'kle -anyɛɛ dɛku -wɛ!»

⁹ "Ne Pilate yua -lɔ bhulɛle- nɛɛ: «'A 'yɔbhɔ bhɔ -gbɔ 'e 'tale- Zufonya 'na -klɔgbɔnyɔ 'yi 'a?»

¹⁰ "Naa-, 'ɔ -gɛ 'yli -gbɔ gblegblesɛ bɔbɔnya "yitia -ple -lɔ Zezu.

¹¹ -Mɔ, bɔbɔnya "yitia -bhulɛle -lɔ "ɛ 'nyakpa 'na -zakpɛ -wɛ nɛɛ: 'Wa no -gbɔ: «'Je -anye Balabase kɔ!»

¹² "Ne Pilate yi -lɔ "kusɔ weli "ku 'libhile, "ne 'ɔ yua -lɔ sɛne bhulɛle- nɛɛ: «-see 'e 'na 'sa bhɔ "ɛ -ye 'a la Zufonya 'na -klɔgbɔnyɔ ne 'a?»

¹³ "Ne 'wa yi -lɔ "kusɔ "me 'kpale nɛɛ: «kolo- klowa "klo!»

¹⁴ "Ne pilate yua -lɔ sɛne bhulɛle- nɛɛ: «"Nyɛnye 'na -ye 'ɔ -no bhɔ -tiaa 'nabhɛ?» "Ne 'wa yi -lɔ "kusɔ "me 'kpa "yitɛ "ku nɛɛ: «-kolo klowa "klo!»

¹⁵ Pilate 'yɔbhɔ nɛ -gbɔ 'ɔ "kɛ "ɛ -zakpɛ -wɛ 'ŋwɛnɛ 'labha- za, 'ɔ -sɛ "bhle Balabase "ne 'ɔ yua -lɔ kɔ 'je. "Ne 'ɔ yi -lɔ no -gbɔ 'wa 'sɛpɔ Zezu, "ne 'ɔ yu -da -lɔ "slojanya kɔ 'je -gbɔ 'wa kolo- klowa "klo.

"Slojanya -sile Zezu

¹⁶ "Slojanya yi -lɔ Zezu 'kamalenyɔ "yitɔ 'na sueme kɔme-, "ne 'wa yi -lɔ "slojanya 'klekle la.

¹⁷ 'Wa "kɛ Zezu 'sile-, zaa, 'wa -plɔ "koti -zɛle "me. 'Wa -lɔbhɔ 'wiɛ -glipɛ "ne 'wa yu -lɔ 'wlime 'gbli.

¹⁸ 'Wa 'bhɛlo "ne 'wa bhulɛlo -lɔ sɛne nɛɛ: «'Yawo 'se, Zufonya 'na -klɔgbɔnyɔ!»

¹⁹ 'Wa 'sɛpɔlo nɛ "zeezu 'wli "ne 'wa -slu nɛ 'dɔ "ku, 'wa "pɔlo -kokomini 'dle "me "ne 'wa "zo -lɔ.

²⁰ 'Wa "kɔ 'sile- "bhuɔ ne, 'wa -sɔ "ɛ "koti -zɛle -wɛ ku "me, "ne 'wa yu -lɔ 'ɔnɛɛ "koti "me 'pla-. 'Wa -kɔmo zikpoku -se 'wa "kɔ klowa "klo 'kole-.

"Slojanya -kole Zezu klowa "klo.

²¹ Silɛne 'na Simɔ, Alɛzadle "ne Wlufuse 'wa 'to yɔ -lɔ. 'Ɔ 'bha- nɛ 'kwlɛ "me, "ne 'ɔ -ko nɛ 'ple dɛku, "ne "slojanya yu -lɔ bhulɛle- -gbɔ 'ɔ 'libhi Zezu 'na klowa "ku klepaa.

²² "Ne 'wa yi -lɔ Zezu 'dɛne -bholo -dee 'wa la Gɔlogota -wɛ kɔme-, 'ɛ sɛ zɔ nɛɛ: «'Wlikwɛ 'na dɛ.»

²³ 'Wa 'nyɔ- duvɛ -ye 'wa -bhleabhleale -titi -ye 'wa la mile -wɛ lo, -mɔ, Zezu "ne 'nɔmɔ-.

²⁴ "Slojanya -kole Zezu klowa "klo, 'ɔnɛɛ "meplakoti 'wa -ylɛ -lɔ, "ne 'wa 'yi -lɔ -negbe "ku "pɔ, -se 'wa "kɛ -ɔ 'cɛ "ku 'libhi -wɛ yibhlele-, "ne 'wa 'yi -lɔ dli- 'wayi 'glɛme.

²⁵ 'Zegbakpɔme 'na 'gle 'fɛɛnɔ "me 'ye 'wa -kolo -lɔ klowa "klo.

²⁶ "Ɛ su -ye 'wa -kole Zezu "klo -wɛ, 'ɛyi 'wa 'mea- -lɔ -kokopɛɛ "klo "ne 'wa yi -lɔ gbo -nyɔ za, 'wa -kolo klowa "klo -wɛ "klo 'kɛle nɛɛ: «Zufonya 'na -klɔgbɔnyɔ.»

²⁷ "Ɛ "slojanya -kole -me 'awɔ "kpokponya "sɔ klowa "klo, Zezu yɔko. -Bholo -ko 'ɔnɛɛ lilikwlɛ -gbɔsɔ "ku, "ne "sɔnɔ -ko 'ɔnɛɛ kɔpɛ -gbɔsɔ "ku.

²⁸ [Soɔ 'ye Lagɔ-bɔgo "me 'na welicibhɛ 'wlole- -lɔ 'yli, sɛne 'ye 'ɛ lɛ -lɔ nɛɛ: 'Wa -zɛle -mo 'nyakpalɔbhɔnya 'glɛme.]

²⁹ 'Pleplenya zigba nɛ 'wli "ku "ne 'wa 'yli nɛ -lɔ Zezu. Ŋwɛnɛɛ: «'Ee, -e nɛɛ -e yi nɛ Zufonya 'na "mebɔbɔle-bhudu -wɛ 'wlɛ, "ne -e 'yi nɛ 'yli ta -kpee 'sɔbhɔle.

³⁰ Zaa, 'fuɔ- 'se -eyi -se 'bha- "ɛ klowa -wɛ "klo!»

³¹ "Ɛ sɛbhele -wɛ 'ye bɔbɔnya "yitia "ne -Lɔsloanya 'sile -lɔ Zezu. "Ne 'wa lɛ -lɔ sɛne 'wayi 'na -kpakpɛ 'glɛme : 'Ɔ 'fuɔ- 'se 'nyakpa 'na -bedia ne, 'ɔ "ne bhɔ 'bhɛle- "ne 'ɔ "kɛ 'ɔyi 'fuɔ -me!

³² -Dɛmeda, -a 'yɔbhɔ- -gbɔ ŋwlɛŋwlɛyu, Izlayɛle 'na -klɔgbɔnyɔ 'kwli klowa "klo zɔ, -se -a 'cɛ 'ylime 'ye, -se 'a "kɔ -la 'dleku kɛle-. "Ne -ye 'wa -kole -me 'awɔ klowa "klo Zezu yɔko -wɛ 'ylu mo 'awɔ 'lelee -lɔ.

Zezu "ku-

³³ 'Ylokwɛ -zɛle "me titiɛ -yi 'du 'klekle "ku -kaa "ne 'ɛ sibhɔ- "kugbedɛ 'gle 'na tanɛ "ku.

³⁴ "Ɛ 'gle 'na tanɛ -wɛ "me 'ye Zezu 'kpa- -lɔ "me "yitɛ "ku, 'ɔ nɛɛ: «Eloyi, Eloyi lama sabatani?» 'Ɛ sɛ zɔ nɛɛ: «'Na Lagɔ, 'na Lagɔ, sɔɔbɛɛza -e 'bhale- bhɔ -ame "me 'a?»

³⁵ 'Nyakpa 'na -bedia -wa -kome lɔbhɔ -wɛ 'no- "ɛ "mekpaweli -wɛ "me, ŋwɛnɛɛ: «'Ɔ la -kɛ Eli!»

³⁶ 'Wanɛɛ 'glɛme 'na -bholo 'na guɔguɔnɔ -glɛ 'zezu 'na 'kwɛ 'yli, "ne 'ɔ 'yi -lɔ vinɛ "me 'ŋwa-, "ne 'ɔ 'yi -lɔ Zezu nuɛ kole-. "Ne 'ɔ lɛ -lɔ sɛne nɛɛ: «'A 'nyegbe-! -Se -a 'cɛ 'ylime 'ye, Eli kɛ -kɛ -yi, "ne 'ɔ "kɔ klowa "klo -sɛ!»

³⁷ "Ne Zezu yi -lɔ "me 'kpa "yitɛ "ku "ne 'ɔ yi -lɔ nyɔŋo bhli.

³⁸ "Ne lokwi "yitɛ -ɛ -ko "mebhubhɔ-bhudu "me -wɛ yi -lɔ "me ylɔ- 'pɛɛ "sɔ, 'ɛ 'bhale- "nɔgɔ "ku -kaa "ne 'ɛ 'sibhɔ- zɔ.

³⁹ "Slojayu "yitɔ -ɔ 'nyegbe- nɛ Zezu 'klo "ku 'ye- -see 'ɔ "ku- -wɛ 'ylime zaa, 'ɔ nɛɛ: «'Nyɔkpɔ -wɛ, Lagɔ 'na Yu yɔ nɛ -lɔ 'diɛɛ.»

⁴⁰ 'Ŋwenea 'na yɛ -ko -me 'lelee 'awɔ lɔbhɔ. 'Wa -ko nɛ -gboji "ne 'wa ylɛ nɛ -lɔ. 'Wayi 'glɛme 'ye Magedala 'na Mali, Salome, Zake 'tekeyi "ne Zoze 'wa "nɔ Mali -ko -me -lɔ.

⁴¹ "Ɛ 'ŋwenea -wɛ -gɛle -me 'awɔ Zezu "ne 'wa -lɔbhɔ mo 'awɔ "ku, -sɔɔdɛku 'ɔ -ko nɛ Galile -wɛ. 'Ŋwenea -kwleyia 'na -bedia -wa -gɛlelomoa Zeluzalɛme -wɛ -kome 'lɔbhɔ.

Zozɛfo 'piɛ- Zezu -biɛ "me

⁴² Silɔ 'yilɔ "bhuɔ, -gbajɛ 'na -li 'wa 'jijalea -lɔ 'wli. Zle kɛ -ze -gbajɛ yɛ -lɔ.

⁴³ 'Lɔbhɔ 'ye 'du -ye 'wa la Alimate -wɛ 'na Zozɛfo -ylɛ -lɔ 'du, Zufonya 'na gbobhle-bhudu "me 'ye 'ɔ -kome -lɔ, "ne 'ɔ -wo -me -lɔ Lagɔ 'na 'Kamalezikpɛ 'dletɛlesɛ, 'ɔ "tamale- 'yli "ku "ne 'ɔ yi -lɔ Pilate 'na dɛce me, "ne 'ɔ yu -lɔ Zezu 'na -gɛzɛ lo 'yɔbhɔle.

⁴⁴ Pilate 'cɛ no -gbɔ Zezu "ku- nɛ "bhuɔ ne, 'ɛ 'pɔ- 'ŋutɛ "ku, "ne 'ɔ yi -lɔ "slojanya 'na "cifi la, "ne 'ɔ yu -lɔ sɛne lo 'yɔbhɔ nɛɛ: «'Ɔ "ku- 'lɔbhɔ -gwlɛ bhɔ "me?»

⁴⁵ "Ne "ɛ "slojanya 'na "cifi yu -lɔ -see 'ɛ -ylɛle 'klekle -wɛ bhulɛle-. "Ne Pilate 'yi -da -lɔ Zozɛfo 'de "nyɛ -gbɔ 'ɔ libhi Zezu 'na -gɛzɛ "ku.

⁴⁶ Zozɛfo "kɛ 'lɔbhɔ 'bha- ne, lokwi 'fɛɛ 'ye 'ɔ -pea -lɔ, "ne 'ɔ yi -lɔ Zezu 'na -gɛzɛ "zo 'kwlia, "ne 'ɔ yu -lɔ "ɛ lokwi -wɛ bubɔ- 'klekle, "ne 'ɔ yu -lɔ -biɛ -ye 'wa -bhlu 'tiyi "me -wɛ "me zizi, "ne 'ɔ yi -lɔ 'tiyi -zabhuɛ 'gbisi-, "ne 'ɔ yi -lɔ 'nuɔ "ku 'piɛ.

⁴⁷ Du -ye 'wa la Magedala -wɛ 'na Mali "ne Zoze 'ɔ "nɔ Mali 'wa -wolo "ɛ -dee 'wa 'piɛ- Zezu 'na -gɛzɛ -wɛ.