Malke 13 - Nouveau Testament bété de Gagnoa

Zezu nɛɛ: 'Wa yi "Mebɔbɔlebhudu wlɛ

¹ -Sɔɔdɛku Zezu 'wlo nɛ "Mebɔbɔlebhudu "me zɔ, 'ɔnɛɛ gɛlenya 'na -bholo 'bhulɛlo -lɔ nɛɛ: «Anyinɛnyɔ, 'wolo- 'se "ku! 'Tiyi 'nane- bhɔ soɔ 'a! Sɔbhɔ sɛ 'nane- bhɔ soɔ 'a!»

² Zezu nɛɛ: «"Ɛ -bhudu "yiti -ye -e -gɛ doɔ 'yli -wɛ, 'wa 'yi wlɛ "ne "ɛ 'tiyi -wɛ 'wɔ -ka -la "ku 'pepele-. 'Ɛyi 'klekle yi 'wlɔ-.»

Zikpɛ -gba "kɛ "kubhiɛ 'na -ɛ "kɛ yi -wɛ

³ Zezu 'gli- oliviesu 'na tlo 'vli, "Mebɔbɔlebhudu "klo "ku. Piɛle, Zake, Zaa "ne Adle 'wɔ "bhaa -ko lɔbhɔ 'wayikɔ "ne 'wa 'yɔbhɔ -lɔ lo nɛɛ:

⁴ 'Bhulɛle- -anye «-Sɔɔdɛku lɔbhɔ "kɛ bhɔ ylɛ. "Ne 'be 'na -ye -a "kɛ bhɔ 'ylime 'ye "ne -a "kɛ bhɔ 'sɛ yibhlele- -gbɔ lɔbhɔ -ylɛ 'a?»

⁵ "Ne Zezu yua -lɔ bhulɛle- nɛɛ: «'A 'luɔle- -kɛ 'ayi "ku, 'nyɔkpɔ te -kɛ 'anye 'kwlɛ bhlia-!

⁶ 'Nyakpa -kwleyia yi 'ce yi "ne 'wa yi 'ce 'neɛ 'tɔ "ku 'libhi, "ne 'wa yi 'ce no -gbɔ: -Ame yɔ -lɔ. "Ne 'wa yi 'ce 'nyakpa -kwleyia 'kwlɛ bhlia-.

⁷ "Ne 'A yi 'ce to 'na -ɛ tlo dɛ "ne -ɛ "ne dɛtlo -wɛ 'na weli 'no. 'A te -kɛ "gu! -Ɛwɛ 'klekle sɔbhɔ 'ye 'ɛ "kɛ -lɔ ylɛle-, -Mɔ, 'Ɛ "ne -mlɛ -kɛ zikpɛ 'na "kubhiɛ -zle yɛ.

⁸ "Naa-, 'du 'na -ɛwɛ -nyɛ 'du 'na -ɛwɛ "bhaa 'wa yi 'ce gwe. -Klɔgbɔdu -nyɛ -klɔgbɔdu "bhaa yi 'ce gwe, "ne -glɔ 'na -bedi "ku ŋɔŋo yi 'ce "bhle yi, "ne dodo yi 'ce tɛtɛle-. -Ɛwɛ 'klekle yi 'ce lele- sɛgbɛɛ 'gwɛlelɔbhɔŋɔnɔ 'na tɛtɛ -gbapeɛ.

-Ɛ "kɛ 'ce Zezu 'na gɛlenya yle -wɛ

⁹ 'A 'fo 'ce -ɛ "kɛ 'anye yle -wɛ 'na weli 'yukwli 'tee! "Naa-, 'wa yi 'ce 'anye gbobhle-bhudu "me "ne "mebhubhɔlebhudu "me kɔme-, "ne 'wa yi 'ce 'anye 'lɔbhɔ, 'wa yi 'ce 'anye 'kamalenyɔ "yitɔ -nyɛ -klɔgbɔnya 'wɔ "bhaa 'yliku kɔme- 'neɛ za, "ne 'a yi 'ce 'neɛ -wayeɛdɛ "zo 'wayi 'yliku.

¹⁰ "Naa-, Lagɔ 'na 'Denaade -sɛleɔ -na 'nyakpa 'klekle "bhuɔ.

¹¹ "Ne 'wa yi 'ce 'anye gbobhlezejilɛ "ku kɔme-. Zaa, 'a te -kɛ no nɛɛ: -See -a "kɛ bhɔ lɛ. -Mɔ, Lagɔ yi 'ce 'anye weli -ye 'a "kɛ bhulɛ- -wɛ 'dleku "pɔ 'ɛ dɛ -wɛ "ku. "Naa-, 'anye -gba 'cɛ bhulɛ-, -mɔ, Zuzu Wlewle 'cɛ 'ce -lɔ 'anye -gɛ bhulɛ-.

¹² "Nɔwli yi 'ce 'ɔ "nɔwli 'ple "ne 'wa yu 'ce 'lɔbhɔ. "Ne 'to yi 'ce 'ɔnɛɛ yu 'ple "ne 'wa yu 'ce 'lɔbhɔ. "Ne yua yi 'ce 'wa 'to 'na -gblenya "zo, "ne 'wa yua 'ce 'kwiɛ 'na -jiɛ "me "pɔ.

¹³ "Ne 'neɛ 'tɔ "me 'nyakpa 'klekle yi 'ce 'anye 'gble, -mɔ, -ɔ kɛ 'ce 'dleku "tamale- -kaa "ne lɔbhɔ kɛ 'ple- ne, Lagɔ yu 'ce 'fuɔ.»

¹⁴ «-Sɔɔdɛku, 'a kɛ 'ce -linyimɔnyɔ "yitɔ 'ylime 'ye, "ne -dee 'ɔ -ka 'gli -wɛ, 'ɔ kɛ lɔbhɔ 'gli-», -ɔ zɛle "me -wɛ, 'ɔ 'no "me! Zaa, -wa kɛ 'ce Zude -glɔ "me -ko, 'wa 'fɔtɔle- tlo 'vli.

¹⁵ "Ne -Ɔ kɛ -bhudu 'wli -ko te 'kwli -se 'ɔ te -bhudu "me plɛ, -se 'ɔ "kɛ -bɛɛ' "ku 'libhi.

¹⁶ -Ɔ kɛ 'ce 'kwlɛ "me -ko, 'ɔ te 'wlizɔ zi -se 'ɔ 'te -bhudu "me "koti "ku 'libhi.

¹⁷ "Ɛ -zlewɛ, gokɛleŋwenea "ne gwaŋwenea yi 'ce 'nyɛze "ku lele- kpɛnyee.

¹⁸ Zaa, 'a bhubhɔ- -kɛ Lagɔ -se soɔ 'na -li te 'ce 'wɔtlɔ -yi dɛku yi.

¹⁹ "Ɛ yli -wɛ "me 'nyakpa yi 'gbape kpɛnyee. "Naa-, -see Lagɔ "mɔ 'awɔ zikpɛ 'wlɛ- -kaa "ne -dɛme, 'nyɔkpɔ -na 'ce -zɛ "ɛ soɔ 'gbape-, "ne 'nyɔkpɔ -ka 'ce -la sɔbhɔ 'gbape.

²⁰ "Naa-, Anyinɛnyɔ Lagɔ 'maa 'wɔ "ɛ 'yli -wɛ "ku -sɛ, 'nyɔkpɔ 'ɔ -ka 'wɔ 'po. -Mɔ, 'ɔ -sɛ "ku, 'nyakpa 'na -ye 'ɔ -sɛ lɔbhɔ -wɛ 'na 'tɔ "me.

²¹ 'Nyɔkpɔ kɛ 'anye bhulɛle nɛɛ: 'A 'wolo- "ku, «Klise -ko dɛne!» "Ne 'a 'wolo- "ku «'ɔ -ko dɛce» 'a 'to 'ce 'dleku kɛle-.

²² "Naa-, 'nyakpa yi 'wayi Ŋwlɛŋwlɛnya la, "guɔkwɔmenya -gbeyia yi yi, "ne 'wa yi zɛzɛ "yitɛ "pɔ. "Ɛ zɛzɛ yi 'kpɔmale- kpɛnyee 'na 'ylime 'ɛ kɛ nɛ -kɛ 'bhɛle-, 'ɛ yi nɛ -kɛ 'nyakpa -ye Lagɔ -sɛ lɔbhɔ -wɛ 'nabhɛ 'kwlɛ bhlia-.

²³ 'E ligba- -kɛ 'anye -ɛ "kɛ yi -wɛ 'na weli, zaa, 'a 'luɔ- -se 'a ko kɛ 'lɔbhɔ.

'Nyɔkpɔ Yowli yi 'ce yi

²⁴ "Ɛ 'yli -wɛ "me 'nyakpa yi -kɛ 'gbape kpɛnyee, 'ɛyi -wɛ kɛ 'ple- "bhuɔ ne, ylo -ka "po, 'ce -ka le.

²⁵ -Zeli yi zɔ bhli "ne "nɔgɔ "me 'na -li 'klekle -ɛ kɛ "bhle -ko yi tɛtɛle-.

²⁶ "Ne 'a yi 'ce 'Nyɔkpɔ Yowli 'na yiyinɔ "nɔgɔjatlɛ "me 'ylime 'yele, 'ɔ -nyɛ 'ɔnɛɛ 'bhɛloɛ 'klekle -nyɛ 'ɔnɛɛ 'ŋlu "bhaa.

²⁷ 'Ɔ yi 'ce "nɔgɔzilia 'wɔ 'lebhe-, "ne 'ɔ yi 'ce 'ɔnɛɛ -ye 'ɔ -sɛ lɔbhɔ dodo ne "ku -dawli -mɔɔnɔ -wɛ dɛbhele 'wli "zole. Wa 'bhale kɔpɛ "ku, lili -kwlɛ "ku, 'yuku "ne 'beme.

Figesu 'na 'yli "me 'bhlealea weli

²⁸ «Figesu 'na "ku 'na weli -ye 'ɛ -sloa 'anye -wɛ, 'a 'no "me 'tee. Figesu 'na kpe kɛ mi -ku "ci, "ne 'ɛ kɛ 'bhoɔ, 'a yibhlele- sɛ -gbɔ 'ylobɛlele "ne -la dɛtlo.

²⁹ "Ɛ sɛbhele -wɛ, 'a kɛ -li -wɛ 'klekle 'ylime 'ye ne, 'a yibhlele- sɛ -gbɔ 'Nyɔkpɔ Yowli "ne -la dɛtlo, 'ɔ -ko 'anye nuɔ "ku.

³⁰ Gbɛklɛklɛ 'e bhulɛle lɛ 'anye, 'nyakpa ne 'na -zakpɛ -ka -na 'ple 'klekle, "ne "ɛ -li ne 'klekle "kɛ -lɔ 'yli 'wlole.

³¹ "Nɔgɔ -nyɛ dodo "bhaa yi 'ce "kubhiɛ, -mɔ, 'neɛ weli -ka 'ce "kubhiɛ.»

'A 'gɛle- 'ylime -se 'a ko lɔbhɔ!

³² «-Mɔ, "ɛ 'yli -wɛ -nyɛ 'gle -wɛ "bhaa, 'nyɔkpɔ "ne -kɛ -yi, "nɔgɔzilia, -wa -ko Lagɔ yɔko "ne -yi. Yu "ne -yi. 'Ɛ "mɔ -kɛ To 'ɔyikɔ -bholo -kpee yɔ.

³³ Zaa, 'a te -kɛ ŋɔŋo, -se 'a te -kɛ 'ayi "ku 'dlule-. "Naa-, 'a "ne -sɔɔdɛku 'ɛ "kɛ yi -wɛ -yi zɛ.

³⁴ Sɛgbɛɛ, 'nyɔkpɔ 'na -ɔ me 'lowlime "ne -ɔ tle 'ɔnɛɛ -bhudu 'ɔnɛɛ "kulɔbhɔnya yɔko, "ne 'ɔ 'joa -lɔ libhɔ kɔ -bholo -bholo, "ne 'ɔ bhulɛle -lɔ 'ɔnɛɛ -bhudu 'na "klokolenyɔ nɛɛ: 'Gɛle- -kɛ 'ylime.

³⁵ Zaa, 'anye 'klekle 'a 'gɛleme- -kɛ 'ylime, "naa-, 'a "ne -kɛ -bhudubhenyɔ 'na yi -zle -yi zɛ. -Mɔ, "kugbɛdeku yɛ -oo, zle -jijɛ "ku yɛ -oo, -dee 'nunu 'pɔle weli -wɛ yɛ -oo, zegbakpɔ "me yɛ -oo, 'a "ne -la 'sɛ -yi.

³⁶ 'Ɔ kɛ -kɛ 'anye 'vu-, 'ɔɔ te -kɛ 'lelee 'anye -gbliylɛ "me ylele-.

³⁷ 'Anye 'klekle 'ye 'e bhulɛle -lɔ nɛɛ: 'A 'gɛle- -kɛ 'ylime, -mɔ 'a te "kɛ 'ŋɔŋo.»