Malke 12 - Nouveau Testament bété de Gagnoa

'Lɛɛslunya 'na nunɛ.

¹ 'Ɛyi -wɛ "kɛ 'ple cuu ne, Zezu 'pɔle- -lɔ 'ɔnɛɛ gɛlenya nunɛ. 'Ɔ nɛɛ: «'Nyɔkpɔ -bholo -glo -lɔ vinyelɛɛ. 'Ɔ -gwe 'yli 'tee, 'ɔ 'sɔbhɔ- 'ɛnɛɛ kɔnimiledɛ, "ne 'ɔ 'sɔbhɔ- -lɔ -dee 'ɔ "kɛ 'nyegbe- "ne 'ɔ 'cɛ "klo 'kole- -wɛ. "Ne 'ɔ yi -lɔ libhɔnonya yɔko 'tle-. "Ne 'ɔ yi -lɔ -glɔ "ku me.

² 'Ɛnɛɛ -sɛ dɛku -ylɛ lɛ ne, 'ɔnɛɛ "kulɔbhɔnyɔ 'ye 'ɔ -lebhe -lɔ 'lɛɛslunya "ku -se 'wa "kɔ 'ɔnɛɛ dɛ kɔ 'je.

³ "Ɛ libhɔnonya 'sa- "ɛ "kulɔbhɔnyɔ kɔ "ne 'wa -bhoto "ne 'wa -kpotu, "ne 'wa "no -bɛɛ' kɔ 'je-.

⁴ 'Lɛɛbhenyɔ -lebhe 'ɔnɛɛ "kulɔbhɔnyɔ 'na -vinɔ. 'Lɛɛslunya 'lɔbhɔlo- 'wli "ne 'wa 'ylu-.

⁵ -Lɛɛbhenyɔ -lebhe 'lelee "kulɔbhɔnyɔ 'na tanɔ. 'Lɛɛslunya 'lɔbhɔ-, "ne 'ɔ "ku-. "Lɛɛbhenyɔ -lebhe 'lelee "kulɔbhɔnya 'na -bedia 'na 'kwleyia, 'lɛɛslunya 'sɛpɔ- -bedia "ne 'wa 'lɔbhɔ- -wawɛ "ne 'wa "ku-.

⁶ -Lɛɛbhenyɔ 'na -wawayu -bholo kpee -to nɛ -lɔ lɔbhɔ. 'Ɔ -lebho 'bebhiɛle dɛku "ɛ 'lɛɛslunya "ku "naa-, 'ɔ 'pɔ- 'dle nɛɛ: 'Wa yi 'neɛ yu 'plome "zo.

⁷ -Mɔ, sɛne "ɛ 'lɛɛslunya -wɛ bhulɛlebhulɛle -lɔ nɛɛ: -Ɔ "kɛ 'ɔnɛɛ 'gugbɛ "ku 'libhi ne lɛ! -A me! -A 'lɔbhɔ 'se, -se "ɛ 'gugbɛ -wɛ "kɛ -anye nɛ "zo

⁸ 'Wa libhi- "ɛ yu -wɛ "ku, 'wa 'lɔbhɔ-, "ne 'ɔ yi "ku, 'wa 'pɔ- 'ɔnɛɛ -gɛzɛ -pi keyi.

⁹ Zezu nɛɛ: -See "ɛ 'lɛɛbhenyɔ -wɛ "kɛ bhɔ "zo 'a? 'Ɔ yi yi, "ne 'ɔ "kɛ -lɔ 'lɛɛslunya -wɛ 'lɔbhɔ 'klekle. "Ne 'ɔ yi 'lɛɛ -vinya kɔ 'je.

¹⁰ 'A -zɛle -lalɛce welicibhɛ ne Lagɔbɔgɔ "me "me. 'Tiyi 'na -ye -bhudusɔbhɔnya 'pɔ- 'kwlɛ "me -wɛ, 'ɛɛ "zo- -da -lɔ -bhudu 'na jijɛtiyi.

¹¹ Anyinɛnyɔ Lagɔ -no -lɔ "ɛ -ɛwɛ 'klekle. -Bɛɛ' 'na -ɛ 'nɛne -anyɛɛ dɛku yɛ -lɔ.»

¹² Zufonya 'na "cifia tɛle 'awɔ -see 'wa "kɛ "zo "ne 'wa "kɛ Zezu 'sa -wɛ 'siɛ. "Naa-, 'wa -yibhlele nɛ sɛ -gbɔ nunɛ -ye 'ɔ pɔ- -wɛ 'wayi 'ye 'ɔ ga nɛ -lɔ. -Mɔ, 'wa 'gu nɛ -zakpɛ -gɛ za, 'wa 'tale- -lɔ Zezu 'yi "ne 'wa yi -lɔ me.

'Wa yi bhɔ 'Kamalenyɔ Sezale kɔ -lɛpo 'peɛle -a?

¹³ Zufonya 'na "cifia -lebhe faliziɛnya "ne Elode 'na keyikonya Zezu "ku, 'wa "kɔ "me 'bea- zɛ.

¹⁴ Ŋwɛnɛɛ: «Slonyɔ, -a -yi sɛ -gbɔ -e bhulɛ gbaa "ne -e "ne 'gu 'nyɔkpɔ -gɛ "ne -e "ne 'wolo- 'nyɔkpɔ 'na kosɛ "ku. Gbɛklɛklɛ 'ye -e sloa -lɔ -ye Lagɔ -no -gbɔ -a no -wɛ, "nyɛ -anye 'de: -A yi bhɔ -lɛpo 'peɛle 'Kamalenyɔ Sezale kɔ? -Mɔ, -a -cɛ bhɔ 'peɛle?»

¹⁵ -Mɔ Zezu -yibhlele sɛ -gbɔ 'nyakpa -gbeyia 'waa -lɔ. 'Ɔ nɛɛ: «Sɔɔbɛɛza, 'a 'bea bhɔ -ame "me -tia? 'A tua- -ame 'tamayɛ 'ylime.»

¹⁶ 'Wa -tua Zezu 'tamayɛ 'ylime. 'Ɔ nɛɛ: «"Ɛ 'tamayɛ ne -nyɔ 'na 'wli -ko bhɔ "klo, "ne -nyɔ 'na 'tɔ 'wa kɛle- bhɔ "klo?» Ŋwɛnɛɛ: «"Naa-, 'Kamalenyɔ Sezale yɔ -lɔ.»

¹⁷ Zezu nɛɛ: «-Ɛ -noɔ 'Kamalenyɔ Sezale -nɛ yɛ -wɛ, 'a 'je Sezale kɔ. -Ɛ -noɔ Lagɔ -nɛ yɛ -wɛ 'a 'je Lagɔ kɔ.» "Ɛ welicibhɛ -wɛ -soa 'awɔ geji "ku 'klekle.

-Glukonya yi bhɔ 'glɔ- 'a?

¹⁸ Saduseɛnya -wa "ne gluzɔwloɛ 'dleku -kɛ -wɛ -yi -lɔ Zezu lo 'yɔbhɔ ka.

¹⁹ Slonyɔ, Moyize kɛle- gbagbɛ -anyɛɛ za: «'Widi -nyɛ 'ŋɔnɔ "bhaa kɛ 'sue -plɛ, "ne 'wa "mɔ yu -gwɛle "ne 'widi kɛ "ku-, 'ɔ "nɔwli 'libhi- 'ɔnɛɛ 'kwiziŋɔnɔ "ku -se 'ɔ "kɔ 'beme "zo.

²⁰ 'A -gɛ 'yli, "nowlia gbɔsɔ -ko -lɔ doɔ. Tɛtɛnɔ -kwɔ 'awɔ 'ŋɔnɔ. 'Ɔ "ne yu -gwɛle "ne 'ɔ yi -lɔ "ku.

²¹ "Sɔnɔ libhi- "ɛ kwiziŋɔnɔ "ku. 'Ɔ "ne yu -yle "ne 'ɔ yi -lɔ "ku. Tanɔ "ku -me 'lelee "ɛ soɔ.

²² "Ɛ -bhele -wɛ -yle -me 'lelee -wa -to lɔbhɔ -wɛ. 'Wa "ku- gbɔsɔ -kpɔ "ne 'wa "ne yu -tle, "ne "ɛ 'ŋɔnɔ -wɛ "ku- -me 'lelee.

²³ Zaa, -glukonya kɛ 'ce glu zɔ 'wlo- ne, -nyɔ 'na 'ŋɔnɔ 'ɔ "kɛ bhɔ "zo 'a? "Naa-, 'wayi gbɔsɔ -kpɔ "zo- -kɛ 'ɔnɛɛ 'widia 'klekle zɛ.»

²⁴ "Ne Zezu yua -lɔ bhulɛle- nɛɛ: «'Kwlɛ 'ye 'a bhli -kɛ -lɔ, sɛko -wɛ, 'a "ne Lagɔbɔgo "me 'na -ɛ kɛleɔ- "bhle -wɛ "ne Lagɔ 'na 'bhɛloɛ -yi.

²⁵ -Glukonya "kɛ 'ce gluzɔ 'wlo- ne, 'widi -nyɛ 'ŋɔnɔ "bhaa 'wa -ka -la 'kwɔkwɔle-. -Mɔ, 'wa yi 'ce "nɔgɔzilia 'nasɛ ko "nɔgɔ "me.

²⁶ 'Nyakpa -wa "kɛ gluzɔ 'wlo -wɛ 'na dɛku, 'a "ne bhɔ Moyize 'na "bɔgo "me -zɛle, 'ɛ bhulɛ 'gbagbe -ɛ diɔ- 'awɔ 'yli -wɛ 'na weli. Lɔbhɔ Lagɔ bhulɛle -lɔ Moyize nɛɛ: 'Mɔɔ -noɔ -lɔ Ablame 'na Lagɔ yɔ, Izake 'na Lagɔ yɔ, Zakɔbo 'na Lagɔ yɔ.

²⁷ Lagɔ "ne 'kwia 'na Lagɔ yɔ. -Mɔ, -yɛyɛnya 'na Lagɔ yɔ -lɔ. -Ye 'a bhulɛ doɔ -wɛ 'gbi 'ye 'a 'to -lɔ.»

-Ɛ -noɔ bhɔ -gbagbɛ 'na "yitɛ yɛ?

²⁸ -Lɔslonyɔ -bholo -fo -moa 'yukwli. 'Ɔ -gɛ 'yli -gbɔ Zezu -bhulɛ 'tee "ɛ Saduseɛnya -wɛ. 'Ɔ 'nyiɔ- Zezu yɔko. 'Ɔ nɛɛ: «Gbagbɛ 'klekle 'glɛme -na -ɛ 'kpɔ- bhɔ -tia?»

²⁹ Zezu nɛɛ: «Gbagbɛ 'glɛme 'na -ɛ 'kpɔ- ne lɛ: Izlayɛleyua, 'a 'fo 'yukwli, Anyinɛnyɔ 'anyɛɛ Lagɔ -yle -bholo -kpee.

³⁰ Wamale- Anyinɛnyɔ -neɛ' Lagɔ, -neɛ' 'dlezɔ, -neɛ' zikpɛ 'klekle "me, -neɛ' 'dlepɔsɛ 'klekle "bhaa -nyɛ -neɛ' 'kwɛme tamaleɛ 'klekle "bhaa.

³¹ Gbagbɛ 'na "sɔnɛ ne lɛ: Wamale- -eluyu -see -e -wa -eyi -wɛ. -Ɛɛ 'kpɔ- lɛ "ne -ɛ -zi lɛ gbagbɛ "sɔ -wɛ "ku "ne -la -le.»

³² -Lɔslonyɔ nɛɛ: «Anyinɛnyɔ -ye -e -bhulɛ -wɛ 'diɛɛ yɛ -lɔ. Anyinɛnyɔ -noɔ -lɔ Lagɔ -bholo -kpee yɔ, Lagɔ 'na -vinɔ "ne -la -le 'ɔ "mɔ 'ɔyi yɔ.

³³ Lagɔ 'na 'dlezɔ 'na wamaleɛ, "nanoɛ 'klekle "me, kwɛ "metamaleɛ "me, -se -eluyu 'na wamaleɛ -see -e -wa -eyi -wɛ, 'ɛ zi bɔbɔli 'klekle -ye 'wa 'siɛ "ne bɔbɔli 'na -vinɛ -wɛ 'wɔ "ku.»

³⁴ Zezu -gɛ 'yli -gbɔ -Lɔslonyɔ -bhulɛ 'tee. 'Ɔ nɛɛ: «-E "ne "nɔgɔ "me 'na 'Kamalezikpɛ 'dɛ 'tlole-.» 'Nyɔkpɔ "ne 'yɔbhɔ nɛ -da lo.

Ŋwɛnɛŋwɛnɛyu "ne Davide

³⁵ Zezu -sloale nɛ "Mebɔbɔlebhudu "me "ne 'ɔ 'yɔbhɔ nɛ -lɔ sɛne lo nɛɛ: «Sɔɔbɛɛza -Lɔsloanya no bhɔ -gbɔ Klise, Davide 'na yu yɔ 'a?

³⁶ Davide 'nabhɛ, Zuzu Wlewle -ko "me 'na -ye 'ɔ -bhulɛ ne lɛ: Anyinɛnyɔ -bhulɛle Anyinɛnyɔ: Yi -se 'gli- 'neɛ lilikwlɛ -gbɔsɔ "ku. -Se 'e "kɛ -neɛ' -gblenya -eyi bhɔzɔ "zo "bhuɔ.

³⁷ 'Ɔyi Davide 'nabhɛ lɔ- Anyinɛnyɔ, sɔɔbɛɛza 'ɔ "kɛ bhɔ 'lelee Davide 'na yu "zo 'a?» 'Nyakpa -kwleyia 'fo nɛ Zezu 'yukwli 'ŋwɛnɛ "me.

'A te -Lɔsloanya 'na -li no

³⁸ Zezu 'na sloaweli "me, 'ɔ nɛɛ: «'A 'luɔ- -kɛ, 'a te 'ce -Lɔsloanya 'na -li no! 'Wawɛ, 'wa -wa 'nyakpa 'na 'ylikunɔŋoɛ 'wanɛɛ "koti -glɛgbɛ "bhaa, -glɔ kɛ "bhle -bhiɛ, ŋwɛnɛɛ 'wa 'bhɛloa "ɛ 'digbɛ -wɛ "me.

³⁹ "Mebhubhɔlebhudu "me, 'waa- 'gli- -lɔ 'yuku. Lilɛlidɛ "me 'waa- -gɛ -lɔ 'yuku.

⁴⁰ 'Wa -sɛ 'kwiziŋwenea 'lɛɛ "me. 'Wanɛɛ bhubhɔweli 'tloma "me kpɛnyee, -ɛwɛza, 'gbobhle dɛku kɛ 'ce -yi, 'wa -nɛ yi 'ce "me "tamale- kpɛnyee.»

'Kwiziŋɔnɔ 'na "nyɛzenɔ

⁴¹ Zezu -nyɛ 'ɔnɛɛ gɛlenya "bhaa -ko "Mebɔbɔlebhudu "me. Zezu 'gli- -dɔkɔ -mee 'wa 'piɛ 'dlasi -wɛ 'yliku "ne 'ɔ 'wolo -lɔ -see 'nyakpa 'piɛ "bhle 'dlasi -wɛ "ku. -Klɔgbɔnya -kwleyia 'piɛ nɛ 'dlasi 'na 'gbo 'cesu "me.

⁴² "Ne 'nyɛze 'kwiziŋɔnɔ -bholo yi -lɔ yi "ne 'ɔ yi -lɔ 'tamayɛ "sɔ -ɛ -bhli lɛ 'taga -bholo 'cesu "me 'piɛ.

⁴³ Zezu la 'ɔnɛɛ gɛlenya "ne 'ɔ -bhulɛloa -lɔ nɛɛ: «'A -gɛ 'yli! Gbɛklɛklɛ 'ye 'e bhulɛle lɛ 'anye, 'nyɛze 'kwiziŋɔnɔ 'na -ye 'ɔ 'piɛ- -dɔkɔ "me -zu "ne 'ɛ -zi 'wawɛ 'klekle -nɛ "ku.

⁴⁴ 'Wayi, 'dlasi -ɛ "noa 'yliku -bɛɛ' -noɔ -wɛ, 'wa "zo- -lɔ -dɔkɔ "me. -Mɔ, 'ɔyi -ye 'ɔ -kɛ gou "ne 'ɔ "kɛ nɛ li -wɛ 'ye 'ɔ "zo- -lɔ -dɔkɔ "me.»