Malke 1 - Nouveau Testament bété de Gagnoa

Zaa Batise 'na bhulɛweli

¹ Dɛne Lagɔ Yowli Zezu Kli 'na 'Denaade 'cile lɛ "ku.

² Weli -ye 'wa 'kɛle- "guɔkwɔmenyɔ Ezayi 'na "bɔgo "me ne lɛ: «-Ame Lagɔ, 'e yi 'neɛ lebhelebhleyu -eyi 'yuku 'gelia-, -se 'ɔ "kɛ -gwe 'na -ye -e "kɛ bhli -wɛ -sɛ.

³ 'Nyɔkpɔ -bholo 'kpale 'kɔsɛku "me, 'ɔ nɛɛ: 'A -sɛ Anyinɛnyɔ 'na -gwe, -se 'a 'jeɛ- -kɛ 'wli gbii.»

⁴ Sɔbhɔ "ku 'ye Zaa Batise -me -lɔ 'kɔsɛku weli 'pɔle -ka, 'ɔ nɛɛ: «'A 'bhelia- 'anyɛɛ kosɛ -nyɛnye -wɛ kɔ. 'A yle batɛme -se Lagɔ "kɛ 'anyɛɛ 'nyinyonoli 'na gbo 'yi 'tale-.»

⁵ "Ne 'nyakpa 'bhale 'awɔ Zeluzalɛme, Zude "ne Zludɛbɔ 'na moɔ 'klekle, "ne 'wa yi 'awɔ -lɔ Zaa yɔko. "Ne 'wa sɛ 'awɔ -lɔ 'wanɛɛ 'nyinyonoli 'na 'de, "ne Zaa 'nyoa 'awɔ -lɔ batɛme Zludɛbɔ "me.

⁶ Zaa 'pɔ- 'awɔ samo ŋɛne -lokwi "ku. 'Ɔ -bhlele nɛmɛku -bɛto "mene. 'Kpakpaa -nyɛ lɔgwea kpe "bhaa 'ye 'ɔ li 'awɔ -lɔ.

⁷ -See 'ɔ 'pɔ weli ne lɛ: «'Nyɔkpɔ -bholo 'bhale -ame 'beme, 'ɔ 'kpɔ -kakaka "ne 'ɔ -zi -ame "ku. 'E "ne -kɛ 'bhɛle- -see 'e "kɛ "ku 'kwlile- -se 'e "kɛ 'ɔnɛɛ -kpɔklo 'na "lu vulu-.

⁸ -Ame, 'e "nyɛle 'anye batɛme 'ŋu 'nu, -mɔ, 'ɔyi Zuzu Wlewle "me 'ye 'ɔ "kɛ -lɔ 'anye batɛme "nyɛle.»

Zaa Batise 'nyɛ- Zezu batɛme

⁹ 'Ɛ dɛ -wɛ "ku, Zezu 'bha- Galile-glɔ "me 'na 'du -ye 'wa la Nazalɛte -wɛ "ne Zaa yu -lɔ Zludɛbɔ "me batɛme 'nyɛle.

¹⁰ -Sɔɔdɛku Zezu -ko 'ŋu "me 'bha- dɛku -wɛ, 'ɔ 'na 'wolo-, "nɔgɔ "me 'diɔ- nuɔ "ne Zuzu Wlewle 'bhale "bhle sɛgbɛɛ -kobhlele, "ne 'ɔ yu -lɔ "ku 'kwlile-.

¹¹ "Ne weli yi -lɔ "nɔgɔ "me 'bhale-, 'ɛ nɛɛ: «'Neɛ -wawayu 'ye -e -noɔ -lɔ. -Eyi 'ye 'e -sɛ -lɔ 'ŋwɛnɛsɛ "ku lɔbhɔ.»

Sata 'bea- Zezu "me 'kɔsɛku

¹² Cuu, Lagɔzuzu -su Zezu "ne 'ɔ yu -lɔ 'kɔsɛku kɔme-.

¹³ 'Ɔ -sɛ 'yli -glo "sɔ 'kɔsɛku, "ne Sata yu -lɔ "me -bea -ka yi. 'Ɔ -ko 'awɔ 'kwlɛ 'nɛmea 'glɛme "ne "nɔgɔzilia lɔbhɔ 'awɔ -lɔ "ku.

Zezu ci- 'ɔnɛɛ libhɔ "ku

¹⁴ 'Wa "kɛ Zaa Batise -jiɛ "me "pɔ "bhuɔ ne, Zezu -sɔ "ku "ne 'ɔ yi -lɔ Lagɔ 'na 'Denaade Galile -sɛle -ka me.

¹⁵ 'Ɔ nɛɛ: «Zle -ylɛ -kɛ lɔbhɔ "bhuɔ, "ne Lagɔ 'na 'Kamalezikpɛ "ne -la 'anye dɛ tlole-. 'A 'bhelia- 'anyɛɛ kosɛ kɔ, -se 'a 'kɛle- Lagɔ 'na 'Denaade 'dleku.»

Zezu la- 'ɔnɛɛ gɛlenya 'na tɛtɛnoa

¹⁶ Zezu 'nɔŋo- Galile 'na 'ŋu "yitɛ yɔko, "ne 'ɔ yi -lɔ Simɔ "ne 'ɔ "nɔwli Adle "bhaa 'ylime 'ye, 'wa -ko nɛ 'sokwli 'ŋu "yitɛ "me "pɔ dɛku. "Naa-, 'ŋudɔnya 'waa nɛ -lɔ zɛ

¹⁷ "Ne 'ɔ yua -lɔ bhulɛle- nɛɛ: «'A yi, -se 'a gɛle- -ame, -se 'e "kɛ gbɔ -se 'a "kɛ -ame 'nyakpa lo lale-.»

¹⁸ "Ɛ doɔ cuu, 'wa 'bha- 'wanɛɛ 'sokwli yɔko, "ne 'wa yu -lɔ gɛlele-.

¹⁹ 'Ɔ "kɛ 'bho -sɛ 'tekeyi ne, 'ɔ 'na 'wolo Zake "ne Zaa, Zebede yowlia. 'Wa -ko gɔlo "me 'wanɛɛ 'sokwli 'wli 'jijalea- dɛku.

²⁰ Zezu "koa la cuu ne, 'wa -tle 'wa 'to Zebede gɔlo "me 'ɔnɛɛ libhɔnonya "bhaa. "Ne 'wa yi -lɔ Zezu gɛlele-.

Zezu -yamalea 'nyɔkpɔ -ye Zuzu -nyɛnye -ko keyi -wɛ

²¹ Lɔbhɔ 'ye Zezu -nyɛ 'ɔnɛɛ gɛlenya "bhaa, 'wa yi -lɔ 'du -ye 'wa la Kafanaɔme -wɛ yi. -Gbajɛzle yɛ 'awɔ -lɔ, "ne 'ɔ yi -lɔ "mebhubhɔlebhudu "me Lagɔweli 'sloa- -ka me.

²² 'Ɔnɛɛ sloasɛ sɛ 'awɔ -wa -fo 'yukwli -wɛ geji "ku. "Naa-, 'kamalea sɛku 'ye 'ɔ sloa nɛ -lɔ, 'ɔ "ne sloa nɛ sɛgbɛɛ -Lɔsloanya.

²³ 'Ɛ dɛ -wɛ "ku 'wanɛɛ "mebhubhɔlebhudu -wɛ "me 'nyɔkpɔ -ye zuzu -nyɛnye -ko keyi -wɛ "kpa- -lɔ "me "yitɛ "ku. 'Ɔ nɛɛ:

²⁴ «Nazalɛte 'na Zezu, -ye -e 'yɔbhɔle bhɔ -anye "me -tia 'a? -E "kɛ -anye "kwlɛ 'bhilia- zaa -e -yi bha? -Ame, 'e -yi "neɛmɔ -ye -e -noɔ: Lagɔ 'na lebhelebhleyu -ɔ -ko 'Wlewle 'ye -e -noɔ -lɔ.»

²⁵ "Ne Zezu yi -lɔ "ɛ Zuzu -nyɛnye -wɛ 'nuɔ "ku bhli, 'ɔ nɛɛ: «'Tli- doɔ "ku, -se 'bha- 'nyɔkpɔ ne keyi!»

²⁶ Zuzu -nyɛnye -zuzuɔ 'kpokposɛ "me, "ne 'ɔ yi -lɔ "me 'kpa, "ne 'ɔ yu -lɔ keyi 'bha-.

²⁷ "Ne 'wliku tluɔ 'awɔ 'nyakpa 'klekle, "ne 'wa 'yɔbhɔyɔbhɔle- 'awɔ -lɔ lo nɛɛ: «-Sɔɔbɛɛ yɛ "ɛ 'ɛyi -wɛ! Sloasɛ -lele yɛ -kɛ 'ce -lɔ ɛɛ! 'Ɔ bhulɛ 'kamalesɛ! 'Ɔ bhulɛle zuzu -nyɛnyea 'nabhɛ "ne 'wa "zo 'plome.»

²⁸ Cuu ne, Zezu 'na 'tɔ -ŋwɛne Galile 'na -glɔ 'klekle "ku.

Zezu -yamalea Piɛle 'na 'wɔtɔŋɔnɔ

²⁹ Zezu "kɛ "mebhubhɔlebhudu "me zɔ 'wlo ne, Simɔ -nyɛ Adle "bhaa 'na sueme 'ye 'ɔ -me -lɔ. Zake -nyɛ Zaa "bhaa 'wa 'kwɛlo nɛ -gweku.

³⁰ Simɔ 'na 'wɔtɔŋɔnɔ pe- nɛ -duku, 'ɔnɛɛ ku gbɛtɛ nɛ kpɛnyee, "ne 'wa yi -lɔ 'ɔnɛɛ za Zezu bhulɛle- cuu.

³¹ "Ne Zezu yu -lɔ yɔko 'nyiɔ-, "ne 'ɔ yu -lɔ 'sɔ 'sale, "ne 'ɔ yu -lɔ 'wli "ku 'libhi-. "Ne 'ɔnɛɛ ku yi -lɔ "ku wɔtɔ-. "Ne 'ɔ yua -lɔ "ku lɔbhɔ-.

Zezu -yamalea 'gwizinya 'na 'kwleyia

³² Kugbedɛku, ylo -bhli lɛ "bhuɔ ne, 'wa -nɛme Zezu 'gwizinya "ne 'nyakpa 'na -ye zuzu -nyɛnyea -ko keyi -wɛ.

³³ 'Ɛnɛɛ 'ylime za, "ɛ zoku -wɛ 'na 'nyakpa 'klekle yi -lɔ -bhudu -gbanuɛ "ku 'wli 'yɔbhɔle -ka.

³⁴ Zezu -yamalea 'gwizinya -kwleyia 'na -ye gu 'klekle 'lɔbhɔ -wɛ, "ne 'ɔ -kpeti -me 'lelee zuzu -nyɛnyea 'na 'kwleyia. 'Ɔ "ne 'taloa- yi "ne 'wa "kɛ 'gbo 'di, "naa-, 'wa -yi sɔɔnyɔ 'ye 'ɔ -noɔ zɛ.

Zezu -bli Galile 'na -glɔ "ne 'ɔ -sɛle "bhle 'Denaade

³⁵ Zle -ze -dɛku, 'titiɛ -ko -namlɛ dodo "ku "ne Zezu yi -lɔ -bhudu "me zɔ 'wlo, "ne 'ɔ yi -lɔ 'kɔsɛku bhubhɔle- -ka me.

³⁶ "Ne Simɔ -nyɛ 'ɔlua "bhaa, 'wa yi -lɔ 'ɔnɛɛ kodɛ 'siɛ tɛle- -ka me.

³⁷ 'Wa "kɔ yle ne, ŋwɛnɛɛ: «'Nyakpa 'klekle bli -neɛ' za "ku.»

³⁸ "Ne Zezu yua -lɔ sɛne bhulɛle- nɛɛ: «-A -ya 'bha- dɛ, -se -a me 'du 'na -vidɛ. -Se 'e "kɛ 'lelee "bhle -ce Lagɔweli 'sloale-, "naa-, 'ɛza 'ye 'e -yi -lɔ zɛ.»

³⁹ -Ɛwɛza Zezu bli 'awɔ -lɔ Galile 'na -glɔ -wɛ 'klekle "ne 'ɔ sɛle 'awɔ -lɔ 'Denaade 'wanɛɛ "mebhubhɔlebhudu "me, "ne 'ɔ 'kpeti me 'awɔ -lɔ zuzu -nyɛnyea.

Zezu -yamalea 'zlɛlɔbhɔnyɔ

⁴⁰ 'Zlɛlɔbhɔnyɔ 'nyiɔ- Zezu yɔko, "ne 'ɔ yu -lɔ bhubhɔ-, 'ɔ "pɔlo -kokomini 'yliku. 'Ɔ nɛɛ: «Anyinɛnyɔ, -e 'cɛ 'yɔbhɔ ne, -e 'bhɛle- -e "kɛ -ame 'wlele "zoa-.»

⁴¹ "Ne 'nyɛze yi -lɔ Zezu "lɔbhɔ, "ne 'ɔ yi -lɔ sɔ "me glo-, "ne 'ɔ yu -lɔ 'kwlɛ libhi, "ne 'ɔ yu -lɔ bhulɛle- nɛɛ: «'E 'yɛbhɛ, plɛ 'wlele.»

⁴² "Ɛ doɔ cuu, "ɛ 'nyɔkpɔ 'na 'zlɛ -bhiɛ. "Ne 'ɔ yi -lɔ yamale-.

⁴³ Zezu -sɔbhɔ 'wli "ne 'ɔ yu -lɔ "kugbɛtɛleɛ "me kɔ 'titli- nɛɛ

⁴⁴ «'Luɔ- -kɛ, te -kɛ 'nyɔkpɔ 'de -sɛle. -Mɔ, me -e "kɛ -eyi bɔbɔnyɔ 'ylime tuɔ-. "Ne bɔbɔli -ye Moyize no -gbɔ 'wa -sɛ -wɛ, 'wlɛ-. -Se 'nyakpa "kɛ sɛ yibhlele- -gbɔ -e -yamale 'diɛɛ.»

⁴⁵ -Mɔ, "ɛ 'nyɔkpɔ -wɛ "kɛ Zezu yɔko 'bha- ne, "ɛ 'de -wɛ 'ye 'ɔ -me -lɔ moɔ 'klekle ŋwenia- -ka. -Ɛwɛza, Zezu kɛ -la -glɔ "ku -me ne, 'ɔ "ne plɛ -la 'nyakpa 'yliku 'du "me, -mɔ, 'kɔsɛku 'ye 'ɔ "neni -lɔ. 'Nyakpa 'bhale -da moɔ 'klekle "ne 'wa 'mo -lɔ lɔbhɔ ylele- -ka.