Luke 8 - Nouveau Testament bété de Gagnoa

'Ŋwenea -wa -ko me nɛ Zezu 'na gɛlenya 'na -zakpɛ "me -wɛ

¹ 'Ɛwɛ 'ple- lɛ "bhuɔ ne, Zezu me 'awɔ 'du "yitɛ "ne 'du 'tekeyi -wɛ 'wɔ "ku, "ne 'ɔ sɛle 'awɔ -lɔ Lagɔ 'na 'Kamalezikpɛ "me 'na 'Denaade. 'Ɔnɛɛ gɛlenya kogbɔ "sɔ

² -nyɛ 'ŋwenea -ye 'ɔ yamalea- 'awɔ "ne 'ɔ -soa 'awɔ zuzu -nyɛnyea keyi -wɛ -gɛlelo 'awɔ: Magedala 'na Mali, -ye zuzu -nyɛnyea -gbɔsɔ 'bha- 'awɔ keyi -wɛ.

³ Elode 'na "kulɔbhɔnyɔ Kuza "nɔŋɔ Zane, Sizane "ne -bedia -wa kwɛlo mo 'awɔ -wɛ.

Gloglonyɔ 'na nunɛ

⁴ Zakpɛ 'na "yitɛ "zo- 'wli "ne 'du 'klekle "ku 'na 'konya 'yli -lɔ Zezu lo, "ne 'ɔ yua -lɔ nunɛ 'pɔle nɛɛ:

⁵ «'Gloglonyɔ 'wlo- zɔ -se 'ɔ "kɛ 'glo -ka me, 'ɔ -ko 'awɔ glo dɛku, 'yo 'na -bedi slu- -gwe yɔko, 'wa 'nyɛze "ku "ne "nɔgɔ "me 'na 'zea -li 'klekle.

⁶ 'Ɛnɛɛ -bedi -bhli 'kpɛslɛ "klo, 'ɛ 'gba- "ne 'ɛ yi yɛ, "naa- lɔbhɔ "ne -wɔtɔ zɛ.

⁷ 'Ɛnɛɛ -bedi -bhli -kpɛcɛ -jijɛ "ku, 'ɛ -nyɛ -kpɛcɛ 'wɔ "bhaa 'bhoɔle- 'gɔme "ne kpɛcɛ 'yi -lɔ 'nyɔŋ "ku zia-.

⁸ "Ne 'ɛnɛɛ -bedi 'na -ɛ -bhli 'dodo 'na -dodo "ku -wɛ, 'ɛ 'wlo- zɔ "ne 'ɛ -tlo 'wlɛ 'na -kwleyi.» "Ne Zezu yi -lɔ "me 'kpa "yitɛ "ku, 'ɔ nɛɛ: «-Ɔ kɛ 'yukwli -kɛ, 'ɔ 'no -kɛ "me.»

Sɔɔbɛɛza Zezu kɛ bhulɛ "ne 'ɔ 'pɔ bhɔ nunɛ

⁹ 'Ɔnɛɛ gɛlenya 'yɔbhɔ -lɔ lo nɛɛ: «-See "ɛ nunɛ -wɛ sɛ bhɔ zɔ.»

¹⁰ Zezu nɛɛ: 'Anye 'wa -slo -lɔ Lagɔ 'na 'Kamalezikpɛ "me 'na diɛweli -wɛ, -mɔ, 'wanɛɛ -wawɛ 'bhe- -lɔ nunɛ, "naa-, 'wa wlo 'siɛ, -mɔ, 'wa "ne -bɛɛ' 'yli -gɛ, 'wa no gbo, -mɔ, 'wa "ne -bɛɛ' "me -nyini.

Zezu sɛ 'gloglonyɔ 'na nunɛ zɔ

¹¹ Sɛne "ɛ nunɛ ne sɛ -lɔ zɔ: -Ɛ gloɔ- -wɛ, Lagɔweli yɛ -lɔ.

¹² 'Wanɛɛ -wa -ko -gwe 'yukwli -zɔ -wɛ, 'nyakpa 'na -wa 'no- "me, "ne Sata -yi, "ne 'ɔ -soa Lagɔ 'na weli 'dlezɔ -se 'wa te -kɛ 'dleku kɛle- -se 'wa te -kɛ "pɔ -wɛ 'waa -lɔ.

¹³ 'Ɛnɛɛ -ɛ -bhli 'kpɛslɛ "klo -wɛ, -wa 'no- Lagɔweli "me "ne 'wa 'sɛ- kɔ 'ŋwɛnɛsɛ 'waa -lɔ. -Mɔ, 'wa "ne -kpulu zɔ -ko, zaa, 'wa -kɛle 'dleku 'tekeyi, -mɔ, "mebeɛ kɛ -la lɔbhɔ -ylɛ ne, keyi 'wa gɛlɛ -lɔ.

¹⁴ 'Ɛnɛɛ -ɛ -bhli -kpɛcɛ -jijɛ "ku -wɛ, -wa 'no- Lagɔ 'na weli "me "ne -wa 'pɔ zikpɛ "ku 'na -li 'klekle "ku 'dle sɛgbɛɛ -klɔgbɔ "ne zikpɛ "ku 'na 'ŋwanali 'na 'dletɛleɛ gbɔ "ne 'wa "ne tlo bhi.

¹⁵ 'Ɛnɛɛ -ɛ -bhli dodo "namanɔ "ku -wɛ, 'naa -wa 'no- Lagɔ 'na weli "me 'dle "namanɔ kɔ "ne -wa -sule 'wayi "me -wɛ, 'waa- "kɛ -lɔ bhi tlo 'dlekutamaleɛ "me.

Napɛ 'na nunɛ

¹⁶ 'Wa "ne 'di -la 'napɛ 'yli, "ne 'wa 'cɛ nyidɛ 'wlime 'gbli, "ne 'wa 'cɛ -gbɔɔto zɔ "zo. -Mɔ, "nɔgɔ "ku 'wa 'glɛ -lɔ, -se -wa plɛ "bhle -wɛ "kɛ zle 'ylime 'ye.

¹⁷ "Naa-, sɛko -wɛ, -ɛ -ko 'diɛɛ "me "ne -ɛ -ka zle "ku sibhɔ, 'ɛ "ne -kɛ -le. -Ɛ zizɔ- "ku "ne 'ɛ -ka "ku 'wale -sɔ "ne -le.

¹⁸ 'A "luɔle- -kɛ -anyɛɛ 'yukwli 'fo -sɛ "ku, "naa-, sɛko -wɛ, -ɔ kɛ -wɛ, 'wa yu "nyɛ, "ne -ɔ "ne -kɛ -wɛ, 'tekeyi 'na -ye 'ɔ kɛ nɛ -kɛ, 'wa yu kɔ -sɛ.

Zezu "ne 'ɔnɛɛ -gligbɛnya gbaa

¹⁹ 'Ɔ "nɔ "ne 'ɔ "nowlia 'wa -me 'awɔ Zezu yɔko -mɔ, 'wa "ne 'bhɛle- 'wa "kɔ 'awɔ "ku 'wlo 'nyakpa 'na zinɔ -za.

²⁰ "Ne 'wa yu -lɔ bhulɛle- nɛɛ: «-E "nɔ "ne -e "nowlia wole- -eyi zikpoku, 'wa "kɛ -eyi 'ylime 'ye.»

²¹ "Ne 'ɔ yua -lɔ bhulɛle- nɛɛ: «-Ame "nɔ "ne -ame "nowlia, -wa 'fo Lagɔ 'na bhulɛweli 'yukwli "ne 'wa -sule 'wayi "me -wɛ -noɔ -lɔ -ame "nɔ "ne -ame "nowlia 'waa.»

Zezu 'nyegbea- gu -pepe

²² 'Yli -bholo "me Zezu -nyɛ 'ɔnɛɛ gɛlenya "bhaa 'wa gblɛ- gɔlo "me, "ne 'ɔ yua -lɔ bhulɛle- nɛɛ: «-A me pɛ 'na -ɛce "ku!» "Ne 'wa yi -lɔ me.

²³ -Sɔɔdɛku 'wa -ko me dɛku -wɛ "ne Zezu yi -lɔ 'ŋɔŋo. "Ne gu -pepe yua -lɔ "ɛ 'ŋu -wɛ 'klo ylele-, "ne gɔlo yi -lɔ 'ŋu ku 'yiɛ. 'Wa -ko 'tekeyi 'wa "kɛ "ku.

²⁴ "Ne 'wa yu -lɔ yɔko 'nyiɔ-, "ne 'wa yu -lɔ golia-. Ŋwɛnɛɛ: «"Bhenyɔ, "Bhenyɔ 'a ku -kɛ 'se ɛɛ?» "Ne 'ɔ yi -lɔ glɔ-, "ne 'ɔ yi -lɔ 'ŋu -nyɛ -pepe "bhaa "ku 'gbɔtɔle-, "ne 'ɛ yi -lɔ "ku tli "ne lɔbhɔ yi -lɔ plɛ vlee.

²⁵ "Ne 'ɔ yua -lɔ sɛne bhulɛle- nɛɛ: «'Anyɛɛ 'dlekukɛleɛ -dee 'ɛ -ko bhɔ?» "Nyanɔ 'lɔbhɔa, "ne 'wa lɛ -lɔ sɛne 'wayi 'glɛme nɛɛ: «sɔɔnyɔ yɔ bhɔ "ne -pepe -nyɛ jinyɛ "bhaa "zo bhɔ 'plome 'a?»

Zezu -yamalea 'nyɔkpɔ -ye zuzu -nyɛnye -ko keyi -wɛ

²⁶ Zezu -nyɛ 'ɔnɛɛ gɛlenya "bhaa -ylɛ Zelazeniɛnya 'na -glɔ -ɛ -ko Galile 'yliku -wɛ "me.

²⁷ 'Ɔ -ko zɔ -sibhɔ dɛku, "ɛ 'du -wɛ "me 'na 'nyɔkpɔ -bholo -ye zuzu -nyɛnyea -ko keyi -wɛ yu -lɔ 'sibhɔle- -ka yi. Lɔbhɔ -gwlɛ "me 'ye 'ɔ "ne 'pla- 'koti "me "ne 'ɔ "ne ko -bhudu "me, -mɔ, -biɛ "me 'ye 'ɔ go -lɔ.

²⁸ 'Ɔ 'ye- lɛ Zezu 'ylime ne, "ne 'ɔ yu -lɔ 'kɔkɔmini 'dle "me 'pɔle, "ne 'ɔ yi -lɔ "me 'kpa "yitɛ "ku: «-Ye -e 'yɔbhɔle bhɔ -ame "me 'a Zezu, Lagɔ -ɔ zi "ku 'na yu. 'E bhubhɔ -eyi, te -kɛ -ame "kwlɛ bhlia-.»

²⁹ "Ne Zezu yi -lɔ "ɛ zuzu -nyɛnye -wɛ bhulɛle- nɛɛ: 'Bha- "ɛ 'nyɔkpɔ -wɛ keyi, "naa-, zuzu -nyɛnye -ko keyi za 'wa -gwalo 'gɔgɔ nu, "ne 'wa "zo -lɔ gbu "me, -mɔ, "me 'ye 'ɔ didile -lɔ, "ne zuzu -nyɛnye 'kɔmo -dee 'nyɔkpɔ ne -ko -wɛ.

³⁰ "Ne Zezu yi -lɔ "ɛ zuzu -nyɛnye -wɛ lo 'yɔbhɔ nɛɛ: «-Neɛ' 'tɔ pa- -lɛ?» 'Ɔ nɛɛ: «'Mɔɔ 'pa- pluplu», "naa- zuzu -nyɛnyea -kwleyia -ko 'awɔ "me zɛ.

³¹ "Ne 'wa yi -lɔ Zezu bhubhɔ nɛɛ: -Yaya te -kɛ -anye "ɛ 'sɔkɔ -wɛ "me "pɔ.

³² "Ɛ doɔ 'kokotia 'na -zakpɛ -ko 'awɔ lɔbhɔ, 'wa li nɛ lɔbhɔ 'na tlo zɔ "ku. "Ɛ zuzu -nyɛnyea -wɛ bhubhɔ -lɔ Zezu nɛɛ: «"Pɔ -kɛ -anye -wɛ 'kokotia "me», "ne Zezu yua -lɔ -gwe "nyɛ.

³³ "Ne "ɛ zuzu -nyɛnyea yi -lɔ "ɛ 'nyɔkpɔ -wɛ keyi 'bha-, "ne 'wa yi -lɔ 'kokotia "me 'gbe. "Ne 'wanɛɛ -zakpɛ -wɛ 'bha- tlo 'vli, "ne 'wa yi -lɔ 'ŋu "me 'gbe 'klekle, "ne 'wa yi -lɔ "bhle "kule.

³⁴ 'Wa 'ye- lɛ -ɛ ple- 'awɔ -wɛ 'ylime ne, "ɛ 'kokotia 'na "klokolenya -wɛ yi -lɔ yɔko -seliɔ. 'Wa -me zoku "ne 'kwlɛdu -wɛ 'wɔ "ku 'de -sɛ -ka.

³⁵ 'Nyakpa 'wlo- zɔ -se 'wa "kɛ -ɛ 'ple- 'awɔ -wɛ 'ylime 'ye. 'Wa 'na sibhɔ Zezu yɔko ne, "ɛ 'nyɔkpɔ -ye zuzu -nyɛnyea 'wɔ -ko nɛ keyi -wɛ, 'ɔ gli- -duku, 'ɔ -pla "me 'tee, "ne 'ɔ -kɛ -la 'nyɔkpɔklo, "ne geji yua -lɔ "ku 'bha- 'klekle.

³⁶ Nyakpa -wa 'ye- "ɛ -li 'klekle 'na 'dɛ -wɛ, 'wa -me -lɔ 'walua, "ɛ 'gwizinyɔ -wɛ, 'na 'de -sɛle -ka.

³⁷ -Ɛwɛza, "ɛ Zelazeniɛnya 'klekle -bhulɛle -lɔ Zezu nɛɛ: 'Ylile- 'anye yɔko 'guɔ, "naa-, sɛko -wɛ, "ku 'tɛtɛloa 'awɔ nyanɔ za. "Ne Zezu yi -lɔ gɔlo "me "gblɛ "ne 'ɔ yi -lɔ me.

³⁸ "Ne 'nyɔkpɔ -ye zuzu -nyɛnyea 'bha- keyi -wɛ 'kwɔ 'awɔ 'ŋlu "ne 'ɔ yu -lɔ bhulɛle- nɛɛ: 'E "kɛ 'se -eyi 'gɛle- -me. -Mɔ, Zezu nɛɛ 'ɔ 'bhɔ. "Ne 'ɔ yu -lɔ bhulɛle- nɛɛ:

³⁹ 'Zi -neɛ' -bhudu "me 'wlizɔ, yle "bhle -neɛ' 'nyoa. -Ye Lagɔ -no -neɛ' za 'klekle -wɛ, -sɛ 'ɛnɛɛ 'de. "Ne "ɛ 'nyɔkpɔ -wɛ yi -lɔ me, "ne 'ɔ yi -lɔ -ye Zezu -no 'wli -wɛ 'na 'de 'du 'klekle "ku ŋwenia-.

Zezu -yamalea 'ŋɔnɔ -bholo, "ne 'ɔ -golia 'ŋuyu 'tekeyi

⁴⁰ Zezu -sɔbhɔ 'wli "ne 'nyakpa -kwleyia yu -lɔ 'yli yiɛ -ka yi, "naa-, 'wayi 'klekle -wo 'awɔ zɛ.

⁴¹ Lɔbhɔ -ye 'nyɔkpɔ -bholo -ye 'wa la Zayile -wɛ -yi -me -lɔ. "Mebhubhɔlebhudu 'na "cifi yɔ 'awɔ -lɔ. 'Ɔ "kɛ Zezu 'ylime 'ye ne, 'kokomini 'ye 'ɔ -yu -lɔ yɔko 'pɔle -ka. "Ne 'ɔ bhubhɔ -lɔ Zezu nɛɛ: -Yaya 'a "kɛ sueme me.

⁴² "Naa-, 'ɔ -kɛ 'awɔ 'ŋuyu -bholo -kpee, -ɔ -kɛ nɛ 'ylobɛ -kogbɔ "sɔ "ne 'ɔ nɛɛ 'ɔ "kɛ 'awɔ "ku. -Sɔɔdɛku, Zezu -ko me dɛku -wɛ, 'nyakpa -zu 'awɔ, 'wa 'pɔpɔ mo "bhle.

⁴³ 'Ŋɔnɔ -bholo -ko -me "ɛ -zakpɛ -wɛ "me, 'ylobɛ 'kogbɔ "sɔ -see 'dlu bhiɔ "me. 'Ɔ 'kplɛle- "nyakpononya -gbagboa kɔ. 'Ɔ -pleloa "fu 'ɔnɛɛ 'dlasi kɔ "ne 'gu "ne 'ŋunu-.

⁴⁴ "Ne 'ɔ yi -lɔ Zezu keyi 'plele, "ne 'ɔ yi -lɔ 'ɔnɛɛ 'koti kɔ sa. "Ɛ -doɔ cuu, 'ɔnɛɛ 'dlu 'diɔle-.

⁴⁵ "Ne Zezu yi -lɔ lo 'yɔbhɔ nɛɛ: «-Ɔ -ze bhɔ -ame kɔ 'a?» "Ne 'nyakpa 'klekle gwegwele nɛ yɔko "me, "ne Piɛle yi -lɔ no nɛɛ: «"Bhenyɔ, -e "ne 'nyakpa -wa gwegwele yɔko "me -wɛ 'yli -gɛ 'a.»

⁴⁶ -Mɔ, Zezu nɛɛ: «'Nyɔkpɔ 'sa- -ame kɔ. 'E -yibhlele sɛ -gbɔ -bɛɛ' 'bha- -ame "ku "me.»

⁴⁷ "Ɛ 'ŋɔnɔ -wɛ tɛtɛle nyanɔ za, "naa- 'ɔ -yi -bɛɛ' 'na -ɛ -ko lɔbhɔ -wɛ zɛ. "Ne 'ɔ yi -lɔ Zezu 'bho yɔko "pɔle, "ne 'ɔ yu -lɔ "ɛ -ye 'ɔ -no -wɛ 'na 'de -sɛle 'klekle, -see 'ɔ -yamale -gba "bhuɔ -bhele -wɛ "me.

⁴⁸ Zezu nɛɛ: «'Na yu, -neɛ' 'dlekukɛleɛ 'ya -eyi 'fuɔ, me "kuwɛtɛ "me.»

⁴⁹ "Ɛ weli -wɛ -ko -namlɛ nu "ne "ɛ 'nyɔkpɔ -ye 'wa -lebhe -wɛ yi -lɔ yi. 'Ɔ 'bhale "Mebɔbɔlebhudu "me 'na "cifi 'na sueme, 'ɔ nɛɛ: Zayile, -e yɔɔ 'ya 'nyɔŋo bhli zaa te -la "fu "Bhenyɔ 'yalɛ lia-.

⁵⁰ -Mɔ, Zezu -bhle 'wanɛɛ 'desɛweli -wɛ 'yukwli, "ne 'ɔ yi -lɔ Zayile bhulɛle- nɛɛ: -Nyanɔ te -eyi 'lɔbhɔ, -mɔ, kɛle- Lagɔ 'dleku cuu -mɔ 'ɔ yi 'po.

⁵¹ 'Ɔ -ylɛ lɛ sueme ne, 'ɔ nɛɛ -vinyɔ te "ɛ -bhudu -wɛ "me plɛ -me, -mɔ Piɛle, Zaa "ne Zake "ne yu 'ɔ 'to -nyɛ "nɔ "bhaa.

⁵² 'Wa 'na 'wolo 'lugbu -jiji, 'wa sibhɔle 'wli, Zezu nɛɛ: 'A te "tu, "ɛ yu ne -na 'se "ku ne, ŋɔŋo 'ɔ 'ŋɔŋo- -lɔ.

⁵³ "Ne 'wa yu -lɔ 'sile-, "naa-, 'wanɛɛ dɛku "ku 'ɔ "ku- -lɔ zɛ.

⁵⁴ "Ne 'ɔ yu -lɔ sɔ 'sale "ne 'ɔ yu -lɔ la: «'na yu, 'sɔku.»

⁵⁵ "Ne 'ɔnɛɛ 'wugɔŋo yu -lɔ "me yi, "ne 'ɔ yi -lɔ "ku -sɔ cuu! "Ne Zezu yua -lɔ bhulɛle- nɛɛ: 'A "nyɔ lilɛ.

⁵⁶ "Ne 'ɔnɛɛ 'nyakpa -wɛ nyanɔ yua -lɔ 'lɔbhɔ. "Ne Zezu yua -lɔ kɔ 'titli, -se -wa te -kɛ 'de -sɛ -wɛ za.