Luke 7 - Nouveau Testament bété de Gagnoa

Zezu -yamalea Wlɔmo 'na "slojayu "yitɔ 'na "kulɔbhɔnyɔ

¹ Zezu "kɛ 'ɔnɛɛ weli 'nyakpa 'yliku bhulɛle- "bhuɔ ne, Kafanaɔme 'ye 'ɔ -me -lɔ.

² "Slojayu "yitɔ -kɛ nɛ "juyu -ye 'ɔ -wa kpɛnyee. 'Ɔ "ne -yɛ "ne 'ɔ nɛɛ 'ɔ "kɛ "ku.

³ 'Ɔ "kɛ Zezu 'na "ku 'na weli 'no ne, Zufonya 'na 'cifia 'na yokoglinya 'na yɛ 'ye 'ɔ -lebheloa -lɔ "ku, -se 'wa "kɔ bhubhɔ- -se 'ɔ "kɛ 'ɔnɛɛ 'juyu 'fuɔ.

⁴ 'Wa "kɛ "ɛ Zezu yɔko ylɛ ne, 'wa bhubhɔ Zezu "ne 'wa lɛ -lɔ sɛne nɛɛ: -Ye 'e "kɛ 'ɔnɛɛ dɛku 'no -wɛ -ŋwɔ "ku.

⁵ "Naa-, 'ɔ -wa -anyɛɛ -glɔ, "ne 'ɔɔ 'sɔbhɔ- -lɔ 'anyɛɛ "mebhubhɔlebhudu.

⁶ Zezu -nyɛ 'wayi 'wɔ "bhaa 'wa nɔŋole- 'gɔme, "ne 'wa "ne -la "ɛ -bhudu dɛ tlole-, "ne "ɛ "slojanya 'na 'ylikugɛlenyɔ "yitɔ -wɛ yi -lɔ 'ɔ titoa 'lebhe -gbɔ 'wa 'bhulɛlo- nɛɛ: «Anyinɛnyɔ te -la fu -eyi 'kpala- -se te -la 'neɛ sueme 'wlo, "naa-, 'e "ne -eyi 'neɛ sueme 'na pla- -sɛ -kɛ.

⁷ 'Ɛnɛɛ 'ylime za 'e "ne -lɔ 'ayigɛsɛ -eyi lo -yli, -mɔ, bhulɛ- welicibhɛ -bholo -kpee, -se 'neɛ "kulɔbhɔnyɔ "kɛ yamale-.

⁸ -Ame 'e -kɛ 'neɛ "cifia 'wɔ -ye 'e "zo lɛ 'plome "ne 'e -kɛ 'neɛ -wa "zo -ame 'plome. 'E kɛ -bholo -no nɛɛ: Me, me 'ye 'ɔ me -lɔ, "ne 'ɔnɛɛ -ɔwɛ yi, yi 'ye 'ɔ yi -lɔ, "ne 'e kɛ 'neɛ "kulɔbhɔnyɔ no -gbɔ no -ɛne, no 'ye 'ɔ no -lɔ.»

⁹ Zezu no- lɛ "ɛ weli -wɛ ne, "ɛ 'nyɔkpɔ -wɛ 'tɔ "ku 'ɔ -lelo -lɔ. 'Ɔ -ziɔ "me "ne 'ɔ yi -lɔ -zakpɛ -ɛ gɛlelo -wɛ 'klo glɛ-, 'ɔ nɛɛ: 'E bhulɛle 'anye -gbɔ Izlayɛleyua 'glɛme, 'e -na 'ce -zɛ "bhle soɔ 'na 'dlekukɛleɛ 'ylime 'ye.

¹⁰ "Ne "ɛ -ye 'wa -lebhe -wɛ yi -lɔ sueme 'wlizɔ zi, 'wa 'na me "ɛ 'juyu -yamale.

Zezu -golia Nayine 'na 'kwiziŋɔnɔ 'na yu -ɔ "ku- -wɛ

¹¹ Zezu "me 'du -ye 'wa la Nayine -wɛ. 'Ɔyi, 'ɔnɛɛ gɛlenya -nyɛ -zakpɛ "yitɛ "bhaa 'wa mele nɛ 'gɔme.

¹² 'Ɔ "kɛ "ɛ 'du -wɛ "me 'na -gbanuɛ "ku ylɛ ne, 'nyakpa -su gɛzɛ, 'wa mo zizi -ka, kwiziŋɔnɔ 'na yu -bholo -kpee yɔ nɛ -lɔ, "ne "ɛ 'du -wɛ "me 'na 'nyakpa kwɛle nɛ -lɔ "ɛ 'ŋɔnɔ -wɛ -gwe "ku.

¹³ Anyinɛnyɔ "kɛ "ɛ 'ŋɔnɔ -wɛ "ylime 'ye, -nyɛze "ku 'ye 'ɔ lelo- -lɔ, "ne 'ɔ yu -lɔ bhulɛle- nɛɛ: Te -la 'tu.

¹⁴ "Ne 'ɔ yu -lɔ lo mele-, "ne 'ɔ yi -lɔ "ɛ 'cesu -wɛ kɔ ze "ne -wa -su yi -lɔ 'nyegbe-. 'Ɔ nɛɛ: Teyigbɔ -mɔɔ bhulɛle lɛ -eyi, glɔ.

¹⁵ "Ne "ɛ gɛzɛ -wɛ yi -lɔ 'guɔ 'glile-, "ne 'ɔ yi -lɔ 'gbo 'di, "ne Zezu yu -lɔ 'ɔ "nɔ kɔ 'je.

¹⁶ Nyanɔ 'lɔbhoa- 'klekle "ne 'wa kwa nɛ -lɔ Lagɔ 'ŋlu nɛɛ "guɔkwɔmenyɔ "yitɔ 'wlole- -anye 'glɛme zɔ, "ne Lagɔ -yi 'ɔnɛɛ 'nyakpa "ku 'be -ka.

¹⁷ "Ɛ weli -wɛ za, Zezu 'na 'tɔ -ŋwɛne -lɔ Zude -glɔ 'klekle "ku.

Zaa Batise 'lebhele- 'ɔnɛɛ gɛlenya "sɔ Zezu "ku

¹⁸ Zaa 'na gɛlenya -me -see 'ɛ -ylɛle 'klekle -wɛ 'na 'de 'wanɛɛ sloanyɔ -sɛle -ka, "ne 'ɔ yi -lɔ 'ɔnɛɛ gɛlenya "sɔ 'klo 'glɛ.

¹⁹ "Ne 'ɔ yua -lɔ Anyinɛnyɔ "ku 'lebhele- -gbɔ 'wa 'yɔbhɔ lo nɛɛ: -Mɔɔ -noɔ bhɔ -ɔ "kɛ yi -wɛ yɔ, -mɔ, -a yi 'na bhɔ -vinɔ wo 'a?

²⁰ 'Wa "kɛ Zezu yɔko ylɛ ne, "ɛ 'nyakpa -wɛ -bhulɛlolɔ nɛɛ: Zaa Batise -lebhe -lɔ -anye -eyi "ku -gbɔ -a yi -se -a "kɛ -eyi lo 'yɔbhɔ- -gbɔ, -mɔɔ -noɔ bhɔ -ɔ "kɛ yi yɔ? -Mɔ, -a wo- -na -vinɔ?

²¹ "Ɛ "tɛnye -wɛ "me Zezu -yamalea 'gwizinya 'na -kwleyia, -wa "ne nɔŋo "ne -ye zuzu -nyɛnyea -ko keyi -wɛ, "ne kpelɔbhɔnya 'na -kwleyia 'na 'yli -vuluɔ "ku.

²² "Ne 'ɔ bhulɛle -lɔ "ɛ -ye 'wa -lebhe -wɛ nɛɛ: «'A me -se 'a -sɛle Zaa -ye 'a 'ye- 'ylime "ne -ye 'a 'no- -wɛ 'na 'de: -Kpelɔbhɔnya 'ye 'siɛ, "ne 'bhogbeyibhlinya 'nɔŋo. 'Zlɛlɔbhɔnya -yamale "ne 'yukwligbɔgbɔnya 'no gbo, 'kwia 'wlo gluzɔ. "Ne 'nyɛzenya 'no Lagɔ 'na 'Denaade "me.

²³ -Se, 'ŋwɛnɛ 'lɔbhɔ 'nyɔkpɔ 'na 'ɔ -ka 'neɛ za 'kwlɛ bhli -wɛ.»

Zezu -bhulɛ Zaa Batise 'na "kukoweli

²⁴ "Ɛ Zaa 'na 'lebhelebheyua "kɛ me "bhuɔ ne, Zezu bhulɛ -lɔ 'ɔnɛɛ "kukoweli zakpɛ nɛɛ: «-Ye 'a -me nɛ bhɔ "ɛ 'kɔsɛku 'ylɛ -ka 'a? "Zeezu -ye 'pepe zuzua "me -wɛ bha?»

²⁵ Zaa, -ye 'a -me nɛ bhɔ 'ylime 'ye ka -tiaa? 'Nyɔkpɔ 'na -ɔ -pla -klɔgbɔkoti "me -wɛ bha? -Mɔ, 'nyakpa -wa -pla "ɛ soɔ "me -wɛ, klɔgbɔnya 'na -bhudu "me 'wa gli -lɔ, klɔgbɔnya yɔko.

²⁶ Zaa, -ye 'a -me nɛ bhɔ 'ylime 'ye ka 'a? "Guɔkwɔmenyɔ bha? -Ɛɛ, gbɛklɛklɛ 'ye 'e bhulɛle lɛ 'anye, 'ɔ -zi "ɛ "guɔkwɔmenyɔ 'nabhɛ "ku.

²⁷ 'Nyɔkpɔ -nyɔ 'na "kukoweli Lagɔbɔgo -bhulɛ nɛɛ: 'Neɛ lebhelebhleyu 'ye 'e -no -gbɔ 'ɔ 'ple -mlɛ -eyi 'yuku -se 'ɔ kɛ -neɛ' gwe 'wli 'jijalea- yɔ -lɔ.

²⁸ 'E bhulɛle 'anye nɛɛ: 'Ŋɔnɔ 'na yua 'glɛme 'na -bholo "ne 'kpɔ "ne 'ɔ "kɛ Zaa "ku -zi. 'Ɛ -ko "ɛ soɔ ne, 'ɔ -noɔ Lagɔ 'na 'Kamalezikpɛ "me 'na yu yɔ -wɛ, 'kpɔ "ne 'ɔ -zu "ku.

-See 'wa 'sa- Zaa, "ne -see 'wa 'sa- Zezu

²⁹ 'Nyakpa 'klekle 'fo 'yukwli, "ne -lɛposanya yi -lɔ Lagɔ 'na -see 'ɔ ŋwinɛle- "me -wɛ yibhlele-, "ne Zaa yua -lɔ batɛme "nyɛ.

³⁰ -Mɔ, Faliziɛnya "ne -Lɔsloanya -sɛ "ɛ -ye Lagɔ 'yɔbhɔ 'wanɛɛ dɛku -wɛ 'na lo, 'ɛnɛɛ 'ylime Zaa "noa batɛme 'nyɛ-.

³¹ -Ye 'e "kɛ bhɔ -dɛme 'na 'nyakpa 'wɔkɔle- 'a? -Ye 'wa 'wlole- bha?

³² 'Wa 'wlole- 'yueja -wa 'gli- 'digbɛ "me ne -wa lalale -wɛ, "ne 'wa bhulɛ nɛɛ: 'A bhle -anyɛɛ za 'wupe, "ne -a "ne -ye: -A 'pɔ- "bhle 'lugbulo "ne 'a "ne 'tu-.

³³ "Ne Zaa Batise -yi, 'ɔ li "fɔlɔ, "ne 'ɔ nɔmɔ duvɛ, "ne 'a no nɛɛ: Zuzu -nyɛnye -ko -lɔ keyi.

³⁴ 'Nyɔkpɔ Yowli -yi, 'ɔ li "ne 'ɔ "nɔmɔ, "ne 'a no nɛɛ: Mɛnɛmɛnɛnyɔ yɔ -lɔ, "ne 'ɔ -noɔ 'lelee -lɔ nogbinɔmɔnyɔ yɔ, 'ɔ -nyɛ -lɛposanya, "ne "nyinyonolinonya "bhaa 'wa -ko -lɔ 'tito "me.

³⁵ -Mɔ, -wa 'sa- Lagɔ 'na weli kɔ 'klekle -wɛ, 'wa yibhlele -lɔ 'ɔnɛɛ nanoɛ cuu. "Ne Lagɔ 'na nanoɛ kɔ 'ye 'wa yibhlele -lɔ 'ɔnɛɛ yua.

Zezu "ne 'widiaseseliaŋɔnɔ

³⁶ Faliziɛnyɔ lale- -lɔ Zezu lilɛ "ku, "ne 'ɔ yi -lɔ "ɛ Faliziɛnyɔ 'na -bhudu "me plɛ, "ne 'ɔ yi -lɔ -duku 'gli.

³⁷ Lɔbhɔ 'ye "ɛ 'du -wɛ "ku 'na 'widiaseseliaŋɔnɔ 'wlole- -lɔ lɔbhɔ zɔ. 'Ɔ 'no- lɛ -gbɔ Zezu -ko "ɛ Faliziɛnyɔ -wɛ 'na -bhudu "me, 'ɔ -su lasiklɔ -ɛ 'tɛ- lɛ 'kpɛ "ku 'na bhotiɛ.

³⁸ 'Ɔ 'tu "ne 'ɔ yi -lɔ Zezu keyi 'plele, "ne 'ɔ 'slu -lɔ 'miɛ 'ɔnɛɛ bhopɛpɛ "ku, "ne 'ɔ siɛle -lɔ 'ɔnɛɛ 'nyi nu, "ne 'ɔ 'nyɛ -lɔ nuɛ "ku, "ne 'ɔ 'slu -lɔ 'lasiklɔ "ku.

³⁹ "Ɛ Faliziɛnyɔ -ɔ la- Zezu -wɛ 'cɛ "ylime 'ye ne, 'ɔ bhulɛle -lɔ sɛne 'dlezɔ nɛɛ: "Ɛ 'nyɔkpɔ ne kɛ nɛ "guɔkwɔmenyɔ yɔ, 'ɔ yi nɛ "ɛ 'ŋɔnɔ, -ɔ 'sɔ kɔ -wɛ 'na kosɛ "me yibhlele-, 'widiaseseliaŋɔnɔ yɔ -lɔ.

⁴⁰ Zezu libhi- weli "ku "ne 'ɔ yu -lɔ bhulɛle- nɛɛ: Simɔ 'e "kɛ -eyi -bɛɛ' -bholo bhulɛle-. Bhulɛ "Bhenyɔ. Zezu nɛɛ:

⁴¹ 'Nyɔkpɔ -bholo 'ye 'nyakpa "sɔ -bho -lɔ 'dlasi "ne 'ɔ yua -lɔ kɔ 'je. 'Wanɛɛ 'glɛme 'na -bholo -kɛ glo 'umgbu, "ne 'ɔnɛɛ -vinɔ -wɛ -kɛ 'dlasi kogbɔ.

⁴² 'Wayi "sɔkpɔ 'wa "ne nɛ -bɛɛ' -kɛ -se 'wa 'cɛ nɛ 'beme "zo, "ne 'ɔ yi -lɔ 'ɛnɛɛ gbo 'yi 'tale-. 'Wayi "sɔ 'glɛme 'na -ɔ "kɔ bhɔ 'wamale- kpɛnyee 'a?

⁴³ Simɔ nɛɛ: 'Neɛ dɛku, nyɔ 'na gbo -zu "ne 'ɔ 'tale- 'yi -wɛ. Ne Zezu yu -lɔ bhulɛle- nɛɛ: -E -bhle 'tee.

⁴⁴ "Ne 'ɔ yi -lɔ "ɛ 'ŋɔnɔ ne "klo 'glɛ, "ne 'ɔ yi -lɔ Simɔ bhulɛle- nɛɛ: -E -gɛ "ɛ 'ŋɔnɔ -wɛ 'yli, 'e -plɛ -neɛ' -bhudu "me, -e "ne -ame 'ŋu bhopɛpɛ "ku 'slu-, -mɔ, 'ɔyi, 'ɔ -bɔŋua 'neɛ bhopɛpɛ 'ɔnɛɛ 'miɛ nu, "ne 'ɔ 'yi -lɔ 'ɔnɛɛ 'nyi nu 'siɛle-.

⁴⁵ -E "ne -ame nuɛ "ku 'nyɛ-, -mɔ 'ɔyi, -see 'ɔ "mɔ nɛ "ɛ -bhudu ne me 'plɛ, 'ɔ "ne la tɛkɛsɛ 'na bho nuɛ "ku 'nyɛɛ -za 'guɔ 'ylile-.

⁴⁶ -E "ne -ame 'ŋonikpe 'wli 'slu-. -Mɔ 'ɔyi, 'ɔ 'slu- lasiklɔ 'neɛ bhopɛpɛ "ku.

⁴⁷ 'E kɛ -eyi bhulɛle- nɛɛ: 'E 'tale- 'ɔnɛɛ 'nyinyonoli -kwleyi -wɛ 'na gbo 'yi, sɛko -wɛ nea, 'ɔ -tua -ame 'ɔnɛɛ 'ŋwɛnɛ -ye 'ɔ -kɛ neɛ za "me -wɛ 'ylime. -Mɔ, -nyɔ 'na 'nyinyonoli 'tekeyi 'na gbo 'wa 'tale- 'yi -wɛ, 'ŋwɛnɛ 'tekeyi 'ye 'ɔ tua -lɔ 'nyakpa 'ylime.

⁴⁸ "Ne 'ɔ yi -lɔ "ɛ 'ŋɔnɔ bhulɛle- nɛɛ: -Neɛ' 'nyinyonoli 'na gbo 'taleɔ- 'yi.

⁴⁹ -Nyɔ 'wɔ "bhaa 'wa lile 'gɔme -wɛ 'pɔ -lɔ sɛne 'dle nɛɛ: Sɔɔnyɔ yɔ bhɔ "ne 'ɔ 'tale bhɔ 'nyinyonoli 'na 'gbo 'yi 'a?

⁵⁰ Zezu -bhulɛle "ɛ 'ŋɔnɔ nɛɛ: -Neɛ' 'dleku 'kɛleɛ 'fuɔ- -eyi. Me "kuwɛtɛ "me.