Luke 6 - Nouveau Testament bété de Gagnoa

Zezu "ne zufonya 'na -gbajɛzle

¹ -Gbajɛzle, Zezu -ylɛle 'blelɛɛ "me. 'Ɔnɛɛ gɛlenya 'di- 'ble 'na 'gwlɛ "ne 'wa 'titli- kɔ "ne 'wa 'yi -lɔ li.

² -Mɔ, Faliziɛnya 'na yɛ nɛɛ: Sɔɔbɛɛza -ye 'wa no -gbɔ 'wa te -gbajɛzle no -wɛ, 'a no bha?

³ "Ne Zezu yua -lɔ bhulɛle- nɛɛ: «-Ye Davide -no -wɛ, 'a "ne bhɔ "me -zɛle? 'Yli -bholo "me ŋɔŋo 'lɔbhɔ 'awɔ "ne 'ɛ 'lɔbhɔ me 'awɔ 'lelee -wa -ko yɔko -wɛ.

⁴ 'Ɔ -plɛ Lagɔ 'na -bhudu "me, "ne 'ɔ libhi- "fɔlɔ -ye 'wa 'bɔbɔle- -wɛ "ku, "ne 'ɔ -li, "ne 'ɔ "nyɛ -me 'ɔlua. "Ɛ soɔ 'na "fɔlɔ -wɛ, bɔbɔnya 'wayikɔ -kɛ -lɔ 'ɛnɛɛ li -sɛ?»

⁵ "Ne Zezu bhulɛloa -lɔ sɛne nɛɛ: «'Nyɔkpɔ Yowli 'bhe- -lɔ -gbajɛ.»

Zezu -yamalea 'nyɔkpɔ -ye sɔ -bhli yɔko -wɛ

⁶ -Gbajɛ 'na -vinɛ 'na zle, Zezu -plɛ "mebhubhɔlebhudu "me "ne 'ɔ sloa nɛ -lɔ. 'Nyɔkpɔ -ye sɔ -bhli yɔko -wɛ -kɔ -me "ɛ -bhudu -wɛ "me.

⁷ -Lɔsloanya "ne Faliziɛnya 'wolo Zezu "ku 'wewe: 'Ɔ "kɛ -gbajɛzle "ɛ 'nyɔkpɔ -wɛ 'na "gu -bhiɛ ne, 'wa "kɔ gbo no zɛ.

⁸ -Mɔ, Zezu 'yi 'wanɛɛ 'dlepɔsɛ. 'Ɔ -bhulɛle "ɛ sɔyɔkobhlinyɔ: -Sɔ "ku! -Se -e yi dɛne 'nyakpa 'klekle 'yli "ku. "Ne 'nyɔkpɔ 'yi -lɔ "ku -sɔ, "ne 'ɔ 'yi -lɔ 'ya 'nyegble-.

⁹ Zezu yua -lɔ bhulɛle- nɛɛ: Lo 'yɔbhɔ lɛ 'anye. -Gbajɛzle, 'wa yi bhɔ 'nyɔkpɔ -li 'na -li 'wli no, -mɔ, 'wa yu bhɔ -nyɛnye 'wli no? 'Wa yi bhɔ 'nyɔkpɔ fuɔ -mɔ 'wa yu 'lɔbhɔ?

¹⁰ Zezu -wloa "ku 'klekle. 'Ɔ nɛɛ: Glo sɔ "me! "Ne 'ɔ 'yi "me glo. 'Ɔnɛɛ sɔ -yamale.

¹¹ -Lɔsloanya "ne Faliziɛnya 'pɔ kɛle "ne 'wa tɛle -lɔ -ye 'wa "kɛ Zezu 'wli no -wɛ 'siɛ.

Zezu -tɔ "kɔlepɔnya -kogbɔ "sɔ

¹² "Ɛ 'yli -wɛ "me, Zezu "me tlo 'vli 'bhubhɔle- -ka. 'Sabo, 'ɔ -bhubhɔ Lagɔ -kaa.

¹³ Zle "kɛ 'ze ne, "ne 'ɔ yi -lɔ 'ɔnɛɛ gɛlenya 'ɔyi yɔko lale-. "Ne 'ɔ yi -lɔ kogbɔ "sɔ 'tɔ-. "Ne 'ɔ yua -lɔ "kɔlepɔnya ziɛle-.

¹⁴ 'Wanɛɛ 'tɔ ne lɛ: Simɔ 'ye 'ɔ -ziɛle Piɛle "ne 'ɔ "nɔwli Adle, Zake, Zaa, Filipo, Batelemi.

¹⁵ Matie, Toma, Zake, Alefe yowli, Simɔ -ye 'wa -ziɛle lɛ Osiduzame.

¹⁶ Zude, Zake yowli "ne Zuda Isekaliɔte -ɔ -ple Zezu -wɛ.

''Nyakpa -kwleyia -yi Zezu 'yukwli 'fo -ka "ne 'ɔ 'yi -lɔ -bedia yamalea-

¹⁷ Zezu -nyɛ 'ɔnɛɛ "kɔlepɔnya "bhaa 'kwli tlo, "ne 'ɔ yi -lɔ -dee 'ŋulɛle- "ku -wɛ 'nyegbe-. Gɛlenya 'na 'kwleyia -ko nɛ lɔbhɔ. 'Nyakpa 'na -zakpɛ "yitɛ -wa 'bhale Zude "ne Zeluzalɛme "ne Tile -nyɛ Sidɔ "bhaa 'na jinyɛ yɔko -ko -me nɛ lɔbhɔ.

¹⁸ 'Wa -yi 'klekle -se 'wa "kɛ Zezu 'yukwli fo, -se 'wanɛɛ 'gu "kɛ bhiɛ. -Ye zuzu -nyɛnye lia 'yalɛ -wɛ, -yamale 'klekle.

¹⁹ 'Nyakpa -kwleyia gwegwele yɔko "me -se 'wa "kɛ Zezu 'kwlɛ libhi, "naa- -bɛɛ' 'bhalo "me "ne 'ɛ yamaloa 'awɔ 'klekle zɛ.

-Jɔlo "ne -kpilɛkpilɛ

²⁰ "Ne Zezu yi -lɔ 'ɔnɛɛ gɛlenya "ku wolo-, 'ɔ nɛɛ: 'Ŋwɛnɛ "lɔbhɔ 'anye 'nyɛzenya, "naa-, Lagɔ 'na 'Kamalezikpɛ 'anye nɛ yɛ -lɔ.

²¹ 'Ŋwɛnɛ "lɔbhɔ 'anye -ye ŋɔŋo 'lɔbhɔ -dɛme ne, 'a yi 'ce lo. 'Ŋwɛnɛ "lɔbhɔ 'anye -wa tu -dɛme ne, 'a yi 'ce gɛlɛ si.

²² 'Ŋwɛnɛ "lɔbhɔ 'anye -sɔɔdɛku 'wa -gble 'anye, 'wa 'pɔ 'anye 'kwlɛ "me, 'wa 'yli 'anye, 'wa 'kpeti 'anye, "ne 'wa 'gbli 'anye gbagba -gbo 'wlime 'Nyɔkpɔ Yowli za -wɛ.

²³ 'Ɛnɛɛ zle -wɛ 'a 'vluvlule- "me, 'a "kpa "me, 'a zigbɔ- 'ŋwɛnɛ za, "naa-, 'peɛleɛ "yitɛ -wole 'anye "nɔgɔ "me. Soɔ -ye 'wa 'to 'wɔ 'sa- 'awɔ -lɔ "guɔkwɔmenya.

²⁴ 'Anye pɔ -klɔgbɔ "ne 'a -yle -li 'klekle -wɛ, -nyɛzenya 'ye 'a -noɔ -lɔ.

²⁵ 'Anye -lo klekle -dɛme -wɛ, 'kpilɛkpilɛ 'ye 'a lale -lɔ 'ayi "ku, ŋɔŋo yi 'ce 'anye 'lɔbhɔ, kpilɛkpilɛ 'ye 'a lale -lɔ 'ayi "ku, 'anye si dɛme -wɛ, 'a yi 'ce gbudu 'wuɔ "ne 'a yi 'ce tu.

²⁶ 'Nyakpa 'klekle "kɛ 'anyɛɛ 'denaade -sɛ, kpilɛkpilɛ yɛ "kɛ -lɔ. "Naa-, "ɛ -soɔ 'wa 'to 'wɔ 'sa 'awɔ -lɔ -wa la 'awɔ 'wayi "guɔkwɔmenya -wɛ.

'A 'wamale- 'anyɛɛ -gblenya

²⁷ -Mɔ 'anye fo -ame 'yukwli ne, 'anye 'ye 'e bhulɛle sɛne: 'A wamale- 'anyɛɛ -gblenya, -se 'a 'noa 'nɛne 'wli.

²⁸ -Wa bhle 'anye "ku -wɛ, 'a 'poa 'ŋu, 'a bhubhɔ- -wa nyimɔ 'anyɛɛ 'tɔ -wɛ za.

²⁹ 'Nyɔkpɔ kɛ -neɛ' -takpe kwlɛ 'pɔ-, tuɔ- -me 'lelee 'ɛnɛɛ "sɔ -nɛ. 'Nyɔkpɔ kɛ -neɛ' "meplakoti "ku libhi- ne, 'jo mo 'lelee -neɛ' "kupɔlokwi kɔ.

³⁰ -Ɔ kɛ -eyi zlɛ, "nyɔ. -Ɔ kɛ -neɛ' -bɛɛ' "ku libhi-, te no -gbɔ 'ɔ 'je -eyi kɔ.

³¹ -Ye 'a 'yɔbhɔ -gbɔ 'wa no 'anyɛɛ za -wɛ, 'a no -me sɔbhɔ 'alua za.

³² 'A kɛ -wa -wa 'anye -wɛ -wa -se 'a 'yɔbhɔ -gbɔ 'wa -na lɛ? -Wa "ne Lagɔ -yi -wɛ "zo me "ɛ soɔ.

³³ -Wa no 'anye 'nɛne 'wli -wɛ 'ye 'a kɛ 'nɛne 'wli no me ne, -se 'wa -na lɛ bhɔ? "Nyinyonolinonya 'nabhɛ "zo me "ɛ soɔ.

³⁴ -Ɔ kɛ 'anye bho "ne 'ɔ 'cɛ 'beme "zo -wɛ 'ye 'a kɛ 'nyɛ, 'a -na mlɛ -bɛɛ' no-. "Nyinyonolinonya "zo me "ɛ soɔ.

³⁵ Zaa, 'a wamale- 'anyɛɛ -gblenya. -Se 'a 'noa 'nɛne 'wli. -Ye 'wa bho 'anye -wɛ, 'wa 'wlɛ- -se 'a te lebhe gwele keyi "zo. 'Anyɛɛ peɛloɛ yi 'ce 'kpɔmale-. "Ne 'wa "kɛ -lɔ 'anye "ku zi Lagɔ 'na yua la. "Naa- 'ɔ -ko 'nɛne konyinɛnya za, "ne -wa "ne yibhlele- 'nɛne -wɛ za.

'A te 'nyakpa 'gbobhlele-

³⁶ 'A wɔtɔ- 'dle -see 'a To Lagɔ -wɔtɔ 'dle -wɛ.

³⁷ 'A te 'alua gbobhlele- -se Lagɔ te -kɛ 'anye gbobhlele- -me zɛ. 'A te kɛ 'alua gbo 'wlime "gbli, -se Lagɔ te kɛ 'anye gbo 'wlime "gli me. 'A 'tale- kɛle 'yi -se Lagɔ "kɛ 'anye nɛ 'yitale- -me.

³⁸ 'A "nyɛ 'alua -se Lagɔ "kɛ -kɛ 'anye "nyɛ me. 'Wa yi -neɛ' "me sɛlelemɔ 'yiɛ, 'wa 'yi "ku ko, 'ɛ "kɛ yɔko 'kwlile-. "Naa- -ye 'a wɔkɔle 'alua -nɛ "me -wɛ, 'ɛyi 'wa "kɛ 'ce -lɔ 'anye -nɛ "me 'wɔkɔle- -me.

³⁹ Zezu pɔloa "lele nunɛ -bholo. 'Ɔ nɛɛ: «-Kpelɛbhɔnyɔ yi bhɔ -kpelɛbhɔnyɔ slu 'a? 'Wa -ka bhɔ 'sɔkɔ "me bhli sɔkpɔsɔkpɔ?»

⁴⁰ Gɛlenyɔ "ne -kɛ 'ɔnɛɛ sloanyɔ "ku -zi, -mɔ gɛlenyɔ 'na -ye 'wa -sloa 'tee -wɛ -lele me 'ɔnɛɛ sloanyɔ 'nasɛ.

⁴¹ Sɔɔbɛɛza -e wolo bhɔ -e "nɔwli 'na 'yli "me 'na -didi -bhueyi "ku? "Ne, -e "ne bhɔ -gbɔpo -ɛ -kesiale -eyi 'yli "me -wɛ 'yli -gɛ?

⁴² Sɔɔbɛɛza -e bhulɛle bhɔ -e "nɔwli nɛɛ: «'Tale- -ame 'yi -se 'e "kɛ -didi -bhueyi -ɛ 'pe- -eyi 'yli "me -wɛ "bhle -sɛ, -eyi -mɔɔ "ne -dɔgbɔlo -ɛ -kesiale -eyi 'yli "me -wɛ 'yli -gɛ! 'Ylisiɛtɛlenyɔ -lɛ! -Sɛ -na 'se -dɔgbɔlo -ɛ -kesiale -eyi 'yli "me -wɛ "bhle "bhuɔ, -se -e "kɛ siɛ 'ye gbɛklɛklɛ, -se -e "kɛ -da -e "nɔwli 'na -didi -bhueyi -ɛ 'po- 'yli "me -wɛ "bhle -sɛ.»

Su "ne 'ɛnɛɛ bhi

⁴³ Su 'na "namanɔ "ne tlo -la 'bhinyɛnye. Su 'na "nyɛnye "ne tlo -la bhi 'na "namanɔ.

⁴⁴ Su, 'ɛnɛɛ bhi -za 'wa yibhlele -lɔ. 'Wiyɛsu 'yli 'wa -na fige 'na yɛ -sɛ, "ne -kpɛcɛ 'yli 'wa -na -la ylɛzɛ 'na yɛ -sɛ.

⁴⁵ 'Nyɔkpɔ kɛ 'nɛne, -li 'na "namanɔ -ɛ 'yiɔ- 'dlezɔ -wɛ 'ye 'ɔ 'wlɛ -lɔ zɔ. 'Nyɔkpɔ kɛ "nyɛnye yɔ ne, -li -nyɛnye -ɛ 'yiɔ- 'dlezɔ -wɛ 'ye 'ɔ 'wlɛ -lɔ zɔ.

-Bhudu "sɔ 'na nunɛ

⁴⁶ Sɔɔbɛɛza 'a la bhɔ -ame Anyinɛnyɔ, Anyinɛnyɔ "ne 'a "ne no bhɔ -see 'e lɛ -wɛ 'a?

⁴⁷ 'Nyɔkpɔ 'na -ɔ yile -ame lo, "ne -ɔ 'no 'na bhulɛweli "me, "ne 'ɔ "zo -ame 'plome -wɛ, 'e "kɛ 'anye -ye 'wa "kɔ 'wɔkɔle- 'sloa-.

⁴⁸ 'Ɔ -ko sɛgbɛɛ 'nyɔkpɔ 'na 'ɔ sɔbhɔ -bhudu. 'Ɔ -bhlu "sɔkɔ 'na -ɛ tlo "me, 'ɔ gilɛ- 'ɛnɛɛ -kpulu 'tiyi "klo. 'Ŋu -lɔbhɔ, 'ɛ -gbisiɔ "yitɛ "ku. 'Ɛ -ylɛle -bhudu yɔko, -mɔ, 'ɛ "ne glu -sɛ. 'Ɛ 'sɔbhɔ- 'tee -zɛ.

⁴⁹ -Mɔ, 'nyɔkpɔ 'na -ɔ 'no 'na weli "me, "ne 'ɔ "ne "zo 'plome -wɛ, 'ɔ -ko sɛgbɛɛ 'nyɔkpɔ 'na -ɔ 'sɔbhɔ- -bhudu, "ne -ɔ ne 'tee 'bhlu-: Zaa, 'ŋu -lɔbhɔ, 'ɛ -gbisiɔ "ne 'ɛ -sɛ "ɛ -bhudu -wɛ glu "ne 'ɛ yi -lɔ bhli-, -bɛɛ' 'na yɛ -bholo "ne lɔbhɔ -to kplokplo.