Luke 5 - Nouveau Testament bété de Gagnoa

Zezu la- gɛlenya 'na tɛtɛnoa

¹ 'Yli -bholo "me Zezu -ko 'awɔ 'ŋu yɔko Zenezalɛte; 'Nyakpa 'na -zakpɛ 'gwegwele 'awɔ yɔko "me -se 'wa "kɛ Lagɔ 'na weli 'yukwli fo.

² "Ne 'ɔ yi -lɔ gɔlo 'sɔ 'ylime 'ye-, 'ɛ 'nyegbe- 'ŋu yɔko, 'ŋudɔnya -wa 'gli- "bhle -wɛ kwli- nɛ zɔ -se 'wa "kɛ 'wanɛɛ "sokwli 'wɛle-.

³ Zezu 'gblɛ "ɛ gɔlo 'na -bholo "me, -ɛ -noɔ Simɔ nɛ yɛ -wɛ. "Ne 'ɔ yu -lɔ bhulɛle- -gbɔ 'ɔ 'bha- cicɛku -se 'ɔ 'nyiɔ- 'yuku 'tekeyi. "Ne 'ɔ yi -lɔ 'duku gli, "ne 'ɔ yi -lɔ "ɛ 'nyakpa 'na -zakpɛ -wɛ 'sloa-.

⁴ 'Ɔ bhiɛ- lɛ 'sloa- -kɔ "bhuɔ ne, 'ɔ nɛɛ: Simɔ 'nyiɔ 'ŋu 'na jijɛku -se 'a 'pɔ "sokwli -se 'a "kɛ zibhia 'sa.

⁵ Simɔ nɛɛ: Slonyɔ, -a 'kplɛ- -kɛ sabo ne "me kpɛnyee, -a go "ɛ 'mɛne, -a "ne -bɛɛ' 'sa-, -mɔ, -e lɛ- -kɛ 'se sɔbhɔ za 'e yi "ɛ "sokwli 'pɔ.

⁶ 'Wa 'pɛ-, 'ɛ yiɛ zibhia "ku, "sokwli 'ko 'tekeyi 'ɛ "kɛ 'dle 'yɔlɔ-.

⁷ "Ne 'wa yi -lɔ 'walua 'wa -ko gɔlo 'na -vimɔ 'ce la, 'wa yi -se 'wa "koa kwɛle-. 'Wa -yi "ne 'wa yi -lɔ gɔlo sɔkpɔsɔkpɔ 'yiɛ, 'ɛ -to 'tekeyi 'ɛ kɛ 'wli 'mɔnɔ.

⁸ 'Wa 'ye- lɛ 'ylime ne, Simɔ Piɛle kokomini 'ye 'ɔ 'pɔ- -lɔ Zezu 'yliku 'ɔ nɛɛ: "Bhenyɔ, 'ylile- -ame yɔko "guɔ, sɛko -wɛ -ame nyinyonolinonyɔ 'ye 'e -noɔ -lɔ zɛ.

⁹ Piɛle nyanɔ 'lɔbhɔ- 'ɔ -nyɛ -wa -ko -me lɔbhɔ -wɛ "bhaa, "naa-, zibhia -ye 'wa 'lɔbhɔ- -wɛ -zu nɛ kpɛnyee zɛ.

¹⁰ "Ɛ sɛbehle -wɛ 'ye Zake, "ne Zaa, Zebede 'yowlia -wa -noɔ 'awɔ Simɔ 'na 'nɔŋonya 'waa -wɛ, Zezu nɛɛ: Simɔ, te 'gu, bhliji "me -e "kɛ -ame 'nyakpa lo lale-.

¹¹ "Ne 'wa yi -lɔ gɔlo -cicɛku "nyia-, "ne -li 'na -ɛ -ko gɔlo "me -wɛ 'wa 'yi -lɔ yɔko 'bha- "ne 'wa yi -lɔ Zezu gɛlele-.

Zezu -yamalea 'zlɛlɔbhɔnyɔ

¹² -Sɔɔdɛku Zezu -ko 'awɔ 'du "yitɛ -bholo "me -wɛ, 'nyɔkpɔ -bholo -ye 'zlɛ slu- "ku yi -lɔ lɔbhɔ fɔtɔle-. 'Ɔ 'ye- lɛ Zezu 'ylime ne, "ne 'ɔ yi -lɔ 'klo siɛ 'gbli-, "ne 'ɔ yu -lɔ bhubhɔ nɛɛ: «Anyinɛnyɔ, -e 'cɛ 'yɔbhɔ ne, -e 'bhɛle- -e "kɛ -ame 'wlele "zoa-.»

¹³ Zezu -glo sɔ "me, 'ɔ -zo kɔ, 'ɔ nɛɛ: 'E 'yɛbhɛ, plɛ 'wlele. "Ɛ doɔ cuu, 'ɔnɛɛ 'zlɛ -bhiɛ.

¹⁴ "Ne Zezu yu -lɔ bhulɛle nɛɛ: Te -kɛ 'nyɔkpɔ 'de -sɛle: Me cuu, -se -e "kɛ -eyi bɔbɔnyɔ 'ylime tua- -se bɔbɔli -ye Moyize no -gbɔ 'wa -sɛ -wɛ, 'wlɛ-. -Se 'nyakpa "kɛ 'sɛ yibhlele- -gbɔ -e -yamale 'diɛɛ.

¹⁵ 'Wa sɛ 'awɔ 'ɔnɛɛ 'de kpɛnyee, "ne 'nyakpa 'na -zakpɛ -blu -se 'wa "kɔ 'yukwli fo, -se 'wa "kɛ yamale-.

¹⁶ "Ne 'ɔ 'yi -lɔ "ɛ -dee 'wa -ko -wɛ 'bha-, "ne 'ɔ yi -lɔ 'kɔsɛku bhubhɔ -ka me.

Zezu -yamalea gbolulɔbhɔnyɔ

¹⁷ 'Yli -bholo "me, Zezu -ko 'awɔ slo dɛku, "ɛ 'nyakpa 'na -zakpɛ -wɛ "me 'ye Faliziɛnya "ne -Lɔsloanya -ko me 'awɔ -lɔ, 'wa 'bhale 'awɔ Galile -glɔ, Zude -glɔ "ne Zeluzalɛme. Lagɔ 'na 'bhɛloɛ -ko 'awɔ "ku za, 'ɔ 'yamalea 'awɔ gwizinya.

¹⁸ 'Wa 'na 'wolo, 'nyakpa -sule sokwli "me -gbolulɔbhɔnyɔ, 'wa 'tɛle -dee 'wa "kɛ ylɛle- "ne 'wa "kɔ Zezu 'dle "me 'sibha- -wɛ siɛ.

¹⁹ "Ɛ 'nyakpa 'na -zakpɛ -wɛ 'na 'ylime, 'wa "ne -dee 'wa "kɛ ylɛle- "ne 'wa "kɛ 'ple -yi, "ne 'wa yi -lɔ -bhudu 'wliji 'gblɛ, "ne 'wa yi -lɔ 'ɔnɛɛ gbɔto -gbɔto -dee 'wa di- nuɔ -wɛ ylɛlea-, "ne 'wa yu -lɔ Zezu 'dle "me 'piɛ.

²⁰ 'Ɔ 'ye lɛ 'wanɛɛ 'dleku kɛlesɛ 'ylime ne, 'ɔ nɛɛ: -Neɛ' 'nyinyonoli 'na gbo -bhiɛ.

²¹ -Lɔsloanya -nyɛ Faliziɛnya "bhaa 'wa lɛ -lɔ sɛne nɛɛ: 'Nyɔkpɔ 'na -ɔ ziɛ bhɔ doɔ Lagɔ 'dii 'a? 'Nyɔkpɔ 'na -ɔ 'bhɛle- bhɔ -se 'ɔ "kɛ 'ɔluyu -nyɔkpɔ 'na 'nyinyonoli "ku "titli 'a? 'Ɛ "mɔ Lagɔ -bholo -kpee yɔ.

²² -Mɔ, Zezu -yi 'wanɛɛ 'dlepɔsɛ za, 'ɔ yua -lɔ bhulɛle- nɛɛ: Sɔɔbɛɛza 'a 'pɔ bhɔ "ɛ soɔ 'dle 'a?

²³ -Bɛɛ' 'na -ɛ yɔle- bhɔ "me "ne -ɛ zi "ɛ -ɛwɛ "ku 'a? 'Wa kɛ -no nɛɛ: -Neɛ' 'nyinyonoli 'na gbo bhiɛ- "ne 'wa "kɛ -no nɛɛ: "Libhi -neɛ' -gbɔɔto "ku -se me.

²⁴ "Naa-, 'a "kɛ 'sɛ yibhlele- -gbɔ 'Nyɔkpɔ Yowli -kɛ 'bhɛloɛ, -se 'ɔ "kɛ dodo ne "ku 'na 'nyakpa 'na 'nyinyonoli "ku "titli. "Ne 'ɔ yi -lɔ "ɛ gbolulɔbhɔnyɔ bhulɛle- nɛɛ: -Sɔ "ku, 'libhi -neɛ' sokwli "ku -se me sueme.

²⁵ "Ɛ 'doɔ cuu, 'wayi 'yliku "ku 'ye 'ɔ -sɔ -lɔ, "ne 'ɔ yi -lɔ 'ɔnɛɛ 'sokwli "ku 'libhi, "ne 'ɔ yi -lɔ sueme me, 'ɔ kwɔ 'awɔ Lagɔ 'ŋlu.

²⁶ Nyanɔ 'lɔbhɔa 'awɔ 'klekle, "ne 'wa kwɔ 'awɔ -lɔ Lagɔ 'ŋlu nɛɛ: «-A 'ya -zeka -li 'na -ɛ zi "ku 'ylime 'ye.»

Sɛne Zezu la- -lɔ Levi

²⁷ 'Ɛyi -wɛ 'ple- lɛ "bhuɔ ne, 'ɔ 'wlo- zɔ, "ne 'ɔ yi -lɔ -lɛposanyɔ Levi "ylime 'ye, 'ɔ gli 'ɔnɛɛ -lɛposa-bhudume "ne Zezu yu -lɔ bhulɛle- nɛɛ: 'Gɛle- -ame.

²⁸ 'Ɔ 'bha- 'ɔnɛɛ -li 'klekle yɔko, "ne 'ɔ 'yi -lɔ "ku -sɔ "ne 'ɔ yu -lɔ -gɛle.

²⁹ "Ne Levi yi -lɔ Zezu 'na za "ku 'za 'ɔnɛɛ sueme. 'Nyakpa -kwleyia 'wɔ "bhaa 'wa lili 'awɔ 'gɔme: -Lɛposanya "ne 'nyakpa 'na -vinoa.

³⁰ Faliziɛnya -nyɛ -Lɔsloanya "bhaa 'wa 'yɔbhɔ -lɔ Zezu 'na gɛlenya lo: Sɔɔbɛɛza -lɛposanya "ne "nyinyonolinonya "bhaa 'a li bhɔ "ne 'a nɔmɔ bha?

³¹ Zezu yua -lɔ bhulɛle- nɛɛ: -Wa -yɛ -wɛ 'waa- -na 'nyakpononyɔ 'siɛ tɛle-, -mɔ, 'gwizinya 'tɛle -lɔ 'nyakpononyɔ 'siɛ.

³² 'E -na "meŋwinɛlenya la -ka -yi, -mɔ, "nyinyonolinonya za 'e -yi -lɔ -se 'wa "kɛ kɔ 'bheliɔ-.

Zezu -bhulɛ 'nuɛteweli

³³ "Ne 'wa yi -lɔ Zezu bhulɛle- nɛɛ: «Zaa 'na gɛlenya te nuɛ "ne 'wa bhubhɔ, 'wa -nyɛ Faliziɛnya "bhaa, "ne -noa -wɛ li "ne 'wa 'nɔmɔ.»

³⁴ "Ne Zezu yua -lɔ sɛne bhulɛle- nɛɛ: 'Wa yi bhɔ 'nyakpa 'ŋukwɔjajo "klo lale- "ne 'ŋukwɔnyɔ yi bhɔ lɔbhɔ ko 'wa yi bhɔ nuɛ te 'a?

³⁵ -Mɔ, -zlewɛ yi 'ce yi "ne 'wa yu 'anye 'glɛme -sɛ, 'ɛnɛɛ zle -wɛ 'ye 'a "kɛ -lɔ nuɛ te.

Ganyidɛ-gɔgɔ "ne nolele.

³⁶ "Ne 'ɔ yua 'lelee -lɔ nunɛ 'pɔle nɛɛ: 'Wa -ka -la lɔkwi-lele 'na pɛɛ "ku 'libhi "ne 'wa 'cɛ lɔkwi-gɔgɔ 'na 'pɛɛ yɔko 'kplalea-, 'ɛ kɛ sɔbhɔ -ylɛle, 'lele yi lɔbhɔ 'to- "ne -gɔgɔ yi 'yɔlɔ-.

³⁷ Nyɔkpɔ te 'ce -la 'ganyidɛ-gɔgɔ duvɛlele "me "zo, duvɛlele yi "ɛ ganyidɛ-gɔgɔ 'wlɛ- "ne "ɛ duvɛ yi 'siɛ 'slu.

³⁸ -Mɔ, 'wa "zo duvɛlele ganyidɛlele "me.

³⁹ 'Nyɔkpɔ 'na -ɔ 'nɔmɔ no -gɔgɔ -wɛ, 'ɔ -ka -la 'lele "nɔmɔ, "naa-, sɛne 'ye 'ɔ lɛ -lɔ nɛɛ: -Gɔgɔ 'nɛne -lɔ kpɛnyee.