Luke 23 - Nouveau Testament bété de Gagnoa

'Wa -kɔme Zezu Pilate 'na dɛce

¹ -Wa -ko 'awɔ lɔbhɔ -wɛ -sɔ "ku 'klekle "ne 'wa yi -lɔ Zezu Pilate kɔme-.

² 'Wa -ylɛ lɛ lɔbhɔ ne, "ne 'wa yi -lɔ Zezu gbo 'wlime "gbli nɛɛ: 'Nyɔkpɔ -ɔ nyimɔ 'anyɛɛ -glɔ, 'ɔɔ ne lɛ. 'Ɔ nɛɛ: 'Wa te 'Kamalenyɔ Sezale kɔ -lɛpo 'peɛle "ne 'ɔ la -lɔ 'ɔyi 'Fuɔnyɔ "ne -klɔgbɔnyɔ.

³ "Ne Pilate yu -lɔ lo 'yɔbhɔ nɛɛ: «Zufonya 'na -klɔgbɔnyɔ 'ye -e -noɔ bha?» Zezu nɛɛ: «-Mɔɔ gbɔ -lɔ sɔbhɔ, -eyi 'nabhɛ.»

⁴ Pilate -glɛ bɔbɔnya "yitia "klo 'wa -nyɛ "ɛ -zakpɛ -wɛ "bhaa. 'Ɔ nɛɛ gbo 'na -ɛ "kɛ "ɛ 'nyɔkpɔ ne -jiɛ "me 'pɔ, 'e "ne 'yli -gɛ:

⁵ «"Ɛ 'nyakpa -wɛ "ne "ku 'ŋunu-, ŋwɛnɛɛ: 'Ɔnɛɛ 'sloasɛ sɛ kpokpo glu -glɔnya 'glɛme. 'Ɔ 'bhale- Galile -kaa "ne 'ɔ sibhɔ- -lɔ Zude 'klekle "ku "ne 'ɛ yi -lɔ dɛne 'ylɛ.»

'Wa -kɔme Zezu Elode 'na dɛce

⁶ "Ɛ weli -wɛ kɔ 'ye Pilate 'yɔbhɔ- -lɔ lo nɛɛ: «Galile 'na 'nyɔkpɔ 'ye 'ɔ -noɔ bha?»

⁷ Ŋwɛnɛɛ: -Ɛɛ Zezu Galile 'na 'nyɔkpɔ yɔ -lɔ. -Mɔ, Elode 'kamalea -lɔ "ɛ 'du -wɛ, "ne 'ɔ -ko -me nɛ Zeluzalɛme 'ɛ dɛ -wɛ "ku, 'ɛ za Pilate -kɔme -lɔ Zezu Elode 'na dɛce.

⁸ Elode 'ye- lɛ Zezu 'ylime ne, 'ŋwɛnɛ 'lɔbhɔ- -lɔ, "naa-, 'ɔ 'yɔbhɔ nɛ -gbɔ 'ɔ "kɛ nɛ Zezu 'ylime 'ye, -li 'ye 'ɔ no -wɛ za. "Ne 'ɔ -kɛ nɛ 'dleku -gbɔ Zezu yu nɛ zɛzɛ -bholo 'yliku 'pɔle.

⁹ Elode 'yɔbhɔyɔbhɔle nɛ Zezu "ku lo, -mɔ, 'ɔyi, 'ɔ "ne -sɛ nɛ keyi.

¹⁰ Bɔbɔnya "yitia "ne -Lɔsloanya -ko -me nɛ lɔbhɔ, 'wa gbli nɛ Zezu gbagbagbo "yitɛ 'wlime.

¹¹ Elode -nyɛ 'ɔnɛɛ "slojanya "bhaa 'wa ziɛ Zezu 'dii, 'wa silo, 'wa -plɔ -klɔbgɔnyɔ 'na 'koti "me, "ne 'wa yu -lɔ Pilate 'na dɛce kɔme-.

¹² 'Ɛnɛɛ zle -wɛ, Elode "ne Pilate -wa -gblegblele 'awɔ -wɛ "zo- 'awɔ 'titoa.

'Wa "kɛ Zezu 'lɔbhɔ za, 'wa 'gblu- gbo 'wlime

¹³ Zaa, Pilate lale- bɔbɔnya "yitia 'na "cifia, 'duslunya "ne 'dunya -zejilɛ "ku.

¹⁴ "Ne Pilate yua -lɔ bhulɛle- nɛɛ: «'Anye -nɛme lɛ -ame "ɛ 'nyɔkpɔ ne -gbɔ 'ɔ 'nyimɔ 'nyakpa 'wlime. -Mɔ, 'anye 'yliku -ame 'nabhɛ 'e 'yɔbhɔ- lo. 'E "no gbo -ye 'a 'gblu 'wlime "ne 'ɛ "kɔ -jiɛ "me "pɔ -wɛ "me -ylele.

¹⁵ Sɔbhɔ 'ɛ -ko -me -lɔ Elode 'dleku za 'ɔ -nɔmo -lɔ -anye. 'Nyɔkpɔ ne "ne -bɛɛ' 'na -ɛ "kɛ gbɔ "ne 'wa "kɔ 'lɔbhɔ "ne 'ɔ "kɛ "ku -no.

¹⁶ Zaa, 'wa "kɔ 'sɛpɔ, -se 'e "kɔ 'yi 'tale-.» [

¹⁷ -See Paake 'na -jajo yi 'ce -wɛ sɔbhɔ Pilate sɛ 'ce -lɔ -jiɛnyɔ -bholo -jiɛ "me]

¹⁸ "Ne 'wayi 'klekle yi -lɔ "me 'kpa: 'Lɔbhɔ, -se 'ɔ "ku! -Sɛ Balabase -jiɛ "me.

¹⁹ 'Wa 'pɔ- 'awɔ Balabase -jiɛ "me, "naa-, 'ɔ 'lɔbhɔ- 'awɔ 'nyɔkpɔ "ne 'ɔ "ku- -zle 'wa -mele 'awɔ wlomɛnya kpokpo sɛku lo.

²⁰ "Ne Pilate 'yɔbhɔ nɛ -gbɔ 'ɔ "kɛ Zezu 'yi 'tale- za 'ɔ yua nɛ -lɔ "kusɔ lo 'yɔbhɔle.

²¹ -Mɔ "me 'wa 'kpa- -lɔ nɛɛ: «Kolo- klowa "klo, kolo- klowa "klo.»

²² Pilate 'yɔbhɔloa- "ku ta dɛku lo nɛɛ: "Nyɛnye 'na -ye "ɛ 'nyɔkpɔ ne -no bhɔ -tia 'a? -Mɔ, 'ɛ kɛ -ame yɔ, 'e "ne gbo 'na -ɛ "kɔ 'lɔbhɔ "ne 'ɔ "kɛ "ku -wɛ -yi, zaa 'e "kɛ "slojanya bhulɛle- -se 'wa "kɔ 'sɔpɔ, -se 'e "kɔ 'yi 'tale-.

²³ "Ne 'wa yi -lɔ "me 'kpa "yitɛ "ku, kolo- klowa "klo.

²⁴ Zaa, Pilate nɛɛ -see 'a 'yɔbhɔ -wɛ, 'a "zo sɔbhɔ.

²⁵ 'Ɔ -sɛ "bhle Balabase -ɔ -ko nɛ 'nyakpalɔbhɔjiɛ "me -wɛ. "Ne 'ɔ yi -lɔ Zezu "slojanya kɔ 'je, 'ɔ nɛɛ: -See 'a 'yɔbhɔ -wɛ, 'a 'sɔ sɔbhɔ!

'Wa -kɔme Zezu -se 'wa "kɔ klowa 'klo kole-

²⁶ "Slojanya -lo kɔme- dɛku, "ne Silɛne 'na Simɔ 'bha nɛ 'kwlɛ "me "ne 'wa yi -lɔ "ku 'sibhɔle-. 'Wa -bhlulo "ku "ne 'wa yu -lɔ Zezu 'na klowa kɔ 'je -gbɔ 'ɔ 'slu- -se 'ɔ gɛle- Zezu.

²⁷ 'Nyakpa 'na -zakpɛ -gɛlo 'awɔ, "ne 'ŋwenea 'tutu me 'awɔ, "ne 'wa 'sɛpɔsɛpɔle me 'awɔ yɔko "me.

²⁸ "Ne Zezu yi -lɔ 'beme 'wolo-, "ne 'ɔ yi -lɔ 'ŋwenea bhulɛle- nɛɛ Zeluzalɛme 'na 'ŋuyua, 'a te 'neɛ za tu, -mɔ 'a tu 'ayi za "ne 'anyɛɛ yua za.

²⁹ "Naa- lɔbhɔ yi 'ce ylɛ "ne 'wa yi 'ce no nɛɛ: 'Ŋwɛnɛ 'lɔbhɔ- 'ŋwenea 'na -wa "ne 'gwɛle- -wɛ, "ne -wa -na 'ce yu yle- "ne -wa -na 'ce lɛ yu 'nyea- gou -wɛ.

³⁰ Lɔbhɔ 'wa "kɛ 'ce -lɔ tlo "yiti bhulɛle- nɛɛ: 'A blile- 'se -anye "ku, "ne gaga 'a zizi- 'se -anye "ku.

³¹ "Naa-, 'wa kɛ soɔ suyiyɛ 'sa, -see 'gbasɔ -nɛ "kɛ bhɔ "me ko -a?

³² "Slojanya 'nɛme- 'awɔ 'nyakpa -gbeyia "sɔ -se 'wa "koa klowa "klo kole -me Zezu "bhaa.

'Wa -kole Zezu klowa "klo

³³ 'Wa -yle lɛ -dee 'wa la 'wlikwɛ 'na dɛ, "ne 'wa yi -lɔ Zezu klowa "klo kole- 'ɔ -nyɛ "ɛ 'nyakpa -gbeyia "sɔ -wɛ "bhaa. -Bholo -ko 'ɔnɛɛ lilikwlɛ -gbɔsɔ "ku, "ne "sɔnɔ -ko kɔpɛ -gbɔsɔ "ku.

³⁴ Zezu la- -lɔ sɛne nɛɛ: -A To, "pɔ -kɛ 'wanɛɛ nyɛzedle, -mɔ 'wa "ne -kɛ -ye 'wa no -yi. 'Wa "kɛ -kɛ 'ɔnɛɛ 'koti "ku 'libhi za "ne 'wa 'yi -lɔ -negbe "ku "pɔ.

³⁵ "Ɛ 'nyakpa -wa -ko -me 'awɔ lɔbhɔ -wɛ wolo 'awɔ Zezu "ku, "ne bɔbɔnya 'na "cifia 'silo 'awɔ -lɔ nɛɛ: 'Ɔ 'fuɔ- 'se 'nyakpa 'na -bedia ne, 'ɔ 'fuɔ -me 'se 'ɔyi 'ɔyigɛsɛ, 'ɔ kɛ 'diɛɛ Lagɔ 'na 'fuɔnyɔ -ye 'ɔ -sɛ lɔbhɔ yɔ.

³⁶ "Ne "ɛ "slojanya -wa sile mo 'lelee -wɛ 'nyiɔ- -lɔ yɔko "ne 'wa yu -lɔ 'cuculuno nuɔ kole-. Ŋwɛnɛɛ:

³⁷ -E kɛ 'diɛɛ Zufonya 'na -klɔgbɔnyɔ yɔ, 'fuɔ- 'se -eyi, -eyigɛsɛ.

³⁸ 'Wa kɛle- 'awɔ supɛ "klo Zufonya 'na -klɔgbɔnyɔ "ne 'wa yu -lɔ 'wlime glɛ.

³⁹ "Ɛ 'nyakpa -gbeyia "sɔ -ye 'wa -kole -me 'awɔ klowa "klo -wɛ 'na -bholo 'ylu mo 'lelee. 'Ɔ nɛɛ: «-E "ne bhɔ "ɛ 'fuɔnyɔ yɔ? 'Fuɔ 'se -eyi -se -e "kɛ -anye 'fuɔ -me.»

⁴⁰ -Mɔ, -vinɔ -wɛ yu -lɔ bhulɛle- nɛɛ: «-E "ne 'gu bhɔ Lagɔ -gɛ 'a? -Neɛ' -ye -e -no -wɛ -nyɛ 'ɔnɛɛ "bhaa -bhele yɛ bha?

⁴¹ -Anye, -anye -nɛ -ŋwa lɔbhɔ, -ye -a -no 'na -jiɛ 'ye -a 'plɛ -lɔ. -Mɔ, 'ɔyi, 'ɔ "ne nyɛnye -no!»

⁴² "Ne 'ɔ yu -lɔ bhulɛle- nɛɛ: «Zezu "pɔ -kɛ -ame "ku 'dle -zle -e "kɛ -kɛ -klɔgbɔsɛ yi.»

⁴³ Zezu nɛɛ: «Gbɛklɛklɛ 'ye 'e bhulɛle- -lɔ -eyi, -zeka ne "me 'e -nyɛ -eyi "bhaa -a -ko Lagɔ yɔko.»

Zezu -bhli 'nyɔŋo

⁴⁴ 'Ylokwɛ -zɛle "me, ylo 'nyimɔ- "ku. Titiɛ -yi 'du 'klekle "ku -kaa "ne 'ɛ sibhɔ- "kugbedɛ 'gle 'na tanɛ "ku.

⁴⁵ Ylo -bhli "ne lokwi "yitɛ -ɛ -ko "mebhubhɔlebhudu "me -wɛ yi -lɔ pɛ "sɔ "me ylɔ-.

⁴⁶ "Ne Zezu yi -lɔ "me 'kpa "yitɛ "ku, 'ɔ nɛɛ: «-A To, -neɛ' 'kwlɛ "me 'ye 'e 'piɛ -kɛ -lɔ 'neɛ 'wugɔŋo.» "Ɛ weli -wɛ kɔ, "ne 'ɔ yi -lɔ nyɔŋɔ bhli.

⁴⁷ "Slojanya 'na "cifi "kɛ -ɛ -ylele lɔbhɔ -wɛ 'ylime 'ye ne, 'ɔ 'kwa- Lagɔ 'ŋlu, 'ɔ nɛɛ: «"Ɛ 'nyɔkpɔ ne, Lagɔ 'na "meŋwinɛlenyɔ 'ye 'ɔ -noɔ nɛ -kɛ 'se -lɔ 'diɛɛ.»

⁴⁸ "Ne 'nyakpa 'klekle -wa 'yɔbhɔlo- yɔko 'wli, "ne 'wa 'ye- -me "ɛ -ye 'wa -no "ku -wɛ 'ylime -zi 'awɔ 'wlizɔ, 'wa tutu me 'awɔ.

⁴⁹ 'Ɔnɛɛ 'titoa "ne 'ŋwenea -wa -gɛlelo nɛ -sɔɔdɛku 'ɔ -ko nɛ Galile -wɛ tlo nɛ dɛ "ne 'wa 'ylɛ nɛ -lɔ -ɛ ylɛle nɛ lɔbhɔ -wɛ.

'Wa 'piɛ- Zezu -biɛ "me

⁵⁰ "Ne 'nyɔkpɔ -ye 'wa la Zozɛfo -wɛ, gbobhlenya 'na -zakpɛ "yitɛ "me 'ye 'ɔ -ko -me 'awɔ -lɔ. "Ɛ 'nyɔkpɔ -wɛ -ko 'awɔ 'nɛne kpɛnyee "ne 'ɔ 'ŋwinɛle- 'awɔ Lagɔ 'yliku "me.

⁵¹ 'Ɔ "ne 'awɔ 'wanɛɛ "zosɛ -nyɛ 'wanɛɛ nosɛ 'wɔ "bhaa "ku 'ŋunu-. Zufonya 'na 'du -ye 'wa la Alimate 'na 'nyɔkpɔ yɔ 'awɔ -lɔ, "ne 'ɔ -wo -me 'awɔ -lɔ Lagɔ 'na 'Kamalezikpɛ.

⁵² 'Ɔɔ -me -lɔ Pilate 'na dɛce, "ne 'ɔ yi -lɔ Zezu 'na -gɛzɛ lo 'yɔbhɔ.

⁵³ "Ne 'ɔ yu -lɔ klowa "klo zɔ kwilia-, "ne 'ɔ yu -lɔ lokwi bubɔ-, "ne 'ɔ yu -lɔ -biɛ -ye 'wa 'bhlu- tiyi -gbogbo "me, "ne 'wa -na 'ce -lɔ "bhle 'nyɔkpɔ 'piɛ -wɛ "zo.

⁵⁴ -Gbajɛ 'na 'yli -to -la "bhle -bholo, -dee 'wa jijalea -jajo 'na -li 'wli -wɛ.

⁵⁵ Galile 'na 'ŋwenea -wa -gɛlele 'awɔ Zezu -wɛ, -bhli Zozɛfo 'beku. "Ɛ 'ŋwenea -wɛ -kabha 'awɔ -see 'wa 'piɛ- Zezu 'na -gɛzɛ -wɛ 'yli.

⁵⁶ "Ne 'wa yi -lɔ 'wli zɔzi -se 'wa "kɛ -lasiklɔ -nyɛ 'kpe "bhaa 'wli 'jijalea-, 'ɛ -nyɛ -li -ye 'wa "kɔ yɔko "zo -wɛ "bhaa. -Gbajɛzle 'ɛ 'ŋwenea -wɛ 'nyɔpɔ- -see 'wanɛɛ -gbajɛ lɛ -wɛ.