Luke 15 - Nouveau Testament bété de Gagnoa

Zezu "ne 'nyinyonolinonya

¹ -Lɛposanya "ne 'nyinyonolinonya 'klekle 'nyiɔ nɛ Zezu yɔko, -se 'wa "kɔ 'yukwli 'fo.

² "Ne Faliziɛnya -nyɛ -Lɔsloanya 'wɔ "bhaa 'ŋuŋwaŋuŋwale nɛ -lɔ "me, 'wa nɛɛ: «'Nyɔpkɔ ne -su nyinyonolinonya 'tee "ne 'ɔ -nyɛ 'wayi 'wɔ "bhaa lili 'gɔme!»

Wli -ɔ -bhli "ne -ye 'wa -yle 'na nunɛ

³ "Ne Zezu yua -lɔ nunɛ ne 'pɔle nɛɛ:

⁴ «'Anyɛɛ 'glɛme 'na 'nyɔkpɔ kɛ wlia 'na glo 'umgbu -kɛ, "ne 'wanɛɛ 'glɛme 'na -bholo kɛ -bhli, 'ɔ yi 'kwlɛ "me "ɛ wlia 'na glo -mɔɔnɔ yɛ kogbɔ fɛɛnɔ -wɛ 'tle-, "ne 'ɔ "kɛ -lɔ -bholo -kpee -ɔ -bhli -wɛ 'siɛ tɛle- -ka me, -kaa "ne 'ɔ "kɔ -lɔ yle.»

⁵ "Ne 'ɔ "kɔ -yle, 'ɔ lubhu "ku 'ŋwɛnɛsɛ, "ne 'ɔ 'piɔ -lɔ -bolo "me.

⁶ 'Ɔ kɛ sueme -ylɛ cuu, 'ɔ la 'ɔ 'titoa "ne 'ɔnɛɛ dɛglinya, "ne 'ɔ bhulɛloa -lɔ nɛɛ: «'A -ya no 'ŋwɛnɛ, "naa-, 'e -yle 'neɛ 'wli -ɔ -bhli nɛ -wɛ!»

⁷ 'E bhulɛle 'anye nɛɛ: Sɛbhele -wɛ 'ye 'ɛ "kɛ -lɔ ko -me "nɔgɔ "me. 'Ŋwɛnɛ yi 'ce 'kpɔmale-, nyinyonolinonyɔ -bholo kɛ 'ce kɔ 'bheliɔ-, "ne 'ɛ yi 'nyakpa -glo -mɔɔnɔ yɛ kogbɔ fɛɛnɔ -wa ŋwinɛle- "me "ne -wa "ne tɛle- kɔ -bheliɔ 'siɛ -wɛ nɛ "ku zi.

'Tama -ɛ -bhli "ne 'wa -yle -wɛ 'na nunɛ

⁸ "Ne 'ɔ yi -lɔ sɛne bhulɛ nɛɛ: 'Ŋɔnɔ kɛ 'tamayɛ kogbɔ -kɛ "ne -bholo kɛ -bhli, 'ɔ "ne 'di bhɔ 'napɛ 'yli "ne 'ɔ "kɛ -bhudu "me yepe-, "ne 'ɔ 'cɛ 'siɛ tɛle- 'tee -kaa -se 'ɔ 'cɛ yle.

⁹ -Sɔɔdɛku 'ɔ 'cɛ -yle ne, 'ɔ la 'ɔnɛɛ 'bheyia -nyɛ dɛglinya "bhaa "ne 'ɔ bhulɛloa -lɔ nɛɛ: 'A yi! 'A yi! 'A -ya no 'ŋwɛnɛ. 'E -yle "ɛ 'tama -ɛ -bhli nɛ -wɛ.

¹⁰ Sɛbhelɛ -wɛ yɛ -lɔ, 'e bhulɛle 'anye nɛɛ: -Sɔɔdɛku 'nyinyonolinonyɔ -bholo 'bheliɔ- kɔ, "nɔgɔzilia 'wɔ no "nɔgɔ "me 'ŋwɛnɛ.

'Widiyu -ɔ -bhli 'na nunɛ

¹¹ Zezu -bhulɛ 'lelee -lɔ nɛɛ: «'Nyɔkpɔ -bholo -kɛ 'awɔ 'widiayua "sɔ.

¹² Tekeyinɔ -bhulɛle -lɔ 'ɔ 'to nɛɛ: -A 'to, 'je -ame gubeli 'na -ɛ "kɛ 'yli -bholo "me 'neɛ "zo -wɛ kɔ.» "Ne 'ɔ 'to yi -lɔ "ɛ -li -wɛ 'klekle 'dli-.

¹³ 'Yli yɛ 'ple- lɛ "bhuɔ ne, yu 'na tekeyinɔ -wɛ 'pɔ- 'ɔnɛɛ -li 'klekle 'pɔlo "ku, "ne 'ɔ yi -lɔ 'lɛjɛ "me me. "Bhle -ce 'ye 'ɔ -no -lɔ zikpɛ, "ne 'ɔ yi -lɔ 'ɔnɛɛ 'dlasi -kwleyi 'nyimɔ.

¹⁴ 'Ɔ 'cɛ 'klekle 'ple "bhuɔ ne, 'ɔ "ne la -bɛɛ' -kɛ "ne guŋɔŋo yi -lɔ "ɛ zoku -wɛ yi. 'Ɔ "ne -da -bɛɛ' 'na 'yɛ -bholo -kɛ.

¹⁵ Lɔbhɔ 'ye 'ɔ -me -lɔ "ɛ zoku -wɛ 'na 'nyɔkpɔ -bholo libhɔ -zɛlɛ -ka, "ne "ɛ 'nyɔkpɔ -wɛ yu -lɔ 'kwlɛ "me kɔme -se 'ɔ "kɛ kokotia "klo kole-.

¹⁶ "Ɛ teyigbɔ ne yɔbhɔ nɛ -gbɔ 'ɔ "kɛ "ɛ kokotia 'na lilɛ li -me -mɔ, 'ɔ "ne nɛ "nyɛnyɔ -kɛ.

¹⁷ Lɔbhɔ 'ye 'ɔ 'pɔ- -lɔ 'dle -vlee nɛɛ: -Ame 'to 'na libhɔnonya 'klekle li "ne 'wa siɛle! "Ne -ame 'e "kule lɛ mɛne ŋɔŋo za!

¹⁸ 'E yi -a 'to lo mele- "ne 'e yu bhulɛle- nɛɛ: -A 'to, 'e -nyimɔle Lagɔ -nyɛ -eyi "bhaa weli yɔko.

¹⁹ 'E "ne -da -neɛ' yu "ku -ŋwa, zaa, -yaya slu -ame -neɛ' libhɔnonyɔ 'nasɛ.

²⁰ "Ne 'ɔ yi -lɔ "ku -sɔ, "ne 'ɔ yi -lɔ 'ɔ 'to "bhle yle. 'Ɔ 'tlo nɛ dɛ "ne 'ɔ 'to yu -lɔ 'ylime 'ye, "ne 'nyɛze yu -lɔ 'lɔbhɔ. "Ne 'ɔ yi -lɔ guɔ- "ne 'ɔ yu -lɔ lo mele-, "ne 'ɔ yu -lɔ "ku tule-.

²¹ "Ɛ yu ne nɛɛ: -A 'to 'e -nyimɔle Lagɔ weli yɔko "ne 'e -nyimɔle -eyi weli yɔko. Zaa, 'e "ne -la -neɛ' yu la -sɛ -kɛ.

²² -Mɔ 'to -bhulɛle 'ɔnɛɛ 'kulɔbhɔnya nɛɛ: 'A -nɛme -dɛme 'koti "namanɔ -wɛ, 'a 'plɔ- "me, 'a "zo 'kɔneyɛ 'sɔ "me, -se 'a 'pɔlo -kpɔklo 'bho "me.

²³ 'A -nɛme -dodobhli, 'a 'lɔbhɔ, 'a -ya li, 'a no -jajo.

²⁴ "Naa- 'neɛ yu -ɔ -ko dɛne, 'ɔ "ku nɛ, "ne 'ɔ yi -lɔ glɔ-. 'Ɔ -bhli nɛ "ne 'e yu -lɔ yle. "Ne 'wa yi -lɔ -jajo -no -ku 'ci.

²⁵ Yu 'na "yitɔnɔ -ko nɛ 'kwlɛ "me. -Sɔɔdɛku 'ɔ 'bha nɛ "bhle "ne 'ɔ 'nyiɔ nɛ -bhudu yɔko, 'ɔ 'no gbɔgɔ -li "ne lo 'ye -jiji "me.

²⁶ "Ne 'ɔ yi -lɔ "kulɔbhɔnya 'na glɛme "me 'na -bholo la "ne 'ɔ yu -lɔ -ɛ -ko lɔbhɔ lo 'yɔbhɔle.

²⁷ 'Kulɔbhɔnyɔ nɛɛ: -E "nɔwli -ylɛ -lɔ 'du. -E 'to 'lɔbhɔ- "ɛ -dodobhli -wɛ 'ɔnɛɛ za, "naa-, 'ɔ yowli -ylɛ 'du 'tee zɛ.

²⁸ Lɔbhɔ 'ye yu 'na "yitɔnɔ 'pɔ- -lɔ 'kɛle "ne 'ɔ nɛɛ 'ɔ -ka nɛ sueme 'wlo. 'Ɔ 'to 'wlo- zɔ "ne 'ɔ yu -lɔ bhubhɔ- -gbɔ 'ɔ plɛ sueme,

²⁹ -mɔ yu -bhulɛle 'ɔ 'to nɛɛ: 'E lɔbhɔ -eyi "ku 'na "zo -kwleyi ne lɛ. 'E -na 'ce -eyi 'plome -sɛ. -Mɔ -e -na 'ce -ame wli -yoyu "nyɛ -se -alua "bhaa -a "kɛ -jajo no.

³⁰ -Mɔ, -neɛ' yu -ɔ -ko dɛne -ylɛ lɛ 'du, 'ɔyi 'na -ɔ -nyimɔ -neɛ' -li 'widiaseseliaŋuyua "bhaa -wɛ, 'ɔnɛɛ za -e 'lɔbhɔ- -lɔ "ɛ -dodobhli -wɛ.

³¹ To nɛɛ: 'Na yu 'e -nyɛ -eyi "bhaa dɛne -a -ko lɛ. "Ne -ye 'e -kɛ 'klekle -wɛ -neɛ' yɛ -lɔ.

³² -Mɔ, -zeka "ne "me, -a yi 'na -jajo "ne 'ŋwɛnɛ no. "Naa-, 'e "nɔwli -ɔ -ko doɔ -wɛ "ku- nɛ, "ne 'ɔ yi -lɔ glɔ-. 'Ɔ -bhli nɛ 'kwlɛ "ne 'ɔ yi -lɔ yleɔ-.