Luke 11 - Nouveau Testament bété de Gagnoa

Zezu -sloa 'ɔnɛɛ gɛlenya bhubhɔsɛ

¹ Zezu -ko 'awɔ dɛne -bholo bhubhɔ- -dɛku, 'ɔ bhiɛ- lɛ kɔ ne, 'ɔnɛɛ gɛlenya 'na 'glɛme -na -bholo 'yɔbhɔ- -lɔ lo nɛɛ: «Anyinɛnyɔ, 'sloa- -anye bhubhɔsɛ, -see Zaa 'sloa- lɛ 'ɔnɛɛ gɛlenya -wɛ.»

² "Ne Zezu yua -lɔ bhulɛle- nɛɛ: «'A kɛ bhubhɔ- ne, 'a la sɛne: -A To, -neɛ' 'tɔ -ko wlewle. Gbɔ -se 'wa yibhlele-. -Nɛme -neɛ' 'kamaleɛ.

³ "Nyɛ -anye zle 'klekle "me 'na lilɛ.

⁴ 'Tale- 'anyɛɛ "nyɛnye 'yi, -see -a 'tale -alua nɛ 'yi -wɛ, te -kɛ -anye 'yi 'tale- -se -a te -kɛ "mebeamɔ bhlile-.

Tito -ɔ yi zlɛ -ka 'na nunɛ

⁵ "Ne Zezu yua -lɔ sɛne bhulɛle- nɛɛ: 'Anye 'glɛme 'na -bholo kɛ "bhle 'ɔ tito zlegbanyede -yle "ne 'ɔ kɔ -bhulɛle nɛɛ: -A tito "nyɛ -mlɛ -ame "fɔlɔ bhi ta.

⁶ Sɛko -wɛ, -a tito -bholo 'bha -glɔ "ku, 'ɔ -ylɛ -dɛme 'du "ne 'e ne lili -bɛɛ' -kɛ, -se 'e "kɔ "nyɛ.

⁷ "Ne -ɔ -ko "ɛ -bhudu "me -wɛ, kɛ -no nɛɛ: Te 'se -ame 'kpla-, -mɔ, 'e 'gba- 'neɛ -bhudu "bhuɔ, 'neɛ yua "bhaa -a 'pe- -duku, 'e -ka -la "ku -sɔ "ne 'e "kɛ -eyi "fɔlɔ kɔ 'je.

⁸ Gbɛklɛklɛ 'ye 'e bhulɛle -lɔ 'anye, 'bheyi -ylime 'ɔ "mɔ "ku -sɔ, "ne 'ɔ "mɔ -bɛɛ' kɔ 'je -ce, -see 'ɔ 'kplɔ -wɛ 'na 'ylime, 'ɔ yi "ku -sɔ "ne 'ɔ yu -ye 'ɔ 'yɔbhɔ -wɛ kɔ 'je -see 'ɔ "ne zu -li -wɛ za.

'A zlɛ-, 'a 'gbɔtɔ -gbulɛ, 'a tɛle- 'siɛ

⁹ "Ne -ame, 'e bhulɛle lɛ sɛne 'anye nɛɛ: 'A kɛ zlɛ-, 'wa yi 'anye "nyɛ. 'A kɛ lɔbhɔ 'siɛ tɛle-, 'a 'yi yle. 'A kɛ gbɔtɔ, 'wa yi lɔbhɔ kɛle-.

¹⁰ "Naa-, -ɔ zlɛ -wɛ, 'ɔyi 'wa "nyɛ -lɔ, -ɔ tɛle 'siɛ -wɛ, 'ɔɔ yle -lɔ, "ne -ɔ gbɔtɔ -gbulɛ -wɛ za 'wa kɛle -lɔ lɔbhɔ.

¹¹ 'Anye 'to 'wɔ 'glɛme 'na -ye yu kɛ bhɔ zibhi -zlɛ "ne 'ɔ 'jo bhɔ 'tɛbhɛ kɔ 'a?

¹² "Ne 'ɔ kɛ bhɔ nunuje -zlɛ "ne 'wa "kɔ bhɔ gagagbitɔ kɔ 'je 'a?

¹³ 'Anye, -wa -noɔ 'nyakpanyɛnyea 'waa -wɛ, 'a 'na "nyɛ 'se 'anyɛɛ yua -li 'na "namanɔ ne. Zaa 'ɛ "kɛ -la zi 'a To -ɔ -ko "nɔgɔ "me -wɛ, 'ɔyi 'ye 'a "kɛ zlɛ "ne 'ɔ -ka bhɔ 'anye Zuzu Wlewle "nyɛ 'a?

Zezu "ne Zuzu -nyɛnye

¹⁴ Zezu -kpeti zuzu -nyɛnye 'nyɔkpɔ -ɔ "ne 'di gbo -wɛ keyi. -Sɔɔdɛku "ɛ zuzu -nyɛnye 'bhɔ- keyi -wɛ, "ɛ -ɔ "ne 'di gbo -wɛ, 'ɔ bhulɛ nɛ. -Wa -ko lɔbhɔ 'klekle -wɛ geji 'bhoa- "ku.

¹⁵ -Mɔ, 'wanɛɛ 'glɛme 'na -bedia nɛɛ: Bɛlzebule, Zuzu -nyɛnyea 'na "cifi gbɔ -lɔ za 'ɔ "kpeti -lɔ Zuzu -nyɛnyea 'nyakpa keyi.

¹⁶ 'Wanɛɛ -wawɛ nɛɛ 'wa "kɔ "me 'bea-, za, 'wa 'yɔbhɔlo -lɔ zɛzɛ -ɛ 'bhale "nɔgɔ "me -wɛ.

¹⁷ -Mɔ, 'ɔ -yi 'wanɛɛ 'dlepɔsɛ za, 'ɔ nɛɛ: 'Du "yitɛ "me 'na 'nyakpa kɛ "me 'diɔle- ne, "ɛ 'du -wɛ bhiɛ 'ye 'ɛ bhiɛ -lɔ, -bhudu -wɛ 'wɔ yi bhli "ne lɔbhɔ yi -glɛgbɛ "zo.

¹⁸ Sata kɛ Sata keyi -glɛ ne, -see 'ɔnɛɛ 'du -wɛ "kɛ 'ce bhɔ ko 'a? "Naa-, sɛne 'ye 'a lɛ -lɔ nɛɛ: -Ame Bɛlzebule "me 'ye 'e 'kpetile -lɔ zuzu -nyɛnyea.

¹⁹ -Ame Bɛlzebule "me 'ye 'e kɛ zuzu -nyɛnyea 'kpetile- ne, 'anye 'anyɛɛ gɛlenya -wɛ -ye 'wa 'kpetiloa bhɔ "me 'a? 'Ɛza 'wa "kɛ 'ce -lɔ 'anyɛɛ gbobhlelenya "zo.

²⁰ -Mɔ, Lagɔ 'na 'tɔ "me 'ye 'e kɛ zuzu -nyɛnyea 'kpetile- ne, Lagɔ 'na 'Kamalezikpɛ 'wlo- -lɔ 'anye "ku.

²¹ 'Nyɔkpɔ 'na -ɔ 'tɛ- "me -wɛ kɛ 'ɔnɛɛ togwe -li 'gba, "ne 'ɔ kɛ 'ɔnɛɛ -bhudu -ko, 'ɔnɛɛ -li 'na -ye 'ɔ 'bhe- -wɛ "klo 'ye 'ɛ "kɛ -lɔ ŋwɛne-.

²² -Mɔ, 'ɔnɛɛ -ɔ 'tɛ- "me "ne 'ɔ -zu "ku -wɛ kɛ -yi, 'ɔ yi 'ɔnɛɛ togwe -li -ye 'ɔ -kɛ 'dleku -wɛ kɔ -sɛ, "ne 'ɔ 'yi dli. -Ɔ "ne -ame -gɛle -wɛ, -ame 'ye 'ɔ -gble -lɔ.

²³ -Nyɔ "bhaa 'a "ne "ku -kole -wɛ, -ame 'ye 'ɔ -gble -lɔ. -Ɔ "ne -ame -kwɛle "ne -a 'cɛ dɛbhele 'wli "zole- ne, 'gbelia 'ye 'ɔ gbelia -lɔ.

Zuzu -nyɛnye -sɔbhɔ 'nyɔkpɔ "me 'wli

²⁴ -Sɔɔdɛku zuzu -nyɛnye 'bha- 'nyɔkpɔ keyi -wɛ, -glɔ -bhli -ka 'ye 'ɔ me -lɔ, "ne 'ɔ tɛle -lɔ glidɛ siɛ. 'Ɔ "mɔ glidɛ -yle ne, 'ɔ no -lɔ nɛɛ: -Dee 'e 'bha- -wɛ 'ye 'e "kɛ -lɔ 'wlizɔ zi.

²⁵ 'Ɔ "kɛ 'du ylɛ-, 'ɔ 'na 'wolo, "bhle -yepeɔ "ne "bhle -jijaleɔ 'wli -meɔ.

²⁶ Sɔbhɔ za 'ɔ me -lɔ zuzu -nyɛnyea gbɔsɔ -wa -zu "ku -wɛ 'yukwɔ, "ne 'wa 'plɛ -lɔ "ɛ 'nyɔkpɔ -wɛ "me, "ne 'wa 'dilo -lɔ "me 'du. "Ne "ɛ 'nyɔkpɔ -wɛ 'na -see 'ɔ -ko -la dɛme -wɛ 'zi "ɛ tɛtɛnɛ 'ce "ku.

'Ŋwɛnɛ 'lɔbhɔ -wa 'fo Lagɔ 'na weli 'yukwli -wɛ

²⁷ "Ne Zezu -ko 'awɔ bhulɛ dɛku, "ne "ɛ -zakpɛ -wɛ "me 'na 'ŋɔnɔ -bholo 'kpa 'awɔ -lɔ "me nɛɛ: 'Ŋwɛnɛ 'lɔbhɔ 'ŋɔnɔ 'na -ɔ -gwɛle -eyi "ne 'ɔ 'nyea- -eyi -wɛ.»

²⁸ -Mɔ, Zezu nɛɛ: «'Ŋwɛnɛ 'lɔbhɔ -tia 'nyakpa 'na -wa 'fo Lagɔ 'na weli 'yukwli "ne -wa 'sɛ kɔ -wɛ.»

''Nyakpa 'yɔbhɔle- Zezu zɛzɛ

²⁹ "Ne 'nyakpa 'na -zakpɛ 'yɔbhɔlo 'awɔ yɔko 'wli za, Zezu yua -lɔ bhulɛle- nɛɛ: «'Wukwɛ 'na -ɛne, 'wukwɛ 'na "nyɛnye yɛ -lɔ. 'Ɛ 'yɔbhɔ zɛzɛ lo. 'E -koa zɛzɛ 'na -vinɛ 'ylime 'tua-, 'ɛ "mɔ Zonase -nɛ -wɛ yɛ.»

³⁰ "Naa-, -see Zonase -tuɔ 'awɔ Ninive 'na konya zɛzɛ 'ylime -wɛ, "ɛ 'wukwɛ ne 'na dɛku sɔbhɔ 'Nyɔkpɔ Yowli -nɛ "kɛ 'ce -lɔ ko -me.

³¹ Seba 'na -klɔgbɔŋɔnɔ 'bha- 'awɔ 'mɔblobhlu, "ne 'ɔ -yi 'awɔ 'nanenyɔ Salomɔ 'na bhulɛweli 'yukwli fo -ka. Gbobhlezle, "ɛ -klɔgbɔŋɔnɔ -wɛ yi "ku -sɔ 'ɔ -nyɛ "ɛ -zakpɛ ne "bhaa, "ne 'ɔ yua gbo lua-! -Ɔ -zi lɛ Salɔmɔ "ku -ko "ɛ dɛne.

³² Gbobhlezle kɛ 'ce -ylɛ, Ninive 'na 'nyakpa yi 'ce "ku -sɔ, 'wa -nyɛ -zakpɛ ne "bhaa, "ne 'wa yua gbo lua-. "Naa-, Ninive 'na 'nyakpa 'bheliɔ- 'awɔ kɔ, Zonase 'na bhulɛweli kɔ. "Ɛ -dɛne -ɔ -zi Zonase "ku -ko lɔbhɔ.

'Yli -noɔ -lɔ 'nyɔkpɔ 'na zle yɛ

³³ 'Wa "ne 'di -la 'napɛ 'yli "ne 'wa 'cɛ zizi ["ne 'wa 'cɛ -gbɔɔto zɔ "zo] -mɔ, "nɔgɔ "ku 'wa 'glɛ -lɔ, -se -wa plɛ "bhle -wɛ "kɛ zle 'ylime 'ye.

³⁴ 'Yli -noɔ -lɔ 'nyɔkpɔ 'na 'napɛ yɛ. Zaa, -neɛ' 'yli "mɔ 'gbape ne, -neɛ' ku 'klekle zle "ku 'ye 'ɛ -ko -lɔ. -Mɔ, -neɛ' 'yli kɛ 'gbape ne, -eyi 'nabhɛ titiɛ "me 'ye -e -ko -lɔ.

³⁵ 'Pɔ -na 'dle too, -neɛ' zle -ɛ -ko -eyi "me -wɛ "mɔ -kɛ titiɛ yɛ.

³⁶ Zaa, 'ɛyi 'nabhɛ 'e kɛ zle "ku -ko, "ne -neɛ' dɛne -bholo "mɔ titiɛ "me -ko ne, -eyi 'nabhɛ zle "ku 'ye -e -ko -lɔ sɛgbɛɛ 'napɛ -ɛ le gbɛklɛklɛ -wɛ.

-Lɔsloanya -nyɛ faliziɛnya "bhaa

³⁷ Zezu -bhulɛ lɛ "bhuɔ ne, faliziɛnyɔ yu -lɔ lilɛ "ku lale-, "ne 'ɔyi "bhaa 'wa yi -lɔ sueme me, "ne 'wa yi -lɔ lilidɛ 'plele.

³⁸ 'Ɛ -nyea faliziɛnyɔ, 'ɔ -gɛ 'yli -gbɔ Zezu "ne kɔ 'wɛle- "ne 'ɔ yi -lɔ li.

³⁹ "Ne "Bhenyɔ yu -lɔ bhulɛle- nɛɛ: «-Dɛmeda 'anye faliziɛnya, 'baa 'na keyi "ku 'ye 'a 'wɛle -lɔ, -mɔ, 'anyɛɛ 'mene 'yiɛ -didi, konyinɛ, tɛtɛ -nyɛ zizi "bhaa "ku.

⁴⁰ -Wa "ne nɛ 'wanye -lɛ! -Ɔ no "ɛ keyi "ku -wɛ, 'ɔɔ "ne bhɔ 'ɛ 'mene -wɛ -no -me?»

⁴¹ Zaa, -ye -a -kɛ -wɛ, 'a 'nyɛ 'alua -se 'a "kɛ 'wlele ko.

⁴² -Mɔ, 'Kpilɛkpilɛ 'ye 'a lale -kɛ -lɔ 'ayi "ku 'anye faliziɛnya, 'a 'nyɛ lasiklɔ "ne -gwe "ne -ɛ mi 'lɛɛ "bhueyi "me 'klekle 'na 'dime 'a 'ze kɔ "ne 'a 'tale Lagɔ 'na "meŋwilezikpɛ "ne Lagɔ 'na wamaleɛ yi. 'Ɛyi -wɛ 'ye 'a "kɛ -lɔ no, "ne 'a 'plɛle -lɔ 'yɛle "ku.

⁴³ -Kpilɛkpilɛnya 'ye 'a -noɔ -lɔ 'anye faliziɛnya, 'anye -wa -wa "mebhubhɔlebhudu "me 'na tɛkɛ -kpiɛ 'na "ku -gliɛ. "Ne 'a kɛ 'wli 'yɔbhɔ, 'a nɛɛ 'wa la 'anye -a 'bhɛle- -zejilɛ.

⁴⁴ 'Kpilɛkpilɛ 'ye 'a lale -kɛ -lɔ 'ayi "ku, 'anye -ko sɛgbɛɛ -biɛ -ye 'wa 'nɔŋo "klo "ne 'wa "ne -see 'wa 'nɔŋo- 'klo -yi.

⁴⁵ "Ne -Lɔslonyɔ -bholo yi -lɔ Zezu bhulɛle- nɛɛ: «"Bhenyɔ "ɛ -neɛ' -see 'e 'bhulɛ -wɛ, -anye 'ye -e 'ylime -lɔ.»

⁴⁶ "Ne Zezu yi -lɔ 'gbo 'di nɛɛ: «'Anye -Lɔsloanya kpilɛkpilɛnya 'ye 'a -noɔ -lɔ, 'anye -wa 'jilɛ 'alua 'gbapi 'wli, "ne 'anye 'nabhɛ 'anyɛɛ 'sɔwleyɛ "ne 'bhɛle- "ne 'ɛ 'cɛ kɔ 'sa, "ne 'a -koa kwɛle-.»

⁴⁷ «-Kpilɛkpilɛnya nye -lɛ, 'anye -wa sɔbhɔ "guɔkwɔmenya -ye 'a 'to 'wɔ 'lɔbhɔ- 'na -biɛ -wɛ.»

⁴⁸ "Ɛ -ɛwɛ "me 'ye 'a 'ŋlule -lɔ 'a 'to 'wɔ 'na nonoli. 'Wayi 'wa 'lɔbhɔ- "guɔkwɔmenya, "ne 'anye 'a sɔbhɔ -lɔ 'wanɛɛ -biɛ.

⁴⁹ 'Ɛza, Lagɔ 'na "nanoɛ "me 'ɔ no -lɔ nɛɛ: «'E yua 'ce "guɔkwɔmenya "ne "kɔlepɔnya -nɛme. 'Wa yi 'ce -bedia 'lɔbhɔ, "ne 'wa yi 'ce 'wawɛ 'nyɛzesɛ no.»

⁵⁰ 'Ɛza -dɛme 'na 'nyakpa "kɛ -lɔ "ɛ "guɔkwɔmenya -kwleyia -ye 'wa 'lɔbhɔ- 'awɔ zikpɛ 'na "kucidɛme 'ce 'na gbo 'bhleleɔ-.

⁵¹ 'Ɛ 'cile Abɛle 'na 'kwiɛ "ku -kaa "ne 'ɛ 'sibhɔ Zakali -ye 'wa 'lɔbhɔle- bɔbɔledɛme -nyɛ bhuducibhɛ 'wlewle "bhaa 'na jijɛku -wɛ nɛ "ku, 'e bhulɛle 'anye nɛɛ -dɛme 'na 'nyakpa yi 'ce 'ɛnɛɛ 'gbo 'bhleleɔ-.

⁵² «'Anye -Lɔsloanya, 'a 'libhi "nanoɛ 'na fayi "ku "ne 'a 'gba -lɔ -gbulɛ "ne 'a -ka "bhle plɛ, "ne -wa no -gbɔ 'wa "kɛ "bhle 'plɛ -wɛ, 'a 'titoa -lɔ 'yliku, zaa 'Kpilɛkpilɛ 'ye 'a lale -kɛ -lɔ 'ayi "ku!»

⁵³ Zezu "kɛ zɔ 'wlo "bhuɔ ne, -Lɔsloanya -nyɛ faliziɛnya "bhaa 'kɛle 'miɛloa- 'wli "ku "ne 'wa 'yɔbhɔlo -lɔ weli 'klekle "ku lo.

⁵⁴ "Naa-, 'se 'wa "kɛ "zo "ne 'wa "kɔ weli 'na 'gbotu 'ci -wɛ, sɔbhɔ 'wa 'tɛle -lɔ 'siɛ, -se 'wa "kɔ weli "me -sɛ.