Luke 1 - Nouveau Testament bété de Gagnoa

Luke 'na "bɔgo "me 'na weli 'na "kuciledɛ

¹ -Atito Teofile, weli -ɛ 'ple- -anye 'glɛme -wɛ, 'nyakpa -kwleyia 'ci- 'ɛnɛɛ "bɔgo "me -zo -ku,

² -see 'ɛnɛɛ -wayeɛdɛ "kucidɛku "ne 'wa "zo- Lagɔweli 'na "kulɔbhɔnya -sɛle -lɔ 'anye 'de.

³ 'E "kɛ -ɛ ple- 'klekle 'na -dee 'ɛ 'bhale -wɛ lo 'yɔbhɔ 'nɛkpɛnɛkpɛ "bhuɔ ne, 'ɛ 'namale- -ame -gɛ zaa 'e kɛle- -lɔ -neɛ' "ku 'tito "yitɔ Teofile

⁴ -se -e "kɛ -ye 'wa -slo -eyi 'na -see 'ɛ -noɔ 'diɛɛ yɛ 'klekle -wɛ yibhlele-.

"Nɔgɔzilɔ bhulɛ Zaa Batise 'na gwɛleweli

⁵ -Sɔɔdɛku Elode -noɔ 'awɔ Zude 'na "cifi yɔ -wɛ, Lagɔ bɔbɔnyɔ -bholo 'pa- 'awɔ Zakali, Abia 'na -gligbɛnyɔ yɔ 'awɔ -lɔ. 'Ɔ "nɔŋɔ -noɔ 'awɔ -lɔ Aalɔ 'na -gligbɛ "ku 'na 'ŋuyu yɔ, 'ɔ 'pa- 'awɔ -lɔ Elizabɛte.

⁶ Zakali -nyɛ 'ɔ "nɔŋɔ "bhaa 'wa ŋwinɛle- 'awɔ "me Lagɔ 'yliku "ne 'wa -gɛle 'awɔ Anyinɛnyɔ 'na gbagbɛ 'klekle, 'wa -kɛ 'awɔ kɔ, "ne 'wa "ne 'awɔ 'nuɔsɔbhɔledɛ -kɛ.

⁷ -Mɔ, 'wa "ne 'awɔ yu "kɛ, "naa-, Elizabɛte "ne gwɛle 'awɔ zɛ, "ne 'wayi "sɔkpɔsɔkpɔ -gɔ 'awɔ 'lelee kpɛnyee.

"Nɔgɔzilɔ bhulɛle Zakali nɛɛ 'ɔ yi 'ce yu yle

⁸ 'Yli -bholo "me, Zakali no 'ɔnɛɛ bɔbɔlibhɔ Lagɔ 'na "Mebɔbɔlebhudu "me, "naa-, 'ɔnɛɛ -zakpɛ 'na bɔbɔ 'yli -ylɛ -lɔ zɛ.

⁹ Bɔbɔnya 'na -see 'wa sɛ 'kle -wɛ za, Zakali 'wa -sɛ -lɔ lɔbhɔ -se 'ɔ "kɛ Anyinɛnyɔ 'na -bhuducibhɛ 'wlewle "me 'wle 'yli 'dile.

¹⁰ -Sɔɔdɛku "ɛ 'wle -ko 'bhu dɛku -wɛ, Lagɔ 'na 'nyakpa -ko 'awɔ zikpoku, 'wa bhubhɔ 'awɔ.

¹¹ Lɔbhɔ 'ye "nɔgɔzilɔ sibhɔ- -lɔ 'yliku, 'ɔ 'nyegbe- bɔbɔledɛ "me 'na lilikwlɛ -gbɔsɔ "ku, -dee 'wle bhule -wɛ.

¹² Zakali kɔ 'ylime 'ye ne, 'dle -wlɔlo -lɔ "me, "ne -nyanɔ yu -lɔ lɔbhɔ.

¹³ "Ne "ɛ "nɔgɔzilɔ yu -lɔ bhulɛle- nɛɛ: «Te 'se "gu Zakali. "Naa-, Lagɔ 'sa- 'neɛ bhubhɔweli kɔ. 'E "nɔŋɔ Elizabɛte yi 'widiyu 'gwɛle-, "ne 'e yu Zaa ziɛle-.

¹⁴ 'Ŋwɛnɛ 'na "yitɛ yi -eyi 'lɔbhɔ, "ne 'ɔnɛɛ gwɛlezle, 'ŋwɛnɛ yi 'nyakpa -kwleyia 'lɔbhɔ me.

¹⁵ "Naa-, 'ɔ yi 'kpɔmale- Anyinɛnyɔ 'yliku. 'Ɔ -ka 'ce duvɛ -ɛ 'tɛ- "me -wɛ 'nɔmɔ. 'Ɔ -ko 'ɔ "nɔ 'mene "ne Zuzu Wlewle kɔ 'ce -lɔ "ku 'kwlile-.

¹⁶ 'Ɔ yi 'ce Izlayɛleyua 'na 'kwleyia, Anyinɛnyɔ 'wanɛɛ Lagɔ lo -nɛmelea.

¹⁷ "Ne 'ɔ yi 'ce Lagɔ 'yliku 'nɔŋo, 'ɔ -nyɛ Zuzu -nyɛ "guɔkwɔmenyɔ Eli 'na 'bhɛloɛ "bhaa. -Se 'ɔ "kɛ 'to 'wɔ 'na 'dle 'wanɛɛ 'yueja "ku plealea-, -se "kpokponya "kɛ "meŋwinɛlenya 'nasɛ 'dlepɔ, -se 'ɔ "kɛ Anyinɛnyɔ 'na -gligbɛnya 'wli jijalea.»

¹⁸ "Ne Zakali yi -lɔ "ɛ "nɔgɔzilɔ bhulɛle- nɛɛ: «-See 'e "kɛ bhɔ 'sɛ yibhlele- 'a? "Naa-, 'e -gɔ, "ne -ame "nɔŋɔ 'na 'ylobɛ 'ple- lɔbhɔ.»

¹⁹ "Ne "ɛ "nɔgɔzilɔ yu -lɔ bhulɛle nɛɛ: «'Mɔɔ -noɔ -lɔ Gabliyɛle yɔ, 'mɔɔ -ko -lɔ Lagɔ 'yliku. 'Ɔɔ -lebhe -lɔ -ame -se 'e "kɛ -eyi bhulɛle-, -se 'e "kɛ -eyi 'Denaade -sɛle.

²⁰ -Mɔ -e "ne 'na bhulɛweli 'dleku -kɛle za, -e yi weli te, -e ka 'ce -la 'gbo 'di -kaa, "ne "ɛ -ye 'e -bhulɛle -eyi -wɛ "kɛ 'ce -lɔ lɔbhɔ ylɛ. Ɛɛ -ye 'e -bhulɛle -eyi -wɛ yi 'yli 'wlole "tɛnye 'na -ye Lagɔ -sɛ lɔbhɔ -wɛ "me.»

²¹ Zakali 'na -see 'ɔ -gwlɛ bhuducibhɛ 'wlewle "me -wɛ 'nyea nɛ 'nyakpa 'wa -wo nɛ -wɛ.

²² 'Ɔ "kɛ zɔ 'wlo ne, 'ɔ "ne 'bhɛle -se 'ɔ "koa 'gbo 'dile, 'ɔ -te nɛ weli, "ne 'ɔ waka nɛ -lɔ. Lɔbhɔ 'ye 'wa 'no- -lɔ "me -gbɔ 'ɔ 'ye- bhuducibhɛ 'wlewle "me -bɛɛ' 'ylime.

²³ Zakali "kɛ "Mebɔbɔlebhudu "me 'ɔnɛɛ libhɔ kɔ bhiɛ "bhuɔ ne, sueme 'ye 'ɔ -zi -lɔ 'wlizɔ.

²⁴ 'Ɛyi -wɛ ple- lɛ "bhuɔ ne, 'ɔ "nɔŋɔ Elizabɛte 'ye- go, "ne 'ce 'umgbu 'na dɛ 'ɔ yi -lɔ -bhudu "me zizɔle-. 'Ɔ nɛɛ:

²⁵ «-Ye Anyinɛnyɔ -no 'neɛ dɛku ne lɛ. -Dɛme ne 'ye 'ɔ 'pɔ- -da -lɔ -ame "ku 'dle, -se 'ɔ "kɛ 'nyakpa 'yliku 'na -ɛ -le nɛ -ame 'zu "ku -wɛ "ku bhia-.»

"Nɔgɔzilɔ -bhulɛle Mali, Zezu 'na 'gwɛleweli

²⁶ 'Ɛnɛɛ 'ce 'na 'gbeplo nɛ -wɛ "me, Lagɔ -lebhe 'ɔnɛɛ "nɔgɔzilɔ Gabliyɛle Galile 'na 'du -ye 'wa la Nazalɛte -wɛ "me.

²⁷ 'Ŋuyu -digbɔ -ye 'wa 'tebhe- 'nyɔkpɔ -bholo 'ɔ 'pa- Zozɛfo "ku -wɛ 'na dɛce. Davide 'na -bhudu "me 'na yu yɔ -lɔ: "Ɛ 'ŋuyu -digbɔ -wɛ 'pa- -lɔ Mali.

²⁸ "Nɔgɔzilɔ -plɛlo lo "ne 'ɔ yu -lɔ bhulɛle- nɛɛ: «Ayo Mali, 'ŋwɛnɛ 'lɔbhɔ 'se -eyi, Lagɔ -wamale -eyi kpɛnyee, "ne Anyinɛnyɔ "bhaa 'a kole- "ku.»

²⁹ "Ɛ weli -wɛ, -sɛ Mali geji "ku, "ne 'ɔ 'yɔbhɔ -lɔ lo nɛɛ: «"Ɛ soɔ 'na bhɛleweli -wɛ -see 'ɛ sɛ bhɔ zɔ?»

³⁰ "Ne "ɛ "nɔgɔzilɔ yu -lɔ bhulɛle nɛɛ: «Te 'se 'gu Mali. "Naa-, -e -yle -jɔlo Lagɔ yɔko.»

³¹ -E yi go 'ye, -e yi 'ce 'widiyu gwɛle-, "ne 'e yu 'ce Zezu ziɛle-.

³² 'Ɔ yi 'ce 'kpɔmale- "ne 'wa yu 'ce "kuzi Lagɔ 'na yu la. Anyinɛnyɔ Lagɔ yu 'ce 'ɔ 'to Davide 'na 'leyli-gbɔglo "ku 'jilɛ.

³³ «'Ɔ yi 'ce Zakɔbo 'na -gligbɛ kamalea- -godogodo, "ne 'ɔnɛɛ 'kamaleɛ -ka 'ce "kubhiɛ.»

³⁴ Lɔbhɔ 'ye Mali -bhulɛle -lɔ "ɛ "nɔgɔzilɔ nɛɛ: «-see 'ɛ "kɛ bhɔ ylɛle 'a? "Naa-, 'e "ne 'widi -yi.»

³⁵ "Ne "ɛ "nɔgɔzilɔ yi -lɔ Mali bhulɛle nɛɛ: «Zuzu Wlewle "kɛ -lɔ -eyi "ku 'kwlile-, "ne Lagɔ -ɔ zi "ku 'na 'bhɛloɛ "kɛ -lɔ -eyi "ku 'wale- sɛgbɛɛ zuzu: 'Ɛnɛɛ za, yu -ɔ "kɛ gwɛleɔ- -wɛ "kɛ 'ce -lɔ 'wlewle ko, "ne 'wa "kɔ 'ce -lɔ Lagɔ 'na Yu la.»

³⁶ -E -gɛ -e "nɔyɔ Elizabɛte -ye 'wa la -ɔ "ne gwɛleŋɔnɔ -wɛ 'yli, 'ɔ -kɛ -me 'widiyu 'na go, 'ɛnɛɛ 'ce 'na 'gbeplo nɛ "me 'ye 'ɔ -ko -lɔ.

³⁷ "Naa-, Lagɔ 'yliku -bɛɛ' "ne -la "me 'tɛ-.

³⁸ Mali nɛɛ: Anyinɛnyɔ 'na 'kulɔbhɔŋuyu 'ye 'e -noɔ -lɔ, -see -e lɛ- 'neɛ dɛku 'klekle -wɛ, 'ɛ ylɛle- sɔbhɔ. "Ne "ɛ "nɔgɔzilɔ yu -lɔ yɔko 'bha.

Mali -me Elizabɛte 'na dɛce

³⁹ "Ɛ 'yli -wɛ "me, Mali sikɔ "ne 'ɔ yi -lɔ Zuda -glɔ "me 'na tlodu -bholo "me me.

⁴⁰ "Ne 'ɔ yi -lɔ Zakali 'na -bhudu "me plɛ, "ne 'ɔ yi -lɔ Elizabɛte bhɛle-.

⁴¹ Elizabɛte "kɛ Mali 'na bhɛleweli "me 'no ne, 'ɔnɛɛ 'mene 'na yu kɔ 'ye 'ɔ -zuzuɔ -lɔ 'ŋwɛnɛ za, "ne Zuzu Wlewle yi -lɔ Elizabɛte "ku 'kwlile-.

⁴² "Ne 'ɔ yi -lɔ "me 'kpa "yitɛ "ku nɛɛ: «-E 'pɔ- 'ŋu "ne -e -zi 'ŋwenea 'klekle "ku. "Ne -neɛ' 'mene 'na yu 'pɔ- -me 'lelee 'ŋu.

⁴³ -See 'ɛ -ylɛle bhɔ "me, "ne Anyinɛnyɔ 'ɔ "nɔ yili- bhɔ -ame lo 'a!

⁴⁴ "Naa-, -ye 'e 'no- -neɛ' bhɛleweli "me -wɛ, 'neɛ 'mene 'na yu -zuzuɔ kɔ 'ŋwɛnɛ za.

⁴⁵ 'Ŋwɛnɛ 'lɔbhɔ -eyi, -eyi -mɔɔ kɛle- lɛ -ye 'wa -bhulɛle -eyi Anyinɛnyɔ 'na 'tɔ "me -wɛ 'dleku.»

Mali 'dile- Lagɔ lo keyi

⁴⁶ Zaa, Mali nɛɛ: «'E 'wezele Anyinɛnyɔ "ku!

⁴⁷ "Ne 'ŋwɛnɛ 'biti -ame, 'neɛ 'Fuɔnyɔ Lagɔ za.

⁴⁸ Sɛko -wɛ nea, 'ɔ 'pɔ- 'ɔnɛɛ lokoŋuyu 'yliku zaa, dɛme 'na dɛku, 'nyakpa 'klekle yi 'ce -ame -bhlegbi "me "zo.

⁴⁹ "Naa-, "kuzinyɔ -no 'neɛ za tɛtɛ -nyɛ -zizi "bhaa. 'Ɔnɛɛ 'tɔ -ko 'wlewle.

⁵⁰ 'Ɔnɛɛ "nɛnekoɛ -ŋwɛne -glɔ 'klekle zɔ, 'nyakpa 'na -wa 'gu -gɛ -wɛ za.

⁵¹ 'Ɔnɛɛ 'bhɛloɛ "me, 'ɔ bidlilia- 'bhabhanya.

⁵² 'Ɔ 'teti- 'kamalenya -gbɔglo zɔ, "ne 'ɔ yi -wa sɛ 'wayi "ku -wɛ 'wli "ku 'libhi.

⁵³ Ŋɔŋolɔbhɔnya -plɔkɔle -me -la -za. "Ne -klɔgbɔnya 'biti 'kwlɛ "ne 'ɔ yua 'kpeti-.

⁵⁴ 'Ɔ -yi 'ɔnɛɛ lokoyu Izlayɛle "ku, 'ɔnɛɛ "nɛneko 'yli "me za, 'ɔ "noa "ku -dlu,

⁵⁵ -see 'ɔ -plele 'awɔ -a 'to 'wɔ weli kɔ yɛ -lɔ. Ablame, "ne 'ɔ yowlia 'wɔ za, -godogodo 'na dɛ.»

⁵⁶ Mali -sɛ Elizabɛte yɔko 'ce ta, "ne 'ɔ yi -lɔ 'ɔnɛɛ dɛce 'wlizɔ zi.

Zaa Batise 'na gwɛleweli

⁵⁷ Elizabɛte 'na gwɛle 'yli -ylɛ "ne 'ɔ yi -lɔ 'widiyu gwɛle-.

⁵⁸ 'Ɔnɛɛ suemegbalenya "ne 'ɔnɛɛ 'nyoa 'no- 'awɔ "me -gbɔ Anyinɛnyɔ 'slu- 'awɔ -jɔlo "ku za 'wayi 'wɔ "bhaa 'wa no 'awɔ 'ŋwɛnɛ.

⁵⁹ 'Ɛnɛɛ 'yli 'na 'gbɔɔtazle "me, 'wa -yi yu "ku 'di -ka, "ne 'wa 'yɔbhɔ nɛ -gbɔ 'wa "kɔ 'ɔ 'to Zakali ziɛle-.

⁶⁰ Lɔbhɔ 'ye 'ɔ "nɔ 'libhi- -lɔ weli "ku nɛɛ: «'Bhɔ, -mɔ 'ɔ 'pa- Zaa.»

⁶¹ "Ne 'wa yu -lɔ bhulɛle- nɛɛ: «-Neɛ' -gligbɛ "ku 'na 'nyɔkpɔ ne "ɛ 'tɔ -wɛ 'pa-.»

⁶² "Ne 'wa 'wakale -lɔ "ɛ yu 'ɔ 'to 'yliku -se 'wa "kɔ lo 'yɔbhɔ nɛɛ: «'Tɔ 'na -ye -e -ziɛlo bhɔ?»

⁶³ "Ne Zakali yi -lɔ 'cesupɛ lo 'yɔbhɔ "ne 'ɔ 'yi -lɔ "klo 'kɛle : «'Ɔnɛɛ 'tɔ 'pa- Zaa.» "Ne 'ɛ yua -lɔ 'nyea- 'klekle.

⁶⁴ Lɔbhɔ cuu, 'ɔnɛɛ nuɛ vuluɔ "ku, "ne 'ɔnɛɛ miɛlu yi -lɔ diɔ: 'ɔ 'di nɛ 'gbo "ne 'ɔ 'kwa nɛ Lagɔ 'ŋlu.

⁶⁵ 'Ɔnɛɛ suemegbalenya 'klekle nyanɔ 'lɔbhoa nɛ, "ne 'wa bhulɛ nɛ -lɔ tloglɔ -ye 'wa la Zude -wɛ 'klekle "ku -ɛ -ylɛle lɔbhɔ 'na weli.

⁶⁶ -Wa 'no "ɛ 'de -wɛ, 'wayi 'klekle 'wa -kulɛle nɛ 'dlezɔ "ne 'wa bhulɛle bhulɛle nɛ -lɔ sɛne nɛɛ: «-See "ɛ yu -wɛ "kɛ 'ce bhɔ ko?» "Naa- Anyinɛnyɔ 'na 'bhɛloɛ -ko nɛ "ku.

Zakali 'dile- Lagɔ lo keyi

⁶⁷ Zuzu Wlewle 'kwlile- 'ɔ 'to Zakali "ku, "ne 'ɔ yi -lɔ "guɔkwɔmenyɔ 'nasɛ bhulɛ- nɛɛ:

⁶⁸ Anyinɛnyɔ 'pɔ- 'ŋu, Izlayɛle 'na Lagɔ. "Naa-, 'ɔ -yi 'ɔnɛɛ -gligbɛnya "ku 'be 'ka, "ne 'ɔ -soa galu 'yli.

⁶⁹ 'Ɔ -gbɔ "ne 'wa gwɛle- 'anyɛɛ 'fuɔnyɔ, 'ɔnɛɛ "kulɔbhɔnya Davide 'na -gligbɛ "ku.

⁷⁰ -See 'ɔ -ple 'awɔ bhlɛme weli, 'ɔnɛɛ "guɔkwɔmenya 'wlewle 'na nuɛ "me yɛ -lɔ.

⁷¹ 'Popoɛ 'na -ɛ sɛ lɛ -anye 'anyɛɛ -gblenya kɔ, "ne -wa "ne sɔbhɔ lɛ -anye 'yli -wɛ kɔ.

⁷² 'Ɔ -tua 'ɔnɛɛ -see 'ɔ -ko "nɛne -wɛ -a 'to 'wɔ 'ylime, "ne 'ɔnɛɛ 'dle yi -lɔ 'ɔnɛɛ mɛneloɛ 'wlewle "ku sibhɔ.

⁷³ -See 'ɔ -plele -a 'to Ablame weli kɔ yɛ 'awɔ -lɔ

⁷⁴ -se 'ɔ kɛ -anye -gblenya kɔ -sɛ "bhuɔ ne

⁷⁵ -a te 'gu -se -a "kɔ "ku lɔbhɔ- "me 'ŋwinɛleɛ "me "ne 'wlewle -koɛ "me, 'ɔyi 'yliku, 'anyɛɛ zikpɛ 'klekle "me.

⁷⁶ "Ne -eyi 'yubhueyi, 'wa yi 'ce -eyi -Ɔziku 'na "guɔkwɔmenyɔ la, "naa-, -e yi 'ce Anyinɛnyɔ 'yliku 'nɔŋo, "ne -e yi 'ce 'ɔnɛɛ -gwe 'wli 'jijalea-,

⁷⁷ -se -e "kɛ 'ɔnɛɛ -gligbɛnya 'wanɛɛ Popoɛ "ne 'nyinyonoli 'na gbo 'yi 'tale- -de -sɛle!

⁷⁸ "Naa-, 'anyɛɛ Lagɔ 'na -see 'ɔ -wa 'anye kpɛnyee yɛ -lɔ. 'Ɛnɛɛ 'ylime, -zeli 'bhale "nɔgɔ "me "ne 'ɛ 'le -lɔ 'anye "ku, sɛgbɛɛ gluzɔwloylo,

⁷⁹ -se 'ɛ "kɛ -wa -ko titiɛ "me "ne -wa -ko -kwiɛ 'na zuzu "me -wɛ "ku le, -se 'ɛ "kɛ -anye "kuwɛtɛ 'na -gwe "ku sibha-.

Zaa Batise 'na 'teyigbɔnɔ

⁸⁰ "Ɛ yu 'kpɔmale nɛ "ne 'ɔnɛɛ 'ylimeyamaleɛ "tamale nɛ "me, "ne 'ɔ yi -lɔ -dee 'nyakpa "ne -ko -wɛ me, "ne 'yli -ye 'ɔ "kɛ 'ɔyi Izlayɛle 'na 'nyakpa tua yi -lɔ ylɛ.