Zezu Kli 'na 'Denaade ‑ye Zaa kɛle‑ ne lɛ 8 - Nouveau Testament bété de Gagnoa

Gbozlɛŋɔnɔ

¹ Zezu 'gbɛlɛ- Olivie -tlo 'vli.

² 'Zegbakpɔme, "ne 'ɔ yi -lɔ "Mebɔbɔlebhudu "me yi, "ne 'nyakpa -kwleyia yu -lɔ lo yili-, "ne 'ɔ yi -lɔ -duku 'gli, "ne 'ɔ yi -lɔ 'wanɛɛ sloa -ku ci.

³ 'Ɔ 'na wolo-, -Lɔsloanya -nyɛ Faliziɛnya "bhaa -su gbozɛlɛŋɔnɔ, "ne 'wa yu -lɔ -zejilɛ "me 'sibha-.

⁴ Ŋwɛnɛɛ: «Anyinɛnyɔ, "ɛ 'ŋɔnɔ ne -a 'salo- gbozlɛdɛme.

⁵ -Lɔ "me 'na dɛku, Moyize pɛ- gbɛ "ku nɛɛ 'wa "pɔ sɔbhɔ 'na 'ŋɔnɔ -wɛ 'tiyi -kaa -se 'ɔ "kɛ "ku. Zaa, -eyi -see -e lɛ bhɔ?»

⁶ 'Wa "kɔ nɛ "me 'bea- -se 'wa "kɔ gbo 'wlime "gbli za 'wa bhulɛ nɛ -lɔ "ɛ soɔ. "Ne Zezu yi -lɔ 'wli 'gbi, "ne 'ɔ yi -lɔ dodo "ku kɛle ku 'ci.

⁷ 'Wa 'yɔbhɔ nɛ lo "yiɛ za Zezu yi -lɔ 'wli "ku 'libhi "ne 'ɔ yua -lɔ bhulɛle- nɛɛ: «'Anye 'glɛme 'na -ɔ -na 'ce -lɔ 'nyinyonoli no, 'ɔɔ -na "pɔ tɛtɛɛ -tiyi.»

⁸ "Ne 'ɔ yi -lɔ "kusɔ 'wli 'gbi, "ne 'ɔ yi -lɔ dodo "ku kɛlele "kusɔ.

⁹ -Ye 'wa 'no- "ɛ weli -wɛ, "ne 'wa yi -lɔ me -bholo -bholo, 'ɛ 'bhale "yitia "ku "ne Zezu -nyɛ "ɛ 'ŋɔnɔ -wɛ "bhaa 'wa yi -lɔ lɔbhɔ to- 'wayikɔ.

¹⁰ "Ne Zezu yi -lɔ 'wli "ku 'libhi, "ne 'ɔ yu -lɔ lo 'yɔbhɔ nɛɛ: «'Ŋɔnɔ -lɛ, -dee 'wa -ko bhɔ? 'Nyɔkpɔ "ne bhɔ -eyi gbo -gla 'a?»

¹¹ "Ne 'ɔ yu -lɔ bhulɛle- nɛɛ: «'Bhɔ -kɛ, Anyinɛnyɔ.» "Ne Zezu yu -lɔ bhulɛle- nɛɛ: «-Ame, 'e -ka 'lelee -eyi gbo yelea-, zaa, me, -mɔ, te -ka -la 'nyinyonoli no.»

Zezu -noɔ -lɔ dodo ne "ku 'na zle yɔ

¹² "Ne Zezu yi -lɔ "kusɔ "ɛ 'nyakpa -wɛ bhulɛle- nɛɛ: «-Ame 'mɔɔ -noɔ -lɔ dodo ne "ku 'na zle yɔ. -Ɔ kɛ -ame lo -yili ne, 'ɔ -ka 'ce -la titiɛ "me 'nɔŋo, -mɔ, 'ɔ yi 'ce zle 'na -ɛ 'nyɛ zikpɛ -wɛ yle.»

¹³ "Ne Faliziɛnya yu -lɔ bhulɛle- nɛɛ: «-Eyigɛsɛ 'na "ku 'na 'de 'ye -e sɛ -lɔ doɔ. Za -neɛ' 'desɛweli "ne -bɛɛ' "me -ko.»

¹⁴ Zezu nɛɛ: «'E sɛ 'neɛ "ku 'na 'de 'diɛɛ. -Mɔ, 'neɛ 'desɛweli -ko gbaa "me. "Naa-, 'e -yi -dee 'e 'bhale, "ne 'e -yi -mee 'e mele. -Mɔ, 'anye, 'a "ne -dee 'e 'bhale -yi. "Ne 'a "ne 'lelee -mee 'e mele -yi.

¹⁵ 'Nyɔkpɔ sɛku 'ye 'a 'bhle -lɔ gbo. -Mɔ, -ame 'e "ne bhlele- 'nyɔkpɔ gbo.

¹⁶ "Ne 'e kɛ gbo bhle ne, 'neɛ gbobhlesɛ -ko gbɛklɛklɛ "naa- 'e "ne -bholo -yle zɛ : To -ɔ -lebhe -ame -wɛ -ko -me lɔbhɔ.

¹⁷ 'Anyɛɛ -Lɔ "me 'ɛ 'kɛleɔ- -gbɔ 'nyakpa "sɔ 'na 'desɛweli gbaa "me 'ye 'ɛ -ko -lɔ.

¹⁸ Zaa, -ame 'e -noɔ 'neɛ -ɔyeɛdɛ yɔ "ne To -ɔ -lebhe -ame -wɛ bhulɛ me 'lelee 'neɛ "kukoweli.»

¹⁹ "Ne 'wa yu -lɔ lo 'yɔbhɔ- nɛɛ: «-Dee -e To -ko bhɔ?» "Ne Zezu yua -lɔ bhulɛle- nɛɛ: «'A "ne -ame -yi, "ne 'a "ne 'lelee -ame To -yi. -Mɔ, 'a kɛ nɛ -ame -yi, 'a yi nɛ -ame To yibhlele- -me.»

²⁰ "Ɛ weli -wɛ 'wɔ, "Mebɔbɔlebhudu "me 'na -dee 'wa 'piɛ bɔbɔli -wɛ, lɔbhɔ 'ye Zezu 'nyegbe- 'awɔ -lɔ, "ne 'ɔ sloa 'awɔ -lɔ. -Mɔ 'nyɔkpɔ "no 'sa-, "naa-, 'ɔnɛɛ glee -na nɛ ylɛ zɛ.

Zezu bhulɛ 'ɔ To yɔko 'na meme -weli

²¹ "Ne Zezu yua -lɔ "kusɔ bhulɛle- nɛɛ: «'E kaa- me. -Mɔ, 'a yi 'ce -ame 'siɛ tɛle-, "ne 'a yi 'ce 'anyɛɛ 'nyinyonoli "me "kule. "Ne -mee 'e me 'ce -wɛ, 'a -ka 'ce lɔbhɔ "mɔme-.»

²² Lɔbhɔ 'ye Zufonya yi -lɔ no nɛɛ: «Zaa, 'lɔbhɔ ka 'ye 'ɔ me bhɔ 'ɔyi 'a? "Naa-, 'ɔ nɛɛ: -Mee 'e me -wɛ 'a -ka lɔbhɔ "mɔme-.»

²³ "Ne Zezu yua -lɔ bhulɛle- nɛɛ: «'Anye, dodo ne "ku -noa 'ye 'a -noɔ -lɔ, -ame, "nɔgɔ "me -nɔ 'ye 'e -noɔ -lɔ. 'Anye ne, -glɔ ne zɔ -noa 'ye 'a -noɔ -lɔ, -mɔ -ame, 'e "ne -glɔ ne zɔ -nɔ yɔ.

²⁴ -Ɛwɛza 'e -bhulɛle -lɔ 'anye nɛɛ: 'A yi 'anyɛɛ 'nyinyonoli "me "kule. -Ɛɛ, 'a yi 'anyɛɛ 'nyinyonoli "me "kule, 'a "mɔ 'dleku -kɛ -gbɔ 'e -noɔ -ɔ -le -wɛ yɔ.»

²⁵ "Ne 'wa yu -lɔ lo 'yɔbhɔ- nɛɛ: «-Eyi, -ye -e -noɔ bhɔ 'nabhɛ?» "Ne Zezu yua -lɔ bhulɛle- nɛɛ: «-Ye 'e -bhulɛle 'anye "kucidɛku -wɛ, 'ɔyi 'ye 'e -noɔ -lɔ.

²⁶ -Ye 'e "kɛ 'anyɛɛ dɛku bhulɛ- -wɛ "ne 'tekeyi yɛ "ne 'e yi 'gbagboa gbobhlele-. -Mɔ, -ɔ -lebhe -ame -wɛ, gbɛklɛklɛ 'ye 'ɔ bhulɛ -lɔ, "ne 'ɔnɛɛ -ye 'ɔ bhulɛle -ame -wɛ, 'ɛyi 'ye 'e bhulɛle -lɔ -glɔnya.

²⁷ -Mɔ, 'wa "ne "me 'no- -gbɔ To Lagɔ 'na "ku 'na weli 'ye 'ɔ bhulɛloa nɛ.»

²⁸ "Ne Zezu yua -lɔ bhulɛle- nɛɛ: «-Sɔɔdɛku 'wa "kɛ 'ce 'Nyɔkpɔ Yowli 'ŋlukwa- -wɛ, lɔbhɔ 'ye 'a "kɛ 'ce -lɔ "me 'no -gbɔ 'mɔɔ -noɔ -lɔ -Ɔ -Le yɔ "ne 'a "kɛ 'ce -lɔ sɛ yibhlele- -gbɔ 'e "ne no 'neɛ -tia -bɛɛ': -Mɔ, -ye -ame To -sloa -ame -wɛ, 'ɛyi 'ye 'e bhulɛle -lɔ 'nyakpa.

²⁹ -Ɔ -lebhe -ame -wɛ -ko -ame yɔko; 'Ɔ "ne -ame -ayikɔ -tle; "Naa-, sɛko -wɛ, -ɛ 'nɛno -gɛ -wɛ 'ye 'e no -lɔ 'yiɛ-.»

³⁰ -Sɔɔdɛku Zezu bhulɛ nɛ "ɛ soɔ -wɛ, 'nyakpa -kwleyia -kɛlo 'dleku.

Gbɛklɛklɛ, Lagɔ "me 'ye 'ɛ 'bhale -lɔ

³¹ "Ne Zezu yi -lɔ "ɛ Zufonya -wa -kɛlo 'awɔ 'dleku -wɛ bhulɛle- nɛɛ: «'A "kɛ 'neɛ bhulɛweli 'dle tɛle- ne, 'neɛ gɛlenya 'ye 'a -noɔ -lɔ -diɛɛ.

³² 'A yi gbɛklɛklɛ yibhlele-, "ne "ɛ gbɛklɛklɛ -wɛ yi 'anye galu 'yli -sɛ.»

³³ "Ne 'wa yu -lɔ bhulɛle- nɛɛ: «-Anye, Ablame 'na yua 'na yua 'ye -a -noɔ -lɔ; "ne 'nyɔkpɔ -na 'ce -zɛ -anye 'juyua "zoa-. Zaa, sɔɔbɛɛza -e no bhɔ -gbɔ -a yi 'lu 'yli 'bha- 'a?»

³⁴ "Ne Zezu yua -lɔ bhulɛle- nɛɛ: «-Ɛɛ, gbɛklɛklɛ 'ye 'e bhulɛle -lɔ 'anye: -Wa no 'nyinyonoli -wɛ, 'nyinyonoli 'na 'juyua 'waa -lɔ.

³⁵ 'Juyu "ne ko -la -gligbɛ "ku -godogodo. -Mɔ, -bhudu "me 'na yu ko -lɔ -gligbɛ "ku -godogodo.

³⁶ Zaa, 'Nyɔkpɔ Yowli kɛ 'anye 'lu 'yli -sɛ, -diɛnadiɛ 'na 'lu 'yli 'ye 'a 'bha- -lɔ.

³⁷ 'E -yi sɛ -gbɔ Ablame 'na yua 'na yua 'ye 'a -noɔ -lɔ, -mɔ, 'a tɛle -ame siɛ -gbɔ 'a "kɛ -ame 'lɔbhɔ -se 'e "kɛ "ku, "naa-, 'a sɛ 'neɛ bhulɛweli 'na lo zɛ.

³⁸ -Ame, -ye 'e 'ye- 'ylime -ame To yɔko -wɛ, 'ɛyi 'ye 'e bhulɛ -lɔ. -Mɔ, 'anye, -ye 'a 'to 'wɔ -bhulɛle 'anye -wɛ, 'ɛyi 'ye 'a no -lɔ.»

³⁹ "Ne 'wa yu -lɔ bhulɛle- nɛɛ: «-A to -noɔ -lɔ Ablame yɔ.» "Ne Zezu yi -lɔ no nɛɛ: «'A kɛ nɛ Ablame 'na yua 'waa ne, 'a yi nɛ Ablame 'na -li no.

⁴⁰ 'A gɛ 'yli, gbɛklɛklɛ -ye Lagɔ -sloa -ame, 'ye 'e -bhulɛle -lɔ 'anye. -Mɔ 'ɛ -ko "ɛ soɔ "ne 'a 'yɔbhɔ -gbɔ 'a "kɛ -ame 'lɔbhɔ- -se 'e "kɛ "ku; Ablame "ne 'se "ɛ -ye 'a no -wɛ -no.

⁴¹ -Mɔ, 'anye 'a 'to 'wɔ, 'wanɛɛ -ye 'wa no -wɛ, 'ɛyi 'ye 'a no me -lɔ.» "Ne 'wa yu -lɔ bhulɛle- nɛɛ: «-Anye, -a "ne -kɛ gbozlɛyua 'waa, -mɔ, -a -kɛ to -bholo -kpee: 'Ɔɔ 'pa- -lɔ Lagɔ.»

⁴² "Ne Zezu yua -lɔ bhulɛle- nɛɛ: «Lagɔ kɛ nɛ 'a To yɔ, 'a yi nɛ -ame wamale-. "Naa-, Lagɔ "me 'ye 'e 'bhale -lɔ, "ne 'ɔnɛɛ 'tɔ "me za 'e -ko lɛ "ɛ dɛ. -Ayigɛsɛ 'ye 'e "ne -yi, -mɔ, 'ɔɔ -lebhe -lɔ -ame

⁴³ Zaa, sɔɔbɛɛza 'a "ne "no bhɔ 'neɛ bhulɛweli "me 'a? "Naa-, 'a "ne 'bhɛle- "ne 'a "kɛ -ye 'e bhulɛ -wɛ 'yukwli fo zɛ.

⁴⁴ Sata -noɔ -lɔ 'a 'to yɔ, "ne 'a 'yɔbhɔ -gbɔ 'a "kɛ 'a 'to 'na -ye 'ɔ 'yɔbhɔ -wɛ no, -see 'ɛ 'bhale- "kucidɛku -ce, 'ɔyi 'nyakpa -lɔbhɔnyɔ yɔ -lɔ. "Ne 'ɔ "ne gbaa "me -ko, "naa-, gbɛklɛklɛ "no "me -ko zɛ. "Ne 'ɔ kɛ bhulɛ-, yo 'na -kpakpɛ yɛ -lɔ, "Naa- yonyɔ yɔ -lɔ, "ne 'ɔɔ 'wlɛ- -lɔ yo.

⁴⁵ -Mɔ, -ame, gbɛklɛklɛ 'ye 'e bhulɛ -lɔ, 'ɛza, 'a "ne -lɔ -ame 'dleku -kɛ.

⁴⁶ 'Anye 'glɛme 'na -ɔ "kɛ bhɔ no -gbɔ 'e -no 'nyinyonoli 'a? Sɔɔbɛɛza 'e kɛ 'anye gbɛklɛklɛ bhulɛle- 'a "ne bhɔ 'dleku -kɛ 'a?

⁴⁷ 'Nyɔkpɔ 'na -ɔ 'bhale Lagɔ "me -wɛ, 'ɔɔ fo -lɔ Lagɔ 'na bhulɛweli 'yukwli. -Mɔ, 'anye 'a "ne fo 'neɛ bhulɛweli 'yukwli "naa- 'a "ne Lagɔ -noa 'waa.»

Zezu "ne Ablame

⁴⁸ "Ne Zufonya yi -lɔ Zezu bhulɛle- nɛɛ: «"Ɛ -ɛwɛza -a -na bhɔ no -gbɔ Samali 'na 'nyɔkpɔ 'ye -e -noɔ, "ne zuzu -nyɛnye -ko -eyi keyi?»

⁴⁹ "Ne Zezu yua -lɔ bhulɛle- nɛɛ: «'Bhɔ, zuzu -nyɛnye "ne -kɛ -ame keyi -ko, -mɔ, -ame To 'ye 'e 'kwa -lɔ 'ŋlu, "ne, 'anye, 'a "ne "zo -lɔ -ame 'plome.

⁵⁰ "E -na 'se -gbɔ wa kwa- -ame 'ŋlu, -mɔ, -ɔ tɛle 'neɛ 'ŋlu 'siɛ "ne 'ɔ bhle gbo -wɛ -le.

⁵¹ -Ɛɛ, gbɛklɛklɛ 'ye 'e bhulɛle -lɔ 'anye: 'Nyɔkpɔ kɛ 'neɛ bhulɛweli 'yukwli -fo, "ne 'ɔ 'cɛ 'plome "zo ne, 'ɛ nyɔ -wɛ, "ɔ -ka 'ce 'kwiɛ yle gou.»

⁵² "Ne Zufonya yi -lɔ Zezu bhulɛle- nɛɛ: «-A -yi -la -dɛme sɛ -gbɔ zuzu -nyɛnye -ko -lɔ -eyi keyi. Ablame "ku-, "ne "guɔkwɔmenya "ku -me 'lelee, "ne -eyi, -e no -lɔ nɛɛ 'nyɔkpɔ kɛ -neɛ' bhulɛweli 'plome "zo- ne, "ɔ -ka 'ce "ku.

⁵³ -Eyi, -e 'kpɔ bhɔ "ne -e -zi bhɔ -a to Ablame "ku 'a? 'Ɔyi, 'ɔ "ku-, "ne "guɔkwɔmenya "ku -me 'lelee. Zaa, -ye -e -tɔle bhɔ -eyi -tiaa?»

⁵⁴ "Ne Zezu yua -lɔ bhulɛle- nɛɛ: «'E "kɛ 'ayi 'ŋlu kwa- 'ye 'e -na 'siɛ tɛle, "naa-, 'neɛ -wɛ "ne -bɛɛ' "me -ko zɛ. -Mɔ, -ame To kwa -lɔ -ame 'ŋlu. -Ye 'a no -gbɔ 'ɔɔ -noɔ 'anyɛɛ Lagɔ yɔ -wɛ,

⁵⁵ -mɔ 'a "no -yi. -Ame, 'e -yu. 'E kɛ no -gbɔ 'e "no -yi ne, yonyɔ 'ye 'e "zo- -lɔ 'anyɛɛ sɛku. -Mɔ, 'e -yu, "ne 'e "zo 'ɔnɛɛ bhulɛweli 'plome.

⁵⁶ 'A To Ablame 'ŋwɛnɛ 'lɔbho- 'awɔ. 'Ɔ 'yɔbhɔ nɛ -gbɔ 'ɔ "kɛ 'neɛ gwɛleyili 'ylime 'ye. 'Ɔ 'ye- 'ylime "ne 'ŋwɛnɛ yu 'awɔ -lɔ "ku 'yiɛ.»

⁵⁷ "Ne Zufonya yi -lɔ Zezu bhulɛle- nɛɛ: «-E -na -kɛ 'ylobɛ 'na glo "sɔ 'ylobɛ kogbɔ 'na -kpakpɛ yle, "ne -e 'ye- -lɔ Ablame 'ylime?»

⁵⁸ "Ne Zezu yua -lɔ no nɛɛ: «-Ɛɛ, gbɛklɛklɛ 'ye 'e bhulɛle -lɔ 'anye: 'Wa -namlɛ Ablame gwɛle-, "ne -ame 'E -Le -lɔ.»

⁵⁹ "Ne 'wa yi -lɔ 'tiyi 'libhi -se 'wa "kɔ 'nu 'lɔbhɔ, "ne 'ɔ yi -lɔ zizɔ-, "ne 'ɔ yi -lɔ "ɛ "Mebɔbɔlebhudu "me zɔ 'wlo.