Zezu Kli 'na 'Denaade ‑ye Zaa kɛle‑ ne lɛ 2 - Nouveau Testament bété de Gagnoa

Zezu 'pɔ 'ɔnɛɛ tɛtɛɛ zɛzɛ Kana -du "me

¹ 'Yli "sɔ 'ple- lɛ "bhuɔ ne, Galile 'na 'du -ye 'wa la Kana -wɛ 'wa -me -lɔ 'ŋukwɔ -jajo "ku; Zezu 'ɔ "nɔ -ko -me 'awɔ lɔbhɔ.

² "Ne 'wa la -me 'awɔ Zezu -nyɛ 'ɔnɛɛ gɛlenya "bhaa "ɛ -jajo -wɛ "ku.

³ Lɔbhɔ "kɛ "me ko ne, "ne 'wanɛɛ duvɛ yi -lɔ "bhle bhiɛ-; "Ne Zezu 'ɔ "nɔ yu -lɔ bhulɛle- nɛɛ: «'Wanɛɛ duvɛ -bhiɛ -kɛ se "bhle 'ɛɛ.»

⁴ "Ne Zezu yu -lɔ bhulɛle- nɛɛ: «'Nyia -lɛ, -ye -e 'yɔbhɔle bhɔ -ame "me -tiaa? 'Neɛ glee -namlɛ ylɛ-»

⁵ "Ne Zezu 'ɔ "nɔ yi -lɔ "kulɔbhɔnya bhulɛle- nɛɛ: «-Ye 'ɔ "kɛ -kɛ 'anye -bhulɛle 'klekle, 'a no -kɛ.»

⁶ "Ɛ doɔ "tiyinyidi 'gbeplo 'gli- nɛ lɔbhɔ, -mee Zufonya sɛ 'ŋu "ne 'wa wale 'wayi "ku -se 'wa "kɛ 'wlele ko. 'Wanɛɛ -Lɔ "me 'na -see 'wa sɛ -wɛ yɛ -lɔ. Nyidɛ -bholo "me 'ŋu 'na litle 'na 'glo 'umgbu- plɛ -lɔ "bhle.

⁷ Lɔbhɔ 'ye Zezu -bhulɛle -lɔ "ɛ "kulɔbhɔnya nɛɛ: «'A 'yiɛ- "ɛ 'nyidɛ -wɛ 'wɔ 'ŋu "ku; "ne 'wa 'yi -lɔ 'yiɛ- -gwizii.»

⁸ "Ne 'ɔ yua -da -lɔ bhulɛle- nɛɛ: «-Dɛmeda, 'a "lu- -se 'a kɔme- -jajo 'na 'yukugɛlenyɔ.» "Ne "ɛ "kulɔbhɔnya 'yi -lɔ "bhle kɔme-.

⁹ "Ne "ɛ -jajo 'na 'yukugɛlenyɔ ne yi -lɔ "ɛ 'ŋu -ɛ -ylile duvɛ "me -wɛ 'nu 'ye. 'Ɔ "ne 'awɔ -dee 'ɛ 'bhale -yi; -Mɔ "kulɔbhɔnya -yi 'awɔ 'wanɛɛ 'mɔ -dee 'ɛ 'bhale. 'Ɛza 'ɔ yi -lɔ 'ŋulele "luwli la-,

¹⁰ "ne 'ɔ yu -lɔ bhulɛle- nɛɛ: «'Nyakpa 'klekle, duvɛ 'na -ɛ 'nɛne nu -wɛ, 'ɛyi 'wa dli -lɔ tɛɛ, "ne wa kɛ -la 'nɔmɔ- -kaa, "ne 'wa dli -la -lɔ 'ɛnɛɛ -ɛ "ne -tiaa nu 'nɛne -wɛ. -Mɔ, -eyi -e -kulɛ "ɛ duvɛ 'na -ɛ 'nɛne -wɛ -kaa -dɛme!»

¹¹ Zezu 'na tɛtɛɛ zɛzɛ -ye 'ɔ 'pɔle- Kana, Galile -glɔ "me, 'ɛɛ -wɛ -lɔ. Lɔbhɔ 'ye Zezu -tua -lɔ 'ɔnɛɛ 'bhɛloɛ 'nyakpa 'ylime, "ne 'ɔnɛɛ gɛlenya yu -lɔ 'dleku kɛle-.

¹² 'Ɛyi -wɛ "kɛ "ple "bhuɔ ne, "ne 'ɔ yi -lɔ Kafanaɔme me, 'ɔ -nyɛ 'ɔ "nɔ, "ne 'ɔ "nowlia, "ne 'ɔnɛɛ gɛlenya "bhaa. -Mɔ, 'wa "ne 'awɔ "bhle -gwlɛ.

Zezu -kpeti Lagɔ 'na "Mebɔbɔlebhudu "me 'na 'pɔlopɔnya

¹³ Zufonya 'na -jajo "yitɛ -ye 'wa la Paake -wɛ 'na gwlɛle- -yili "ne 'awɔ -la dɛtlo, 'ɛza Zezu yi -lɔ Zeluzalɛme me.

¹⁴ 'Ɔ 'na plɛ "ɛ "Mebɔbɔlebhudu "me ne, 'pɔlopɔnya 'yiɛ- "ku; 'Wa 'pɔ nɛ -bhilia, 'bhlɛbhlea "ne kpakoa 'pɔlo "ku. "Ne 'dlasi "me zigbalenya -ko -me nɛ 'lelee "bhle.

¹⁵ "Ne Zezu yi -lɔ 'lu -kple "ku no, "ne 'ɔ yi -lɔ "ɛ 'pɔlopɔnya -wɛ 'klekle 'kpeti-, 'wanɛɛ 'bhlɛbhlea "ne -bhilia, "ne -kpakoa 'wɔ "bhaa. "Ne 'ɔ yi -lɔ 'dlasi "me zigbalenya 'na gbɔto -gbɔto 'gblicia-, "ne 'ɔ yi -lɔ 'wanɛɛ 'tama yo 'kwlɛ "me "pɔ 'klekle.

¹⁶ "Ne 'ɔ yi -lɔ "ɛ -kpakoa 'na 'pɔlopɔnya -wɛ bhulɛle- nɛɛ: «'A -sɛ -dɛne -ɛne 'wɔ 'klekle; -Mɔ, 'a te -ame To 'na -bhudu "pɔlopɔbhudu "zoa-!»

¹⁷ Lɔbhɔ 'ye Zezu 'na gɛlenya 'na dle 'sibhɔ- -lɔ lɔbhɔ -see 'ɛ 'kɛleɔ- nɛ Lagɔbɔgo "me -wɛ: «-neɛ' -bhudu 'na 'ŋwɛnɛ -ye 'e -kɛ "me -wɛ yi -ame siɛ- sɛgbɛɛ -kosu.»

¹⁸ "Ne Zufonya 'na "cifia yi -lɔ Zezu bhulɛle- nɛɛ: «zɛzɛ 'na -ye -e "kɛ bhɔ -anye 'yliku 'pɔle "ne -a 'cɛ 'dleku kɛle- -gbɔ -e -kɛ sɔbhɔ 'na no -sɛ?»

¹⁹ "Ne Zezu yua -lɔ bhulɛle- nɛɛ: «'A wlɛ- -bhudu ne, -mɔ, 'e 'yi 'yli ta -kpee "kusɔ 'sɔbhɔle.»

²⁰ "Ne "ɛ Zufonya yu -lɔ no nɛɛ: «-Bhudu 'na -ye -a 'sbhɔle- 'ylobɛ 'na glo "sɔ 'ylobɛ 'gbeplo -wɛ, 'ɛyi 'ye -e "kɛ bhɔ -neɛmɔ 'yli ta -kpee "sɔbhɔle 'a?»

²¹ -Mɔ, "ɛ -bhudu -nyɔ 'na weli -ye Zezu bhulɛ nɛ -wɛ, 'ɔnɛɛ ku 'ye 'ɔ ga nɛ -lɔ.

²² -Ɛwɛza, 'ɔ 'wlo- lɛ gluzɔ "bhuɔ ne, lɔbhɔ 'ye 'ɔnɛɛ gɛlenya -luɔle -lɔ -gbɔ 'ɔ -gbɔ 'awɔ "ɛ soɔ. "Ne 'wa yu -lɔ 'dleku kɛle-, 'ɔ -nyɛ -ɛ 'kɛleɔ- -Lagɔbɔgo "me -wɛ "bhaa.

Zezu -yi 'nyɔkpɔ 'na 'dlepɔsɛ

²³ -Sɔɔdɛku Zezu -ko 'awɔ Zeluzalɛme Paake 'na -jajo "ku -wɛ, 'nyakpa 'na 'gbagboa -kɛlo 'dleku, zɛzɛ -ye 'ɔ 'pɔ 'awɔ -wɛ za.

²⁴ -Mɔ, Zezu "noa 'awɔ 'dleku -kɛ, "naa-, 'ɔ -yua nɛ 'klekle zɛ.

²⁵ 'Ɔ "ne 'yɔbhɔ -gbɔ wa -sɔlo nɛ 'nyakpa 'na 'de, "naa-, 'ɔyi 'ɔ -yi 'nyɔkpɔ 'na dle -pɔ -sɛ zɛ.