Zezu Kli 'na 'Denaade ‑ye Zaa kɛle‑ ne lɛ 11 - Nouveau Testament bété de Gagnoa

Zezu -sɛ Laza glu

¹ 'Nyɔkpɔ -bholo pa- 'awɔ -lɔ Laza. 'Ɔyi 'ye gu 'lɔbhɔ 'awɔ -lɔ. Mali "ne 'ɔ "nɔyɔ Mate 'wa 'luku Betani 'na 'nyɔkpɔ yɔ 'awɔ -lɔ.

² Mali, 'ŋɔnɔ -ɔ 'slu- 'awɔ Anyinɛnyɔ -lasiklɔ bhopopɛ "ku, "ne 'ɔ 'yi 'awɔ 'ɔnɛɛ 'nyi 'nu siɛle- -wɛ yɔ 'awɔ -lɔ. "Ɛ Mali -wɛ, 'ɔ "nɔwli Laza "ne 'awɔ -lɔ -yɛ.

³ "Ne "ɛ "nɔyoa "sɔ -wɛ yi -lɔ 'nyɔkpɔ Zezu "ku lebhele- nɛɛ: «Anyinɛnyɔ, -neɛ' -ye -e -wa -wɛ "ne -yɛ.»

⁴ Zezu 'no- lɛ "ɛ weli -wɛ "me ne, 'ɔ nɛɛ: «Laza 'na gu -wɛ -kɔ 'lɔbhɔ "ne 'ɔ "kɛ "ku, -mɔ, Lagɔ 'na 'bhɛloɛ "kɛ 'yli 'wlole za 'ɛ ylɛle -lɔ sɔbhɔ. "Naa-, 'ɛyi "me 'ye Lagɔ Yowli "kɛ -lɔ 'ŋlu me -le.»

⁵ Zezu -wa nɛ Mate, Mali "ne 'wa "nɔwli Laza.

⁶ -Mɔ, 'ɔ 'no- lɛ "me -gbɔ Laza ne -yɛ ne, "ɛ -dee 'ɔ -ko nɛ -wɛ, 'ɔ -sɛ lɔbhɔ 'yli "sɔ "bhuɔ

⁷ "ne 'ɔ yi -la -lɔ 'ɔnɛɛ gɛlenya bhulɛle- nɛɛ: «'A -ya zi Zude 'wlizɔ.»

⁸ Lɔbhɔ 'ye 'ɔnɛɛ gɛlenya -bhulɛlo -lɔ nɛɛ: «"Bhenyɔ, 'yli -bholo "me, Zufonya tɛle nɛ -eyi siɛ -se 'wa "kɛ nɛ -eyi 'tiyi "pɔ -se -e "kɛ "ku, "ne -e "kɛ -lɔ "bhle 'wlizɔ zi?»

⁹ "Ne Zezu yua -lɔ bhulɛle- nɛɛ: «'Yli "ne bhɔ glee kogbɔ "sɔ "me -ko 'a? -Ɔ 'nɔŋo- zlegɛ -wɛ, 'ɔ "ne 'gɔzɔ- -da, "naa-, dodo ne "ku 'na zle lelo "ku zɛ.

¹⁰ -Mɔ, -ɔ 'nɔŋo- titiɛ "me -wɛ, 'ɔɔ 'gɔzɔ -lɔ, "naa- 'ɔ "ne 'ye siɛ zɛ.»

¹¹ 'Ɔ "kɛ soɔ lɛ "bhuɔ ne, "ne 'ɔ yi 'lelee -lɔ no nɛɛ: «-Anyɛɛ 'tito Laza 'ŋɔŋo-, -mɔ, 'e "kɔɔ- golia- -ka me.»

¹² "Ne 'ɔnɛɛ gɛlenya yu -lɔ bhulɛle- nɛɛ: «Anyinɛnyɔ, 'ɔ kɛ 'ŋɔŋo- ne, 'ɔ yi yamale-.»

¹³ 'Ɔnɛɛ gɛlenya -tɔle 'awɔ -gbɔ 'yɛlɛ 'na -yɛlɛ 'ye 'ɔ ga. -Zɛglɛgbɔ, sɛne 'ye Zezu lɛ- 'awɔ -lɔ nɛɛ: Laza "ku-.

¹⁴ "Ne Zezu yua -la -lɔ gbɛklɛklɛ bhulɛle- nɛɛ: «Laza "ku-.

¹⁵ "Ne 'ɔ yi -lɔ no nɛɛ: 'Ŋwɛnɛ 'lɔbhɔ -ame 'anyɛɛ za, -ye 'e "ne lɔbhɔ -ko -me -wɛ, "naa-, 'a "kɛ -da -ame 'dleku kɛle-. -A -ya me Laza yɔko.»

¹⁶ "Ne Toma, -ye 'wa la Didime -wɛ, bhulɛle -lɔ gɛlenya 'na vinoa -wɛ nɛɛ: «-A -ya "mɔme- -se -anyɛɛ "bhenyɔ "bhaa -a "kɛ 'gɔme "kule!»

Zezu -noɔ -lɔ zikpɛ yɔ

¹⁷ Zezu -ylɛ lɛ 'du ne, 'ɔ 'na wolo-, 'wa zizi- Laza "bhuɔ, 'yli -mɔɔnɔ 'ple-.

¹⁸ Betani -nyɛ Zeluzalɛme "bhaa "ne 'awɔ dɛtlo -tlole.

¹⁹ 'Ɛza Zufonya -kwleyia -yi -lɔ Mate -nyɛ Mali "bhaa 'bhɛle- -ka, 'wa "nɔwli 'na "lugbu za.

²⁰ -Sɔɔdɛku Mate 'no- "me -gbɔ Zezu -ko yi dɛku -wɛ, 'ɔ -mo 'sibhɔle- -ka "ne Mali gli- nɛ -bhudu "me.

²¹ "Ne Mate yi -lɔ Zezu bhulɛle- nɛɛ: «Anyinɛnyɔ, -e kɛ nɛ -kɛ lɔbhɔ -ko ne, -ame "nɔwli -ka nɛ "ku.

²² -Mɔ, 'e -yi sɛ -gbɔ -dɛme 'na dɛku, -ye -e kɛ Lagɔ -zlɛ, 'ɔ 'yi -eyi kɔ 'je.»

²³ "Ne Zezu yu -lɔ bhulɛle- nɛɛ: «-E "nɔwli yi gluzɔ 'wlo.»

²⁴ Mate nɛɛ: «-Ɛɛ, 'e -yi sɔbhɔ sɛ, -mɔ, -glukonya kɛ 'ce gluzɔ 'wlo ne, 'ɔ yi gluzɔ 'wlo me, 'be -bhiɛle -yli "me.»

²⁵ "Ne Zezu yu -lɔ no nɛɛ: «-Ame, 'mɔɔ -noɔ -lɔ gluzɔwloɛ yɔ, "ne 'e -noɔ -lɔ zikpɛ yɔ. -Ɔ kɛ -ame 'dleku -kɛ ne, "ku 'ɔ kɛ se 'ku- -ce, 'ɔ yi 'ce lele-.

²⁶ "Ne 'nyɔkpɔ 'na -ɔ -kɛ -ame 'dleku -dee 'ɔ -yɛ -na -wɛ, 'ɔ -ka 'ce 'kwiɛ yle gou. -E -cɛ bhɔ sɔbhɔ 'dleku -a?»

²⁷ Mate nɛɛ: «-Ɛɛ, Anyinɛnyɔ, 'e -kɛ 'dleku -gbɔ -mɔɔ -noɔ -lɔ Lagɔ 'na 'Fuɔnyɔ yɔ, "ne -e -noɔ -lɔ Lagɔ 'na Yu yɔ, -ɔ "kɛ nɛ dodo ne "ku yi -wɛ.»

Zezu tu Laza 'na 'kwiɛ za

²⁸ Mate -bhulɛ lɛ "bhuɔ ne, "ne 'ɔ yi -lɔ 'ɔ "nɔyɔ Mali la -ka me, "ne 'ɔ yu -lɔ 'diɛ "me bhulɛle nɛɛ: «Anyinɛnyɔ -ko -kɛ lɔbhɔ. 'Ɔ la -eyi.»

²⁹ Mali 'no- lɛ "ɛ weli -wɛ "me, 'ɔ -sɔ "ku cuu, "ne 'ɔ yi -lɔ Zezu 'na laweli "ku me.

³⁰ Zezu -na nɛ mlɛ 'du "me plɛ-. -Mɔ, 'ɔ -ko nɛ -dee "ɛ Mate -mo nɛ 'sibhɔle- -ka -wɛ.

³¹ Zufonya -wa -nɔmo "lugbu "ku -wɛ -ko -me nɛ "ɛ -bhudu -wɛ "me. 'Wa 'na wolo Mali -sɔ "ku cuu "ne 'ɔ wlo- zɔ. Zaa, 'wa -tɔle nɛ -biɛglo "ku 'ye 'ɔ me "tule -ka, "ne 'wa yu -lɔ gɛlele-.

³² "Ne Mali yi -lɔ Zezu yɔko ylɛ. 'Ɔ 'yo- lɛ 'ylime ne, 'ɔ 'pɔ- -kokomni, "ne 'ɔ yu -lɔ bhulɛle- nɛɛ: «Anyinɛnyɔ, -e kɛ nɛ -kɛ lɔbhɔ -ko, -ame "nɔwli -ka nɛ "ku.»

³³ Zezu -gɔ 'yli -gbɔ 'ɔ 'tu. "Ne Zufonya -wa -yi -wɛ 'tu -me ne, 'nyɛze yu -lɔ 'lɔbhɔ-.

³⁴ "Ne 'ɔ yua -lɔ lo 'yɔbhɔ- nɛɛ: «-Dee 'a 'piɔ- bhɔ?» "Ne 'wa yi -lɔ no nɛɛ: «Anyinɛnyɔ, yi -se -e "kɔ 'ylime 'ye.»

³⁵ "Ne Zezu yi -lɔ 'tu.

³⁶ "Ɛ Zufonya -wɛ nɛɛ: «'A -gɛyli, 'ɔ -wɔ nɛ -kɛ 'ce kpɛnyee 'ɛɛ!»

³⁷ "Ne, -bedia yi -lɔ no nɛɛ: «'Ɛ "ne bhɔ -ɔ -vulu -kpelɔbhɔnyɔ 'na 'yli "ku -wɛ yɔ? Sɔɔbɛɛza 'ɔ -ko bhɔ lɔbhɔ "ne Laza yi "ku 'a?»

Zezu -sɛ Laza glu

³⁸ "Ne "ɛ Zezu, 'nyɛze yu -lɔ "kusɔ 'lɔbhɔle, "ne 'ɔ yi -lɔ -biɛ "ku ylɛ. -Gbogbo yɛ 'awɔ -lɔ "ne 'wa 'piɛ- nɛ 'tiyi -zabhuɛ 'nuɔ "ku.

³⁹ "Ne Zezu yi -lɔ no nɛɛ: «'A -sɛ lɔbhɔ "ɛ 'tiyi -wɛ.» Laza 'ɔ "nɔyɔ Mate nɛɛ: «Anyinɛnyɔ, 'ɔ yi -la 'ŋɛnɛ "pɔ. 'Ɔ -ko -biɛ "me 'na 'yli -mɔɔnɔ ne lɛ.»

⁴⁰ "Ne Zezu yu -lɔ bhulɛle- nɛɛ: «'E "ne nɛ bhɔ -eyi -bhulɛle -gbɔ -e kɛ 'dlekukɛleɛ -kɛ ne, -e yi Lagɔ 'na 'ŋlu 'ylime 'ye 'a?»

⁴¹ "Ne 'wa yi -lɔ "ɛ 'tiyi -wɛ lɔbhɔ -sɛ. "Ne Zezu yi -lɔ "nɔgɔ "me wolo-, "ne 'ɔ yi -lɔ no nɛɛ: «-Ame To, 'e bhɛle -eyi -se -e kɛ -kɛ 'neɛ bhubhɔweli 'yukwli fo!

⁴² 'E -yi sɛ -gbɔ -e fo 'neɛ bhubhɔweli 'yukwli -godogodo. -Mɔ, -ye 'e bhulɛ ne, 'nyakpa -wa -bli -ame ne za yɛ -lɔ. 'Wa "kɛ 'dleku kɛle- -gbɔ -mɔɔ -lebhe -lɔ -ame 'diɛɛ.»

⁴³ Zezu -bhulɛ lɛ "bhuɔ ne, "ne 'ɔ yi -lɔ "me "kpa "yitɛ "ku nɛɛ: «Laza, "wlo zɔ!»

⁴⁴ "Ne "ɛ Laza yi -lɔ -biɛ "me zɔ "wlo-, 'ɔnɛɛ bho -nyɛ 'ɔnɛɛ sɔ "bhaa -gbɛteɔ, "ne 'ɔnɛɛ 'klo 'waleɔ- "ku lokwi 'nu. "Ne Zezu yua -lɔ bhulɛle- nɛɛ: «'A vulu- "ɛ -ɛwɛ 'klekle -se 'ɔ me.»

Zufonya nɛɛ 'wa ''kɛ Zezu 'lɔbhɔ

⁴⁵ Zufonya -wa -nɛme 'awɔ Mali "lugbu "ku -wɛ 'na 'glɛme 'na "gbagboa 'ye- -ye Zezu -no -wɛ 'ylime. "Ne 'wa yu -lɔ 'dleku kɛle-.

⁴⁶ -Mɔ, 'wanɛɛ 'glɛme 'na -bedia -me -ye Zezu -no -wɛ 'na 'de Faliziɛnya -sɛle -ka.

⁴⁷ "Ne, bɔbɔnya "yitia -nyɛ Faliziɛnya "bhaa yi -lɔ 'wli "zo. Ŋwɛnɛɛ: «-See -a "kɛ bhɔ "zo -tiaa? "Ɛ 'nyɔkpɔ -wɛ, 'ɔ 'pɔ -kɛ zɛzɛ -kwleyi!

⁴⁸ Zaa, -a "kɔ -kɛ soɔ 'yi 'tale-, "ne 'ɔ 'cɛ -kɛ no 'yiɛ ne, 'nyakpa -kwleyia yu -kɛ 'dleku kɛle-, "ne Wlɔmo 'na 'nyakpa yi -kɛ -anyɛɛ "Mebɔbɔlebhudu wlɛ, "ne 'wa yi -kɛ -anyɛɛ 'du "ku bhia-.»

⁴⁹ 'Wanɛɛ 'glɛme 'na 'nyɔkpɔ -bholo -ye 'wa la Kayifo -wɛ, "ne 'ɔ -noɔ 'awɔ "ɛ 'ylobɛ -wɛ "me 'na bɔbɔnyɔ "yitɔ yɔ -wɛ, 'ɔɔ -no -lɔ nɛɛ: «'A "ne -bɛɛ' "me -nyini!

⁵⁰ 'A "pɔ -na 'se 'dle! 'Ɛ -ŋwa sɔbhɔ -gbɔ 'nɔkpɔ -bholo -na "ku -glɔnya 'na 'ylime. Lɔbhɔ 'na dɛku -anyɛɛ -glɔ -ka 'wli bhiɛ.»

⁵¹ "Ɛ Kayifo 'na -ye 'ɔ -bhulɛ -wɛ, 'ɔyigɛsɛ 'ye 'ɛ -na "me 'bhale-. -Mɔ, 'ɔɔ -noɔ nɛ -lɔ "ɛ 'ylobɛ -wɛ "me 'na bɔbɔnyɔ "yitɔ yɔ. 'Ɛza 'ɔ bhulɛ 'awɔ -lɔ guɔkwɔmenyɔ 'nasɛ, "ne 'ɔ no 'awɔ -lɔ nɛɛ Zezu yi "ku, Zufonya za.

⁵² "Ne 'ɛ "ne 'lelee Zufonya 'wayikɔ za yɛ, -mɔ, 'ɔ "kɛ -glɔnya 'wli "zo -se 'wa "kɛ -bholo yle-, 'wayi "ne Lagɔ 'na yua -wa -ŋwɛne -glɔ 'klekle keyi -wɛ.

⁵³ "Ɛ zle -wɛ 'wa "zo- -lɔ 'de -gbɔ 'wa "kɛ Zezu 'lɔbhɔ -se 'ɔ "kɛ "ku.

⁵⁴ 'Ɛza, Zezu "ne me 'awɔ -da -lɔ "ɛ Zufonya 'glɛme, "ne 'ɔ yi -lɔ 'du -ye 'wa la Eflayime -wɛ "gule -ka me, "ne 'ɔ -nyɛ 'ɔnɛɛ gɛlenya "bhaa yi -lɔ "bhle ko.

⁵⁵ 'Ɛ dɛ -wɛ "ku, Zufonya 'na Paake 'na -jajo 'na 'yli "ne 'awɔ dɛtlo. "Ne 'nyakpa -kwleyia yi -lɔ Zeluzalɛme bɔbɔ -ka me, -se 'wa "kɛ 'wayi 'wlele "zoa-.

⁵⁶ 'Wa -ko "ɛ "Mebɔbɔlebhudu "me, "ne 'wa 'pɔ -lɔ Zezu za 'yli. Ŋwɛnɛɛ: «-See 'a 'pɔ bhɔ 'dle 'a? "Ɛ Zezu yi bhɔ "ɛ -jajo ne "ku yi -me -a?»

⁵⁷ Bɔbɔnya "yitia -nyɛ Faliziɛnya "bhaa, -piɛ nɛ 'nyakpa -gbɔ -bɛsɛza, -ɔ kɛ -kɛ Zezu 'ylime 'ye-, 'ɔ yi -se 'ɔ "koa bhulɛle- -se 'wa "kɔ "sa.