Zezu Kli 'na 'Denaade ‑ye Zaa kɛle‑ ne lɛ 10 - Nouveau Testament bété de Gagnoa

Wliagɛlenyɔ 'na nunɛ

¹ Zezu nɛɛ: «-Ɛɛ, gbɛklɛklɛ 'ye 'e bhulɛle lɛ 'anye: -Ɔ "mɔ wlia 'na -pi 'na -gbanuɛ "me ylɛle, "ne 'ɔ kɛ "ɛ -pi 'gbɛlɛ-, "ne 'ɔ -kɛ "bhle 'sibhɔ-, 'ɔyi -wɛ 'winyɔ "ne 'kpokponyɔ yɔ -lɔ.

² -Mɔ, -ɔ ylɛle -gbanuɛ "me -wɛ -noɔ -lɔ wlia 'na gɛlenyɔ yɔ.

³ -Gbanuɛgwe 'na "klokolenyɔ kɛle lɔbhɔ wliagɛlenyɔ za, "ne "ɛ wlia fo -lɔ 'ɔnɛɛ weli 'yukwli, "ne 'ɔ laloa -lɔ 'wanɛɛ 'tɔ "me -bholo -bholo, "ne 'ɔ 'kɔmoa -lɔ zikpɔ "ku.

⁴ 'Ɔ koa zɔ 'wloa- 'klekle "bhuɔ ne 'ɔ -goa -lɔ 'yuku, "ne 'wa gɛlelo -lɔ "naa- 'wa -yile 'ɔnɛɛ weli "me zɛ.

⁵ -Ɛwɛza, 'wa -ka 'ce -lɔ lowlinyɔ gɛlele-. -Mɔ, -gɛ 'wa "kɔ -lɔ gu, "naa- 'wa "ne 'ɔnɛɛ weli "me -yile zɛ.»

⁶ Zezu "pɔloa- "ɛ nunɛ ne, -mɔ 'wa "ne nɛ -see 'ɛ sɛ nɛ zɔ -yi.

Zezu -noɔ -lɔ wliagɛlenyɔ 'na "namanɔ yɔ

⁷ "Ne Zezu yua -lɔ "kusɔ bhulɛle- nɛɛ: «-Ɛɛ, gbɛklɛklɛ 'ye 'e bhulɛle -lɔ 'anye nɛɛ: 'Mɔɔ -noɔ -lɔ wlia 'na -gbanuɛgwe yɔ.

⁸ -Wa -yi 'neɛ za tɛɛ -wɛ, 'winya "ne 'kpokponya 'waa -lɔ, -mɔ, "ɛ wlia "noa 'yukwli -fo.

⁹ 'Mɔɔ -noɔ -lɔ -gbanuɛgwe yɔ. -Ɔ kɛ -ame "me -ylɛle yi 'ce "po. "Naa-, 'ɔ yi 'bhle plɛ-, "ne 'ɔ yi zɔ 'wlo, "ne 'ɔ yi 'ce lili -bɛɛ' yle.

¹⁰ 'Winyɔ yi 'wiyli -za, 'wli "ku -di -za "ne li -nyimɔ -za 'ɛyikɔ. -Mɔ, -ame 'e -yi -se 'nyakpa "kɛ zikpɛ yle, -se 'ɛ "kɛ lɔbhɔ 'ple.

¹¹ 'Mɔɔ -noɔ -lɔ wliagɛlenyɔ 'na "namanɔ yɔ. Wliagɛlenyɔ 'na "namanɔ 'bhale 'ɔnɛɛ zikpɛ "me 'ɔnɛɛ wlia za.

¹² -Mɔ, 'nyɔkpɔ -ɔ no 'dlasi 'ɛyikɔ 'na libhɔ -wɛ, 'ɔɔ "ne wliagɛlenyɔ yɔ, "ne 'ɔɔ "ne "ɛ wlia -wɛ 'bhe-. 'Ɔ kɛ -kaakpɔ 'na yiyinɔ 'ylime 'ye-, 'ɔ tle doɔ "ɛ wlia, "ne 'ɔ fɔtɔ -lɔ. "Ɛ -kaakpɔ bidliloa "ne 'ɔ kɔme -lɔ -bedia.

¹³ 'Ɔyi -wɛ, 'dlasilibhɔ 'ye 'ɔ no -lɔ gou zaa 'ɔnɛɛ gbo "ne "ɛ wlia -wɛ "klo -ko.

¹⁴ -Ame, 'mɔɔ -noɔ -lɔ wliagɛlenyɔ 'na "namanɔ yɔ. 'E -yi 'neɛ wlia, "ne 'neɛ wlia -yi -ame,

¹⁵ -see To -yi -ame, "ne 'e -yi To -wɛ. 'E 'bhale 'neɛ zikpɛ "me 'neɛ wlia za.

¹⁶ 'E -kɛ wlia 'na vinoa -wa "ne "ɛ -pi ne "me -ko -me -wɛ. 'Wayi -wɛ 'e yua 'lelee slu- -me, "ne 'wa yi 'neɛ weli 'yukwli fo. Lɔbhɔ 'na dɛku, wlia 'na -zakpɛ yi 'ce -bholo yle, "ne 'wanɛɛ 'yukugɛlenyɔ "kɛ 'ce 'lelee -lɔ -bholo -kpee yle.

¹⁷ To -wa -ame "naa- 'e 'bhale 'neɛ zikpɛ "me, "ne 'e 'yi 'ce "kusɔ ylele-.

¹⁸ 'Nyɔkpɔ "ne -ame 'neɛ -zikpɛ kɔ -sɛ. -Mɔ "mɔ 'bhale- -lɔ -ayigɛsɛ "me. "Naa-, 'e -kɛ 'bhɛloɛ -se 'e 'cɛ "me 'bhale-, "ne 'e -kɛ 'bhɛloɛ -se 'e 'cɛ "kusɔ "kulibhile. -Ame To 'na -ye 'ɔ no -gbɔ 'e no yɛ -lɔ.»

¹⁹ "Ɛ weli -wɛ kɔ 'ye Zufonya -dliɔle -lɔ "kusɔ "me.

²⁰ 'Wanɛɛ 'glɛme 'na "kwleyia nɛɛ: «Zuzu -nyɛnye -ko -lɔ keyi, "ne "kukwɛ sɔ- -lɔ. Sɔɔbɛɛza 'a -fo bhɔ 'yukwli 'a?»

²¹ -Mɔ, -bedia nɛɛ: «'Nyɔkpɔ 'na -ye zuzu -nyɛnye -ko keyi -wɛ "ne 'bhɛle- "ne 'ɔ "kɛ soɔ bhulɛ-. "Ne, zuzu -nyɛnye "ne 'bhɛle- "ne 'ɔ "kɛ -kpelɔbhɔnyɔ 'na 'yli "ku vulu-.»

Zezu nɛɛ To Lagɔ "bhaa, -bholo -kpee 'wa -yle -lɔ

²² 'Wa -gwlɛle 'awɔ Zeluzalɛme "Mebɔbɔlebhudu 'na 'ŋupɔjajo. Wɔtlɔ -yi -dɛku yɛ 'awɔ -lɔ.

²³ "Mebɔbɔlebhudu "me 'na gbɛle -ye 'wa -ziɛle Salomɔ -wɛ "me Zezu ylɛle 'awɔ -lɔ. 'Ɔ me 'awɔ "ne 'ɔ yi 'awɔ.

²⁴ "Ne Zufonya yi -lɔ Zezu bli-, "ne 'wa yu -lɔ lo 'yɔbhɔ nɛɛ: «-zlegba -e "kɛ bhɔ -anye bhulɛle-? -E kɛ 'Fuɔnyɔ yɔ, bhulɛle- -anye gbɛklɛklɛ!»

²⁵ "Ne Zezu yua -lɔ bhulɛle- nɛɛ: «'E -bhulɛle nɛ 'anye "ne 'a "ne -lɔ 'dleku -kɛle. Libhɔ -ye 'e no -ame To 'na 'tɔ "me -wɛ sɛle -lɔ 'anye 'de.

²⁶ -Mɔ, 'a "ne -ame 'dleku -kɛ "naa- 'a "ne 'neɛ wlia 'glɛme -noa 'waa.

²⁷ 'Neɛ wlia fo 'na weli 'yukwli. 'E -yua, "ne 'wa -gɛle -ame.

²⁸ 'E 'joa zikpɛ 'na -ɛ -ka "kubhiɛ -wɛ kɔ. 'Wa -ka 'ce "kwlɛ bhli, "ne 'nyɔkpɔ "ne 'bhɛle- "ne 'ɔ "koa -ame kɔ -sɛ.

²⁹ -Ame To -ɔ 'joa- -ame kɔ -wɛ 'kpɔ kpɛnyee, "ne 'ɔ -zi "ku, "ne 'nyɔkpɔ "ne 'bhɛle- "ne 'ɔ "kɛ -ame To Lagɔ -bɛɛ' kɔ -sɛ.

³⁰ -Ame -nyɛ -ame To "bhaa, -bholo 'ye -a -yle -lɔ.»

³¹ "Ne Zufonya yi -lɔ "kusɔ 'tiyi "ku 'libhile -se 'wa "kɔ 'nu 'lɔbhɔ-.

³² "Ne Zezu yi -lɔ "kusɔ weli "ku 'libhile, "ne 'ɔ yi -lɔ no nɛɛ: «Zɛzɛ -kwleyi -ye 'e 'pɔ- To 'na 'tɔ "me -wɛ, 'a 'ye- 'ylime. 'Ɛnɛɛ -ye 'a 'nyegbe- bhɔ "ku "ne 'a no -gbɔ 'a "kɛ -ame 'tiyi 'nu 'lɔbhɔ -se 'e "kɛ "ku 'a?»

³³ "Ne Zufonya yu -lɔ bhulɛle- nɛɛ: «-A -na no -gbɔ -e -no -li 'na -li za -a "kɛ -eyi 'tiyi nu 'lɔbhɔ, -mɔ, Lagɔ 'ye -e 'yli- -lɔ. Sɛko -wɛ, -eyi 'nyɔkpɔ -fu 'ye -e -noɔ -lɔ, "ne -e la -lɔ -eyi Lagɔ.»

³⁴ "Ne Zezu yua -lɔ bhulɛle- nɛɛ: «Weli -cibhɛ ne 'kɛleɔ- 'anyɛɛ -Lɔ "me: 'E nɛɛ, Lagɔ 'ye 'a -noɔ -lɔ»

³⁵ -A -yi sɛ -gbɔ nɛɛ, 'nyɔkpɔ "ne 'bhɛle- "ne 'ɔ "kɛ -ye 'wa 'kɛle- Lagɔbɔgo "me -wɛ "ku "titli. "Ɛ Lagɔbɔgo -wɛ "me 'ye Lagɔ "ne bhɔ -no nɛɛ, dodo ne "ku 'na 'nyakpa, Lagɔ -ye 'wa -noɔ 'a?

³⁶ -Mɔ, -ame, -ame To -sɛ -lɔ lɔbhɔ -ame, "ne 'ɔ yi -lɔ -ame dodo ne "ku lebhele-, "ne 'e yi -lɔ no nɛɛ: Lagɔ 'na Yu 'ye 'e -noɔ. -Mɔ, 'anye, 'a nɛɛ Lagɔ 'ye 'e 'yili. Sɔɔbɛɛza bhɔ?

³⁷ 'E "mɔ -ame To 'na libhɔ no ne, 'a te -ame 'dleku kɛle-!

³⁸ -Mɔ, 'e 'cɛ no, 'a kɛle- -ame 'dleku, -se -li 'na -ye 'e no -wɛ, 'a kɛle- -me 'lelee 'dleku. Lɔbhɔ 'na dɛku, 'a yi sɛ yibhlele- -gbɔ -ame To -ko -ame "me, "ne 'e -ko -ame To "me.

³⁹ 'Ɛza 'wa 'tɛle 'awɔ -lɔ "kusɔ Zezu siɛ -se 'wa "kɔ "nyegbea-, "ne 'ɔ yua -lɔ 'ylime zizɔle-.

⁴⁰ "Ne Zezu yi -lɔ Zludɛbɔɔ 'na -gbɔsɔ -ce 'wli zɔzi, -dee Zaa "nyɛle 'awɔ batɛme -wɛ. "Ne 'ɔ yi -lɔ lɔbhɔ 'glile-.

⁴¹ "Ne 'nyakpa -kwleyia yu -lɔ lɔbhɔ ylele-: Ŋwɛnɛɛ: «Zaa "ne zɛzɛ 'pɔ-, -mɔ, 'nyɔkpɔ ne 'na "kukoweli -ye 'ɔ -bhulɛ 'klekle -wɛ, 'diɛɛ yɛ 'awɔ -lɔ.»

⁴² "Ne "ɛ doɔ, 'nyakpa -kwleyia yi -lɔ Zezu 'dleku kɛle-.