Galatenya 6 - Nouveau Testament bété de Gagnoa

-A 'kwɛle -kwɛlele 'gbudu

¹ -Nyɔsɔwanye, Zuzu Wlewle -su -lɔ 'anye. Zaa, 'a kɛ 'nyɔkpɔ 'ylime 'ye "ne 'ɔ "kɛ "nyɛnye no ne, 'a sibhɔ- -gwe 'na "nɛmanɔ "ku, 'dlewɔtɛ "me. 'A luɔle -kɛ 'ayi "ku! "Ne 'e bhulɛle sɛne -ɔkɔkokɔko: -E yi 'lelee "mebeamɔ bhlile-, "ne -e yi "nyɛnye no -me.

² 'A 'kwɛle -kwɛlele 'gbudu. 'A 'cɛ sɔbhɔ 'sa ne, Klise 'na -Lɔ 'ye 'a "kɛ -lɔ 'plome "zo.

³ 'Nyɔkpɔ -ɔ "ne -bɛɛ' "me -ko -wɛ kɛ no -gbɔ 'ɔɔ zi- "ku 'ɔyi 'ye 'ɔ no -lɔ ylo.

⁴ -Ɔkɔkokɔko yi -ye 'ɔ no -wɛ "ku wolo 'tee. 'Ɔ kɛ sɛ -yi -gbɔ -ye 'ɔ no -wɛ 'nɛno -gɛ ne, 'ɛnɛɛ 'ŋwɛnɛ 'lɔbhɔlo 'dlezɔ 'ɔyikɔ. -Se 'ɔ te kɛ 'ɔyi 'ɔlua 'wɔkɔle-.

⁵ -Ɔkokɔkɔko 'na -li -ye 'ɔ no -wɛ, 'ɛɛ kɔ 'ce -lɔ -gɛlele.

⁶ 'Nyɔkpɔ 'na -ɔ 'slo -eyi Lagɔweli -wɛ, -ye -e -kɛ -wɛ, 'nyɛ- 'mo.

⁷ 'A te -kɛ 'ayi ylo no: Lagɔ "ne 'ŋunu "ku -se 'wa "kɔ sile-. -Ɔkɔkokɔko 'na -ye 'ɔ -glo -wɛ 'ɛyi 'ye 'ɔ "kɛ 'ce -lɔ 'di.

⁸ 'Nyɔkpɔ 'na -ɔ glo 'ɔnɛɛ 'dlepɔsɛ -nyɛnye 'na -ye 'ɛ 'yɔbhɔ -wɛ, 'ɔ yi 'ce -ye 'ɔnɛɛ 'dlepɔsɛ -nyɛnye tlo -wɛ -sɛ, 'ɛ sɛ zɔ nɛɛ: 'Kwiɛ. -Mɔ, 'ɔ kɛ -ɛ 'nɛne Zuzu Wlewle -gɛ -wɛ glo, 'ɔ yi -ye Zuzu Wlewle tlo -wɛ -sɛ, 'ɛ sɛ zɔ nɛɛ: Zikpɛ -ɛ -ka "kubhiɛ -wɛ.

⁹ -A no -li 'na -li, 'kwɛme te -kɛ -anye yɔle-. 'A 'cɛ no yiɛ ne, lɔbhɔ kɛ 'ce -ylɛ, -a yi 'ce -bɛɛ' 'na -bɛɛ' "me ylele-.

¹⁰ Zaa, -a -ka -namlɛ "tɛnye -kɛ ne, -a no -li 'na -li -alua 'klekle za, -wa -kɛ me 'dleku -anyɛɛ sɛne -wɛ za -tiaa.

'Demezoweli 'na 'bebhiɛle -nɛ "ne bhɛleweli

¹¹ 'A wolo- "bɔgo ne "ku -see 'ɛnɛɛ yle 'kpɔ: 'Mɔɔ 'kɛle- -lɔ 'anye "ku 'neɛ sɔ nu!

¹² 'Nyakpa 'na -wa no -gbɔ 'a "di 'ayi "ku klepaa -wɛ, 'wayi -wɛ, 'wa 'yɔbhɔ -gbɔ 'wa -soa 'tɔ 'nyakpasɛ "ku. "Naa-, 'wa 'toa -kɛ Klise 'na klowa za 'gbapea- -za 'wa no -lɔ "ɛ -soɔ.

¹³ "Ɛ 'nyakpa -wa "di doɔ 'wayi "ku -wɛ, 'wa "ne "zo "ɛ -Lɔ -wɛ 'plome! "Ne 'ɛ -ko sɔbhɔ, "ne 'wa 'yɔbhɔ -gbɔ 'a "di 'ayi "ku "klepaa -se 'wa "kɛ 'anyɛɛ "kudiɛ -wɛ "me 'wayi "ku ziale.

¹⁴ -Ame Pɔle, 'e yi 'ayi "kuzia -bɛɛ' -bholo za: Anyinɛnyɔ Zezu Kli 'na klowa -wɛ za. Klowa "klo zikpɛ ne "ku 'na -li kule- -lɔ 'neɛ za, -ame 'lelee, 'e "ku- -me -lɔ zikpɛ ne "ku 'na -li za.

¹⁵ -E "diɔ- "ku 'oo -e "ne "ku "diɔ- 'oo, 'ɛyi -wɛ "ne -bɛɛ' "me -ko! -Mɔ -ɛ -ko -bɛɛ' "me 'pa- -lɔ -gbɔ: Lagɔ "zoa- -anye 'nyakpa -lelea.

¹⁶ 'Nyakpa -wa "zo 'na -sloaweli ne 'plome -wɛ, 'e nɛɛ: "Kuwɔtɛ -nyɛ Lagɔ 'na "nɛnekoɛ "bhaa "koa "ku. 'Ɛ -ko -me Izlayɛleyua 'klekle "ku.

¹⁷ -Dɛmeda, 'nyɔkpɔ -ka -la -ame kpla! "Naa-, 'e -su 'neɛ ku ne "me Zezu 'na 'gbapegbapeɛ 'na 'be.

¹⁸ -Nyɔsɔwanye, Anyinɛnyɔ Zezu Kli "pɔ 'anye 'ŋu! AMƐN.