Galatenya 5 - Nouveau Testament bété de Gagnoa

Klise 'di- -anyɛɛ galu

¹ Klise 'di- -anyɛɛ galu -se -a "kɛ -diɛnadiɛ kɔ yele. Zaa, 'a "tamale "me, -se 'a te "kɛ -la "kusɔ 'juyua "zole.

² -Ame, Pɔle, 'e bhulɛle 'anye -gbɔ, 'a kɛ -kɛ 'ayi "ku 'di- ne, 'anyɛɛ dɛku, Klise "ne -la -bɛɛ' "me -ko.

³ "Kusɔ 'ye 'e bhulɛle "kɛ -lɔ, 'nyɔkpɔ 'na -ɔ 'di- 'ɔyi "ku -wɛ, -Lɔ 'klekle 'ye 'ɔ -na "zo -kɛ 'plome "klepaa.

⁴ 'Anye 'wa no -gbɔ 'a "kɛ "me ŋwinɛlenya "zo -Lɔ 'na -kɔkɛleɛ "me -wɛ, Klise "bhaa 'ylime 'a 'bhabhale- -lɔ, -jɔlo -ye Lagɔ 'je- 'anye kɔ -wɛ, 'ɛyi 'ye 'a -bhlia -lɔ.

⁵ -Anye -wa -kɛ Lagɔ 'dleku -wɛ, -a -kɛle 'dleku -gbɔ, Lagɔ yi 'ce -anye "me ŋwinɛlenya "zoa-, Zuzu Wlewle -gbɔ -lɔ "ne -a -wo -lɔ, "ne -a 'piɛ- -lɔ "bhle 'dle, "ne -a "tɛlo- -lɔ 'dle.

⁶ 'Nyɔkpɔ -nyɛ Klise Zezu "bhaa 'wa "kɛ "ku -kole ne, 'ɔ 'diɔ- "ku 'oo, 'ɔ "ne "ku 'diɔ- 'oo, 'ɛ "ne -bɛɛ' "me -ko! -Mɔ, 'ɛnɛɛ 'ɛ zi lɛ "ku -noɔ -lɔ -gbɔ -a 'tua -anyɛɛ 'dlekukɛleɛ 'na -se -a -wɔ -wɛ 'ylime.

⁷ 'A 'ci- nɛ 'se "ku 'tee ne, 'ɔ -kakla bhɔ 'anyɛɛ -gwe, "ne -ɔ -sɛ bhɔ 'anye gbɛklɛklɛ 'na 'plomezoɛ 'na -gwe "ku 'a?

⁸ -Ɔ -zo 'anye 'ɛyi -wɛ 'wlime -gbɔ 'a no -wɛ, 'ɛ "ne "kɛ Lagɔ 'ɔ la- 'anye -wɛ yɔ.

⁹ Ŋwɛnɛɛ: "Manyɔ 'tekeyi yɔlia -lɔ faline 'na -ye 'wa 'ŋwa- -wɛ.

¹⁰ 'Ɛ -ko sɔbhɔ, "ne Anyinɛnyɔ "zo- -lɔ -ame 'dlekukɛleɛ 'dlezɔ 'anyɛɛ za: Zaa, 'e -kɛ 'dleku -gbɔ 'anyɛɛ 'dlepɔsɛ -nyɛ 'neɛ "bhaa "bhle yɛ -lɔ. -Mɔ, 'nyɔkpɔ 'na -ɔ -nyimɔ 'anye 'wlime -wɛ, Lagɔ yu 'ce 'kleyea, "ne 'nyɔkpɔ -ka 'ce "ku to-.

¹¹ -Nyɔsɔwanye, 'e 'sɛ -na bhɔ -zɛ 'ɛ "kudi weli 'na 'de yiɛ 'a? "Ne 'ɛ "kɛ -diɛɛ yɛ, sɔɔbɛɛza 'wa -gbapea -na bhɔ -zɛ -ame 'a? 'E 'cɛ bhulɛ, Zezu 'na klowa -wɛ -ka nɛ -la 'nyɔkpɔ 'gbapea!

¹² 'E nɛɛ: -Wa -nyimɔ 'nyakpa 'wlime 'anye 'glɛme -wɛ, 'wa 'di 'wayi "ku gou!

'A 'tale 'ayi yi -se Zuzu Wlewle "kɛ 'anye slu

¹³ -Nyɔsɔwanye, 'wa la- 'anye -gbɔ 'a "kɛ kɔ 'yele. -Mɔ, 'ɛ 'kɔyeleɛ -wɛ te -kɛ -gbɔ -se 'a te -kɛ 'ayi -se 'a 'pɔ "nyɛnye "ku 'dle -slu! -Ye 'a "kɛ no ne lɛ, 'a lɔbhɔlɔbhɔle- "ku -waleɛ "me.

¹⁴ Moyize 'na -Lɔ -wɛ 'klekle -gbagbɛ -bholo -kpee 'ye 'ɛ -ko -lɔ "me: «-Wamale -kɛ -eluyu -see 'e -wa -eyi 'nabhɛ -wɛ.»

¹⁵ -Mɔ, 'a kɛ niminimile-, "ne 'a "kɛ 'dlu yɔko 'ylaylale- ne, 'a 'luɔ- -kɛ, 'wli 'a "kɛ -kɛ -lɔ bhiabhiale-!

¹⁶ 'Ɛza, 'e no -lɔ nɛɛ: 'A 'tale Zuzu Wlewle yi -se 'ɔ "kɛ 'anyɛɛ zikpɛ slu, -se 'a te -kɛ -la 'anyɛɛ 'dlepɔsɛ -nyɛnye -wɛ gɛlele.

¹⁷ "Naa-, 'nyɔkpɔ 'na 'dlepɔsɛ -nyɛnye -nyɛ Zuzu Wlewle "bhaa 'gwe 'wa 'gwe -lɔ, "ne Zuzu Wlewle -nyɛ 'nyɔkpɔ 'na 'dlepɔsɛ -nyɛnye "bhaa 'gwe 'wa 'gwe -lɔ, 'wayi 'glɛme to yɛ -kɛ -lɔ, 'ɛnɛɛ 'wlisɛledɛ -noɔ -lɔ -gbɔ, -ye 'a 'yɔbhɔ -gbɔ 'a "kɛ no -wɛ, 'a -cɛ no.

¹⁸ -Mɔ, Zuzu Wlewle "kɛ 'anye -su, 'a "ne -la -Lɔ -noa 'waa.

¹⁹ -Ye Zuzu -nyɛnye no -wɛ, 'wa 'ye me 'ylime 'tee. "Tutuliɛ, 'wiyliɛ, 'kpɛtɛklinɔŋoɛ.

²⁰ "Ne 'wa bɔbɔ -lɔ "fu 'na lagɔ, "ne 'wa -ko me 'lelee -lɔ gu 'na mɔ, 'wa "ne sɔbhɔ 'walua 'yli, 'wa no -lɔ gbo, "ne 'wa no -lɔ lɔbhɔzo, "ne 'wa 'pɔ -lɔ 'kɛle, "ne 'wa 'tɛle -lɔ 'walua 'na yɔkomepleɛ siɛ, "ne 'wa dliɔdliɔle -lɔ "me -zakpɛ -zakpɛ "ku, "ne 'wa 'glɛglɛle -lɔ keyi.

²¹ "Ne 'walua 'na -ye 'wa -kɛ -wɛ, 'ɛyi 'wa 'yɔbhɔ -lɔ, "ne 'wa 'nɔmɔ -lɔ no gbi, "ne 'wa -noɔ -lɔ 'mlɛmlɛnya 'waa, "ne 'wa no 'lelee -lɔ -li 'na -bedi -ɛ 'wlole- -wɛ. 'Luɔ 'ye 'e luɔ -mlɛ -kɛ -lɔ 'anye, "ne 'e yɛ nɛ -kɛ bhulɛ- "klee, -wa no "ɛ -soɔ 'na -li -wɛ, 'wa -ka 'ce Lagɔ 'na 'Kamalezikpɛ "me 'bhulɛ ylele.

²² -Mɔ, Zuzu Wlewle 'na -ye 'ɔ 'nyɛ ne lɛ: -Waleɛ, 'ŋwɛnɛ, "kuwɔteɛ, 'dlebhlepiɛ, "nɛnekoɛ, "kulɔbhɔɛ, -alua 'na 'dlekukɛleɛ,

²³ 'dle -bɔŋobɔŋo -kɛleɛ "ne 'dlebhlepiɛ. -Lɔ "ne -la -ɛyi -wɛ 'wɔ -gble.

²⁴ -Wa -noɔ Klise Zezu -noa 'waa -wɛ, 'wanɛɛ 'ye 'wa 'yɔbhɔ "ne 'wanɛɛ 'dlepɔsɛ -nyɛnye -ɛ -sua nɛ -wɛ, 'wa lɛbhɛle klowa 'klo.

²⁵ "Naa-, Zuzu Wlewle -gbɔ -lɔ "ne -a -yɛ -lɔ, zaa, -a 'tale 'ɛ Zuzu Wlewle -wɛ 'yi -se 'ɔ "kɛ -anye -slu.

²⁶ -A te 'yli 'sie 'tɛle. -Ayi 'glɛme -a te gbo no, -ayi 'glɛme -a te lɔbhɔzo no.