Galatenya 4 - Nouveau Testament bété de Gagnoa

Klecɛnya "ne -la 'juyua 'waa -mɔ Lagɔ 'na yua 'waa -lɔ

¹ -Se 'e 'pɔ 'dle ne lɛ: -Sɔɔdɛku "bhenyɔ 'na yu -noɔ -mlɛ yu yɔ -wɛ, 'ɔ -nyɛ 'juyu "bhaa -bhelea 'waa -lɔ. 'Ɛ -ko "ɛ -soɔ, -mɔ, 'ɔ -noɔ -lɔ -li 'klekle 'na "bhenyɔ yɔ.

² "Ne 'ɔ yi 'ɔnɛɛ "kuwlonya "ne 'wa -gɛ 'ɔnɛɛ -li 'yliku -wɛ 'plome "zo -kaa "ne 'ɛ "tɛnye -ye 'ɔ 'to di- -wɛ "kɛ 'ce -lɔ ylɛ.

³ -Anyɛɛ -dɛku, 'ɛ -bhele -wɛ yɛ -lɔ. "Naa-, 'watɔ -ce yua 'nasɛ 'ye -a -ko 'awɔ -lɔ, "ne -a no 'awɔ -lɔ dodo ne "ku 'na -li -ɛ "ne -bɛɛ' "me -ko -wɛ 'na 'juyua 'waa.

⁴ -Sɔɔdɛku, "tɛnye -ylɛ lɛ ne, Lagɔ -lebhe 'ɔ Yowli. 'Ŋɔnɔ -gwɛlo -lɔ "ne 'ɔ "zo me nɛ Moyize 'na -Lɔ 'plome.

⁵ 'Ɔ -yi -se 'ɔ "kɛ -wa 'nɔŋo -Lɔ "ku -wɛ kɔ yelea, -se 'ɔ "kɛ -anye Lagɔ 'na yua "zoa.

⁶ "Naa-, 'ɔnɛɛ yua 'ye -a -noɔ -lɔ -diɛɛ, 'ɛ -noɔ -lɔ nɛɛ: Lagɔ -nɛme -anye 'ɔ Yowli 'na Zuzu 'dlezɔ, "ɛ Zuzu -wɛ -gbɔ -lɔ "ne -a no -lɔ: -Abba Lagɔ!

⁷ Zaa, -e "ne -la 'juyu yɔ, -mɔ, Lagɔ 'na yu 'ye -e -noɔ -lɔ. -E -noɔ -kɛ 'sela 'ɔnɛɛ yu yɔ za, "ɛ Lagɔ yi -eyi 'gube -li -ye 'ɔ "zo- lɔbhɔ 'ɔnɛɛ yua za -wɛ -eyi kɔ 'je me.

'Dlebhɛ lɔbhɔ Pɔle, Galate 'na 'klecɛnya za

⁸ 'Watɔ -ce, 'a "ne 'awɔ Lagɔ -yi, 'ɛza, 'a -noɔ 'awɔ -lɔ zikpɛ ne "ku 'na -li -wɛ 'wɔ, -ɛ "ne -diɛnadiɛ Lagɔ yɛ -wɛ 'na 'juyua 'waa.

⁹ -Mɔ, -dɛmeda, 'a -yi Lagɔ, "ne -tiaa 'nabhɛ Lagɔ -yi -lɔ 'anye. Zaa, sɛko bhɔ "ne 'a "kɛ bhɔ zikpɛ ne "ku 'na -li -ɛ "ne 'bhɛloɛ -kɛ, "ne -ɛ "ne -bɛɛ' "me -ko -wɛ, "kusɔ 'plome "zole 'a? 'A 'yɔbhɔ bhɔ -gbɔ 'a "kɛ "kusɔ 'ɛnɛɛ 'juyua "zole "bhaa 'a?

¹⁰ 'A 'gwɛlele 'yli 'na -bedia, 'ce 'na -bedia, "ne 'ylobɛ -wɛ 'wɔ 'na -bedia!

¹¹ 'Dlebhɛ lɔbhɔ -ame 'ɛ lea "fu 'ye 'e -ylɔ kɔ 'anyɛɛ za!

¹² 'A no -me 'neɛ sɛne, -nyɔsɔwanye, sɛko -wɛ, 'e "zo -la sɛgbɛɛ 'anye zɛ. 'E bhubhɔ 'anye. 'A "ne -ame "nyɛnye 'na yɛ -bholo 'wli no.

¹³ 'A -yi sɛ -gbɔ 'e "ne 'awɔ -yɛ za, 'e -yi -lɔ 'anye 'Denaade 'sɛle -ka 'neɛ 'tɛtɛɛ dɛku.

¹⁴ 'Neɛ ku "ne nɛ "klo wlo sɛ -kɛ, -mɔ 'ɛ -ko sɔbhɔ "ne 'a "ne -ame 'kwlɛ "me 'pɔ-, "ne 'e "ne 'anye -nyɛnyɛne "kulele-. -Mɔ, 'a 'sa -ame 'tee, sɛgbɛɛ "nɔgɔzilɔ, "ne 'ɛ -leɛ "ɛ Klise Zezu 'nabhɛ.

¹⁵ 'Anyɛɛ -watɔ 'na 'ŋwɛnɛ -wɛ de 'ɛ -ko bhɔ? "Naa-, -diɛnadiɛ, 'e 'ye- 'ɛ 'dɛ, zaa, 'ɛ kɛ nɛ 'anyɛɛ 'yli 'na "bhle sɛ yɛ, 'a 'yi nɛ "bhle sɛ, "ne 'a 'yi nɛ -ame kɔ 'je.

¹⁶ "Ne -dɛme ne, 'e bhulɛle 'anye gbɛklɛklɛ, za 'e "zo bhɔ 'anyɛɛ 'gblenyɔ bha?

¹⁷ "Ɛ 'nyakpa -wɛ -si 'anyɛɛ za "me -mɔ, 'wanɛɛ 'dlepɔsɛ "ne -kɛ "nɛne. 'Wa 'yɔbhɔ -gbɔ 'wa "kɛ 'anye -ame 'beku 'sɛ cuu, -se 'a "kɛ 'wanɛɛ za "me -si.

¹⁸ -Ɛ 'nɛne -noɔ -lɔ -gbɔ, si 'ɛ 'nɛne -wɛ za "me yiɛ. "Ɛ "ne -kɛ -ye 'e -ko 'anye 'glɛme -wɛ 'ɛyikɔ za yɛ!

¹⁹ Zaa, 'na yua nye, 'e 'gbapele "kusɔ 'anyɛɛ za, sɛgbɛɛ 'ŋɔnɔ gwɛle. "Ne 'ɛ yi "me 'gwlɛ -kaa, "ne 'a -kɛ -lɔ Klise 'na kosɛ "ku 'libhi 'anye "me.

²⁰ 'E 'yɔbhɔ nɛ -gbɔ 'e "kɛ 'anye yɔko ko -dɛme ne, -se 'e "kɛ 'anye bhulɛle -visɛ. "Naa-, 'e "ne -ye 'anye 'wɔ "bhaa -a kɛ no -yi.

Agale "ne Sala -ko 'mɛnenoɛ "sɔ 'na -bhulɛ "me

²¹ 'A bhulɛle -ame, 'anye -wa no -gbɔ 'a "kɛ -Lɔ 'plome "zo -wɛ, 'a "ne bhɔ -ye 'ɛ bhulɛ -wɛ "me 'nyini?

²² -Ɛ 'kɛleɔ ne lɛ: «Ablame 'gwɛle 'widia yua "sɔ: Agale -ɔ -noɔ 'juyuŋɔnɔ yɔ -wɛ "bhaa, 'wa -gwɛle 'widi yu -bholo, "ne Sala, 'ŋɔnɔ 'na -ɔ "ne 'juyu yɔ -wɛ "bhaa, 'wa -gwɛle 'widi yu -bholo.»

²³ 'Juyu 'na 'widi yu -gwɛleɔ -see 'nyɔkpɔ "ne 'ŋɔnɔ 'yɔbhɔ -wɛ. -Mɔ, 'ŋɔnɔ 'na -ɔ "ne 'juyu yɔ -wɛ 'na 'widi yu -gwɛleɔ -see Lagɔ -ple weli -wɛ.

²⁴ "Ɛ weli ne -kɛ 'lelee zɔsɛsɛ 'na -vinɛ. Sɛko -wɛ, "ɛ 'ŋwenea -wɛ -ko sɛgbɛɛ 'mɛnenoɛ "sɔ. 'Mɛnenoɛ 'na tɛtɛnɛ -ɛ 'bhale Sinayi 'na tlo 'vli -wɛ -noɔ -lɔ Agale yɔ, "ɛ 'gwɛle -lɔ 'juyua.

²⁵ "Ne Agale, Sinayi 'na tlo 'ɛ -ko Alabi -wɛ yɔ -lɔ. 'Ɔ -ko -me 'lelee -dɛme 'na Zeluzalɛme -du -ɛ -noɔ 'juyu yɛ, 'ɛ -nyɛ 'ɛnɛɛ yua "bhaa.

²⁶ -Mɔ, Zeluzalɛme -ɛ -ko "nɔgɔ "me -wɛ -yele kɔ, "ne 'ɛ -noɔ -lɔ -a "nɔ yɔ.

²⁷ "Naa-, Lagɔbɔgo "me sɛne 'wa 'kɛle -lɔ nɛɛ: 'Ŋwɛnɛ lɔbhɔ 'se -eyi, -eyi -mɔ "ne gwɛle -wɛ! -Se 'kpa 'se 'ŋwɛnɛ za "me, -eyi -mɔ "ne gwɛle 'na 'gbapeɛ yibhlele- -wɛ! -Ɛɛ, 'ŋɔnɔ -ye 'wa 'bhale "me -wɛ yi 'ce yua -gbagboa yle. "Ne 'ɛ 'yi -ɔ -kɛ 'widi -wɛ "ku zi.

²⁸ "Ne 'anye, -nyɔsɔwanye, Lagɔ 'na yua -ye 'ɔ -gwɛle welipleɛ "me Izake 'na sɛku 'ye 'a -ko -lɔ.

²⁹ -Mɔ, -watɔ -dɛce "ku, Ablame 'na 'widi yu -ye 'wa -gwɛle -wɛ, -see 'widi -nyɛ 'ŋɔnɔ "bhaa 'yɔbhɔ -wɛ, 'wa -gwɛlo -lɔ, 'ɔ 'gbapea 'widi yu -ye Lagɔ Zuzu -gbɔ "ne 'wa yu 'gwɛle- -wɛ. "Ne -dɛme ne, "ɛ sɛbhele -wɛ yɛ 'lelee -lɔ.

³⁰ -Mɔ, -see Lagɔbɔgo lɛ bhɔ? 'Ɛ nɛɛ: «'kpeti 'juyuŋɔnɔ -nyɛ 'ɔnɛɛ yu "bhaa. 'Bhɔ! "Naa-, 'juyu 'na yu "ne 'bhɛle- -se 'ŋɔnɔ 'na -ɔ "ne 'juyu yɔ -wɛ 'na yu "bhaa 'wa "kɛ 'gubeli "ku 'bhele»

³¹ -Nyɔsɔwanye, lɔbhɔ 'na dɛku 'juyuŋɔnɔ 'na yua 'ye -a "ne 'se -noɔ, -mɔ, 'ŋɔnɔ 'na -ɔ "ne 'juyu yɔ -wɛ 'na yua 'ye -a -noɔ -me -lɔ.