Galatenya 3 - Nouveau Testament bété de Gagnoa

-Lɔ "ne 'dlekukɛleɛ

¹ 'Anye Galate 'na 'nyakpa -wa "ne "nɛ- 'kplokplo, -ɔ 'pɔ- 'bhɔ 'anye "ɛwɛ 'wlime 'a? "Ne 'anye, 'wa 'tua- 'se 'anye -see Zezu Kli -kule klowa "klo -wɛ 'ylime ne!

² 'A sibha 'na 'yukwli dodo weli 'cibhɛ ne "ku: Zuzu Wlewle -ye 'a -yle -wɛ, 'a "zo- -Lɔ 'plome za yɛ "bhaa, -mɔ, 'a -kɛle 'Denaade 'dleku za yɛ?

³ 'Wli "me -nyimɔ bhɔ 'anye -a! "Kucidɛku, Zuzu Wlewle 'ye 'a tɛle- nɛ "kɛ -lɔ 'dle, -Dɛmeda, 'ayi 'ye 'a "kɛ -la -lɔ 'dle 'tɛle -a?

⁴ Zaa, -ye 'a -no doɔ 'klekle -wɛ "fu yɛ -lɔ? "Ne 'ɛ kɛ nɛ 'se "ɛ "fu yɛ -ce, 'e "ne 'dleku -kɛ -gbɔ "fu yɛ!

⁵ Lagɔ 'nyɛ 'anye 'ɔnɛɛ Zuzu, "ne 'ɔ 'pɔle 'anye 'glɛme zɛzɛ! -Ye Lagɔ no "ɛ doɔ -wɛ, -a "zo -Lɔ 'plome za 'ɔ -no "bhaa, -mɔ, 'Denaade -ye 'a 'no- "ne 'a -kɛle 'dleku -wɛ za yɛ bha?

-Lɔ "ne "zoa- 'nyɔkpɔ "meŋwinɛlenyɔ

⁶ -See Ablame -kɛle Lagɔ 'dleku -wɛ za 'ɔ -lɔ- -lɔ "meŋwinɛlenyɔ.

⁷ Zaa, 'a "no 'ɛyi ne "me: -Wa -kɛ 'Lagɔ 'dleku -wɛ -noɔ -lɔ Ablame 'na yua 'waa.

⁸ "Naa-, Lagɔbɔgo lɛ -me 'lelee sɛne "kle nɛɛ: «Lagɔ yi -wa "ne Zufonya 'waa -wɛ "meŋwinɛlenya "zoa- 'wanɛɛ 'dlekukɛle -ylime. "Ɛ 'Denaade ne "me, Lagɔ -bhulɛle nɛ Ablame "kle: Lagɔ yi 'ce -glɔ 'klekle 'ŋu "pɔ Ablame "me.»

⁹ Sɔbhɔ za, -wa -kɛ 'dleku -wɛ, Lagɔ yua 'ŋu "pɔ 'dlekukɛlenyɔ Ablame "bhaa.

¹⁰ "Naa-, -wa zɛle -Lɔ 'na 'plomezoɛ "ku -wɛ, -wa -bhleɔ "ku, "naa-, sɛne 'ye 'ɛ 'kɛleɔ- -lɔ Lagɔbɔgo "me -gbɔ: «'Nyɔkpɔ 'na -ɔ "ne -ɛ 'kɛleɔ -Lɔ 'na "bɔgo "me -wɛ 'klekle kɔ kɛ -godogodo, 'ɔ yi 'ce "ku bhleɔ-.»

¹¹ Lagɔ 'yliku, 'nyɔkpɔ 'na -ɔ ŋwinɛle- "me -Lɔ 'na kɔ -sluɛ "me "ne -le, 'ɛ -ko gbɛklɛklɛ. "Naa-, sɛne 'wa bhulɛ -lɔ -gbɔ: «'Nyɔkpɔ 'na -ɔ -kɛ Lagɔ 'dleku -wɛ "meŋwinɛlenyɔ yɔ -lɔ, "ɛ soɔ -nɔ -wɛ yi 'ce 'dlekukɛle -za zikpɛ yle.»

¹² -Lɔ -nyɛ 'dlekukɛleɛ "bhaa "ne -bhele yɛ. "Naa-, «-ɔ "zo -Lɔ 'na -gbagbɛ 'klekle 'plome -wɛ yi 'ɛnɛɛ za zikpɛ yle.»

¹³ "Ne "kubhleɛ -ye -Lɔ 'nɛme -anye "ku -wɛ, Klise 'di- 'ɛnɛɛ 'galu "yitɛ "ku. -Anyɛɛ za 'wa -bholo -lɔ "ku. "Naa-, Lagɔbɔgo "me sɛne 'ye 'ɛ 'kɛleɔ- -lɔ: «'Nyɔkpɔ -ye 'wa -gbɛtele su 'vli -wɛ, 'ɔyi 'ye- "kubhleɛ 'sa -lɔ kɔ.»

¹⁴ 'Ɛ ylɛle- "ɛ soɔ, -se -wa "ne Zufonya 'waa -wɛ "kɛ Ablame 'na 'ŋupɛɛ yle -me Zezu Kli "me. Zaa, 'dlekukɛleɛ "me -a yi weli -ye Lagɔ -ple -wɛ yle me. 'Ɛ 'sɛ zɔ nɛɛ Zuzu Wlewle.

-Lɔ 'sɛ lɔbhɔ Lagɔ 'na weli -ye 'ɔ -ple -wɛ

¹⁵ -Nyɔsɔwanye, 'e "kɛ 'anye -see -li ylɛle zikpɛ ne "ku -wɛ 'anye bhulɛle: 'Nyɔkpɔ kɛ 'ɔnɛɛ weli -tle "ne -se 'ɛ "kɛ ylɛle -wɛ "ɛ "kɛ sɔbhɔ -ko ne, 'nyɔkpɔ -cɛ sɔbhɔ -sɛ "ne 'ɔ 'cɛ "ku 'pelia.

¹⁶ "Ɛ sɛbhele -wɛ 'ye Lagɔ -plele -lɔ- Ablame weli kɔ 'ɔ -nyɛ 'ɔnɛɛ yu 'na yu "bhaa Zenɛ 12.7. Lagɔbɔgo -na kɛ no -gbɔ -ye 'ɔ "kɛ 'gwɛle -wɛ 'wɔ 'waa, sɛgbɛɛ 'nyakpa -kwleyia 'wa ga. 'Bhɔ 'nyɔkpɔ -bholo -kpee 'wa 'galɔ. Sɛne 'ye 'ɛ lɛ -lɔ nɛɛ: «'Neɛ yu 'na yu.» "Ɛ 'nyɔkpɔ -wɛ, Klise yɔ -lɔ.

¹⁷ Sɛne 'ye 'e 'pɔ -lɔ 'dle nɛɛ: 'Watɔ -ce 'ye Lagɔ -tle 'awɔ -lɔ weli "ne -se 'ɛ "kɛ ylɛle -wɛ -ɛ ylɛle 'awɔ -lɔ sɔbhɔ. Moyize 'na -Lɔ -ɛ -yi 'ylobɛ -glo 'umgbu 'na 'wukwɛ -mɔɔnɔ 'ylobɛ -glo -bholo 'ylobɛ -kogbɔ 'ple "bhuɔ -wɛ "ne 'bhɛle "ne 'ɛ 'cɛ lɔbhɔ 'sɛ.

¹⁸ -Lɔ kɛ gbɔ "ne 'wa kɛ 'gugbɛ "ku 'libhi ne, welipleɛ 'ye 'ɛ -na -da "me 'bhale-. "Naa-, welipleɛ kɔ 'ye Lagɔ -tua -lɔ Ablame 'ɔnɛɛ -waleɛ 'ylime.

¹⁹ Zaa, sɔɔbɛɛza -Lɔ -le bhɔ -tiaa? "Naa-, 'ɛ 'bhale 'beme -se 'ɛ "kɛ -anye "nyɛnye 'ylime 'tua. -Se 'nyɔkpɔ 'ɔ "kɛ 'awɔ Ablame 'na -gligbɛ "ku 'bhale- -wɛ, "kɛ 'ce yi. 'Ɔnɛɛ za Lagɔ -ple 'awɔ -lɔ weli. "nɔgɔzilia -sloa -lɔ 'ɛ -Lɔ -wɛ. "Ne 'ɛ yi -lɔ 'nyɔkpɔ "me ylɛle- "ne 'ɔ yi -lɔ 'de -sɛ.

²⁰ -Mɔ, 'wa -na "meylɛlenyɔ siɛtɛle, 'ɛ kɛ 'nyɔkpɔ -bholo za yɛ. "Naa-, Lagɔ -yle -bholo -kpee.

Sɔɔbɛɛza Lagɔ 'je- bhɔ -anye -Lɔ kɔ

²¹ Zaa, -se 'ɛ sɛ bhɔ zɔ 'a? -Lɔ -nyɛ Lagɔ 'na weli -ye 'ɔ -ple -wɛ "bhaa keyi 'ye 'ɛ -glɛglɛle bha? 'Bhɔ gou! -Lɔ kɛ nɛ kɛ 'bhɛle -se 'ɛ "kɛ zikpɛ "nyɛ, "ne 'nyakpa kɛ nɛ -kɛ 'ɛ -Lɔ -wɛ kɔ sa- ne, ɛɛ -diɛɛ, -Lɔ yua nɛ "meŋwinɛlea.

²² "Naa-, Lagɔbɔgo nɛɛ -glɔnya 'klekle 'nyinyonoli 'gblua- -lɔ 'wlime. Lagɔ 'na weli -ye 'ɔ -ple -wɛ "kɛ nɛ -lɔ 'yli 'wlole 'dlekukɛlenya 'klekle za, 'wanɛɛ Zezu Kli 'na 'dlekukɛle -ylime.

²³ -Sɔɔdɛku Klise 'na 'dlekukɛleɛ -na nɛ yi -wɛ, "ɛ -Lɔ -wɛ -jiɛ "me 'ye 'ɛ 'pɔ nɛ -lɔ -anye. "Tenye 'na -ye Lagɔ "kɛ nɛ -anye 'dlekukɛleɛ 'ylime -tua -wɛ 'ye -a "kɛ nɛ -lɔ wo-.

²⁴ Sɔbhɔ za, -Lɔ -kole -anye "klo -kaa "ne Klise yi -lɔ yi -se 'dlekukɛleɛ "kɛ -kɛ -anye "meŋwinɛlenya "zoa- Lagɔ 'yliku.

²⁵ -Dɛmeda, Klise 'na 'dlekukɛleɛ -yi. Zaa, -Lɔ "ne -da -anye "klo -kole.

²⁶ "Naa-, Lagɔ 'na yua 'ye 'a -noɔ -lɔ 'klekle, 'a -kɛ Zezu Kli 'dleku zɛ.

²⁷ 'Anye 'klekle, Klise "me 'ye 'a -ylele -lɔ batɛme. "Ne 'a yi -lɔ 'ɔnɛɛ 'wlole "zo.

²⁸ -Dɛmeda, "meseseliɛ "ne -da -le, Zufonyɔ 'oo, Glɛkeyu 'oo, 'juyu 'oo, -ɔ "ne 'juyu yɔ 'oo, 'widi "ne 'ŋɔnɔ 'oo, 'anye 'klekle -bholo 'ye 'a -zo -da -lɔ Klise Zezu "me.

²⁹ 'A kɛ Klise -noa 'waa ne, Ablame 'na -gligbɛ "ku 'na yua 'ye 'a "zo -me 'lelee -lɔ. Lagɔ 'na weli -ye 'ɔ -ple -wɛ 'na 'gugbɛ 'ye 'a "kɛ -lɔ yle -me.