Filiponya 4 - Nouveau Testament bété de Gagnoa

Pɔle 'na 'demezoweli 'na 'bebhiɛle- -nɛ

¹ -Awale 'wanye, 'anyɛɛ to 'lɔbhɔ -ame kpɛnyee za 'e 'yɔbhɔ -gbɔ 'e "kɛ 'anye "kusɔ 'ylime 'ye ka yi. "Naa-, 'anye -noɔ -lɔ 'neɛ 'ŋwɛnɛ 'waa, "ne 'anye -noɔ 'lelee -lɔ 'neɛ -bhlegbimezonya 'waa. 'Ɛnɛɛ za, 'titoa 'wanye, 'a "tɛle Anyinɛnyɔ 'dle gbigbi "ɛ sɛbhele -wɛ.

² Evodi "ne Sɛtiike, 'e 'yɔbhɔ -gbɔ 'a 'nonole- "ku "me, -se Anyinɛnyɔ "bhaa 'a kole- "ku.

³ "Ne -eyi, 'neɛ 'diɛɛ 'na -gwebhlinyɔ, 'e 'yɔbhɔ -gbɔ kwɛle- "ɛ 'ŋwenea "sɔ -wɛ. "Naa-, 'wayi 'wɔ "bhaa -a -gwele kɔ 'Denaade za, 'ɛ -nyɛ Klema "ne "nowlia -nyɔ 'wɔ "bhaa -a -nole libhɔ 'gɔme -wɛ. 'Wanɛɛ 'tɔ 'kɛleɔ- zikpɛbɔgo "me.

⁴ 'Ɛza, 'e bhulɛle -lɔ 'anye nɛɛ: 'Ŋwɛnɛ 'lɔbhɔ 'ce 'anye -godogodo -see 'a -nyɛ Anyinɛnyɔ "bhaa 'a kole- "ku -wɛ za! 'E bhulɛle 'ce 'anye 'yiɛ, 'ŋwɛnɛ 'lɔbhɔ 'ce 'anye!

⁵ 'Nyakpa 'klekle yibhlele- 'anyɛɛ "nɛnekosɛ. Anyinɛnyɔ 'na yizle "ne -ka -la dɛtlo-.

⁶ -Bɛɛ' 'na 'dlebhɛ te 'anye 'lɔbhɔ, -mɔ, -dee 'ɛ "mɛ -ko "ne -dee 'ɛ kɛ -ko, 'a zlɛ Lagɔ -ye 'a 'yɔbhɔ -wɛ, bhubhɔweli "me, "ne 'dle 'na -dle kɔ, -se 'a 'bhɔlo-.

⁷ -Se Lagɔ 'na "kuwɛtɛ -ɛ zi lɛ -li 'klekle "ku "kɛ 'anyɛɛ 'dle -nyɛ 'anyɛɛ 'dlepɔsɛ "bhaa 'slu- Zezu Kli "me.

⁸ 'Bebhiɛleweli -ye 'e "kɛ 'anye bhulɛle- ne lɛ: "Nowlia 'wanye, -ɛ -noɔ "nɛne yɛ -wɛ, "ne -ɛ -noɔ gbɛklɛklɛ yɛ -wɛ, "ne -ɛ -koɛ 'ŋlukwasɛ -wɛ, "ne -ɛ -noɔ gbaa yɛ -wɛ, "ne -ɛ -ko 'plome -wɛ, "ne -ɛ -ko -kpee -wɛ, "ne -ɛ -le 'ŋwana "ku -wɛ, "ne -ɛ -ko 'wlewle -wɛ, "ne -ɛ sɛ zu 'klo "me -wɛ, 'ɛyi -wɛ 'klekle -na -ko 'anye 'wugɔŋo "me.

⁹ -Ye 'e -sloa 'anye -wɛ, "ne -ye 'a 'ciɛle- -ame kɔ -wɛ, "ne -ye 'e -bhulɛ "ne 'a 'no- "me -wɛ, "ne -ye 'a -wolo -ame "ku "ne 'e -no 'anye 'glɛme -wɛ, 'ɛyi 'klekle, 'a 'no. 'Ɛɛ "kɛ -lɔ gbɔ "ne Lagɔ, -ɔ 'nyɛ "kuwɛtɛ -wɛ "bhaa 'a "kɛ -lɔ "ku kole-.

Pɔle bhɛle Filipɔ -du "me 'na 'nyakpa, -ye 'wa 'nyɔ- -wɛ za

¹⁰ 'Ŋwɛnɛ 'lɔbhɔ 'ce -ame Anyinɛnyɔ Zezu Kli "me, -ye 'a "zolea- "kusɔ -ame 'yliku -wɛ za. 'E -yi sɛ -gbɔ 'a 'yɔbhɔ nɛ -gbɔ 'a "kɛ nɛ sɛne -ame -li 'nyɛ, -mɔ, 'a "ne nɛ -see 'a 'cɛ "sa -yi.

¹¹ 'E -na -kɛ no -gbɔ 'a "kɛ -ame -li 'nyɛ za 'e bhulɛ -kɛ "ɛ soɔ. "Naa-, -ame 'neɛ dɛku ne, 'e -kɛ -bɛɛ' 'oo, 'e "ne -bɛɛ' -kɛ 'oo, 'neɛ -ye 'e -kɛ -wɛ, 'ɛɛ -noɔ -lɔ 'neɛ- yɛ.

¹² 'Ɛ yi 'poɛ "me "zo 'oo, 'ɛ yi -klɔgbɔ "me "zo 'oo, 'e -yi -see 'e "kɛ -ayi 'slu-. -Dee 'e kɛ -ko, "ne -dee 'e "mɔ -ko, -see 'ɛ kɛ -ko, "ne -see 'ɛ "mɔ -ko, 'ŋwɛnɛ 'lɔbhɔ 'ce -ame "yiɛ. 'E -kɛ lilibɛɛ 'oo, ŋɔŋo 'lɔbhɔ -ame 'oo, 'e -kɛ -li -vu 'oo, 'e "ne -bɛɛ' -kɛ 'oo, 'ŋwɛnɛ 'lɔbhɔ 'ce -ame "yiɛ.

¹³ 'E 'bhɛle- 'e "kɛ -li 'klekle no, Anyinɛnyɔ -ɔ 'nyɛ -ame 'kwɛmetamaleɛ -wɛ za.

¹⁴ -Mɔ, -ye 'e 'ye nɛ 'kle -wɛ, 'a -kwɛle nɛ -ame! "Ne -ye 'a -kwɛle -ame -wɛ 'ɛ 'nɛne.

¹⁵ 'A -yi 'se 'sɛ ne, 'anye Filipo -du "me 'na 'nyakpa, -sɔɔdɛku 'e 'bha -nɛ Masedoane -glɔ "me "ne 'e 'ci- 'Denaade 'na -sɛ -ku -wɛ, lɔbhɔ 'na dɛ -wɛ "ku, Lagɔgligbɛ 'na -vinɛ "ne -ame -bɛɛ' kɔ 'je- "ne 'ɛ "kɛ 'dlasi zo-. -Mɔ, 'anye Filipo -du "me 'na 'nyakpa, 'ayikɔ cuu- -kwɛle -lɔ -ame.

¹⁶ -Dee 'e -ko 'awɔ Tesalonike -du "me -ce, 'a 'pɔ 'awɔ -ame -li -gwe "ku "yiɛ.

¹⁷ -Li -nyɛɛ 'ye 'e -na nɛ 'siɛ 'tɛle- -tiaa! -Mɔ, -ye 'e 'tɛle 'siɛ 'pa- -lɔ nɛɛ: 'A kɛ -ame -li 'nyɛ ne, -ye 'a no 'na za -wɛ 'nɛme- 'anye -jɔlo "ku.

¹⁸ -Ye 'e 'yɔbhɔ -wɛ, 'e -kɛ, "ne 'ɛ -zu! -Dɛme 'lelee, 'e -yle -ye 'a -slua Epaflodiite 'na za -wɛ. 'Ɛ -li -wɛ -ko sɛgbɛɛ bɔbɔli -nyɔ 'na 'ŋoni -ko sɛgbɛɛ lasiklɔ. 'Ɛ -soɔ 'na bɔbɔli -wɛ 'ye Lagɔ -wa -lɔ "ne 'ɔ 'sa -lɔ kɔ.

¹⁹ 'Neɛ Lagɔ yi 'anye -li 'klekle -ye 'a 'yɔbhɔ -wɛ kɔ 'je, Anyinɛnyɔ 'ŋlumenyɔ Zezu Kli 'na 'tɔ "me, "naa-, -Klɔgbɔnyɔ "yitɔ yɔ -lɔ, 'ɔnɛɛ -klɔgbɔ "ne nɛnidɛ -kɛ.

²⁰ -A To Lagɔ me 'ŋlu -godogodo 'yiɛ! Amɛn!

Pɔle 'na cilɛcilɛweli

²¹ 'A bhɛle- Lagɔ 'na yua 'klekle Zezu Kli "me. "Nowlia -nyɔ 'wɔ "bhaa 'a -ko mɛne -wɛ bhɛle 'anye.

²² Lagɔ 'na yua 'klekle -wa -ko "ɛ 'du ne "me -wɛ 'bhɛle 'anye. 'Wa bhɛle -tiaa -wa lɔbhɔ 'Kamalenyɔ Sezale "ku -wɛ.

²³ Anyinɛnyɔ Zezu Kli 'pɔ 'anye 'ŋu!