Filiponya 3 - Nouveau Testament bété de Gagnoa

Pɔle -kɛ Zezu -bholo -kpee 'dleku

¹ -Dɛmeda, "nowlia 'wanye, Anyinɛnyɔ za, 'a no 'ŋwɛnɛ! 'E yi 'ce 'anye "ɛ sɛbhele -wɛ "ku kɛle, "ne 'ɛ -ka -ame 'gbapea-. 'Ɛ "kɛ 'anye 'kwɛme "tamalea- za yɛ -lɔ -tiaa.

² 'A luɔle- -kɛ 'nyakpa 'na -wanɛɛ nonoli -ko sɛgbɛɛ gwea, "ne libhɔnonya -nyɛnyea, "ne 'wa "zo "ku -diɛ "plome -wɛ "ku.

³ -Mɔ, 'wa kɛ no -gbɔ -wa 'diɔ- "ku -wɛ, -anye 'wa ga -lɔ -tiaa. "Naa-, -anye, -a lɔbhɔ Lagɔ "ku Zuzu Wlewle "me zɛ, "ne -anye -wa -ko Zezu Kli "me -wɛ, -anye zia -lɔ -ayi "ku, "ne dodo ne "ku 'na -li "me 'ye -anyɛɛ 'dlekukɛleɛ -na 'bhale-.

⁴ -Ame 'nabhɛ 'e 'bhɛle- -se 'e "kɛ 'ayigɛsɛ 'ayi 'dleku 'kɛle-. 'Nyɔkpɔ kɛ no -gbɔ 'ɔ -kɛ 'ɔyi 'dleku ne, -ame, 'neɛ "kɛ nɛ -lɔ "ku zi.

⁵ "Naa-, 'yli gbɔɔta -zle "me 'wa 'di- -lɔ -ame "ku, "ne Izlayɛleyu 'ye 'e -noɔ -lɔ. Bɛzamɛ 'na -gligbɛ "ku 'ye 'e 'bhale -lɔ. Ebleyu 'na yu 'ye 'e -noɔ -lɔ, "ne 'ɛ kɛ Lagɔ 'na gbagbɛ 'na "kɔkɛleɛ "me yɛ ne, Faliziɛnyɔ 'ye 'e -noɔ -lɔ.

⁶ 'Ɛ dɛ -wɛ "ku, 'kwɛme 'tɛ- nɛ -ame gbligbli -Lɔ 'na "kɔkɛledɛ "ku, 'ɛza, 'e 'gbapea nɛ -lɔ Lagɔgligbɛ kpɛnyee. "Ne -Lɔ "me 'na -ye 'wa no -gbɔ 'wa no -se 'wa "kɛ "me ŋwinɛle- Lagɔ 'yliku -wɛ, 'e no nɛ 'tee, "ne 'e "ne nɛ 'nuɔsɔbhɔledɛ -kɛ.

Klise 'sa- 'na 'dle kɔ

⁷ -Mɔ, 'e -yibhlele -la -dɛme Klise za, -li 'klekle 'na 'ye 'e 'wlole "me -wɛ "ne -la -bɛɛ' "me -ko 'neɛ dɛku.

⁸ "Ɛ -ɛwɛ 'klekle ne, 'ɛ -ko -ame 'yliku sɛgbɛɛ -bɛɛ' 'na -ye 'e 'pɔ- 'kwlɛ "me Anyinɛnyɔ Zezu Kli za -wɛ. "Ɛ -ye 'e -yibhlele Anyinɛnyɔ Zezu Kli -wɛ, 'ɛ 'kpɔ- "ne 'ɛ -zi -li 'klekle "ku. Zezu Kli za, 'e 'bhale- -li 'klekle "me. 'E 'wolo -da "ku sɛgbɛɛ -didi, -se Klise 'ɔyikɔ "kɛ -bɛɛ' 'na 'ye 'e "kɛ yle -wɛ "zo.

⁹ 'E 'yɔbhɔ nɛ -gbɔ 'ɔyi "bhaa -a "kɛ "ku -kole gou, -mɔ 'ɛ "ne -kɛ 'neɛ 'bhɛloɛ "me yɛ, "ne 'ɛ "ne -kɛ 'lelee gbagbɛ 'na "kɔkɛleɛ "me yɛ, -mɔ, Zezu Kli 'na 'dlekukɛleɛ "me. "Meŋwinɛleɛ -ye Lagɔ 'je lɛ 'ɔnɛɛ -wa -kɔ 'dleku -wɛ kɔ "me.

¹⁰ -Bɛɛ' 'na -ye 'e 'yɔbhɔ -wɛ -yle -bholo -kpee: 'E "kɛ Zezu Kli yibhlele- 'tee, "ne 'bhɛloɛ -ɛ -gbɔ "ne 'ɔ yi gluzɔ 'wlo -wɛ. -See Klise 'ye- 'kle -wɛ, 'e yi sɔbhɔ 'na "kle 'ye -gbo 'ŋunu -me. "Naa-, 'e 'yɔbhɔ -gbɔ 'e "kɛ 'ɔnɛɛ sɛ "ku me.

¹¹ -Se 'ɛ kɛ 'bhɛle- ne, 'e "kɛ 'ɔnɛɛ sɛ gluzɔ 'wlo me.

-A guɔ -se -a 'cɛ 'wli -sɛ

¹² 'E -na -kɛ no -gbɔ 'e -ylɛ 'du "bhuɔ, 'e -na -kɛ no -gbɔ "nyɛnye "ne -da -ame "me -ko, -mɔ, 'e 'tɔtɔle "kɛ 'ayi "kɔ, "ne 'e guɔ -na -kɛ "yiɛ, -se 'e "kɛ -kɛ 'ye 'wa 'piɛ- -wɛ yle, "naa-, -ame 'nabhɛ, Zezu Kli 'sa- 'na 'dle kɔ zɛ.

¹³ "Nowlia 'wanye, 'e -namlɛ -kɛ "ɛ -ye 'wa 'piɛ- -wɛ yle. -Mɔ, -bɛɛ' -bholo 'na -ye 'e no ne lɛ: 'E -dlu -ɛ -ko 'beme -wɛ "ku, -mɔ, 'yuku 'ye 'e wlo -la -lɔ "yiɛ.

¹⁴ 'E guɔ -se 'e "kɛ -ye 'wa 'piɛ- -wɛ yle, -se 'e "kɛ -ye Lagɔ lale -anye "ku "nɔgɔ "me, Zezu Kli 'na 'tɔ "me -wɛ yle.

¹⁵ -Anye 'klekle, -anye 'gɔbhɔle- 'dlekukɛleɛ "me ne, -soɔ 'ye -a "kɛ -lɔ 'dle "pɔ. -Mɔ, 'a kɛ 'lelee -visɛ 'dle 'pɔ- ne, Lagɔ yi gbɔ "ne -a 'yi "me 'no.

¹⁶ Zaa, -dɛne -dee -a -ylɛ ne, -a -ya bhli "ɛ -gwe -bhele ne "yiɛ -se -a 'cɛ 'wli sɛ!

¹⁷ "Nowlia 'wanye, 'a didale- -ame Pɔle. 'A 'wolo- 'anye 'glɛme 'na 'nyakpa -wa -su 'wayi 'tee sɛgbɛɛ -ame ne "ku, -se 'a didaloa-

¹⁸ 'E -bhulɛle 'awɔ sɛne 'anye, "ne 'e bhulɛle -na zɛ -dɛme 'anye "yiɛ 'lugbutuɛ "me, sɛko -wɛ, 'nyakpa 'na -bedia -su 'wayi Klise 'na klowa 'na -gblenya 'nasɛ, -see Zezu Kli 'ye- 'kle klowa "klo -wɛ, 'wanɛɛ gbo "ne "klo -ko. "Ne 'wa "ne 'yɔbhɔ -gbɔ 'wa "kɛ 'ɔnɛɛ sɛ 'gbape.

¹⁹ 'Wa yi 'ce "kwlɛbhli, "naa- lilɛliɛ -noɔ -lɔ 'wanɛɛ Lagɔ yɔ. -Ɛ -le 'zu "ku -wɛ -noɔ -lɔ 'wanɛɛ 'ŋlumeɛ yɛ, "ne 'wa "tɛle- -lɔ dodo ne "ku 'na -li 'dle.

²⁰ -Mɔ, -anye, -anyɛɛ 'du "nɔgɔ "me yɛ -lɔ. -Anyɛɛ Fuɔnyɔ Anyinɛnyɔ Zezu Kli -ye -a -wo, "bhle 'ye 'ɔ "kɛ 'ce -lɔ 'bhale-.

²¹ "Ne 'ɔ "kɛ -lɔ -anyɛɛ ku -ɛ gbape -wɛ, 'ɔnɛɛ 'ŋlumeku -ɛ "ne "ku -wɛ "me zigbalea-. 'Ɔnɛɛ 'bhɛloɛ "yitɛ -ɛ gbɔ "ne 'ɔ zi -li 'klekle "ku -wɛ "me 'ye 'ɔ "kɛ -lɔ "ɛ -li -wɛ 'klekle nole-.